May

Ka morago ga gore Jehofa a lokolle batho ba gagwe bokgobeng kua Egepeta, o ile a kgetha baperisita gore ba hlankele taberenakeleng. Balefi ba be ba abetšwe gore ba dire dikabelo tše dingwe tenteng e kgethwa. Na Jehofa o be a hlokomela batho bao ba bego ba hlankela taberenakeleng goba bao ba bego ba dula kgauswi le yona go feta kamoo a bego a hlokomela ba bangwe? Aowa! Jehofa ga a kgetholle. Baisiraele ka moka ba be ba thabela go ba bagwera ba Jehofa. Ka mohlala, Jehofa o ile a kgonthišetša gore setšhaba ka moka se be se kgona go bona leru le mollo wo o bego o le godimo ga taberenakele. (Ek. 40:38) Ge leru le be le tloga, batho bao ba bego ba dula kgole le taberenakele ba be ba kgona go le bona ke moka ba kgobokanya dilo tša bona, ba hlahlamolla ditente gomme ba sepela le setšhaba. (Num. 9:​15-23) Le lehono re ka kgona go ba ka tenteng ya Jehofa go sa šetšwe gore re dula kae. w24.06 4 ¶10-12

Bophelo bja Dafida bo be bo le kotsing. Morwa wa gagwe Abesalomo o be a ikemišeditše go mo tšeela bogoši. (2 Sam. 15:​12, 13) Dafida o ile a swanelwa ke go tloga Jerusalema ka ponyo ya leihlo! Ge bahlanka ba gagwe ba dutše ba tšhaba, Dafida o ile a lemoga gore go na le motho yo a swanetšego go šala gore a kgone go ba botša dilo tšeo Abesalomo a naganago go di dira. Ka gona, o ile a re Tsadoko le baperisita ba bangwe ba šale motseng gore ba hlankele bjalo ka dihlodi. (2 Sam. 15:​27-29) Ba be ba swanetše go ntšha mahlo dinameng. Dafida o ile a kgopela Tsadoko le mogwera wa gagwe yo a botegago e lego Hushai gore ba mo thuše go loga leano. (2 Sam. 15:​32-37) Hushai o ile a itira eka o thekga Abesalomo ke moka a mo nea keletšo ya kamoo ba ka hlaselago Dafida ka gona, gomme seo sa dira gore Dafida a hwetše nako ya go tlo hlasela Abesalomo. Ka morago, Hushai o ile a botša Tsadoko le Abiathara ka leano la Abesalomo. (2 Sam. 17:​8-16) Banna bao ba ile ba kgona go romela molaetša go Dafida gore ba šireletše bophelo bja gagwe.—2 Sam. 17:​21, 22. w24.07 4-5 ¶9-10

Bahlanka ba bangwe ba Jehofa ba a itshola ka baka la diphošo tšeo ba di dirilego nakong e fetilego, e ka ba pele goba ka morago ga ge ba kolobeditšwe. Eupša go bohlokwa go gopola gore Jehofa o re neile topollo ka ge a re rata kudu. Ruri o nyaka gore re amogele mpho yeo a re neilego yona. Jehofa o re kgonthišetša gore ka morago ga gore re ‘lokiše ditaba’ le yena, o lebala dibe tšeo re di dirilego. Jehofa o tloga a re bontšha gore o a re rata ka go lebala dibe tša rena! Le gona go a thabiša go tseba gore ga a lebale dilo tše dibotse tšeo re di dirago. (Ps. 103:​9, 12; Baheb. 6:10) Ge e ba o fela o tshwenywa ke go nagana ka diphošo tšeo o di dirilego nakong e fetilego, dira sohle seo o ka se kgonago gore o nagane ka dilo tše dibotse tšeo di diregago gona bjale le tšeo di tlo diregago nakong e tlago. O ka se kgone go fetoša diphošo tšeo o di dirilego nakong e fetilego. Eupša o ka tumiša Jehofa ka dilo tšeo o di dirago gona bjale le go naganišiša ka dilo tšeo a tshepišitšego go di dira nakong e tlago. w24.10 8 ¶8-9

Ka dinako tše dingwe o ka ikwa o imelwa ge o bala Beibele gomme o hwetša go na le dilo tšeo o swanetšego go šomela go tšona. Nagana ka boemo bjo: Ka letšatši le lengwe ge o bala Beibele o hwetša e bolela ka taba ya go kgetholla. (Jak. 2:​1-8) O a bona gore o ka kaonefatša tseleng yeo o swarago batho ba bangwe ka yona ke moka o leka go dira diphetogo. Ke moka ge o bala gape o hwetša karolo yeo e bolelago ka bohlokwa bja go boledišana le batho ba bangwe gabotse. (Jak. 3:​1-12) O lemoga gore o fela o sa boledišane le batho gabotse, ke moka o ikemišetša go thoma go bolela dilo tšeo di agago. Letšatši le le latelago o hwetša karolo yeo o e balago e bolela ka go kgetha boithabišo. (Jak. 4:​4-12) O a bona gore o swanetše gore o kaonefatše tsela yeo o kgethago boithabišo ka yona. Ka morago o hwetša o imetšwe ke dilo tšeo o swanetšego gore o kaonefatše go tšona. O se ke wa nyama ge eba go na le dilo tšeo o swanetšego go kaonefatša go tšona. re swanetše go dula re e ba ‘batho ba baswa.’ w24.09 5-6 ¶11-12

Jesu o be a tseba gore tsela yeo Jehofa a lebelelago dilo ka yona, e bohlokwa kudu. O be a tseba gore Jehofa o tla mo thuša ka nako ya maleba. Ge motho yo mongwe a sa re sware gabotse, re ka ekiša Jesu ka go hlokomela dilo tšeo re di bolelago. Ka dinako tše dingwe go ka no nyakega gore re se ke ra bolela selo ka ge taba yeo e se e kgolo. Goba re ka no kgetha go homola gore re se senye ditaba le go feta. (Mmo. 3:7; Jak. 1:​19, 20) Ka dinako tše dingwe re ka no swanelwa ke go bolela gore re ikemelele goba re emele ditumelo tša rena. (Dit. 6:​1, 2) Ge e ba re bolela, re swanetše go dira sohle seo re ka se kgonago gore re dule re išitše maswafo fase le go bontšha tlhompho. Re ka ekiša Jesu ka go “ikgafela Yo a ahlolago ka go loka.”—1 Pet. 2:23. w24.11 5-6 ¶10-12

Ge motho yo a dirilego sebe se segolo a itshola, re thaba kudu. (Luka 15:7) Le ge bagolo e le bona ba kopanago le motho yoo, ge e le gabotse ke mang a dirago gore a itshole? Gopola gore moapostola Paulo o ile a re’ng ge a be a bolela ka batho bao ba dirilego dibe tše dikgolo. O ile a re: “Mohlomongwe Modimo a ka ba dira gore ba fetoše dipelo tša bona.” (2 Tim. 2:25) Jehofa ke yena a thušago motho gore a fetoge e sego bagolo. Paulo o re botša gore ge motho a itshola, o thoma go kwešiša nnete ya ka Beibeleng gabotse, a nagana gabotse e bile a phonyokga gore Sathane a se ke a mo tanya. (2 Tim. 2:26) Ge motho yo a dirilego sebe se segolo a itshola, komiti e tlo rulaganya gore a hwetše maeto a bodiši gore ba mo thuše gore Sathane a se ke a mo tanya gape le gore a lokiše segwera sa gagwe le Jehofa.—Baheb. 12:​12, 13. w24.08 23 ¶14-15

Lešaba leo Jesu a le fepilego le be le tshwenyegile ka dijo le go ikgotsofatša feela. Le bontšhitše bjang seo? Letšatši le le latelago, lešaba leo le ile la bona gore Jesu le baapostola ba gagwe ba sepetše. Lešaba le ile la namela dikepe tšeo di bego di etšwa Tiberiase, gomme la leba Kaperenaume gore le yo hwetša Jesu. (Joh. 6:​22-24) Na ba ile ba mo šala morago gore ba ithute ka Mmušo wa Modimo? Aowa. Ba be ba no inyakela senkgwa. Ke ka baka la’ng re realo? Nagana ka seo se diregilego ge lešaba leo le kopana le Jesu kgauswi le Kaperenaume. Jesu o ba boditše gore ba tlile go yena ka gobane ba nyaka dijo. O ba boditše gore ba tlile go yena ka ge ba be ba jele ‘dinkgwa ebile ba khoše’ e le go “dijo tše di senyegago.” O ile a ba botša gore ba šomele “dijo tše di dulago go iša bophelong bjo bo sa felego.” (Joh. 6:​26, 27) Jesu o ile a ba botša gore Jehofa ke yena a tla ba neago dijo tša mohuta woo. w24.12 5 ¶8-9

Ge o nyaka go ba le bokgoni bja go ruta, ithekge ka Lentšu la Modimo ge o ruta phatlalatša le ge o nea keletšo. Bala Beibele le dikgatišo tša rena ka mehla. (Die. 15:28) Ge o dutše o ithuta, bona kamoo o ka dirišago keletšo ya Mangwalo ka gona. Ge o ruta, leka go fihlelela dipelo tša bao ba go theeditšego. O ka kgona go ba morutiši yo mokaone ge o ka kgopela bagolo ba bangwe gore ba go thuše le go go nea keletšo. (1 Tim. 5:17) Bagolo ba swanetše gore ba kgothatše bana babo bona le dikgaetšedi e bile ka dinako tše dingwe ba swanetše gore ba eletše le go ba kgala. Ka mehla bagolo ba swanetše go dula ba le botho. Ge e ba o le botho e bile o na le lerato le go ithekga ka Lentšu la Modimo ge o ruta, o tlo kgona go ruta gabotse ka gobane o tla be o ekiša Morutiši yo Mogolo e lego Jesu.—Mat. 11:​28-30; 2 Tim. 2:24. w24.11 24 ¶16

Re ka fa Jehofa letago ka seo re se bolelago ka yena. Bahlanka ba Jehofa ba kgothaletšwa gore ba ‘opelele Jehofa,’ ba “rete leina la gagwe,” ba “bolele ditaba tše dibotse tša kamoo a phološago batho,” le gore ba “[tsebiše] ditšhaba gore o na le matla a magolo.” (Ps. 96:​1-3) Ge re dira dilo tše ka moka re tla ba re efa Tatago rena wa legodimong letago. (Dit. 4:29) Re ka fa Jehofa letago ka go neelana ka dilo tšeo re nago le tšona. Ke kgale bahlanka ba Jehofa ba mo tumiša ka tsela yeo. (Die. 3:9) Ka mohlala, Baisiraele ba ile ba ntšha meneelo gore go agwe le go hlokomela tempele. (2 Dikg. 12:​4, 5; 1 Dikor. 29:​3-9) Balatedi ba bangwe ba Kriste ba be ba neelana “ka dilo tša bona” gore yena le baapostola ba kgone go ba le dilo tšeo ba di hlokago. (Luka 8:​1-3) Bakriste ba lekgolong la pele la mengwaga le bona ba ile ba ntšha meneelo gore ba kgone go thuša bana babo bona le dikgaetšedi. (Dit. 11:​27-29) Lehono, le rena re ka fa Jehofa letago ka go ntšha meneelo. w25.01 4 ¶8; 5 ¶11

Koronelio o thušitšwe ke’ng gore a kolobetšwe? Re bala gore “e be e le monna wa borapedi le yo a boifago Modimo. Bohle ba ntlo ya gagwe le bona ba be ba le bjalo.” Koronelio o be a dula a lopa Modimo ka dinako tšohle. (Dit. 10:2) Ka morago ga gore Petro a botše Koronelio ditaba tše dibotse, yena le lapa la gagwe ba ile ba kolobetšwa ka ponyo ya leihlo. (Dit. 10:​47, 48) Ga go pelaelo gore Koronelio o be a ikemišeditše go fetoša bophelo bja gagwe gore a kgone go hlankela Jehofa a na le lapa la gagwe. (Josh. 24:15; Dit. 10:​24, 33) Koronelio o be a na le maemo, eupša ga se a ka a dumelela maemo ao a mo šitiša go ba Mokriste. Na go na le diphethogo tše dikgolo tšeo o swanetšego go di dira bophelong bja gago gore o kgone go kolobetšwa? Ge e ba go le bjalo, Jehofa o tlo go thuša. O tlo go šegofatša ge e ba o ikemišeditše go diriša melao ya motheo ya Beibele bophelong bja gago gore o kgone go mo hlankela. w25.03 5 ¶12-13

Ge o ka kwa dipego tša maaka ka mokgatlo wa Modimo goba bana babo rena bao ba etelelago pele, gopola gore manaba a Modimo a ile a swara bjang Jesu le barutiwa ba lekgolong la pele la mengwaga. Lehono batho ba Modimo ba a tlaišwa le go senywa maina go etša ge Beibele e boletše e sa le pele. (Mat. 5:​11, 12) Re ka se tshepe ditaba tša maaka ge e ba re ka tseba gore di tšwa kae gomme ra dira se sengwe ka pelapela gore re itšhireletše. Re ka itšhireletša bjang? Gana dipego tša maaka. Moapostola Paulo o ile a re botša ka go lebanya gore re swanetše go dira’ng ge re ekwa dipego tša maaka. O ile a botša Timotheo gore “o laele ba bangwe gore ba se [ke ba]. . . ela hloko dikanegelo tša maaka” le gore ba “[gane] dikanegelo tša maaka tšeo di senyago.” (1 Tim. 1:​3, 4) Re gana dipego tša maaka ka gobane re a tseba gore di tšwa go Sathane. Go ena le moo, re theetša “mantšu a phedišago” a therešo.—2 Tim. 1:13. w24.04 11 ¶16; 13 ¶17

E bang ngatana e tee le batho bao ba botegelago Jehofa. Modimo o nyaka gore re mo hlankele re le ngatana e tee. Re tlo dula re le ngatana e tee ge e ba re ngaparela therešo. Modimo o re botša gore re “pheme” go gwerana le batho bao ba bolelago maaka goba bao ba phatlalatšago mabarebare ka phuthegong. Ge re ka se hlokomele re ka tshepa maaka ao gomme ra se sa botegela Jehofa. (Baroma 16:17) Ge re ka kgona go tseba phapano magareng ga nnete le maaka gomme ra dula re rata nnete yeo, re tlo dula re le bagwera ba Jehofa le go ba le tumelo e tiilego. (Baef. 4:​15, 16) Re tlo dula re šireletšegile go maaka ao Sathane a a phatlalatšago e bile Modimo o tlo re šireletša nakong ya masetlapelo a magolo. Dulang le swareletše therešo ka go tia, “Modimo wa khutšo o tla le šegofatša.”—Bafil. 4:​8, 9. w24.07 13 ¶16-17

Jesu o be a tshwenyegile ka batho bao ba bego ba imelwa ke sebe ke moka a ba mema gore e be balatedi ba gagwe. O be a tseba gore batho ba tlaišega ka baka la sebe. O ile a gwerana le batho bao ba bego ba tsebja e le badiradibe. O ile a diriša papišo e nngwe go hlalosa gore: “Batho ba ba phetšego gabotse ga ba nyake ngaka, eupša ba babjago ba a e nyaka.” A oketša ka gore: “Ke tletše go bitša badiradibe, e sego baloki.” (Mat. 9:​12, 13) Jesu o ile a dira sona seo. O ile a lebalela mosadi yo a ilego a kolobiša dinao tša gagwe ka megokgo a ba a bolela le yena ka botho. (Luka 7:​37-50) O ile a ruta mosadi wa Mosamaria ditherešo tše bohlokwa ba le sedibeng le ge a be a tseba gore mosadi yoo o dula le monna yo a sego a nyalana le yena. (Joh. 4:​7, 17-19, 25, 26) Modimo o ile a nea Jesu le matla a go tsoša bahu. O ile a tsoša banna, basadi le bana.—Mat. 11:5. w24.08 4 ¶9-10

Jehofa o tlo tagafatša bjang leina la gagwe e se kgale? Ka go ahlola gabotse. Go se kgale o tlo fediša Babilona o Mogolo ka gobane o tsentše leina la gagwe ka gare ga maraga. (Kut. 17:​5, 16; 19:​1, 2) Ba bangwe ge ba bona Babilona o Mogolo a fedišwa ba ka tla ba hlankela Jehofa le rena. Ka ntwa ya Haramagedone, Jehofa o tlo fediša batho ka moka ba kgopo le bao ba senyago leina la gagwe gomme a phološa bao ba mo ratago le bao ba ikemišeditšego go mo hlankela. (Mar. 8:38; 2 Bathes. 1:​6-10) Ka morago ga Pušo ya Kriste ya mengwaga e sekete, Jehofa o tla ba a kgethagaditše leina la gagwe. (Kut. 20:​7-10) Ka nako yeo, “badudi ba lefase ka moka ba tla tseba ka bogolo bja Jehofa go swana le meetse ao a tletšego ka lewatleng.” (Habak. 2:14) Go tlo thabiša kudu go bona ge batho bao ba tla bego ba phela mo lefaseng ba tumiša Jehofa ka tsela yeo e mo swanetšego. w25.01 7 ¶15-16

Ke’ng seo se be go se tlo thuša Bakriste ba Baheberu go kgotlelela mathata? Ba be ba tlo thušwa ke go nagana ka mehola ya go ba le kgotlelelo. Moapostola Paulo o boletše gore ge Mokriste a kgotlelela mathata gagwe, Jehofa a ka diriša sebaka seo go mo tlwaetša. Tlwaetšo yeo e ka dira gore Mokriste yoo a be le dika tša go kgahliša Jehofa. Ge Bakriste bao ba Baheberu ba be ba bona mehola ya go kgotlelela, go be go tlo ba bonolo gore ba dule ba kgotlelela. (Baheb. 12:11) Paulo o ile a kgothaletša Bakriste ba Baheberu gore ba se ke ba fela matla ge ba kgotleletše mathata. Paulo o be a tseba seo a bolelago ka sona. Ka ge Paulo le yena a ile a tlaiša Bakriste, o be a tseba gabotse gore Bakriste ba be ba tlaišwa bjang. Le yena o ile a kgotlelela ge a be a tlaišwa. Ka morago ga gore e be Mokriste o ile a tlaišwa ka ditsela tše dintšhi.—2 Bakor. 11:​23-25. w24.09 12-13 ¶16-17

Letšatši le lengwe le lengwe modiro wa go bolela ditaba tše dibotse o ba bohlokwa le go feta. Ka baka la’ng? Ka gobane nako e jelwe ke magotlo. Nagana ka seo Jesu a ilego a se bolela lengwalong la Mareka 13:10 mabapi le ditaba tše dibotse mehleng ya bofelo. Go ya ka pego yeo Mateo a e ngwadilego, Jesu o boletše gore ditaba tše dibotse di tla bolelwa lefaseng ka moka pele “bofelo” bo ka tla. (Mat. 24:14) Se se ra gore pele lefase le le lebe la Sathane le fedišwa. Jehofa o beile “letšatši “ leo dilo tše di tlago go direga ka lona. (Mat. 24:36; Dit. 1:7) Letšatši leo le batamela ka lebelo. (Baroma 13:11) Eupša re swanetše go tšwela pele re bolela ditaba tše dibotse go ba go fihla bofelo bo etla. Ge re dutše re naganišiša ka bodiredi bja rena, re ka ipotšiša potšišo ye e bohlokwa: Ke ka baka la’ng re bolela ditaba tše dibotse? Ge re eya tšhemong re bontšha gore re rata ditaba tše dibotse, re rata batho e bile re rata Jehofa le leina la gagwe. w24.05 14-15 ¶2-3

Batswadi, thušang bana ba lena go naganišiša ka dilo tšeo Jehofa a di bopilego. Ge o dutše o sepela le bana ba gago phakeng, boledišana le bona ka dilo tše di kgahlišago tšeo Jehofa a di bopilego. Ka baka la’ng? Dilo tšeo di bontšha gore Jehofa o bohlale. Ke kgale borasaense ba bona gore dilo tše dintšhi di bopilwe ka tsela e raraganego. Rasaense yo a bitšwago Nicola Fameli o hlalosa gore ge o ka lebelela tsela yeo dilo di bopilwego ka yona o tlo bona gore di nyakile di swana. Gantšhi tsela yeo dilo tše di swanago ka yona e bitšwa Fibonacci sequence. w24.12 16 ¶7

Moshe, Dafida le Johane ba phetše mehleng yeo e sa swanego le ya rena e bile ba ile ba lebeletšana le maemo ao a sa swanego le a rena. Eupša go na le dilo tše dintšhi tšeo re swanago le bona ka tšona. Ba be ba hlankela Modimo wa nnete go swana le rena. Go swana le bona, le rena re rapela Jehofa e bile re ithekga ka yena gore a re thuše le go re hlahla. Re kgodišegile gore Jehofa o šegofatša bao ba mo kwago. A re direng sohle seo re ka se kgonago gore re naganišiše ka mantšu a mafelelo ao banna bao ba botegago ba a boletšego gomme re kwe ditaelo tšeo Jehofa a re neago tšona. Ke moka, re tlo atlega dilong ka moka tšeo re di dirago. Ge re ka dira bjalo re tlo kgona go phela ka mo go sa felego. E bile re tlo thabišwa ke go kgahliša Tatago rena wa legodimong, yo a dirago dilo ka moka tšeo a di tshepišitšego go feta ka tsela yeo re naganago ka yona.—Baef. 3:20. w24.11 13 ¶20-21

Lekgolong la pele la mengwaga, banna ba bangwe ba be ba kgethwa gore e be bahlanka ba bodiredi. (1 Tim. 3:8) Go bonagala ba be ba dira dilo tšeo moapostola Paulo a boletšego ka tšona. Go ka direga gore bahlanka ba bodiredi ba be ba swarega ka dilo tše dingwe tše bohlokwa gore bagolo ba kgone go ruta le go dira maeto a bodiši. Ka mohlala, ba ka ba ba be ba thuša ka go kopolla Mangwalo goba ba ka be ba be ba reka dilo tšeo di bego di hlokega gore ba kgone go ngwala mangwalo ao. Nagana ka dilo tše bolokwa tšeo bahlanka ba bodiredi ba di dirago ka phuthegong ya geno. (1 Pet. 4:10) Ba ka dirišwa e le bahlanka ba diakhaonto goba bahlanka ba tšhemo, go kgonthišetša gore phuthego e dula e na le dikgatišo le gore bagoeledi ba di hwetše, go hlokomela tša medumo le dibidio, go ba bahlokomedi goba go hlokomela Holo ya Mmušo. Dilo tšeo ka moka di dira gore phuthego e sepele gabotse.—1 Bakor. 14:40. w24.10 19 ¶4-5

Re ka kgona go kgotlelela mathata a mangwe le a mangwe ge e ba re ka gopola gore Jehofa o a phela e bile o dula a ikemišeditše go re thuša. Ke Ramatlaohle, e bile a ka kgona go re nea matla a go kgotlelela. Re na le mabaka a kwagalago a go kgona go kgotlelela mathata a rena. Ge re bona Jehofa a re thuša ge re na le mathata a manyenyane, seo se tlo re kgodiša gore a ka kgona go re thuša ge re lebeletšane le mathata a magolo. Nagana ka dilo tše pedi tšeo di dirilego gore Kgoši Dafida a tshepe Jehofa. Nakong ya ge e be e sa le modiši go ile gwa tla bere le tau gomme e nngwe le e nngwe ya tšea nku ya tatagwe. Dinakong tšeo ka moka Dafida o ile a ba le sebete a kitimiša diphoofolo tšeo gomme a phološa dinku tša tatagwe. Eupša ga se a ka a bona e le yena a fentšego diphoofolo tšeo. O be a tseba gore ke Jehofa a mo thušitšego. (1 Sam. 17:​34-37) Dafida o ile a naganišiša ka dilo tšeo di mo diragaletšego, gomme a lemoga gore Modimo yo a phelago o tlo mo thuša nakong e tlago. w24.06 21 ¶5-6

A re re motho o go mema pokanong ya segwera. Na o tla ya? Ge e ba o sa tlwaelana kudu le motho yo a go memago goba o sa tsebe seo se tlo diregago pokanong yeo, o ka mmotšiša dipotšišo tša go swana le gore: “Pokano ye e tlo direga neng le gona kae? Go tlo tla batho ba ba kae? Mohlokomedi e tla be e le mang? Go tlo tla bo mang? Go tla be go direga’ng? Na go tla be go na le bjala?” Go hwetša dikarabo tša dipotšišo tše go tlo go thuša gore o dire diphetho tše bohlale. Ka morago ga gore o hwetše ditaba ka botlalo, nagana ka dilo tšeo di ka diregago. Ka mohlala, o ka lemoga gore pokanong yeo go tla be go na le batho bao ba sa phelego ka melao ya motheo ya Beibele goba go tla be go se na le motho yo a hlokomelago gore bjala bo nwewa bjang. O ka lemoga le gore pokano yeo e ka fetoga monyanya wa mašata. (1 Pet. 4:3) Ka morago ga gore o naganišiše ka seo se ka diregago o tlo kgona go dira phetho e bohlale. w25.01 15 ¶4-5

Jehofa o diriša mehlala go re thuša go leboga mpho ya topollo yeo a e dirišago go phumola dibe tša batho bao ba itsholago. Go boima go tloša madi goba letsoku godimo ga lešela. Jehofa o diriša mohlala wo go re kgodiša gore o tloga a re lebalela, go no swana le ge lešela leo le bego le na le letsoku le hlatswa ke moka letsoku leo la se sa bonala. Dibe di swantšhwa le dikoloto. (Mat. 6:12; Luka 11:4) Ge re direla Jehofa diphošo, go swana le ge re oketša sekoloto sa rena. Re mo kolota kudu, eupša ge a re lebalela go swana le ge a phumola sekoloto seo. Ga go hlokagale gore re patele dibe tšeo a šetšego a re lebaletše tšona. Go no swana le ge motho yo mongwe le yo mongwe a thaba ge sekoloto sa gagwe se phumotšwe, le rena re a thaba ge Jehofa a re lebalela. w25.02 9-10 ¶9-10

Ge batswadi ba tšofala, ba tlo hloka gore bana ba bona ba ba thuše ka dilo tše itšego. (1 Tim. 5:4) Batswadi ba Bakriste ga ba be le bana gore ba tle ba ikhole ka bona eupša ba thuša bana ba bona gore ba tle ba hlankele Jehofa. Batswadi ba thaba kudu ge ba bona bana ba bona ba hlankela Jehofa. (3 Joh. 4) Ge o dutše o ruta bana ba gago gore ba ka dira eng gore ba tle ba kgone o itlhokomela, ba bontšhe le gore o ithekgile ka Jehofa. Ba rute e sa le ba banyenyane gore go bohlokwa go šoma ka thata. (Die. 29:21; Baef. 4:28) Ge ba dutše ba gola, ba thuše le gore ba šome gabotse sekolong. Batswadi ba Bakriste ba dira nyakišišo gore ba hwetše melao ya motheo ya Beibele, ke moka ba thuša bana ba bona gore ba ithute go dira mešomo yeo e tlago go ba thuša go itlhokomela ge ba dutše ba hlankela Jehofa. w25.03 30-31 ¶15-16

Go Jesaya kgaolo 65, Jehofa o hlalosa gore bophelo bja batho bao ba tlago go phela paradeiseng ya moya bo tlo ba bjang. Boporofeta bjo bo ile bja phethagala la mathomo ka 537 B.C.E. Ka nako yeo Bajuda bao ba bego ba itshola ba ile ba lokollwa bokgobeng Babilona gomme ba boela gagabo bona. Jehofa o ile a šegofatša batho ba gagwe le go ba thuša gore ba tsošološe Jerusalema e be e botse gape e bile ba tsošološe tempele gore batho ka moka bao ba dulago Isiraele ba mo hlankele go yona gape. (Jes. 51:11; Sak. 8:3) Boporofeta bja Jesaya bo phethagetše ka lekga la bobedi ka 1919 C.E. ge bahlanka ba Jehofa ba lehono ba lokollwa bokgobeng bja Babilona o Mogolo. Ke moka paradeise ya moya e ile ya thoma go gola lefaseng ka moka. Bagoeledi ba ditaba tše dibotse ba ile ba thoma go hloma diphuthego tše dintšhi le go tšweletša dika tše di enywago ke moya. Banna le basadi bao ba bego ba rata dintwa e bile ba na le mekgwa ya bophoofolo, ba ile ba “[fetoša] tsela yeo [ba] phelago ka yona gore e dumelelane le thato ya Modimo.” w24.04 20-21 ¶3-4

Dinageng tše dingwe go letetšwe gore batswadi goba ba bangwe ba leloko ba nyakele motho yo a sa nyalago molekane. Mola mafelong a mangwe ba leloko goba bagwera ba ka kopanya monna le mosadi ke moka ba ba tlogela gore ba bone ge e ba ba swanelana. Ge e ba o ka kgopelwa gore o kopanye batho ba itšego, o swanetše go tseba gore ke’ng seo bobedi bja bona ba se nyakago. Ge e ba o bona eka motho yo a itšego o swanela mogwera wa gago goba motho wa geno, tseba gore o na le dika tša mohuta mang le gore o rata Modimo gakaaka’ng. Go ba le segwera sa kgauswi le Jehofa go bohlokwa kudu go feta go ba le tšhelete, go rutega goba go tsebega setšhabeng. Gopola gore batho bao o ba kopanyago ke bona ba tlago go itirela phetho ya gore ba tla nyalana na. w24.05 23 ¶11

Re ka thekga batho bao ba ratanago ka dilo tšeo re di bolelago. Ka dinako tše dingwe, re ka swanelwa ke go itshwara gomme ra se bolele selo. (Die. 12:18) Ka mohlala, ka dinako tše dingwe re ka nyaka go botša batho ba bangwe gore mang mang le mang mang ba ratana, eupša wa hwetša baratani bao e le bona ba nyakago go botša batho ka taba yeo. Ga se ra swanela go seba ka batho bao ba ratanago goba go bolela ka ditaba tša bona. (Die. 20:19; Baroma 14:10; 1 Bathes. 4:11) Le gona, ga se ra swanela go botšiša batho bao ba ratanago gore ba tlo nyalana neng. Ke’ng seo re ka se dirago ge baratani ba kgetha go kgaogana? Ga se ra swanela go tsenatsena ditaba tša bona goba go tšea lehlakore. (1 Pet. 4:15) Go kgaogana ga go bolele gore batho bao ba ratanago ba paletšwe. Seo se bontšha gore baratani bao ba fihleletše phetho e botse. Lega go le bjalo, phetho yeo e ka no ba e ba kwešitše bohloko. Re ka nyaka ditsela tšeo re ka ba thušago ka tšona. w24.05 31 ¶15-16

Bothata bjo bogolo bjo re ka lebeletšanago le bjona ke ge wa leloko goba mogwera yo re mo ratago a tlogela go hlankela Jehofa. (Ps. 78:40) Re ka thatafalelwa ke go amogela boemo bjoo ka ge re rata motho yoo kudu. Ge e ba seo se ile sa go diragalela, mohlala wa Tsadoko wa go botega o ka go tiiša. O ile a dula a botegela Jehofa le ge mogwera wa gagwe Abiathara a be a kgetha go se sa botega. Nakong ya ge Kgoši Dafida a tšofetše e bile a le kgauswi le go hwa, morwa wa gagwe e lego Adonija o ile a nyaka go itšeela bogoši bjoo Jehofa a bego a tshepišitše gore e tlo ba bja Solomone. (1 Dikor. 22:​9, 10) Abiathara o ile a kgetha go thekga Adonija. (1 Dikg. 1:​5-8) Abiathara o ile a se botegele Dafida, Tsadoko le Jehofa. Tsadoko le Abiathara ba ile ba šoma gotee e le baperisita ka mengwaga e mentšhi.—2 Sam. 8:17; 15:29; 19:​11-14. w24.07 6 ¶14-15

Re ka kgodišega gore re tlo thaba ge re ka dula re itlhokomela. Re tlo dula re thabile ge re phela ka melao ya Jehofa ya motheo, go sa šetšwe “boipshino bja nakwana” bjo bo tlišwago ke sebe. (Baheb. 11:25; Ps. 19:8) Re bopetšwe gore re phele ka melao ya Modimo. (Gen. 1:27) Re tlo ba le letswalo le le hlwekilego le go ba le kholofelo ya bophelo bjo bo sa felego. (1 Timotheo 6:12; 2 Timotheo 1:3; Juda 20, 21) Ke nnete gore “nama e a fokola.” (Mateo 26:41) Eupša seo ga se bolele gore ya pala ya le swa. Jehofa o dula a ikemišeditše go re nea matla. (2 Bakor. 4:7) O re nea matla a fetago a tlwaelegilego. Eupša le rena re swanetše go šoma ka thata gore re lwantšhane le mafokodi a rena. Jehofa o tlo araba dithapelo tša rena gomme a re nea matla ao re a hlokago. (1 Bakor. 10:13) Ruri Jehofa a ka re thuša go lebeletšana le diteko tšeo re kopanago le tšona. w24.07 19 ¶19-21

Moapostola Paulo o ngwaletše Timotheo mantšu ao a lego temaneng lehono gore a kgone go thuša “batho bao ba tlwaetšego go dira sebe.” O be a era gore re’ng? Paulo o be a sa re gore batho ba ka phuthegong ka moka ke “babogedi.” Eupša o be a bolela ka batho bao ba ka bego ba šetše ba tseba ka sebe seo motho yoo a se dirilego. Eka ba bao ba mmonego ge a dira sebe seo goba bao a ba boditšego ka sona. Bagolo ba tla botša batho bao ba tsebago ka sebe seo gore le bona ba tseba ka taba yeo e bile ba thušitše motho yo a dirilego sebe se segolo. Ka dinako tše dingwe go ka direga gore sebe seo se šetše se tsebja ke batho ba bantšhi ka phuthegong goba go ka tla gwa direga gore se tsebje. Ge go le bjalo, “babogedi” e tlo ba batho ba ka phuthegong ka moka. Ka gona, phuthego e tla tsebišwa gore ngwanabo rena goba kgaetšedi o kgalemetšwe. Ka baka la’ng? Paulo o itše: Gore “e be temošo go ba bangwe ka moka.” w24.08 23-24 ¶16-17

Re swanetše go dula re šoma ka thata go hlankela Jehofa go ba go fihla mafelelong. Bakriste bao ba tloditšwego ba swanetše go dula ba phakgame e le gore ba hwetše kabelo ya bona ya go ya legodimong. (Mat. 24:40) Bakriste ba tloditšwego ba fela pelo ya go “kgobokanywa gotee” gore ba be le Jesu Kriste kua legodimong. Ke moka ka morago ga ntwa ya Haramagedone Bakriste ba tloditšwego e tlo ba monyadiwa wa kwana. (2 Bathes. 2:1) Le ge nako ya gore Jesu a tle a ahlole e batamela, ga se ra swanela go tšhoga. Ge re dula re botegela Jehofa o tlo re nea “matla a fetago a tlwaelegilego” gore re “atlege . . . le go ema pele ga Morwa wa motho.” (2 Bakor. 4:7; Luka 21:36) Go sa šetšwe gore re tlo phela legodimong goba mo lefaseng re tlo thabiša Jehofa ge re ekwa ditemošo tšeo Jesu a boletšego ka tšona dipapišong tša gagwe. Ka ge Jehofa e le Modimo yo a lokilego, o tlo “ngwala maina a rena” ka pukung ya bophelo.—Dan. 12:1; Kut. 3:5. w24.09 24-25 ¶19-20

Lentšu la Modimo le ka go thuša gore o be le khutšo ya monagano. Bjang? Dula o gopola dilo tše dibotse tšeo Jehofa a go direlago tšona le go gopola gore Jehofa ga a thekge batho bao ba sa mo hlankelego. Batho bao ba sa hlankelego Jehofa ba tšea mešomo ya bona e le e bohlokwa kudu ka gobane ga ba tsebe gore go tlo direga eng nakong e tlago. Ge o ka dula o botega, Jehofa o tlo go direla dilo tše dibotse gona bjale le nakong e tlago. (Ps. 145:16) O ka thušwa le ke go nagana gore ge nkabe o ile wa dira diphetho tše di fapanego bophelo bja gago bo be bo tlo ba bjang. Seo se thabišago kudu ke go tseba gore batho bao ba ratago Jehofa le batho ba bangwe ba dula ba thabile. w24.10 27 ¶12-13