Kgaolo 73

Mo-Samaria wa Kgaugelo

MO GONGWE Jesu o kgaufsi le Bethania, e lego motse wo o ka bago bokgole bja dikhilomithara tše tharo go tloga Jerusalema. Monna yo e lego setsebi sa Molao wa Moše o tla go yena ka potšišo, o re: “Moruti, bophelô byo bo sa felexo ke tlo bo rua xe ke dira’ng?”

Jesu o lemoga gore monna yo yo e lego ramolao, ga a botšiše feela ka go nyaka go tseba eupja, go e na le moo, ke ka gobane a nyaka go mo leka. Maikemišetšo a ramolao mo gongwe ke go nyaka go dira gore Jesu a arabe ka tsela e tlago go kgopiša maikwelo a ba-Juda. Ka gona Jesu o dira gore ramolao a itlame ka go mmotšiša gore: “Xo ngwadilwe’ng Molaong? O bala’ng?”

Ramolao ge a araba o bontšha go ba le temogo e makatšago ka go tsopola melao ya Modimo e lego go Doiteronomio 6:⁠5 le Lefitiko 19:​18 gomme a re: “Morena Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka matla a xaxo ka moka, le ka thlaoloxanyô ya xaxo ka moka; le wa xeno O mo ratê ka mokxwa wo O ithataxo ka wôna.”

Jesu o araba ka gore, “O fetotše ka xôna; dira seo, ké mo O tl’o xo phela.”

Lega go le bjalo, ramolao ga se a kgotsofala. Karabo ya Jesu ke e sa lebanyago go yena. O nyaka kgonthišetšo e tšwago go Jesu ya gore kgopolo ya gagwe e nepagetše le gore ka go rialo o swara batho ba bangwe ka tsela ya go loka. Ka gona o a botšiša: “Xomme wa xešo ké mang?”

Ba-Juda ba dumela gore lentšu “wa xweno” le dira feela go ba-Juda ba gabo bona bjalo ka ge taba e dikologilego Lefitiko 19:​18 e bonala e šupa seo. Ge e le gabotse, ka morago gaešita le moapostola Petro o ile a re: “Le a tseba; monna wa Mo-Juda xa xo a mo swanêla xe a ka kôpana le motho wa mohuta o šele.” Ka gona ramolao, mo gongwe gotee le barutiwa ba Jesu, ba dumela gore ba lokile ge e ba ba swara ba-Juda ba gabo bona feela ka botho ka ge ka go ya ka kgopolo ya bona batho bao e sego ba-Juda e se ba gabo bona.

Ka ntle le go kgopiša batheetši ba gagwe, Jesu o be a ka lokiša bjang kgopolo ya bona? O ba botša taba yeo mo gongwe e theilwego tiragalong ya kgonthe. Jesu o hlalosa gore, “Motho e mongwê [mo-Juda] ó be a foloxa à e-⁠tšwa Jerusalêma a ya Jeriko; ’me a wêla xare xa bahlakodi. Ba mo hlobodiša, ba mo nthša dinthô, ba ikêla, ba mo tloxêla à le makxatheng.”

Jesu o tšwela pele ka gore, “Xwa tla moperisita à foloxa ka tsela yeo; a re xo mmôna a aroxa a feta. Xwa tla le Mo-Lefi; xe a fihla felô fao, a mmôna a aroxa a feta. Monna wa Samaria, e a bexo a êta a tla moo a mmôna a mo xauxêla.”

Baperisita ba bantši le bathuši ba bona ba tempeleng ba ba-Lefi ba dula Jeriko, yeo e lego bokgoleng bja dikhilomithara tše 23 tseleng e kotsi yeo e theogelago ka dimithara tše 900 go tloga moo ba šomago gona tempeleng ya Jerusalema. Moperisita gotee le mo-Lefi ba be ba tla letelwa gore ba thuše mo-Juda wa gabo bona yo a lego tlalelong. Eupja ga ba mo thuše. Go e na le moo, o thušwa ke mo-Samaria. Ba-Juda ba hloile ba-Samaria kudu mo e lego gore ba sa tšwa go goboša Jesu ka mantšu a matla ka go mmitša “Mo-Samaria.”

Mo-Samaria o thuša mo-Juda ka go dira’ng? Jesu o re, “A batamêla, a mo tlêmêlêla dinthô à di thšetše makhura le beine; a mo nametša lekaba la xaxwe, a mo iša ngwakong wa baeti, a mo ôkêla xôna. Ka bosasa xe a tloxa a ntšha mašeleng a mabedi, [moputso wa matšatši a ka bago a mabedi], a a nea mong wa ngwakô, a re, Mo ôkê; se O tl’o xo mo nthšetša sôna sa fetiša seo, O tlo bušetšwa xe ke boa.”

Ka morago ga go anega taba, Jesu o botšiša ramolao: “Byale xe O bôna, xo ba bararo bao ké ofe a tlilexo a ba wa xabô-eo wa xo wêla xare xa bahlakodi?”

Ka baka la go ikwa a sa hunologa go phagamiša mo-Samaria lege e ka ba ka tsela efe, ramolao o araba gabonolo ka gore: “Ké e a mo dirilexo ka kxauxêlô.”

Jesu o phetha ka gore, “Sepela, O y’o dira ka mokxwa woo le wene.”

Ge Jesu a ka be a ile a botša ramolao ka go lebanya gore bao e sego ba-Juda le bona e be e le ba gabo, ga se feela gore monna a ka be a se a ka a amogela se eupja bontši bja batheetši mo gongwe bo be bo tla ema le yena poledišanong ya gagwe le Jesu. Lega go le bjalo, taba ye ye e lego ya kgonthe e ile ya ba molaleng ka tsela ye e ka se kego ya ganetšwa gore ba gabo rena ba akaretša le batho bao e sego ba morafo wa gabo rena goba setšhaba. A tsela e botse gakaakang ya go ruta yeo Jesu a nago le yona! Luka 10:​25-37; Ditiro 10:​28; Johane 4:⁠9; 8:⁠48.

▪ Ke dipotšišo dife tšeo ramolao a di botšišago Jesu, gomme go bonala lebaka la gagwe la go botšiša e le lefe?

▪ Ba-Juda ba dumela gore motho wa gabo bona ke mang, gomme go na le lebaka lefe la go dumela gore gaešita le barutiwa ba na le kgopolo ye?

▪ Jesu o fetišetša bjang kgopolo e nepagetšego ka tsela yeo ramolao a ka se kego a e ganetša?