Ebangedi ya Mateo
25 “Mmušo wa magodimo o ka swantšhwa le dikgarebe tše lesome tše di tšerego mabone a tšona+ tša ya go gahlanetša monyadi.+ 2 Dikgarebe tše hlano e be e le ditlaela gomme tše hlano di le bohlale.*+ 3 Tša ditlaela di ile tša tšea mabone a tšona tša sepela eupša tša se tšee le makhura, 4 mola tše bohlale di ile tša tšea mabone a tšona le makhura ao a lego ka gare ga mapotlelo. 5 Ka ge monyadi a be a tšea nako, ka moka di ile tša swarwa ke boroko tša robala. 6 Gare ga bošego go ile gwa hlabja mokgoši wa gore: ‘Monyadi o fihlile! Etšwang le yo mo gahlanetša.’ 7 Ke moka dikgarebe tšeo ka moka tša tsoga tša lokiša mabone a tšona.+ 8 Dikgarebe tša ditlaela tša re go tše bohlale: ‘Re tšheleleng makhura ka gobane mabone a rena a kgauswi le go tima.’ 9 Tše bohlale tša araba ka gore: ‘Ge re ka le tšhelela, mohlomongwe a ka tla a se re lekane ka moka. Eyang le yo ithekela a lena go batho bao ba a rekišago.’ 10 Ge di eya go a reka, monyadi a šala a fihla. Dikgarebe tšeo di bego di itokišitše di ile tša tsena le yena monyanyeng wa lenyalo,+ ke moka lebati la tswalelwa. 11 Ka morago, dikgarebe tšela tše dingwe tše hlano le tšona tša tla, tša re, ‘Mohlomphegi, Mohlomphegi, re bulele!’+ 12 Yena ge a araba a re, ‘go le botša nnete, nna ga ke le tsebe.’
13 “Ka gona, dulang le phakgame,+ ka gobane ga le tsebe letšatši le nako.+
14 “Le gona Mmušo wa Modimo o swana le monna yo a lego kgauswi le go ya nageng ya kgole. Pele a tloga, o ile a bitša bahlanka ba gagwe gomme a ba fa dilo tša gagwe gore ba di hlokomele.+ 15 O ile a fa mohlanka yo mongwe ditalente* tše hlano tša silifera. Yo mongwe a mo fa tše pedi ke moka yo mongwe a mo fa e tee. O file yo mongwe le yo mongwe go ya ka bokgoni bja gagwe, ke moka a ya nageng ya kgole. 16 Ka yona nako yeo, yo a hweditšego ditalente tše hlano, o ile a sepela a ya go dira kgwebo ka tšona ke moka a hwetša tše dingwe tše hlano. 17 Yola a hweditšego ditalente tše pedi tša silifera, o ile a dira se se swanago ke moka le yena a hwetša tše dingwe tše pedi. 18 Eupša mohlanka yoo a hweditšego e tee feela o ile a sepela, a epa fase gomme a khutiša tšhelete ya mong wa gagwe ya silifera ka moo moleteng woo a o epilego.
19 “Ka morago ga nako e telele, mong wa bahlanka bao o ile a tla go tlo bona gore ba dirile eng ka tšhelete ya gagwe.+ 20 Ka gona, mohlanka yo a bego a hweditše ditalente tše hlano tša silifera, o ile a tliša ditalente tše dingwe tše hlano, a re: ‘Mong wa ka, o ntshwarišitše ditalente tše hlano. Bjale bona, ke hweditše ditalente tše dingwe gape tše hlano.’+ 21 Mong wa gagwe a re go yena: ‘O šomile wena mohlanka yo botse le yo a tshepegago! O tshepegile dilong tše dinyenyane. Ka gona ke tla go bea gore o hlokomele dilo tše dintši.+ Thaba le mong wa gago.’+ 22 Ke moka yo a bego a filwe ditalente tše pedi a tla a re: ‘Mong wa ka, o ntshwarišitše ditalente tše pedi. Bjale bona, ke hweditše tše dingwe tše pedi.’+ 23 Mong wa gagwe a re go yena: ‘O šomile wena mohlanka yo botse le yo a tshepegago! O tshepegile dilong tše dinyenyane. Ka gona ke tla go bea gore o hlokomele dilo tše dintši. Thaba le mong wa gago.’
24 “Mafelelong mohlanka yo a bego a hweditše talente e tee ya silifera a tla a re: ‘Mong wa ka, ke go tseba o le motho yo a nyakago dilo ka šiši. O buna moo o sego wa bjala ebile o kgoboketša mabele ao o sego wa a šomela.+ 25 Ka gona ke ile ka ikwa ke tšhoga gomme ka epa mmu ka khutiša talente ya gago moo. Bjale še yona! Ke e bušitše go wena.’ 26 Mong wa gagwe a re go yena: ‘Wena mohlanka yo mobe le wa sebodu, ge o re ke buna moo ke sego ka bjala gona ebile ke kgoboketša mabele ao ke sego ka a šomela, 27 gona ke ka baka la eng o se wa iša tšhelete ya ka pankeng gomme ka re ge ke boa, ka e hwetša e oketšegile?’
28 “Ke moka a re: ‘Mo tšeeleng talente yeo a e swerego le e nee yo a nago le ditalente tše lesome.+ 29 Ka gobane mang le mang yo a nago le se sengwe, o tla fiwa dilo tše dintši ebile o tla ba le dilo tše dintši le go feta. Eupša mang le mang yo a se nago selo, le seo a nago le sona o tla se tšeelwa.+ 30 Le lahlele mohlanka yoo a sa holego ka selo ka ntle leswiswing. O tla lla a ba a lomantšha meno* a le moo.’
31 “Ge Morwa wa motho+ a etla ka maatla a gagwe a bolaodi a na le barongwa ka moka,+ o tla dula setulong sa gagwe se segolo sa bogoši.* 32 Ditšhaba ka moka di tla kgobokanywa pele ga gagwe gomme o tla aroganya batho go etša ge modiši a aroganya dinku go dipudi. 33 O tla bea dinku+ ka letsogong la gagwe le letona, eupša dipudi a di bea ka go le letshadi.+
34 “Ke moka Kgoši e tla re go bao ba lego ka letsogong la yona le letona: ‘Etlang. Tate o le šegofaditše. Ejang bohwa bja Mmušo wo le o lokišeditšwego go tloga ge batho ba thoma go ba gona. 35 Ka gobane ke be ke swerwe ke tlala la mpha dijo. Ke be ke swerwe ke lenyora la mpha meetse. Le be le sa ntsebe eupša la nkamogela magaeng a lena.+ 36 Ke be ke se ka apara* gomme la nkapeša.+ Ke ile ka lwala, la ntlhokomela. Ke ile ka išwa kgolegong gomme la nketela.’+ 37 Ke moka baloki ba tla mo araba ba re: ‘Morena, ke neng moo re go bonego o swerwe ke tlala ra go fa dijo, goba ke neng moo re go bonego o swerwe ke lenyora ra go fa meetse?+ 38 Ke neng mo re bego re sa go tsebe eupša ra go amogela, goba ke neng moo re ilego ra go bona o se wa apara gomme ra go apeša? 39 Ke neng mo re ilego ra go bona o lwala goba ke neng moo re ilego ra go etela o le kgolegong?’ 40 Ke moka Kgoši e tla ba araba ya re: ‘Ruri ke le botša gore nako le nako ge le be le thuša yo mongwe wa ba banyenyane ba, bao e lego banabešo, go no swana le ge le be le thuša nna.’+
41 “Ke moka, o tla re go bao ba lego ka letsogong la gagwe le letshadi, ‘tlogang go nna+ lena bao Modimo a le ahlotšego. Eyang mollong o sa felego+ wo o lokišeditšwego Diabolo le barongwa ba gagwe,+ 42 ka gobane ke be ke swerwe ke tlala eupša la se mphe dijo. Le gona ke be ke swerwe ke lenyora, la se mphe meetse. 43 Le be le sa ntsebe, la se nkamogele magaeng a lena. Ke be ke se ka apara, la se nkapeše, ke lwala ebile ke le kgolegong eupša la se ntlhokomele.’ 44 Ke moka le bona ba tla araba ba re: ‘Morena, ke neng mo re ilego ra go bona o swerwe ke tlala goba o swerwe ke lenyora goba re sa go tsebe ebile o se na mo o dulago gona, goba o se wa apara goba o lwala goba o le kgolegong gomme ra se go thuše?’ 45 Ke moka o tla ba araba a re: ‘Ruri ke le botša gore nako le nako ge le be le sa thuše yo mongwe wa ba banyenyane ba, go no swana le ge le nna le be le sa nthuše.’+ 46 Bona ba, ba tla fedišetšwa sa ruri,+ eupša baloki ba tla phela go ya go ile.”+