Ditiro tša Baapostola
26 Agaripa+ a re go Paulo: “O ka ipolelela.” Ke moka Paulo a otlolla seatla sa gagwe a re:
2 “Kgoši Agaripa, lehono ke thabile kudu ka ge ke eme pele ga gago gore ke ikemelele go dilo ka moka tšeo Bajuda ba ntatofatšago ka tšona.+ 3 Seo se nthabišago kudu ke gore wena o setsebi sa mekgwa ya Bajuda ka moka le ditaba tšeo ba sa kwanego ka tšona. Bjale ke kgopela gore o ntheetše o sa mphelele pelo.
4 “Batho ba gešo ba mo Jerusalema le Bajuda ka moka bao ke bego ke tlwaelane le bona ba a tseba gore ke be ke phela bjang go tloga ke sa le moswa.+ 5 Ge e ba ba rata ba be ba ka go botša gore ke be ke le Mofarasei,+ le gore Bafarasei ba tiiša letsogo ge go tliwa tabeng ya go latela molao go feta Bajuda.+ 6 Ke a sekišwa ka gobane ke dumela gore Modimo o tlo phethagatša seo a se tshepišitšego borakgolokhukhu ba rena.+ 7 Meloko e 12 ya Isiraele e šomela Modimo bošego le mosegare ka gobane e dumela gore Modimo o tlo phethagatša tshepišo yeo. Wena kgoši, Bajuda ba ntatofatša ka baka la yona taba ye.+
8 “Ke ka baka lang le sa dumele gore Modimo a ka tsoša bahu? 9 Le nna ka bonna ke be ke nagana gore ke selo se sebotse go ganetša motho yo mongwe le yo mongwe yo a bolelago ka leina la Jesu wa Monatsaretha. 10 Ke be ke dira sona seo Jerusalema. Ka ge baperisita ba bagolo+ ba be ba mphile maatla, ke ile ka swara barutiwa ba bantši ba Jesu ka ba iša dikgolegong+ ebile ke be ke thekga taba ya gore ba bolawe. 11 Ke be ke dula ke ba tlaiša disinagogeng gore ba feleletše ba hlanogetše ditumelo tša bona. Ka mokgwa wo ke bego ke ba galefetše ka gona, ke be ke tlaiša le barutiwa bao ba bego ba le metseng e mengwe.
12 “Baperisita ba bagolo ba be ba ntumeletše gore ke ye Damaseko gore ke yo tlaiša barutiwa. 13 Ge ke be ke le tseleng ya go ya moo, ke ile ka bona seetša seo se phadimago gare ga mpa ya mosegare. Wena kgoši, seetša seo se be se phadima go feta letšatši. Se be se etšwa legodimong, se ile sa dikologa nna le batho bao ke bego ke sepela le bona.+ 14 Ka moka ga rena re ile ra wela fase. Ke moka ka kwa lentšu le bolela le nna ka Seheberu le re: ‘Saulo, Saulo, o ntlaišetšang? O tlo ikgobatša ge o ka tšwela pele o ngangabala.’* 15 Ka re: ‘Mong wa ka, ke wena mang?’ Yena a re: ‘Ke nna Jesu yo o mo tlaišago. 16 Ema ka gobane ke go kgethile gore o be mohlanka wa ka le gore o tle o botše batho dilo tšeo o di bonego le tšeo ke tlago go go bontšha tšona mabapi le nna. Le ke lona lebaka leo ke iponagaditšego go wena.+ 17 Ke tla go phološa go Bajuda le go batho ba ditšhaba bao ke go romelago go bona.+ 18 Ke go roma gore o yo ba bula mahlo+ gore ba tloge leswiswing+ ba ye seetšeng,+ le gore ba lese go laolwa ke Sathane+ eupša ba laolwe ke Modimo. Ke moka Modimo o tla ba lebalela dibe tša bona,+ ebile o tla ba šegofatša a ba a dira gore e be ba bakgethwa ka gobane ba dumela go nna.’
19 “Bjale Kgoši Agaripa, ke ile ka dira dilo ka moka tšeo Jesu a mpoditšego tšona ponong yeo. 20 Ke ile ka thoma Damaseko,+ ge ke tloga ka ya Jerusalema+ gomme ka ya nageng ka moka ya Judea le go batho ba ditšhabeng tše dingwe. Ke be ke tšama ke botša batho gore ba itshole, ba hlankele Modimo ebile ba dire dilo tšeo di bontšhago gore ba itshotše.+ 21 Ke ka baka leo Bajuda ba ilego ba ntshwara ka tempeleng gomme ba leka go mpolaya.+ 22 Eupša ka ge Modimo a nthuša, le lehono ke sa tšwela pele ke nea bohlatse go batho ka moka, ba bagolo le ba banyenyane. Ke ba botša feela seo Molao wa Moshe le dipuku tša baporofeta di boletšego gore se tlo direga.+ 23 Di boletše gore Kriste o be a tlo tlaišega,+ le gore ka ge e le wa mathomo wa go tsošwa bahung+ o be a tlo botša Bajuda le batho ba ditšhaba ditaba tše dibotse le go ba tlišetša seetša.+
24 Bjale ge Paulo a sa dutše a bolela, Fesito o ile a goeletša a re: “O a gafa Paulo! O gafišwa ke gore o rutegile kudu!” 25 Eupša Paulo a re: “Mohlomphegi Fesito, ga ke gafe, ke no ba ke bolela nnete ebile dilo tšeo ke di bolelago di a kwagala. 26 Wena kgoši o tseba taba ye, ke ka baka leo ke bolelago le wena ke sa boife. Ke kgodišegile gore o tseba taba ye ka gobane ga se ya direga ka sephiring.+ 27 Kgoši Agaripa, na o dumela dilo tšeo di boletšwego ke baporofeta? Ke a tseba gore o a di dumela.” 28 Eupša Agaripa a re go Paulo: “E se kgale, o tla ba wa dira gore ke be Mokriste.” 29 Ke moka Paulo a re: “Ke rapela Modimo gore go sa šetšwe gore se se direga gona bjale goba ka morago ga nako e telele, wena le batho ka moka bao ba ntheeditšego lehono le be Bakriste go swana le nna. Eupša ga ke dume gore le golegwe go swana le nna.”
30 Kgoši e ile ya ema, ke moka mmuši Fesito, Berenike le batho ka moka bao ba bego ba dutše le bona, le bona ba ile ba ema. 31 Ge ba tloga moo ba ile ba boledišana ba re: “Motho yo ga a na molato, ga se a swanelwa ke go bolawa goba go išwa kgolegong.”+ 32 Agaripa o ile a re go Fesito: “Monna yo o be a tlo ba a lokolotšwe ge nkabe a se a iša molato wa gagwe go Kesara.”+