Thabiša Jehofa go Bontšha Botho

“Se Morêna a se nyakaxo xo wene: Ké xo dira tokô, ké xo rata botho; ké xo sepela le Modimo w’axo Ò n’e boipoetšô.”​—MIKA 6:8.

1. Ke ka baka la’ng re sa swanela go makatšwa ke gore Jehofa o letetše gore batho ba gagwe ba bontšhe botho?

JEHOFA o letetše gore batho ba gagwe ba bontšhe botho. Se ga se sa swanela go re makatša. Modimo ka boyena ke yo botho go bohle, gaešita le go batho ba kgopo bao ba sa lebogego. Tabeng ye Jesu Kriste o boditše barutiwa ba gagwe gore: “Sa lena a e bê xo rata manaba a lena, le xo setša le xo adima mo Le sa holofelexo xo boêlwa. Ké mo moputsô wa lena e tl’o xo ba o montši, la tlo ba bana ba Yo-xodimo-dimo, xobane Yêna le ba ba sa leboxexo, le ba babe, ó ba dira ka botho. Bang baxauxedi bo-ka Tata-weno xe e le moxauxedi.”​—Luka 6:​35, 36.

2. Ke dipotšišo dife mabapi le botho tšeo re swanetšego go di ela hloko?

² Bjalo ka ge Mika 6:8 e bolela, bao ba sepelago le Modimo ba tloga ba swanetše go “rata botho.” Go molaleng gore Jehofa o a thaba ge bahlanka ba gagwe ba rata botho gomme ba bo bontšha ka go tšwa pelong. Eupja botho ke’ng? Ke mehola efe yeo e tlišwago ke go bo bontšha? Le gona seka se se ka bontšhwa bjang?

Seo Botho bo Lego Sona

3. O be o ka hlalosa botho bjang?

³ Botho ke seka sa go bontšha kgahlego go ba bangwe ka mediro. Bo bontšhwa ka ditiro tša go thuša le ka mantšu a go naganela. Go ba yo botho go bolela go dira botse go e na le selo lege e le sefe seo se gobatšago. Motho yo botho o na le bogwera, o bonolo, o na le kwelobohloko gomme o a gaugela. O na le kgopolo yeo e sego ya boithati ya go naganela go ba bangwe. Le gona botho ke karolo ya sebopego sa seaparo sa seswantšhetšo sa Mokriste o mongwe le o mongwe wa therešo, ka gobane Paulo o kgothaditše ka gore: “Aparang kxauxêlô le botho le boikokobetšô le bolêta le xo se fêle pelo.”​—Ba-Kolose 3:12.

4. Jehofa e bile wa pele bjang go bontšheng botho go batho?

⁴ Jehofa ke wa pele go bontšheng botho. Bjalo ka ge moapostola Paulo a boletše, e bile ‘mola go bonagetše botho bja Modimo, Mophološi wa rena, le lerato la gagwe go batho’ moo ‘a re phološitšego ka kgaugelo ya gagwe, ka hlatso ya go tswalwa la bobedi, le ya mpshafatšo ya Moya o mokgethwa.’ (Tito 3:​4, 5, PK) Modimo o hlwekiša goba o ‘hlatswa’ Bakriste ba tloditšwego mading a Jesu, a diriša mohola wa sehlabelo sa Kriste sa topollo bakeng sa bona. Gape ba mpshafatšwa ka moya o mokgethwa, ba ba “mmopya e mofsa” e le barwa ba Modimo bao ba tswetšwego ka moya. (2 Ba-Korinthe 5:​17) Ee, botho bja Modimo le lerato la gagwe bakeng sa batho gape di katologela go “lešaba le lexolo” la ditšhaba ka moka, leo le ‘hlatswitšego diaparo tša lona la di tagafatša mading a Kwana.’ (Kutollo 7:​9, 14; 1 Johane 2:​1, 2) Go feta moo, batlotšwa le lešaba le legolo leo le nago le kholofelo ya lefaseng ka moka ba ka tlase ga joko ya Jesu “e botho.”​—Mateo 11:30, NW.

5. Ke ka baka la’ng re swanetše go letela bao ba hlahlwago ke moya wa Modimo gore ba bontšhe botho go ba bangwe?

⁵ Gape botho ke karolo ya dienywa tša moya o mokgethwa wa Modimo, goba matla ao a šomago. Paulo o itše: “Dienywa tša Môya, tšôna ké leratô, le lethabô, le moláô; ké xo se fêle pelo, le botho, le bonôlô, le pôtêxô le bolêta, le boithswarô. Tše byalo xa di xanwe ke Molaô.” (Ba-Galatia 5:​22, 23) Ka gona, ke’ng seo re swanetšego go se letela go bao ba hlahlwago ke moya wa Modimo? Ka kgonthe ba tla bontšha botho go ba bangwe.

6. Botho bo swanetše go dira gore bagolo le Bakriste ba bangwe ba itshware ka tsela efe?

⁶ Botho bo ka bontšhwa ka ditsela tše dintši. Re bontšha botho ge re e-na le kgaugelo. Ka mohlala, bagolo ba Bakriste ba bontšha botho ge ba gaugela mofoši yo a itsholago gomme ba tsoma go mo thuša moyeng. Seka seo se neilwego ke Modimo sa botho se dira gore balebeledi e be bao ba kgotlelelago, bao ba naganelago, bao ba nago le kwelobohloko le ba bonolo. Se ba tutueletša go ‘setša mohlape.’ (Ditiro 20:​28, 29) Ge e le gabotse, seenywa sa moya sa botho se swanetše go dira gore Bakriste ka moka e be ba gaugelago, ba kgotlelelago, ba naganelago, ba nago le kwelobohloko, ba nago le bogwera le bao ba amogelago baeng.

Phema Botho bjo bo Fošagetšego

7. Ke ka baka la’ng o ka bolela gore botho bjo bo fošagetšego ke bofokodi?

⁷ Batho ba bangwe ba lebelela botho e le bofokodi. Ba nagana gore motho e swanetše go ba yo a se nago kwelobohloko gaešita le yo bogale ka dinako tše dingwe e le gore ba bangwe ba kgotse matla a gagwe. Eupja go boletšwe gabotse gore “kgalefo ke mokgwa woo ka wona monna yo a fokolago a lekago go bontšha matla.” Ge e le gabotse, bobedi go ba yo botho e le ka kgonthe le go phema botho bjo bo fošagetšego go nyaka matla a kgonthe. Botho bjo e lego seenywa sa moya wa Modimo ga se kgopolo e fokolago le e kwanantšhago mabapi le boitshwaro bjo bo fošagetšego. Go e na le moo, botho bjo bo fošagetšego ke bofokodi bjo bo dirago gore motho a tlogelele phošo.

8. (a) Mabapi le barwa ba gagwe, Eli o itlhatsetše bjang e le yo a sa tiago? (b) Ke ka baka la’ng bagolo ba swanetše go ela hloko gore ba se ineele bothong bjo bo fošagetšego?

⁸ Moperisita o mogolo wa Isiraele e lego Eli e be e le yo a sa tiago ge a laya barwa ba gagwe, e lego Hofini le Pinehase bao ba bego ba beilwe ka molao e le baperisita taberenakeleng. Ka baka la go se kgotsofatšwe ke karolo ya sehlabelo yeo ba e neilwego go ya ka Molao wa Modimo, ba ile ba bea mohlokomedi yo a nyakago nama e tala go monei wa sehlabelo pele ga ge makhura a sebego a ka tšhungwa aletareng. Gape barwa ba Eli ba be ba e-ba le dikopano tšeo di gobogilego le basadi bao ba hlankelago mojakong wa taberenakele. Lega go le bjalo, go e na le go tloša Hofini le Pinehase maemong ao, Eli o ile a fo ba kgalemela ka boleta, a hlompha barwa ba gagwe go feta Modimo. (1 Samuele 2:​12-29) Ga go makatše ge “mehleng yeo Lentšu la Modimo le be le hlôkwa”! (1 Samuele 3:1) Ka gona bagolo ba Bakriste ga se ba swanela go ineela kgopolong e fošagetšego goba go bontšheng botho bjo bo fošagetšego bjo bo ka beago bomoya bja phuthego kotsing. Botho bja kgonthe ga se bjo bo foufaletšego mantšu a mabe le ditiro tšeo di robago ditekanyetšo tša Modimo.

9. (a) Ke kgopolo efe yeo e ka re thušago go phema go ineela bothong bjo bo fošagetšego? (b) Jesu o bontšhitše bjang matla ge a fetolana le badumedi ba bahlanogi?

⁹ Ge e ba re tla phema go bontšha botho bjo bo fošagetšego, re swanetše go rapelela thušo ya Modimo gore re be le matla a swanago le ao a tšweletšego mantšung a mopsalme: “Bakxôpô ntloxeleng! Nna ke xomarêla ditaêlô tša Modimo wa-ka.” (Psalme 119:​115) Gape re swanetše go latela mohlala wa Jesu Kriste yo a bego a se na molato wa go bontšha botho bjo bo fošagetšego. Ge e le gabotse, Jesu e be e le mothofatšo wa botho bja kgonthe. Ka mohlala, ‘o ile a bona mašaba a batho a ba šokela; ka gobane ba be ba lapile, ba lahlegile wa dinku tše di se nago modiši.’ Ka gona, batho ba dipelo tše di botegago ba ile ba ikwa ba lokologile go batamela Jesu, gaešita le go tliša bana ba bona ba banyenyane go yena. Anke o akanye ka botho le kwelobohloko tšeo a di bontšhitšego ge a be “a ba xokara, a ba bea diatla a ba šexofatša.” (Mateo 9:​36; Mareka 10:​13-16) Gaešita lege Jesu e be e le yo botho, ruri o be a tsepame ka seo e lego se se lokilego mahlong a Tatagwe wa legodimong. Le ka mohla Jesu ga se a ka a tlogelela bobe; o be a e-na le matla ao a a neilwego ke Modimo a go nyatša baetapele ba baikaketši ba bodumedi. Go Mateo 23:​13-26, o ile a boeletša polelo ya kahlolo ka makga a mantši: “Le ba madi-mabe lena ba-mangwalô le bafarisei, lena baikaketši.” Lekgeng le lengwe le le lengwe, Jesu o ile a nea lebaka bakeng sa kahlolo ya Modimo.

Botho bo Kgokaganywa le Lerato

10. Barutiwa ba Jesu ba bontšha bjang botho le lerato go badumedi-gotee le bona?

¹⁰ Mabapi le balatedi ba gagwe, Jesu o itše: “Seo bohle ba tl’o xo tseba ka sôna xe Le le barutiwa ba-ka, kè xe Le na le leratanô.” (Johane 13:​35) Ka gona sebopego se sengwe sa lerato leo le hlaolago barutiwa ba therešo ba Jesu ke sefe? Paulo o itše: “Leratô xa le fêle pelo. Leratô ké le botho.” (1 Ba-Korinthe 13:4) Go ba bao ba sa felego pelo le ba botho go bolela gore re kgotlelele mefokolo le diphošo tša ba bangwe, bjalo ka ge Jehofa a dira ka botho bjo bokaakaa. (Psalme 103:​10-14; Ba-Roma 2:4; 2 Petro 3:​9, 15) Lerato la Bokriste le botho gape di iponagatša ge badumedi-gotee ba hlaselwa ke mathata lefelong le lengwe lefaseng. Ba arabela ka seo se fetišago “botho bja batho,” Bakriste mafelong a mangwe ba bontšha lerato la borwarre ka go neela dilo tše di bonagalago bakeng sa go thuša barapedi ba bjalo ba Jehofa.​—Ditiro 28:2, NW.

11. Ge re bolela go ya ka Mangwalo, botho bjo lerato ke eng?

¹¹ Botho bo kgokaganywa le lerato polelong e rego “botho bjo lerato,” yeo gantši e dirišwago Mangwalong ka go New World Translation. Bjo ke botho bjo bo tšwago leratong le le botegago. Leina la Sehebere leo le fetoletšwego e le “botho bjo lerato” (cheʹsedh) le akaretša se se fetišago go lebelela ka maikwelo a lerato. Ke botho bjo bo ikgokaganyago ka lerato le selo go fihlela ge morero wo o lego mabapi le sona o phethilwe. Botho bja Jehofa bjo lerato, goba lerato le le botegago, bo bontšhwa ka ditsela tše di fapa-fapanego. Ka mohlala, bo bontšhwa ditirong tša gagwe tša go lopolla le go šireletša.​—Psalme 6:4; 40:​11; 143:12.

12. Ge bahlanka ba Jehofa ba rapelela thušo goba topollo, ke’ng seo ba ka kgonthišegago ka sona?

¹² Ga go makatše ge botho bja Jehofa bjo lerato bo gogela batho go yena! (Jeremia 31:3) Ge bahlanka bao ba botegago ba Modimo ba nyaka topollo goba thušo, ba a tseba gore botho bja gagwe bjo lerato ka kgonthe ke lerato le le botegago leo le ka se kego la ba tlogela kgakanegong. Ka gona, ba ka rapela ka tumelo, go etša ge go dirile mopsalme yo a itšego: “Xe e le nna, se ke se bôtaxo ké botho bya xaxo [bjo lerato, NW]; pelo ya-ka e tlo hlalala xe O mphološitše.” (Psalme 13:5) Ka ge lerato la Modimo e le le le botegago, bahlanka ba gagwe ga ba bote botho bja gagwe bjo lerato ka lefeela. Ge ba rapelela thušo goba topollo, ba na le kgonthišego ye: “Xomme Morêna xa’ lahle sethšaba sa xaxwe, ’me naxa ya xaxwe a ka se e tloxêle.”​—Psalme 94:14.

Meputso ya Botho

13, 14. Ke ka baka la’ng motho yo botho a e-na le bagwera ba potego?

¹³ Ka go ekiša Jehofa, bahlanka ba gagwe ba “dirana ka botho bjo lerato le ka dikgaugelo.” (Sakaria 7:9, NW; Ba-Efeso 5:1) “Se se kgahlišago ka motho wa lefaseng ke botho bja gagwe bjo lerato,” gomme motho yo a bontšhago seka se o buna meputso e megolo. (Diema 19:​22) E mengwe ya ye ke efe?

¹⁴ Botho bo re dira gore re be ba bohlale ka go rialo bja re thuša go boloka tswalano e botse le ba bangwe. Motho yo bohlale o bolela le go dira dilo goba go lebeletšana le maemo a thata ka ditsela tša go naganela le tšeo di sa kgopišego. Mola “motho yo šoro” a furalelwa, “motho yo a nago le botho bjo lerato o dirišana le moya wa gagwe ka mo go putsago.” (Diema 11:​17, NW) Batho ba široga motho yo šoro eupja ba gogelwa go yo a ba bontšhago botho bjo lerato. Ka gona, motho yo botho o na le bagwera ba potego.​—Diema 18:24.

15. Botho bo ka ba le mohola ofe ka lapeng leo le aroganego bodumeding?

¹⁵ Mosadi wa Mokriste yo a nago le molekane yo a sa dumelego a ka mo gogela therešong ya Modimo ka seka se bjalo sa botho. Pele a ithuta therešo le go “apara motho o mofsa yo a bopilwego go ya ka thato ya Modimo go lokeng le potegong ya makgonthe,” mo gongwe e ka ba e be e le yo a se nago botho, gaešita le wa manganga. (Ba-Efeso 4:​24, NW) Ge nkabe monna wa gagwe a be a tseba diema tše dingwe, o be a ka ba a ile a dumela ka mo go swanetšego gore “mangangá a mosadi ké matlôbôtlôbô a sa kxaotšexo,” gomme “xo dula lešokeng xo phala xo dula le mosadi wa swele le manganga.” (Diema 19:​13; 21:​19) Eupja bjale boitshwaro bjo bobotse bja mosadi wa Mokriste le tlhompho e kgolo, gotee le dika tšeo di swanago le botho di ka thuša go rua molekane wa gagwe tumelong ya therešo. (1 Petro 3:​1, 2) Ee, se e ka ba moputso o mongwe bakeng sa botho bja gagwe.

16. Re ka holwa bjang ke botho bjo bo bontšhwago go rena?

¹⁶ Botho bjo bo bontšhwago go rena e ka ba bjo bo holago ka go dira gore re be bao ba nago le kwelobohloko le bao ba lebalelago ka mo go oketšegilego. Ka mohlala, ge e ba re be re nyaka thušo ya moya gomme ra swarwa ka botho le ka bonolo, na seo se be se ka se re dire bao ba ikemišeditšego kudu go dirišana le ba bangwe ka tsela e swanago? Ee, go swarwa ka botho le ka bonolo go ka letelwa go banna bao ba swanelegago moyeng, ka gobane Paulo o ngwadile gore: “Bana bešo, xe motho a thšoxa à wetše molatong, lena ba Le lexo ba Môya, Le mo tsošê ka môya o bonôlô; xomme le lena Le itôtê, xore Le se wêlê molekong.” (Ba-Galatia 6:1) Bagolo bao ba kgethilwego ba bolela ka bonolo le ka botho ge ba nyaka go thuša modumedi-gotee yo a fošago. Lega go le bjalo, go sa šetšwe ge e ba re kile ra amogela thušo e bjalo e botho ka borena goba go se bjalo, ke’ng seo Modimo a se letetšego go bohle bao ba mo hlankelago? Bakriste ka moka ba swanetše go bontšha botho go ba bangwe le gona ba swanetše go kwa keletšo ya Paulo e rego: “Sa lena a e bê xo dirana ka botho le bonôlô, le xo xauxêlana byalo ka xe Modimo le Yêna a Le xauxetše ka Kriste.” (Ba-Efeso 4:​32) Ee, ge e ba re ile ra lebalelwa ke motho o mongwe goba re ile ra thušwa bothateng bja moya ka botho, se se swanetše go oketša tekanyo ya rena ka noši ya go lebalela, kwelobohloko le botho.

Leboga Botho bja Modimo bjo bo sa Swanelago

17. Ka ge re belegwe re le badiradibe, ke botho bofe bjo re swanetšego go bo leboga ka mo go kgethegilego?

¹⁷ Ka ge ka moka ga rena re belegwe re le badiradibe bao ba ahloletšwego lehu, go na le botho bjo re swanetšego go bo leboga ka mo go kgethegilego. Ke botho bja Jehofa Modimo bjo bo sa swanelago. Gore badiradibe ba lokollwe kahlolong ya lehu gomme ba bolelwe e le bao ba lokilego ke botho bjo bo tlogago bo sa swanela. Paulo yo a boletšego botho bja Modimo bjo bo sa swanelago ka makga a 90 mangwalong a gagwe a 14 ao a buduletšwego ke Modimo go ya ka New World Translation, o boditše Bakriste kua Roma ya bogologolo gore: “Ba dirile dibe bohle gomme ba hlaelelwa ke letago la Modimo, ka gona ke mpho e sa lefelelwego ge ba bolelwa e le bao ba lokilego ka botho bja gagwe bjo bo sa swanelago ka go lokollwa ka topollo yeo e lefilwego ka Kriste Jesu.” (Ba-Roma 3:​23, 24) Re swanetše go leboga gakaakang botho bjo bo sa swanelago bjo bo bontšhwago ke Jehofa Modimo!

18, 19. Re ka phema bjang go lahlegelwa ke morero wa botho bja Modimo bjo bo sa swanelago?

¹⁸ Ka go ba bao ba sa lebogego, re ka lahlegelwa ke morero wa botho bja Modimo bjo bo sa swanelago. Tabeng ye, Paulo o itše: “Ka gona re batseta bao ba lego legatong la Kriste, go le bjalo ka ge eka Modimo o eletša ka rena. Re kgopela re le baemedi legatong la Kriste gore: ‘Boelanang le Modimo.’ Yo a sa kago a tseba sebe o mo dirile sebe bakeng sa rena, e le gore re be toko ya Modimo ka yena. Re le badirišani ba gagwe, re le eletša gape gore le se ke la amogela botho bja Modimo bjo bo sa swanelago gomme la lahlegelwa ke morero wa bjona. Gobane o re [go Jesaya 49:​8, Septuagint]: ‘Ke go kwele ka lebaka le le swanetšego, gomme ke go thušitše ka letšatši la phološo.’ Bona! Bjale ke lona lebaka le le swanetšego. Bona! Bjale ke letšatši la phološo. Ga re nee lebaka lege e le lefe la go kgopja, e le gore bodiredi bja rena bo se ke bja hwetšwa bo e-na le bosodi; eupja re ipontšha ka ditsela tšohle re le bahlanka ba Modimo.” (2 Ba-Korinthe 5:​20–6:4, NW) Paulo o be a bolela’ng?

¹⁹ Bakriste bao ba tloditšwego ke batseta bao ba lego legatong la Kriste gomme lešaba le legolo ke baemedi ba gagwe. Ba kopane, ba kgothaletša batho gore ba boelane le Modimo e le gore ba hwetše phološo. Paulo o be a sa nyake gore motho lege e le ofe a amogele botho bja Jehofa Modimo bjo bo sa swanelago ka Jesu Kriste gomme a lahlegelwe ke morero wa bjona. Seo se be se ka re diragalela ge nkabe re ile ra palelwa ke go dira modiro woo botho bjo bo sa swanelago bo re dirilego gore re o swanelegele. Ge re e-na le ditswalano tše botse le Modimo re le bao ba boelanego le yena, re tla ba re sa amogele botho bja gagwe bjo bo sa swanelago ka lefeela ge e ba re phethagatša ‘bodiredi bja go bolela poelano. Ka gobane Modimo o boelantše lefase le Yena ka Kriste.’ (2 Ba-Korinthe 5:​18, 19, PK) Gape re tla ba re dira ba bangwe ka botho bjo bogolo kudu ka go ba thuša gore ba boelane le Modimo.

20. Ke’ng seo re tlago go se hlahloba nakong e tlago?

²⁰ Bahlanka ba Jehofa ba diriša nako ya bona le ditšhelete ditirong tša botho ge ba tsoma go thuša batho moyeng ka bodiredi bja Bokriste. Eupja ke’ng seo re ka ithutago sona mehlaleng ya Mangwalo ya go diriša botho? Se se latelago anke re hlahlobeng e mengwe ya yona gomme re ele hloko ditsela tše dingwe tša go thabiša Jehofa ka go bontšha botho.

O be o tla Araba Bjang?

◻ Botho ke’ng?

◻ Re ka phema bjang go ineela bothong bjo bo fošagetšego?

◻ Ke ka baka la’ng batho ba Jehofa ba ka bota botho bja gagwe bjo lerato?

◻ Meputso e mengwe ya botho ke efe?

◻ Re ka se ke ra lahlegelwa ke morero wa botho bja Modimo bjo bo sa swanelago ge re dira eng?

[Seswantšho go letlakala 13]

Re ka dira ba bangwe ka botho bjo bogolo kudu ka go ba thuša gore ba boelane le Modimo

[Seswantšho go letlakala 13]

Botho bo dira gore bagolo ba Bakriste e be bao ba kgotlelelago, bao ba naganelago le bao ba kwelago bohloko

[Seswantšho go letlakala 13]

Botho bja mosadi wa Mokriste bo ka thuša go rua molekane wa gagwe tumelong ya therešo