Molao wa Gauta—Ke Ofe?

“BONA! Ga ke tshwenye baagišani ba-ka. Go ya ka nna, ba ka dira se ba ratago go se dira. Eupja, ge ba le mathateng, nka dira seo nka se kgonago go ba thuša.” Na ye ke tsela yeo o bonago dilo ka yona? Ge dikotsi di direga, ditiro tše botho le tša go hloka boithati mo gongwe e ka ba tše ntši gomme tša makatša ba bantši. Eupja na se ke se se lekanego?

Ge e ba o le motswadi, ka ntle le pelaelo o ile wa laya bana ba gago gore ba pheme go rumola bao ba bapalago le bona. Ba bantši ba rena re na le mabadi a bofseng bja rena ao a bontšhago gore go hlokomologa tlhahlo yeo go tliša go itefeletša. Ee, re ile ra ithuta bohlale bja molao wa motheo wo o ilego wa thewa ke ra-difilosofi wa Bohlabela Confucius o rego: “Seo o sa ratego se dirwa go wena, o se ke wa se dira go ba bangwe.” Lega go le bjalo, na o lemoga gore se e fo ba go ngwalwa go go fokolago le mo go ganetšago ga seo se tsebegago e le Molao wa Gauta?

Molao o Tsepamego

Go ya ka Webster’s New Collegiate Dictionary, “molao wa gauta” o hlaloswa e le “molao wa motheo wa boitshwaro o šupago go [Mateo] 7:12 le [Luka] 6:31 gomme e le o bolelago gore motho o swanetše go dira ba bangwe kamoo a tlago go rata ge ba bangwe ba mo dira ka gona.” Lebelela lepokising le lego ka mo tlase letlakaleng gomme o ele hloko kamoo diphetolelo tše fapanego tša Beibele go Mateo kgaolo 7, temana 12 di dumelelago letago la molao wo o hlahlago go tšweletša seetša.

Hle ela hloko gore lege e ba mantšu a fapana go ya ka diphetolelo, molao ke o tsepamego. Go feta moo, go etša ge Jesu a ile a bolela pelenyana go Thuto Thabeng: “Kxopêlang; ké mo Le tl’o xo fiwa. Nyakang; ké mo Le tl’o xo bôna. Ôpaôpang; ké mo Le tl’o xo bulêlwa. Xobane mang le mang a kxopêlaxo, ó a amoxêla; e a tsomaxo ó a hwetša; e a ôpaôpaxo ó tlo bulêlwa.” (Mateo 7:7, 8) Kgopelang, nyakang, opaopang, tše ka moka ke ditiro tše tsepamego. Jesu o tšwela pele ka gore: “Tšohle tše Le rataxo xore batho ba le dirêlê tšona, le lena le Le ba dirêle tšôna-tšeo.”—Mateo 7:12.

Beibele e bontšha gore barutiwa ba Jesu le bona ba ile ba bolelela go phela ka molao wona wo. (Ba-Roma 15:2; 1 Petro 3:11; 3 Johane 11) Lega go le bjalo, ka manyami, boemo bja ditswalano tša batho lehono bo hlatsela gore bontši bja batho, go sa šetšwe gore ke Bakriste ka leina feela goba go se bjalo, ga ba o latele. Na se se bolela gore molao wo wa motheo wa boitshwaro ga e sa le wa bohlokwa? Na mohlomongwe o fetilwe ke nako?

[Lepokisi go letlakala 3]

“Dira batho ba bangwe tšohle tšeo o bego o tla rata ba go dira tšona.”—The Holy Bible, e fetoletšwego ke R. A. Knox.

“Swara batho ba bangwe ka yona tsela yeo o bego o tla rata ba go swara ka yona.”—The New Testament in Modern English, ka J. B. Phillips.

“Selo lege e le sefe seo o kganyogago gore ba bangwe ba go dire le go go direla sona, le wena ka mo go swanago o ba dire le go ba direla sona seo.”—The Amplified New Testament.

“Direla ba bangwe selo se sengwe le se sengwe seo o tla nyakago ba go direla sona.”—The New Testament in the Language of Today, ka W. F. Beck.

“Ka gona dilong ka moka, swara magageno kamoo o bego o tla rata ge ba go swara ka gona.”—The Four Gospels, e fetoletšwego ke E. V. Rieu.

“O swanetše go ithuta go dirišana le ba bangwe kamoo o bego o tla nyaka gore ba dirišane le wena ka gona.”—The New Testament, ka C. B. Williams.