Petro wa Pele
4 Ka ge Kriste a ile a tlaišega ge a be a phela mo lefaseng,+ le lena itokišeng gore le tle le nagane go swana le Kriste, ka gobane motho yo a tlaišitšwego o tlogetše go dira dibe,+ 2 e le gore nakong ka moka ya ge e le motho a dire dilo tšeo Modimo a di ratago,+ e sego tšeo di ratwago ke batho.+ 3 Nakong e fetilego le feditše nako e ntši le dira dilo tšeo di ratwago ke batho ba lefase le.+ Le be le itshwere gampe le sa jewe ke dihlong,* le kganyoga go dira dilo tše mpe, le enwa ka mo go feteletšego, le dira menyanya ya go se laolege, le kgobokana gore le nwe kudu, ebile le rapela medimo ya diswantšho yeo e šišimišago.+ 4 Ba makatšwa ke ge le sa tšwele pele le dira dilo tše mpe tšeo ba di dirago, ka gona ba bolela gampe ka lena.+ 5 Eupša batho ba ba tla ikarabela go Kriste yo a tlago go ahlola bao ba phelago le bao ba hwilego.+ 6 Ge e le gabotse, ke ka lona lebaka le ditaba tše dibotse di ilego tša bolelwa le go bao ba hwilego,*+ e le gore le ge ba ahlolwa ka tsela yeo batho ba ahlolwago ka yona, ba ka phela ba hlahlwa ke moya wa Modimo.
7 Eupša bofelo bja dilo ka moka bo batametše. Ka gona bontšhang gore le nagana gabotse,+ gomme le se ke la lebala go rapela.+ 8 Sa bohlokwa kudu ke gore le rataneng ka dipelo tša lena ka moka,+ ka gobane motho yo a ratago ba bangwe o dula a ikemišeditše go ba lebalela.*+ 9 Amogelanang le sa ngunangune.+ 10 Yo mongwe le yo mongwe wa lena o hweditše mpho, ka gona e dirišeng gore le thušane ka ge le le bahlanka bao ba thušago batho ba bangwe gore ba holwe ke botho bjo bogolo bja Modimo bjo bo bontšhwago ka ditsela tše di sa swanego.+ 11 Ge e ba motho a na le bokgoni bja go bolela, a a bolele ka tsela yeo e tlago go bontšha gabotse gore o bolela molaetša wo o tšwago go Modimo. Ge e ba motho a thuša ba bangwe, o swanetše go ithekga ka maatla ao Modimo a mo neago ona,+ e le gore dilo tše ka moka di dirwe gore go tumišwe+ Modimo ka Jesu Kriste. Modimo o tla dula a na le letago le maatla go ya go ile. Amene.
12 Banabešo le dikgaetšedi ba ba rategago, le se ke la makatšwa ke diteko tše kgolo tšeo di le welago,+ bjalo ka ge eka le diragalelwa ke selo seo se sa tlwaelegago. 13 Eupša tšwelang pele le thabile+ ka ge le tlaišwa ka tsela yeo Kriste a tlaišitšwego ka yona,+ e le gore le tle le thabe kudu nakong ya ge letago la gagwe le utollwa.+ 14 Thabang ge batho ba bolela gampe ka lena ka baka la leina la Kriste,+ ka gobane seo se bontšha gore le na le moya wa letago, e lego wona moya wa Modimo.
15 Eupša mo go lena go se be le motho yo a tlaišegago ka baka la ge e le mmolai goba e le lehodu goba a dira dilo tše mpe goba e le mpheane ditabeng tša batho.+ 16 Eupša ge e ba motho le ge e le ofe a tlaišega ka baka la ge e le Mokriste, a se ke a hlabja ke dihlong,+ eupša a a tšwele pele a reta Modimo ebile a phela ka tsela yeo e bontšhago gore ke Mokriste. 17 Bjale ye ke nako e beilwego ya gore kahlolo e thome ka batho bao ba lego ka ntlong ya Modimo.+ Bjale ge e ba e thoma ka rena,+ go tlo diregang ka bao ba ganago go theetša ditaba tše dibotse tša Modimo?+ 18 “Ge e ba motho yo a lokilego a swanetše go šoma ka thata gore Modimo a mo phološe, gona go tlo diregang ka motho yo a sa boifego Modimo gotee le modiradibe?”+ 19 Ka gona anke bao ba tlaišegago ka baka la ge ba dira seo Modimo a se nyakago ba tšwele pele ba dira dilo tše dibotse, ba be ba ipee ka diatleng tša Mmopi yo a tshepegago.+