Diriša “Molao wa Botho” Bophelong Bja Gago

LISA o re: “Bana babo rena le dikgaetšedi ba ile ba mpontšha botho.”a O be a bolela ka seo se dirilego gore a rate ditherešo. Anne le yena o re: “Ke ile ka rata therešo ka ge Dihlatse tša Jehofa di be di mpontšha botho e sego ka baka la seo ba bego ba se ruta.” Gona bjale dikgaetšedi tše tše pedi di thabela go ithuta Beibele le go naganišiša ka yona, eupša ba kgahlilwe kudu ke botho bjo ba ilego ba bontšhwa.

Re ka bontšha batho bao re phelago le bona botho bjang? A re boledišaneng ka ditsela tše tše pedi: Go bontšha botho ge re bolela le ka dilo tšeo re di dirago. Ke moka re kwe gore ke bomang bao re ka ba bontšhago botho.

DIRIŠA “MOLAO WA BOTHO” GE O BOLELA

Mosadi yo go bolelwago ka yena go Diema kgaolo 31 o be a diriša “molao wa botho” ge a bolela. (Die. 31:26) O be a dumelela “molao” wo gore o hlahle tsela yeo a bolelago ka yona. Botate le bona ba swanetše go dumelela “molao” wo gore o ba hlahle. Batswadi ba bantši ba tseba gore ge ba sa bolele gabotse le bana ba bona go ka ba thata gore ba ba theetše. Batswadi ba swanetše go bolela le bana ba bona gabotse gore go be bonolo gore ba ba theetše.

Go sa šetšwe gore o motswadi goba aowa, o ka bontšha bjang botho ka seo o se bolelago? Re bona se go Diema 31:26 yeo e rego: “O bula molomo wa gagwe ka bohlale.” Se se akaretša go kgetha ka bohlale tsela yeo re bolelago ka yona. Gantši go bohlokwa go ipotšiša gore, ‘Na seo ke tlago go se bolela se tla senya ditaba goba se tla dira gore go be le khutšo?’ (Die. 15:1) Re swanetše go nagana pele re bolela.

Go na le seema se sengwe seo se rego: “Go na le yo a bolelago a sa naganišiše ka ge eka o hlaba ka tšhoša.” (Die. 12:18) Ge re ka naganišiša ka tsela yeo mantšu a rena a kgomago ba bangwe ka gona, re tlo kgona go laola tsela yeo re bolelago ka yona. Ge re diriša “molao wa botho” re ka se hlabe ba bangwe ka mantšu. (Baef. 4:31, 32) Go e na le moo re tlo bolela mantšu ao a agago batho ba bangwe le go ba kgothatša. Jehofa o re beetše mohlala tabeng ye ge a be a bolela le mohlanka wa gagwe Eliya yo a bego a tšhogile. Morongwa yo a bego a emela Jehofa o ile “a bolela ka lentšu la tlasana.” (1 Dikg. 19:12) Eupša go ba botho ga go bolele go no bolela ka tsela ya botho. Eupša go bontšhwa le ka ditiro tša botho. Bjang?

DITIRO TŠA BOTHO DI KGOTHATŠA BA BANGWE

Re ekiša Jehofa ka go bolela le go swara batho gabotse. (Baef. 4:32; 5:1, 2) Lisa yo re boletšego ka yena pejana o ile a hlalosa botho bjo a bo bontšhitšwego ke Dihlatse, o itše: “Banyalani ba bangwe ba ile ba se ye mošomong gore ba thuše lapa la gešo go phutha ge re be re gapeletšwa go huduga. Ka nako yeo ke be ke sa ithute Beibele!” Dilo tšeo ba di dirilego di thušitše Lisa gore a thome go nyaka go ithuta therešo.

Anne yo re boletšego ka yena mathomong le yena o ile a thabela botho bjo a ilego a bo bontšhwa ke Dihlatse tše dingwe. O boletše gore: “O be a hwetša go le thata gore a tshepe batho ka lebaka la tsela yeo batho bao ba bego ba sa hlankele Modimo ba bego ba mo swara ka yona.” O tšwela pele ka gore: “Ge ke be ke kopana le Dihlatse tša Jehofa, ke be ke belaela maikemišetšo a tšona. Ke ile ka ipotšiša gore ‘ke ka baka lebaka la eng ba na le taba le nna.’ Eupša motho yo a bego a nthuta Beibele o ile a dira gore ke thome go mo tshepa.” Na go ile gwa ba le mafelelo a mabotse? Anne o re: “Ee ka gobane ke ile ka thoma go nagana kudu ka seo ke ithutago sona.”

Re a bona gore Lisa le Anne ba ile ba kgongwa ke tsela yeo Bakriste ba ilego ba ba bontšha botho ka yona ka phuthegong gomme seo sa dira gore ba nyake go ithuta therešo. Tsela yeo phuthego e ba bontšhitšego botho ka yona e dirile gore ba thome go tshepa Jehofa le batho ba gagwe.

EKIŠA MODIMO GOMME O BONTŠHE BATHO BA BANGWE BOTHO

Batho ba bangwe ba tlwaetše go diriša mantšu gabotse le go semaela ka lebaka la tsela yeo ba godišitšwego ka yona. Tsela yeo batho bao ba itshwarago ka yona e a retega. Eupša go no tlwaela go dira dilo tšeo ka nako e nngwe ga go bontšhe go ekiša botho bja Modimo.—Bapiša le Ditiro 28:2.

Botho bjo bo tšwago go Modimo ke se sengwe sa dika tšeo di enywago ke moya wa Modimo o mokgethwa. (Bagal. 5:22, 23) Ka gona re hloka moya o mokgethwa gore o re thuše go hlagolela seka se e le gore re ekiše Jehofa le Jesu. (Bagal. 5:22, 23) Le gona, go swana le Jesu, re na le taba le batho ba bangwe. Lerato leo re ratago Jehofa le batho ba bangwe ka lona le dira gore re bontšhe botho. Botho bja rena ke seka se matla seo se tšwago pelong seo Modimo a se amogelago.

KE BOMANG BAO RE SWANETŠEGO GO BA BONTŠHA BOTHO?

Go ka bonala eka go bonolo go bontšha botho go batho bao ba go bontšhago bjona goba go bao o ba tsebago. (2 Sam. 2:6) Tsela e nngwe e ka ba ka go ba leboga. (Bakol. 3:15) Eupša re tlo dira eng ge e ba re bona eka motho ga se a swanelwa ke go bontšhwa botho?

Nagana ka taba ye: Jehofa o re beetše mohlala o mogolo tabeng ya go bontšha ba bangwe botho e bile o ngwadile ka lentšung la gagwe bohlokwa bja go bontšha ba bangwe seka se. Polelwana yeo e rego “botho bjo bogolo bja Modimo” e dirišitšwe gantši ka Mangwalong a Bakriste a Segerika. Modimo o re bontšha bjang botho?

Jehofa o bontšhitše batho ba dimilione botho ka go ba nea dilo tšeo ba di hlokago gore ba kgone go phela. (Mat. 5:45) Ge e le gabotse Jehofa o bontšhitše batho botho bja gagwe le pele ba mo tseba. (Baef. 2:4, 5, 8) Ka mohlala, o neelane ka Morwa wa gagwe yo a tswetšwego a nnoši gore e be sehlabelo bakeng sa batho ka moka. Moapostola Paulo o ngwadile gore “Jehofa o re neile topollo “go ya ka mahumo a botho bja gagwe bjo bogolo.” (Baef. 1:7) Go oketša moo, Jehofa o tšwela pele a re hlahla le go re ruta le ge re le badiradibe e bile re mo nyamiša. Mantšu a gagwe a etša “dipula tša mesarasarane.” (Doit. 32:2) Ga go kgonege gore re lefe Jehofa ka lebaka la botho bjo a re bontšhago bjona. Le gona, re a tseba gore ge nkabe Jehofa a se a re bontšha botho bja gagwe bjo bogolo, re be re ka se be le kholofelo ka bokamoso.—Bapiša le 1 Petro 1:13.

Ga re belaele gore botho bja Jehofa ke bjona bo re thušago go bontšha ba bangwe botho. Ka baka la se re šoma ka thata gore re ekiše Jehofa gomme re bontšhe ba bangwe botho. (1 Bathes. 5:15) Ka gona, ga re kgetholle gore ke bomang bao re swanetšego go ba bontšha botho, go ena le moo re ekiša Jehofa ka go bontšha batho ka moka botho maphelong a rena letšatši le letšatši. Ge e ba re bontšha botho, batho ba tlo kgona go re batamela. Re tlo kgona go homotša ditho tša malapa a gabo rena, Bakriste gotee le rena, bao re šomago le bona, bao re tsenago le bona sekolo le baagišani ba rena.

Nagana ka batho ba geno goba ba ka phuthegong ya geno bao ba ka holegago ge o ka ba bontšha botho. Nagana ka motho yo mongwe ka phuthegong ya geno yo a ka bago a hloka thušo, e ka ba ka go hlokomela legae la gagwe, serapana sa gagwe goba go dira mešomo e mengwe e bjalo ka go ya mabenkeleng. Goba na o ka thuša motho yo mongwe yo o kopanago le yena tšhemong yo a hlokago thušo?

Ge re dutše re ekiša Jehofa, anke mantšu a rena le dilo tšeo re di dirago di dule di “hlahlwa ke molao wa botho.”