Latela Tsela e Phalago Tšohle ya Lerato

JEHOFA MODIMO ke lerato. (1 Johane 4:8) Morwa wa gagwe, Jesu Kriste o itše re swanetše go rata Modimo le magagabo rena. (Mateo 22:​37-40) Ruri Modimo o laola legohle ka moka motheong wa seka se! Re swanetše go latela tsela ya lerato bakeng sa go hwetša bophelo bjo bo sa felego lege e ka ba kae.

Modimo o bontšhitše lerato go setšhaba sa Isiraele eupja ka morago a lahla phuthego yeo ka baka la go se botege. Ke moka a kgetha phuthego ya barutiwa ba Jesu gore e be phuthego ya Gagwe e mpsha. Bjang? Ka go bonagatša ka mo go kgethegilego moya o mokgethwa woo o ba neago matla a go bolela ka maleme le go porofeta. Ka Pentekoste ya 33 C.E., ba-Juda le bao ba sokologetšego go bjona ba 3 000 ba ile ba ba badumedi gomme ba tlogela phuthego ya kgale ba tsena phuthegong ya Modimo e mpsha. (Ditiro 2:​1-41) Ka ge dineo tša moya ka morago di ile tša newa ka baapostola ba Jesu, dipontšho tše bjalo di ile tša kgaotša lehung la bona. (Ditiro 8:​5-18; 19:​1-6) Eupja ka nako yeo dineo di ile tša bontšha gore kgaugelo ya Modimo e be e le go Isiraele wa moya.​—Ba-Galatia 6:16.

Mehlolo yeo e bego e tšweletšwa ke dineo tša moya e be e hola. Lega go le bjalo, go bontšha lerato goba go kgomega ka ba bangwe ka go se be le boithati go bohlokwa kudu go feta go ba le dineo tša moya. Moapostola Paulo o bontšhitše se lengwalong la gagwe la pele le yago go Ba-Korinthe (mo e ka bago ka 55 C.E.). Ka go lona o boletše ka lerato e le “tsela e kaone ka go fetišiša.” (1 Ba-Korinthe 12:​31, PK) ­Tsela yeo e ahla-ahlwa go 1 Ba-Korinthe kgaolo 13.

Ka Ntle le Lerato, ga re Selo

Paulo o boletše gore: “Le xe nka bolêla ka maleme a batho le a Barongwa, ka upya ka hlôka leratô, xôna nka ba thsipi e llaxo, nka ba moropa wo o dumaxo.” (1 Ba-Korinthe 13:1) Ka ntle le lerato go ka se hole selo go bolela ka leleme la batho leo o le neilwego ke moya goba leleme la barongwa ba legodimong. Paulo o ile a kgetha go bolela mantšu a mahlano ao a agago moyeng go e na le a dikete tše lesome ka leleme leo batho ba sa le kwešišego. (1 Ba-Korinthe 14:​19) Motho yo a se nago lerato o tla ba bjalo ka “thsipi e llaxo”​—tšhipi ye e hlabago lešata, yeo e tsenago ditsebeng​—“moropa wo o dumaxo” wa modumo o sego bose. Go bolela ka maleme o se na lerato e be e se tsela e homotšago ya go aga moyeng bakeng sa go tumiša Modimo le go thuša batho ba gagwe. Lehono, re bontšha lerato ka go bolela leleme le le kwešišegago bodireding bja Bokriste.

Moapostola ka morago o itše: “Le xe nka ba le boporofeta ka tseba diphiri [tše kgethwa, “NW”] ka moka, ka ba le thlaoloxanyô yohle, ka ba le tumêlô wa xo šuthiša dithaba, ka upya ka hlôka leratô, xôna xa ke selô.” (1 Ba-Korinthe 13:​2) Go porofeta ka mohlolo, go kwešiša diphiri tše kgethwa ka mo go kgethegilego le tsebo yeo e newago ke moya di ka hola ba bangwe eupja e sego bao ba neilwego dineo tše bjalo ge e ba ba se na lerato. Paulo o dirišitše kwešišo e kgethegilego ya diphiri tše kgethwa bakeng sa go thuša ba bangwe, gomme neo ya tsebo e dirile gore a kgone go bolela e sa le pele ka go phologa ga bao ba robegetšwego ke sekepe. (Ditiro 27:​20-44; 1 Ba-Korinthe 4:​1, 2) Lega go le bjalo, ge nkabe a be a e-na le ‘tsebo ka moka le tumelo ka moka’ eupja a se na lerato, o be a ka se be selo mahlong a Jehofa.

Lehono moya wa Jehofa o dira gore Dihlatse tša gagwe di kgone go kwešiša diporofeto tša Beibele le diphiri tše kgethwa le go ba hlahla tabeng ya go fetišetša tsebo e bjalo go ba bangwe. (Joele 2:​28, 29) Moya gape o tšweletša tumelo yeo e nyakegago bakeng sa go fenya mapheko a swanago le dithaba. (Mateo 17:​20) Ka ge moya e le wona o dirago dilo tše, ruri ke phošo go nyaka go tumišwa ke ba bangwe. Ga re selo ka ntle le ge re dira dilo bakeng sa go tumiša Modimo le ka go rata yena gotee le magagabo rena.​—Ba-Galatia 5:6.

Go se Holwe ke Boikgafo bjo bo Dirwago ka Ntle le Lerato

Paulo o itše: “Le xe nka hlallêla ba hlôkaxo ka tše e lexo tša-ka tšohle, xe nka xafa mmele wa-ka wa thšungwa ka mollô, ka upya ka hlôka leratô, xôna xo ka se nkhole selo.” (1 Ba-Korinthe 13:3) Ka ntle le lerato Paulo a ka be a sa ka a holega ka selo ge nkabe a neile ba bangwe se sengwe le se sengwe seo a bego a e-na le sona bakeng sa go ba fepa. Modimo o re putsa bakeng sa lerato leo le tutueletšago go nea dineo tša rena, e sego bakeng sa mohola o bonagalago wa tšona goba ka gobane re nyaka tumišo bjalo ka banei, go swana le Anania le Safira ba boletšego maaka. (Ditiro 5:​1-11) Paulo o beile mohlala o mobotse ka go ikgafa ka lerato mabapi le bodiredi bjo bo direlwago go thuša badumedi kua Judea.​—1 Ba-Korinthe 16:​1-4; 2 Ba-Korinthe 8:​1-24; 9:7.

Gaešita le go hwela tumelo bjalo ka hlatse ya therešo o se na lerato ga se selo go Modimo. (Diema 25:​27) Jesu o boletše ka sehlabelo sa gagwe eupja ga se a ikgantšha ka sona. Go e na le go ikgantšha o ile a ikgafa ka go rata a tutuetšwa ke lerato. (Mareka 10:​45; Ba-Efeso 5:2; Ba-Hebere 10:​5-10) Banababo ba moya ba ‘tliša mebele ya bona e le sehlabelo se phelago’ tirelong ya Modimo e sego ka go itumiša ka go hwela tumelo, eupja ka ditsela tše di sa gogelego mahlo tše tumišago Jehofa le go bontšha lerato la bona go yena.​—Ba-Roma 12:​1, 2, bapiša le NW.

Ditsela tše Dingwe Tšeo Lerato le Tlago go re Dira Gore re Gate Mogato

Paulo o ngwadile gore: “Leratô xa le fêle pelo. Leratô ké le botho.” (1 Ba-Korinthe 13:4a) Go ba bantši go se fele pelo ga Modimo ga e sa le go tloga sebeng sa motho go boletše tshokologo ye e išago phologong ya ba bantši. (2 Petro 3:​9, 15) Ge e ba re e-na le lerato, re tla ruta ba bangwe therešo ka go se fele pelo. Re tla široga go ferehlega maikwelong gomme re tla ba bao ba naganelago le bao ba lebalelago. (Mateo 18:​21, 22) Lerato e bile ke le botho gomme re batametšwa go Modimo ka baka la botho bja gagwe. Seenywa sa moya wa gagwe sa botho se re thuša gore re se ke ra nyaka se se fetišago go ba bangwe go feta seo a se nya-​kago go rena. (Ba-Efeso 4:​32) Lerato le re dira ba botho go batho ba sa lebogego.​—Luka 6:35.

Paulo o okeditše ka gore: “Leratô xa le tsebe moná; xa le na xo ikxanthša, xa le ikxoxomoše.” (1 Ba-Korinthe 13:4b) Mona ke modiro wa nama wo o tlago go dira gore motho a se tsene Mmušong wa Modimo. (Ba-Galatia 5:​19-21) Lerato le re thuša gore re se ke ra hufegela dilo tša motho o mongwe goba maemo a mabotse. Ge e ba a newa tokelo ya tirelo yeo re bego re e kganyoga, lerato le tla re dira gore re ­thabe le yena, re mo nee thekgo ya rena le go leboga Modimo ge a mo dirišitše go hola phuthego.

Ka ge lerato ‘le sa ikgantšhe,’ ga le re tutueletše go ikgantšha ka seo Modimo a re dumelelago go se dira tirelong ya gagwe. Ba-Korinthe ba bangwe ba ile ba ikgantšha tše o ka rego ke bona ba thomilego dineo tša moya, mola di be di e-tšwa go Modimo bjalo ka ge ditokelo phuthegong ya gagwe ya mehleng yeno di e-tšwa go yena. Ka gona, go e na le go ikgantšha ka boemo bja rena ka phuthegong ya Modimo, anke re hlokomeleng gore re se we. (1 Ba-Korinthe 1:​31; 4:7; 10:​12) Lerato “xa le ikxoxomoše” eupja monagano wa motho yo a se nago lerato o ka tlala ka boikgogomošo. Batho ba ba nago le lerato ga ba ikwe ba phala ba bangwe.​—1 Ba-Korinthe 4:​18, 19; Ba-Galatia 6:3.

Ga le Dire tša Dihlong, ga le na Boithati, ga le na Sekgopi

Lerato “xa le dire tša dihlong; xa le tsome xo ikhola, xa le hlohleletšexe.” (1 Ba-Korinthe 13:5a) Le hlohleletša mekgwa e mebotse, boitshwaro bja go boifa Modimo, go hlompha taolo le boitshwaro bjo bobotse dibokeng tša Bokriste. (Ba-Efeso 5:​3-5; 1 Ba-Korinthe 11:​17-34; 14:​40; bapiša le Juda 4, 8-10.) Ka ge lerato le dira gore motho o mongwe le o mongwe a ikwe a nyakega go swana le ditho ka moka tša mmele wa motho; phuthego e nago le lerato ke lefelo la khutšo le botšhabelo. (1 Ba-Korinthe 12:​22-25) Ka go se swane le boithati bjo bo ‘tsomago tša go ikhola,’ lerato le re tutueletša go gafa ditshwanelo tša rena ka dinako tše dingwe le go bontšha kgahlego go ba bangwe le katlego ya bona. (Ba-Filipi 2:​1-4) Lerato le re dira gore ‘re be dilo tšohle go batho ba mehuta ka moka, e le gore re tle re phološe ba bangwe’ ka bodiredi bja rena.​—1 Ba-Korinthe 9:​22, 23.

Lerato “xa le hlohloletšexe.” Bogale ke modiro wa nama ya sebe, eupja lerato le re dira gore re “diêxê xo xalefa.” (Jakobo 1:​19; Ba-Galatia 5:​19, 20) Gaešita lege re ka befelwa ka mo go swanetšego, lerato ga le re dumelele gore re dule re galefile, ka go rialo ra nea Diabolo sebaka. (Ba-Efeso 4:​26, 27) Bagolo kudu-kudu ba swanetše go široga go galefa ge badumedi-gotee ba sa diriše tšhišinyo e itšego.

Paulo o boletše gape ka lerato gore: “Xa le loxe manô mabé.” (1 Ba-Korinthe 13:5b) Lerato ga le boloke lelokelelo la diphošo go swana le go boloka dipego tša dikoloto le dikadimo. Le bona botse go badumedi-gotee gomme ga le lefeletše diphošo tša kgonthe goba tšeo di inaganelwago. (Diema 20:​22; 24:​29; 25:​21, 22) Lerato le re thuša ‘go phegelela tše re kago khutšišana le go agišana ka tšona’ (Ba-Roma 14:​19) Paulo le Baranaba ba bile le phapano gomme ba tšea ditsela tše fapanego tirelong ya Modimo, fela lerato le fedišitše karogano gomme la ba thibela go boloka sekgopi.​—Lefitiko 19:​17, 18; Ditiro 15:​36-41.

Le Sekametše go Lokeng le Therešong

Paulo o tšwela pele mabapi le lerato ka gore: “Xa le thabêle bobe; le thaba le therešô.” (1 Ba-Korinthe 13:6) Ba bangwe ba thabela go se loke moo e lego gore “xa ba rôbale bà sešo ba dira bobe.” (Diema 4:​16) Eupja ka phuthegong ya Modimo ga re ganetšane goba ra thaba ge e ba o mongwe a tantšwe ke sebe. (Diema 17:5; 24:​17, 18) Ge e ba go bile le lerato le lekanego la go rata Modimo le toka phuthegong ya Korinthe, boitshwaro bjo bo gobogilego nkabe bo se bja kgotlelelwa. (1 Ba-Korinthe 5:​1-13) Gare ga tše dingwe, go rata toko go re thibela go thabela thelebišene, dipaesekopo goba dipontšho tša sethaleng tšeo di sa lokago.

Lerato le “thaba le therešô.” Therešo mo e fapantšhwa le go se loke. Go molaleng gore se se bolela gore lerato le re dira gore re thabele tutuetšo ya go dira toko yeo therešo e nago le yona bathong. Re thabišwa ke dilo tšeo di agago batho le tšeo di tšwetšago pele therešo le toko. Lerato le re thibela go bolela maaka, le re nea lethabo ge ba lokilego ba hlatselwa ba se na molato, gomme le re dira gore re thabele go fenya ga therešo ya Modimo.​—Psalme 45:4.

Kamoo Lerato le Dirišanago ka Gona le Dilo Tšohle

Paulo ge a tšwela pele ka tlhaloso ya gagwe ya lerato o ngwadile gore: “Le bipa tšohle; le dumêla tšohle; le holofêla tšohle; le kxôtlêlêla tšohle.” (1 Ba-Korinthe 13:7) Ka go ‘bipa tšohle’ lerato le tloša sekgopi go etša ge tlhaka e botse e thibela pula. Ge o mongwe a re kgopiša eupja ka morago a kgopela tshwarelo, lerato le re dira gore re kgotlelele bohloko, re lebalele yo a re kgopišitšego go e na le go seba ka ditaba tšeo. Ka lerato, re leka go ‘rua banababo rena.’​—Mateo 18:​15-17; Ba-Kolose 3:13.

Lerato le “dumêla tšohle” tšeo di lego ka Lentšung la Modimo gomme le re dira gore re leboge dijo tša moya tše newago ka “molaki e a bôtêxaxo yo bohlale.” (Mateo 24:​45-47) Lege re sa forwe gabonolo lerato le re šireletša gore re se be le pelo e sa dumelego gomme le re šireletša gore re se kganyogele badumedi-gotee bobe. (Mmoledi 7:​21, 22) Lerato gape le “holofêla tšohle” tšeo di ngwadilwego ka Mangwalong, bjalo ka ditherešo tšeo di lego mabapi le Mmušo wa Modimo. Ka ge re tutuetšwa ke lerato, re holofela le go rapelela mafelelo a mabotse kudu maemong a thata. Lerato gape le re tutueletša go botša ba bangwe lebaka la tumelo ya rena. (1 Petro 3:​15) Go oketša moo, lerato le “kxôtlêlêla tšohle,” go akaretša le dibe tšeo di dirwago malebana le rena. (Diema 10:​12) Lerato la go rata Modimo gape le re thuša go kgotlelela tlaišo le meleko e mengwe.

Paulo o okeditše ka gore: “Lerato xa le fele neng le neng.” (1 Ba-Korinthe 13:8a) Bjalo ka ge Jehofa a sa fele le lona lerato le ka se fele. Ka ge Modimo wa rena wa ka go sa felego e le mohlala wa kgonthe wa lerato, seka se se ka se ke sa fela. (1 Timotheo 1:​17; 1 Johane 4:​16) Legohle ka mehla le tla bušwa ka lerato. Ka gona, anke re rapeleng gore Modimo a tle a re thuše go fenya mekgwa ya boithati gomme re bontšhe seenywa se se se sa felego sa moya wa gagwe.​—Luka 11:13.

Dilo Tšeo di Tlago go Feta

Ge a bolela e sa le pele Paulo o ngwadile gore: “Gomme ga e le [dineo tša go porofeta, “NW”] di tlo fedišwa, le ga e le maleme, a tlo homola; le ga e le tsebo, e tlo fedišwa.” (1 Ba-Korinthe 13:8b, “PK”) ‘Dineo tša go porofeta’ di dira gore bao ba nago le tšona ba bolele diporofeto tše mpsha. Lege dineo tše bjalo di fetile ka morago ga gore phuthego ya Bokriste e hlongwe e le phuthego ya Modimo, matla a gagwe a go porofeta le ka mohla ga a fele gomme Lentšu la gagwe le na le boporofeta ka moka bjoo re bo nyakago gona bjale. Bokgoni bjo bo newago ke moya bja go bolela ka maleme le bjona bo kgaoditše, gomme tsebo e kgethegilego e ile ya “fedišwa” bjalo ka ge go boletšwe e sa le pele. Eupja Lentšu le le feletšego la Jehofa le re nea seo re se nyakago bakeng gore re phologe. (Ba-Roma 10:​8-10) Go feta moo, batho ba Modimo ba tletše ka moya wa gagwe gomme ba tšweletša dienywa tša wona.

Paulo o tšwetše pele ka gore: “Xobane tše re di tsebaxo ké diripanyana fêla; le xe re porofeta, ké diripanyana fêla. Mohla xo tlaxo tše botlalô, xo tlo fêla tša boripanyana.” (1 Ba-Korinthe 13:​9, 10) Dineo tša tsebo le boporofeta di be di sa felela. Go molaleng gore, boporofeta bjo bobjalo ga se bja hlalosa ka botlalo, le gona moporofeta o mongwe le o mongwe o be a sa utolle bokamoso ka mo go feletšego, a hloka tsebo e feletšego mabapi le seo a se boletšego e sa le pele. Lega go le bjalo, ga bjale boporofeta bo thoma kwešišwa go ganyenyane-ganyenyane ka botlalo. Ka mohlala, ditaba tše phethagatšago boporofeta bja Beibele di kgonthiša gore Jesu o amogetše matla a bogoši godimo ga batho ka 1914. Ga e sa le go tloga nakong yeo re be re dutše re le ‘lebakeng la bofelo’ gomme re thabela go gola tsebong le kwešišong ya moya ya boporofeta bja Beibele ka mo go tšwelago pele. (Daniele 12:4) Ka gona, re fihla tsebong e feletšego gomme “tše botlalô” di swanetše go ba di le kgaufsi.

Seka se Segolo Kudu se a Šala

Paulo ge a bolela ka go lebanya ka tšwelopele ya phuthego, o ngwadile gore: “Mola kè sa le ngwana, ke be ke bolêla bo-ka ngwana, ke be ke hlaoloxanya bo-ka ngwana, kè eleletša bo-ka ngwana. Byale kè le monna, tša byana ke di fedišitše.” (1 Ba-Korinthe 13:11) Ka ge ngwana a itshwara go ya ka tsebo ya gagwe e lekaneditšwego le kgolo ya mmele, a ka akga-akgega, bjalo ka ge e ka o hlokosetšwa a boputšwe ka thari. Eupja monna o gotše kudu mmeleng, o na le tsebo e kgolwanyane, gomme gantši ga a akga-akgege gabonolo. O tlošitše dikgopolo, boitshwaro le mekgwa ya bjana. Ka mo go swanago, ka morago ga gore phuthego ya Modimo ya mo lefaseng e gole go tloga bjaneng, O boletše gore e be e sa nyake dineo tša moya tša boporofeta, maleme le tsebo. Lege ditho tša mehleng yeno tša phuthego di tšofetše, ga di ikwe di nyaka dineo tše bjalo, di thabela go direla Modimo ka tlase ga tlhahlo ya moya wa gagwe.

Paulo o okeditše ka gore: “Xe e le byale re bôna ka seipone re sa kwa ka nyêpô; mohla woo re tlo bôna rè lebane natšô’. Se ke se tsebaxo byale ké boripanyana fêla. Mohla woo ke tlo tseba moka bo-ka le nna xe ke tsebilwe moka.” (1 Ba-Korinthe 13:12) Ge phuthego e sa le bjaneng e be e le nako ya Modimo ya go utolla dilo tše dingwe. Ka gona, ba be ba bona makgarikgari bjale ka ge o ka re Bakriste ba be ba lebelela ka seiponeng sa tšhipi seo se sa bonagatšego gabotse. (Ditiro 1:​6, 7) Eupja re fetile ponong ya makgarikgari. Phethagalo ya boporofeta le mohuta wa bjona di bonagala gabotse ka gobane ye ke nako ya Modimo ya kutollo. (Psalme 97:​11; Daniele 2:​28) Lege Paulo ka boyena a tsebile Modimo, tlhora ya tsebo ya go tseba Jehofa le tswalano ya kgaufsi kudu le Yena di be di tla tla ge moapostola a tla be a tsošetšwa bophelong bja legodimo, ka go rialo a hwetša moputso o feletšego wa tsela ya gagwe ya Bokriste.

Ge a fetša kakaretšo ya gagwe e kopana ya lerato, Paulo o ngwadile gore: “Ké moka, di šalaxo di le xôna ké tumêlô, le kholofêlô le leratô, tše tharo tšé. Xomme se sexolo mo xo tšôna ké leratô.” (1 Ba-Korinthe 13:13) Go sa šetšwe go se be gona ga dineo tša moya tša mohlolo, phuthego ga bjale e na le tsebo e feletšego kudu le lebaka la go ba le tumelo e kgolo, kholofelo le lerato. E na le tumelo ya gore selo se sengwe le se sengwe seo Modimo a se holofeditšego go bjalo ka ge e ka se phethegile. (Ba-Hebere 11:1) Dikarolo tša tumelo di tla fela ge dilo tše di boletšwego e sa le pele Lentšung la Modimo di phethagala. Dibopego tša kholofelo di tla kgaotša ge re bona dilo tše di letetšwego. Eupja lerato le tla šala le le gona ka mo go sa felego. Ka gona, anke Dihlatse tša Jehofa ka moka di tšweleng pele di latela tsela e phalago tšohle ya lerato.