Bjalo ka Maeba ge a Kgorogela Nywakwaneng ya Ona

MO GONGWE maeba ke o mongwe wa mehuta ya pele ya dinonyana tše di ilego tša ruiwa ke batho. Nywageng e fetilego e dikete, Ba-Egipita​—ka ge ba be ba nyaka dijo tšeo di bego di ka swarelela ngwaga ka moka—​ba ile ba aga nywakwana ya maeba kgaufsi le nywako ya bona. Nama ya dinonyana tše e be e ratwa kudu, gomme boloko bja tšona bo be bo dirišwa bjalo ka morole. Nywageng ya Magareng, nywakwana ya maeba e be e ratwa kudu mo e lego gore dinageng tše dingwe e be e le batho ba maemo feela goba ba bagolo bodumeding bao ba bego ba dumelelwa go ba le yona.

Gaešita lege gona bjale nama ya kgogo e lewa kudu go feta ya maeba, nywakwana e mengwe ya kgale ya maeba e sa hwetšagala. Nywakwana ya maeba ye e swantšhitšwego mo e hwetšwa kua Egipita.

Dinonyana tše ge di be di boa e le tše dintši ka nako ya mantšiboa, di be di lebelega bjalo ka leru leo le theogelago dihlageng tša maeba. Moporofeta wa mo-Hebere e lego Jesaya o boletše ka se ge a be a botšiša gore: “Ké bô-mang bála ba fofaxo bo-ka maru, byalo ka maeba xe a kxoroxêla dihlaxeng tša ôna?” Bjalo ka ge phetolelo e nngwe e bea se ka gore: “Ke bomang bala ba fofago bjalo ka maru, le bjalo ka maeba a fofelago nywakwaneng ya ona?”​—Jesaya 60:8; PK.

Karabo lehono e hwetšagala ka baka la batho ba dikete tše makgolo bao ba boifago Modimo bao ba kgorogelago phuthegong ya Jehofa. Diholong tša Mmušo tša Dihlatse tša Jehofa, ba ithuta go holofela Modimo. (Jesaya 60:9) Ge ba le gare ga batho ba Modimo, ba hwetša gore mehola ya moya, tumelo e phelago gotee le bogwera bjo bo lokilego di nea khutšo le polokego ye e swanago le ye e hwetšwago ke leeba ge le le ka gare ga ngwakwana wa lona.

[Picture Credit Line on page 32]

Pictorial Archive (Near Eastern History) Est.