Botona le Botshadi

Tlhaloso: Ditho tša dibopiwa tša lefase tšeo di dirago e le tsela ya go belega bana yeo e dirišwago ke batswadi ba babedi bao ba kopanago. Go se swane ga setho sa botona le sa botshadi go na le mafelelo a holago kudu bophelong bja motho. Ka ge Modimo e le yena Mothopo wa bophelo gomme ka ge batho ba dirilwe gore ba bonagatše dika tša gagwe, gona matla a go fetišetša bophelo ka dikopano tša botona le botshadi a swanetše go swarwa ka tlhompho e kgolo.

Na Beibele e ruta gore dikopano tša botona le botshadi ke tša sebe?

Gen. 1:28: “Modimo a ba [Adama le Efa] šexofatša, a bolêla le bôna a re: Tswalang Le atê, tlalang lefase.” (Go phetha taelo ye ya Modimo go be go tla nyaka gore ba be le dikopano tša botona le botshadi, na go be go ka se be bjalo? Go dira bjalo e be e ka se ke ya ba sebe, eupja e be e tla ba go dumelelana le morero wa Modimo wa go tlatša lefase ka batho. Batho ba bangwe ba nagana gore ‘dienywa tše di bego di ileditšwe’ kua Edene mo gongwe e be e le seka sa polelo ge e le ka go thibela ga Modimo goba gaešita le go iletša dikopano tša botona le botshadi go Adama le Efa. Eupja seo se ganetšana le taelo ya Modimo e tsopotšwego ka mo godimo. Le gona se ganetšana le therešo ya gore gaešita lege Adama le Efa ba ile ba ja dienywa tše di bego di ileditšwe kua Edene, fela go bolelwa ga pele ga go kopana ga bona ka botona le botshadi e bile feela ka morago ga ge ba lelekilwe go yona.—Gen. 2:17; 3:17, 23; 4:1.)

Gen. 9:1: “Modimo a šexofatša Noaxe le barwa ba xaxwe, a bolêla le bôná a re: Atang, Le bê ba bantši, Le tlalê lefase.” (Tšhegofatšo ye ye nngwe gotee le go bolelwa gape ga taelo ya Modimo ya gore ba be le bana ba bantši, e ile ya newa ka morago ga Meetse-fula a lefase a mehleng ya Noage. Kgopolo ya Modimo malebana le dikopano tša botona le botshadi tše e lego tša tshwanelo ga se ya fetoga.)

1 Ba-Kor. 7:2-5: “Xore xo efoxwê bootswa, [ruri] e mongwê le e mongwê a bê le mosadi wa xaxwe; mosadi e mongwê le e mongwê a bê le monna wa xaxwe. . . . Le se kê la hlôkana, xe e se ka xo kwana ka mabaka . . . xore Sathane a se kê a Le leka ka xe Le sa kxone xo ithswara.” (Seo e lego sa phošo se bontšhwa e le bootswa, e sego dikopano tša botona le botshadi tša tshwanelo tše di dirwago magareng ga monna le mosadi.)

Na dikopano tša botona le botshadi tša pele ga lenyalo ke tša phošo?

1 Ba-Thes. 4:3-8: “Se Modimo a se rataxo ké . . . xore Le ilê bootswa. Mang le mang e lexo wa lena a tsebê mosadi e lexo wa xaxwe ka mokxwa wa kxêthêxô le wa xo mo xodiša; a e se bê ka phišêxô le kxanyoxô bo-ka ba-ntlê ba ba sa tsebexo Modimo. Mo xo tše Le di diraxo xo se kê xwa ba xo jana le xo forana; xobane [Jehofa] ké Molefetši wa dilô tše byalo ka moka. Ké tše re Le boditšexo kxalê ra tiiša xo Le hlatsêla tšôna. Xobane se Modimo a re bileditšexo sôna xa se dithšila, ké kxêthêxô. Ké xôna, mo-nyatša-motho ó nyatša Modimo, e a Le neilexo Môya wa xaxwe wa ba mo xo lena.” (Lentšu la Segerika la por·neiʹa, le le fetoletšwego “bootswa,” le bolela kopano ya botona le botshadi magareng ga batho ba babedi bao ba se ba nyalago le go nyalwa, le gona le bolela dikopano tše di oketšago tša botona le botshadi ka lehlakoreng la batho ba ba nyetšego le go nyalwa.)

Ba-Ef. 5:5: “Le fêlê Le tseba xore, e ka ba seotswa, le xe e le wa dithšila, xoba wa mexabaru—xobane wa mexabaru ó dirêla medimo e šele—bohle bao xa ba na kabêlô mmušong wa Kriste le wa Modimo.” (Se ga se bolele gore motho lege e le ofe yo nakong e fetilego e bego e le seotswa a ka se ke a thabela ditšhegofatšo tša Mmušo wa Modimo, eupja o swanetše gore a furalele tsela yeo ya bophelo e le gore a tle a amogelwe ke Modimo. Bona 1 Ba-Korinthe 6:9-11.)

Na Beibele e dumelela go dula gotee ga monna le mosadi ka ntle le lenyalo le le ngwadišitšwego?

Bona matlakala 254-256, tlase ga hlogo ya ditaba ya “Lenyalo.”

Beibele e bolela’ng ka bosodoma?

Ba-Roma 1:24-27: “Modimo a bá a ba lesa ba ya le dikxanyoxô tša dipelo tša bôná, ba tsêna dithšileng ba ikxoboša mebele. . . . Modimo a ba xafa ba ya le ditumô tše di lešaxo dihlong; basadi ba bôná ba tloxêla modirêlô wo ba o bopetšwexo, ba tšea modirêlô wo ba sa kaxo ba bopêlwa wôna. Banna ba tla ba tloxêla modirêlô wo ba o bopetšwexo wa xo dula le mosadi, ba fišêxêlana monna à duma monna, ba dira tša dihlong; xomme kôtlô ya phapoxô ba e bôna mebeleng ya bôná.”

1 Tim. 1:9-11: “Molaô xa o a beêlwa moloki, xe o beetšwe ba ba senyaxo Molaô, le ba ba xanaxo xo kwa, ba xo se boife Modimo, le ba-dira-dibe le bakxôpô, . . . le ba diotswa, le ba xo senya bašemane, . . . le ba xo xanana le thutô-thutô. Re di tseba ka Ebangedi ya letaxô la Modimo wa mahlôxônôlô.” (Bapiša le Lefitiko 20:13.)

Juda 7: “Sodoma le Gomora le metse ya mathokô ao, ye e . . . [latetšego] nama e šele, e dula e beetšwe xo swanthšetša batho kôtlô ya mollô wo o sa timexo.” (Leina Sodoma ke leo e lego modu wa leina “bosodoma,” leo gantši le bolelago mokgwa wa bosodoma. Bapiša le Genesi 19:4, 5, 24, 25.)

Maikwelo a Bakriste ba therešo ke afe malebana le batho bao ba nago le histori ya bosodoma?

1 Ba-Kor. 6:9-11: “Ba diotswa, le ba medimo e šele, le bahladi, le dihlôtlôlô, le ba xo dira dithšila le banna ka bôná, . . . Ba ba byalo xa ba na kabêlô mmušong wa Modimo. Ba bangwê ba lena e be e le ba ba byalo. Fêla, Le hlatswitšwe, Le kxethexile, Le lokafaditšwe, ka Leina la Morêna Jesu le ka Môya wa Modimo wa rena.” (Go sa šetšwe setlogo se se bjalo, ruri ge e ba batho mo nakong ye ba lahla mekgwa ya bona ya pele ya ditšhila, ba diriša melao ya Jehofa ya go loka gomme ba dumela tokišetšong ya gagwe ya go lebalela dibe ka Kriste, gona ba tla thabela boemo bjo bo sekilego pele ga Modimo. Ka morago ga ge ba fetogile, gona mo gongwe ba ka amogelwa ka phuthegong ya Bokriste.)

Bakriste ba therešo ba tseba gore gaešita le ka dikganyogo tše di nweletšego tše mpe tšeo di akaretšago tšeo mo gongwe di ka bago di hweditšwe ka mokgwa wa leabela, goba tšeo di akaretšago mabaka a tlhago goba maemo a tikologo ruri ga se tšeo di lego thata go ka lokišwa ke batho bao ba ratago e le ka kgonthe go kgahliša Jehofa. Batho ba bangwe ka tlhago ke bao ba befelwago gatee-tee. Mo gongwe nakong e fetilego ba ka ba ba ile ba itahlela pefelong; eupja go tseba thato ya Modimo, kganyogo ya go kganyoga go mo kgahliša le thušo ya moya wa gagwe di ba dirile gore ba tšweletše boitshwaro. Motho mo gongwe e ka ba lekgoba la dino tše di tagago, eupja ka go tutuetšwa ka tshwanelo ruri a ka lesa go nwa gomme a široga go ba letagwa. Ka mokgwa o swanago, motho mo gongwe a ka kwa a kgahlišwa kudu ke batho ba bangwe bao e lego ba botona goba botshadi bjo bo swanago le bja gagwe, eupja ka go kwa keletšo ya Lentšu la Modimo a ka dula e le yo a hlwekilego medirong ya bosodoma. (Bona Ba-Efeso 4:17-24.) Jehofa ga a re dumelele gore re dule re nagana gore boitshwaro bjo bobe ruri ga se bjo bo se nago molato; o re lemoša ka botho eupja e le ka go tia mabapi le mafelelo ao a ka tlišwago ke bjona, gomme o nea thušo e ntši go bao ba ratago go ‘apola motho e motala le ditiro tša gagwe, gomme ba ikapeša ka motho e mofsa.’—Ba-Kol. 3:9, 10.

Na kgopolo ya Beibele mabapi le botona le botshadi mo gongwe e ka ba e le yeo e feletšwego ke nako, goba e le yeo e thibelago ka mo go sa nyakegego?

1 Ba-Thes. 4:3-8: “Se Modimo a se rataxo ke . . . xore Le ilê bootswa. . . . Ké xôna, mo-nyatša-motho ó nyatša Modimo, e a Le neilexo Môya wa xaxwe wa ba mo xo lena.” (Kgopolo ya Beibele mabapi le botona le botshadi ga se feela selo seo se bego se tšweleditšwe ke batho ba itšego bao ba phetšego ka nywaga e mentši e fetilego. E tšwa go Mmopi wa batho; e bontšha molaleng seo se nyakegago e le gore go hwetšwe kamogelo ya gagwe; le gona e nea tlhahlo yeo e thušago go dira malapa gore e be a tiilego le ao a kgahlišago gotee le go ba le ditswalano tše di thabišago le bao e sego ba lapa. Bao ba dirišago keletšo ye ba itšhireletša malebana le go kwa bohloko mo go tsenago pelong gotee le malwetši a ditšhila ao a tlišwago ke boitshwaro bjo bo gobogilego. Keletšo ya Beibele ke yeo e lego nakong kudu mabapi le go thuša batho bao ba ratago go ba le matswalo a sekilego pele ga Modimo le go ba le bophelo bjo bo hunologilego tlalelong yeo e hlokišago lethabo.)

Ge e ba o Mongwe a Bolela Gore

‘Maikwelo a gago ke afe malebana le bosodoma?’

Mo gongwe o ka araba ka gore: ‘Ke kgopolo yeo e bolelwago mo ka Beibeleng. Ke dumela gore seo e se bolelago ke sa bohlokwa kudu go phala kgopolo lege e le efe ya motho, ka gobane yona e re nea megopolo ya Mmopi wa motho. (1 Ba-Kor. 6:9-11) O tla lemoga gore ba bangwe ba batho ba bao ba fetogilego Bakriste, ba kile ba ba bao ba dirago bosodoma. Eupja ka baka la lerato la bona la go rata Modimo le ka thušo ya moya wa gagwe, ruri ba fetogile.’

Goba o ka re: ‘Go araba se, mo gongwe nka bolela gore ke hlokometše gore batho ba bantši bao ba bonago gore ga go na kgobogo yeo e swanetšego go kgomaganywa le bophelo bja bosodoma, ruri ga ba dumele gore Beibele ke Lentšu la Modimo. Na nka go botšiša kamoo o lebelelago Beibele ka gona?’ Ge e ba motho a bolela gore o dumela Beibele, gona mo gongwe o ka oketša ka gore: ‘Bosodoma ga se taba e mpsha. Beibele e bolela kgopolo ya Jehofa Modimo e sa fetogego ka polelo e kwalago kudu. (Mo gongwe o ka diriša taba e lego matlakaleng 132, 133.)’ Ge e ba motho a belaela mabapi le go ba gona ga Modimo goba a belaela Beibele, gona mo gongwe o ka re: ‘Ge e ba go be go se na Modimo, ruri go molaleng gore re be re ka se ke ra ikarabela go yena gomme re be re tla iphelela ka tsela yeo re e ratago. Ka gona, potšišo e lego gona ke ya gore, Na go na le Modimo gomme na ke mo kolota go ba gona ga-ka [mo gongwe le gore, Na Beibele ruri e buduletšwe ke Modimo]? (Diriša dintlha tše di tšwago matlakaleng 332-338 goba 52-62.)’