Ba Dirile Thato Ya Jehofa

Mo-Samaria o Itlhatsela e le Moagišani yo Botse

MEHLENG ya Jesu, go be go na le lehloyo le legolo magareng ga ba-Juda le Ba-ntle. Ge nako e dutše e e-ya, Mishnah ya Sejuda e ile ya ba ya akaretša molao wo o bego o thibela basadi ba ba-Isiraele go thuša bao e sego ba-Juda ge ba belega, ka ge seo se be se tla fo thuša go tliša motho yo mongwe wa Ba-ntle gape lefaseng.—Abodah Zarah 2:1.

Ba-Samaria ba be ba tswalane le ba-Juda kgaufsi kudu go feta Ba-ntle, bobedi ka bodumedi le ka morafo. Lega go le bjalo, le bona ba be ba bonwa e le balahlwa. Moapostola Johane o ngwadile gore: “Ba-Juda xa ba kxônane le Ba-Samaria.” (Johane 4:9) Ka kgonthe, Talmud e be e ruta gore “lerathana la senkgwa leo le newago ke mo-Samaria le šilafetše kudu go feta nama ya kolobe.” Ba-Juda ba bangwe ba be ba bile ba diriša lentšu “mo-Samaria” e le polelo ya lenyatšo le go nyenyefatša.—Johane 8:48.

Ka baka la boemo bjo, mantšu a Jesu go monna yo a bego a rutegile ka molao wa Sejuda ke a rutago kudu. Monna o ile a batamela Jesu gomme a botšiša gore: “Moruti, bophelô byo bo sa felexo ke tlo bo rua xe ke dira’ng?” Jesu ge a araba o ile a mo hlokomediša Molao wa Moše wo o laelago go ‘rata Morena ka pelo ya gago ka moka, le ka moya wa gago ka moka, le ka matla a gago ka moka, le ka tlhaologanyo ya gago ka moka,’ le go ‘rata wa geno ka mokgwa wo o ithatago ka wona.’ Ke moka ramolao o ile a botšiša Jesu gore: “Xomme wa xešo ké mang?” (Luka 10:25-29; Lefitiko 19:18; Doiteronomio 6:5) Go ya ka Bafarisei lentšu ‘wa xeno’ le be le šoma feela go bao ba bego ba boloka ditšo tša Sejuda—e sego Ba-ntle goba ba-Samaria le gatee. Ge e ba ramolao yo yo a bego a rata go tseba a be a nagana gore Jesu o be a tla thekga pono yeo, o be a tla makala.

Mo-Samaria wa Kwelobohloko

Jesu o ile a araba potšišo ya monna ka go laodiša seswantšho.a O ile a re: “Motho e mongwê ó be a foloxa à e-tšwa Jerusalêma a ya Jeriko.” Bokgole bja magareng ga Jerusalema le Jeriko e be e le dikhilomithara tše ka bago 23. Tsela yeo e bego e kopanya metse ye e mebedi e be e tšama e thinya gomme e e-na le mafsika a dintlha e lego seo se bego se dira gore go be bonolo gore mahodu a utame, a hlasele gomme a tšhabe. Ka ge go ile gwa direga, mosepedi seswantšhong sa Jesu “[o ile] a wêla xare xa bahlakodi. Ba mo hlobodiša, ba mo nthša dinthô, ba ikêla, ba mo tloxêla à le makxatheng.”—Luka 10:30.

Jesu o ile a tšwela pele ka gore: “Xwa tla moperisita à foloxa ka tsela yeo; a re xo mmôna a aroxa a feta. Xwa tla le Mo-Lefi; xe a fihla felô fao, a mmôna a aroxa a feta.” (Luka 10:31, 32) Baperisita le ba-Lefi e be e le barutiši ba Molao—go akaretša le molao wa go rata wa geno. (Lefitiko 10:8-11; Doiteronomio 33:1, 10) Ka kgonthe, gare ga batho ka moka, ke bona nka bego ba ile ba kwa ba gapeletšega go thuša mosepedi yo a gobetšego.

Jesu o ile a tšwela pele ka gore: “Monna wa Samaria, e a bexo a êta a tla moo a mmôna.” Ga go na pelaelo gore go bolelwa ga mo-Samaria go ile gwa emiša ditsebe tša ramolao. Na Jesu o be a tla gatelela pono e sa lokago ka morafo wo? Ka mo go fapanego, ge a bona mosepedi yo madimabe, mo-Samaria o ile “a mo xauxêla.” Jesu a re: “A batamêla, a mo tlêmêlêla dinthô à di thšetše makhura le beine; a mo nametša lekaba la xaxwe, a mo iša ngwakong wa baeti, a mo ôkêla xôna.b Ka bosasa xe a tloxa, a nthša mašeleng a mabedi, a a nea mong wa ngwakô, a re: Mo ôkê; se O tl’o xo mo nthšetša sôna sa fetiša seo, O tlo bušetšwa xe ke boa.”—Luka 10:33-35.

Bjale Jesu o ile a botšiša motho yo a bego a nyaka go tseba: “Bjale xe o bôna, xo ba bararo bao ké ofe a tlilexo a ba wa xabô-eo wa xo wêla xare xa bahlakodi?” Ramolao o be a tseba karabo, eupša go bonagala a be a sa nyake go re “mo-Samaria.” Go e na le moo, o ile a fo re: “Ké e a mo dirilexo ka kxauxêlô.” Ke moka Jesu a re: “Sepela, O y’o dira ka mokxwa woo le wene.”—Luka 10:36, 37.

Thuto go Rena

Monna yo a ilego a botšiša Jesu o be a dira bjalo ka boiteko bja “go itokafatša.” (Luka 10:29, PK) Mohlomongwe o be a nagana gore Jesu o be a tla reta go kgomarela ga gagwe Molao wa Moše mo go feteletšego. Eupša motho yo yo a bego a ikgogomoša o be a swanetše go ithuta therešo ya seema sa Beibele se se rego: “Motho tsela tš’axwe tšohle ó re di lokile; xe e le Morêna ó hlatha dipelo.”—Diema 21:2.

Seswantšho sa Jesu se bontšha gore motho yo a lokilego e le ka kgonthe ga se yo a kwago melao ya Modimo feela eupša gape o ekiša dika tša gagwe. (Ba-Efeso 5:1) Ka mohlala, Beibele e re botša gore “Modimo xa a bebe motho.” (Ditiro 10:34) Na re ekiša Modimo tabeng ye? Seswantšho sa Jesu se se tutuetšago se bontšha gore go ba le bogwera ga rena go swanetše go fenya mapheko a tša botšhaba, setlogo le bodumedi. Ka kgonthe, Bakriste ba laelwa go ‘direla batho bohle botse’—e sego feela batho bao e lego ba sehlopha se tee sa tša leago, morafo goba setšhaba le gona e sego feela go badumedi-gotee. (Mongwalo o sekamego ke wa rena.)—Ba-Galatia 6:10.

Dihlatse tša Jehofa di katanela go latela keletšo ye ya Mangwalo. Ka mohlala, ge dikotsi tša tlhago di direga, di nea thušo ya setho go badumedi-gotee le go bao e sego Dihlatse.c Go oketša moo, e le sehlopha di fetša diiri tše di fetago dimilione tše sekete ngwaga o mongwe le o mongwe di thuša batho gore ba fihlele tsebo e kaone ya Beibele. Di katanela go fihlelela yo mongwe le yo mongwe ka molaetša wa Mmušo, ka gobane thato ya Modimo ke gore “batho bohle ba phološwê ba fihlêlê tsebô ya therešô.”—1 Timotheo 2:4; Ditiro 10:35.

[Mengwalo ya tlase]