Modimo

Tlhaloso: Mo-ba-gona yo a Phagamego yo leina la gagwe le le mo kgethollago e lego Jehofa. Leleme la Sehebere le diriša mantšu go “Modimo” ao a neago kgopolo ya matla gotee le bogolo, seriti le tlhompho. Ka go se swane le Modimo wa therešo, ruri go na le medimo ya maaka. E mengwe ya ye e itirile medimo; e mengwe e dirilwe dilo tše di dirišwago borapeding ke batho bao ba e direlago.

Na go na le mabaka a a kwalago a go dumela go Modimo?

Ps. 19:1: “Maxodimo a re anêxêla boxolo bya Modimo; medirô ya ’atla tša xaxwe e rêtwa ke leratadima.”

Ps. 104:24: “[Jehofa], medirô ya xaxo xa se ka boati! O e dirile xohle ka bohlale; lefase le tletše dibopiwa tša xaxo.”

Ba-Roma 1:20, PK: “Tše di sa bonwego tša gagwe, . . . di a bonala ruri go tloga tlholong ya lefase, di fela di lemogiwa mo ditirong.”

Makasine wa New Scientist o itše: “Kgopolo e bolelwago ka go phegelelwa ke ya gore bo-ra-thutamahlale ‘ga ba dumele’ bodumedi. Ke kgopolo yeo gantši go lebeletšwego ka yona bo-ra-thutamahlale gore ke bao e sego badumedi; gore Darwin o ile a kokotela dipikiri tša mafelelo lepokising la Modimo; le gore go hlatlangwa ga ditšweletšwa tša thutamahlale le tša tekinolotši ga e sa le go tloga moo, go fedišitše go kgonega ga tsogo lege e le efe. Ke kgopolo yeo e lego ya phošo e le ka kgonthe.”—May 26, 1977, letl. 478.

Setho sa French Academy of Sciences se boletše gore: “Thulaganyo ya tlhago ga se ya tšweletšwa ke mogopolo wa motho goba go hlongwa ke matla a itšego. . . . Go ba gona ga thulaganyo go bontšha molaleng go ba gona ga morulaganyi yo a hlalefilego. Mohlalefi yo bjalo ga a gona, ge e se feela yena Modimo.”—Dieu existe? Oui (Paris, 1979), Christian Chabanis, e tsopola Pierre-Paul Grassé, letl. 94.

Bo-ra-thutamahlale ba hweditše metswako e ka fetago 100. Kagego ya yona ya diathomo e bontšha go dumelelana mo go raranego ga dipalo ga metswako. Thulaganyo ya metswako yeo e theilwego molaong wo o e laolago e šupa thulaganyo e lego molaleng. Thulaganyo e bjalo e makatšago e be e ka se ke ya ba fela yeo e tlilego ka kotsi, yeo e itšweleditšego.

Seswantšho: Ge re bona khamera, radio goba computer, ruri re dumela gore tše di swanetše go ba di tšweleditšwe ke morulaganyi yo a hlalefilego. Ka gona, na e be e tla ba ga hlaloganyo go bolela gore dilo tše di raranego kudu-kudu, e lego leihlo, tsebe le bjoko bja motho, ga se tša tšweletšwa ke Morulaganyi yo a hlalefilego?

Bona gape le matlakala 417-419, tlase ga hlogo ya ditaba ya “Tlholo.”

Na go ba gona ga bobe le mahloko go bontšha gore ga go na Modimo?

Ela mehlala hloko: Na therešo ya gore dithipa ke tšeo di dirišetšwago go bolaya, e bontšha gore ga go na motho yo a di dirilego? Na go dirišwa ga difofane tše di lahlelago dibomo nakong ya ntwa ke bohlatse bja gore ga di na modiri? Goba, na ke feela go dirišwa mo tše di dirišwago ka gona moo go kwešago batho bohloko?

Na ga se therešo gore malwetši a mantši a tlišwa ke mekgwa yeo motho a phelago ka yona yeo e sego e mebotse, le go itshenyetša yena le ba bangwe tikologo? Na dintwa tšeo di lwiwago ke batho ga se lona lebaka le legolo la mahloko a batho? Na ga se therešo gore gaešita lege batho ba dimilione ba bolawa ke tlala, ruri go na le dijo tše dintši kudu mafaseng a mangwe moo bjo bongwe bja mathata a magolo e lego megabaru ya motho? Dilo tše ka moka di nea bohlatse bjoo e sego bja gore ga go na Modimo, eupja bja gore batho ba senya ka mo go nyamišago matla a bona ao ba a neilwego ke Modimo gotee le lefase.

Na Modimo ruri o hlokomela seo se diregago go rena batho?

Ee, o a hlokomela! Ela hloko bohlatse: Beibele e re botša gore Modimo o ile a nea motho mathomo a phethagetšego. (Gen. 1:27, 31; Doit. 32:4) Lega go le bjalo, go tšwela pele ga motho a thabela kgaugelo ya Modimo go be go tla ithekga ka go kwa ga gagwe Modiri wa gagwe. (Gen. 2:16, 17) Ge e ba motho a be a ile a kwa, gona nkabe a ile a tšwela pele a thabela bophelo bjo bo phethagetšego bjo bo se nago malwetši, mahloko gaešita le ka lehu. Mmopi o be a tla nea motho tlhahlo e swanetšego gomme o be a tla diriša matla a Gagwe go šireletša batho malebana le kotsi lege e le efe. Eupja motho o ile a gana go hlahlwa ke Modimo; a ikgethela tsela ya boipušo. Ka go leka go dira selo seo a bego a se a ka a se bopelwa le ka mohla, ruri o ile a itlišetša kotsi. (Jer. 10:23; Mmo. 8:9; Ba-Roma 5:12) Fela, Modimo ka makgolo a nywaga o be a dutše a nyaka ka go se fele pelo batho bao ka baka la go mo rata le go rata ditsela tša gagwe, ba ratago go mo direla. O beile pele ga bona sebaka sa go thabela ditšhegofatšo ka moka tšeo go se phethege ga motho le go ipuša ga gagwe ka phošo go mo amogilego tšona. (Kut. 21:3-5) Tokišetšo yeo Modimo a e dirilego ka Morwa wa gagwe ya go lopolla batho sebeng le lehung, ke bohlatse bjo bo makatšago bja lerato la gagwe le legolo la go rata batho. (Joh. 3:16) Modimo le gona o beile nako yeo ka yona a tlago go senya batho bao ba senyago lefase, gomme o tla dira gore barati ba go loka ba thabele bophelo ka go dumelelana le morero wa gagwe wa mathomo.—Kut. 11:18; Ps. 37:10, 11; bona gape le hlogo ya ditaba e kgolo ya “Mahloko” le “Bokgopo.”

Na Modimo ke motho wa kgonthe?

Ba-Heb. 9:24: “Kriste . . . ó tsene xona-kwa maxodimong, ’me byale ó bonala pele xa sefahloxô sa Modimo ka baka la rena.”

Joh. 4:24: “Modimo ké Môya.”

Joh. 7:28: “[Jesu o itše:] Ó xôna ruri E a nthomilexo.”

1 Ba-Kor. 15:44: “Byalo ka xe xo na le mmele wa nama, le mmele wa môya o xôna.”

Na Modimo o na le maikwelo a mohuta wo re o kgomaganyago le batho ba phelago?

Joh. 16:27: “Tate Yêna Mong ó a Le rata, ka xobane Le nthatile la dumêla xore ke tšwa xo Modimo.”

Jes. 63:9: “Mehlakong ya bôná yohle, ó be a hlaka le Yêna; . . . A ba lokolola ka leratô la xaxwe le ka xo ba hlomoxêla pelo.”

1 Tim. 1:11, NW: “Modimo yo a thabilego.”

Na Modimo o na le mathomo?

Ps. 90:2: “O wa mola dithaba di sešo tša tswalwa, wa mola naxa le lefase di sešo tša tšweletšwa, wa mehla e se naxo mathômô, e se naxo mafêlô; O Modimo.”

Na se se a kwala? Megopolo ya rena e ka se ke ya se hlaloganya ka botlalo. Eupja leo ga se lebaka le le kwalago la go se gana. Ela mehlala hloko: (1) Nako. Ga go na motho yo a ka šupago motsotswaneng o itšego e le mathomo a nako. Ke therešo gore gaešita lege maphelo a rena a fela, fela nako ga e fele. Ga re gane go ba gona ga nako, ka gobane go e-na le dibopego tša yona tšeo re sa di hlaloganyego ka botlalo. Go e na le moo, re sepediša maphelo a rena ka yona. (2) Sebaka. Baithuti ba dinaledi ba hwetša gore sebaka ga se na mathomo goba mafelelo. Ge feela ba dutše ba phuleletša legohleng, e ba moo sebaka se katologelago pele. Ga ba gane seo bohlatse bo se bontšhago; ba bantši ba bolela ka sebaka e le seo e lego sa go ya go ile. Molao wa motheo o swanago o dirišwa le tabeng ya go ba gona ga Modimo.

Mehlala e mengwe: (1) Baithuti ba dinaledi ba re botša gore phišo ya letšatši ge e le gabotse ke di-degree tše 15 000 000 Celsius. Na re gana taba ye ka gobane re ka se ke ra hlaloganya ka botlalo phišo e bjalo e kgolo? (2) Ba re botša gore: Molalatladi wa rena wa dinaledi ke o mogolo kudu moo lehlasedi la seetša leo le sepelago ka dikhilomithara tše 300 000 ka motsotswana, le tlago go tšea nywaga e 100 000 gore le o putlaganye. Na megopolo ya rena e hlaloganya e le ka kgonthe bokgole bjo bo bjalo? Fela, re amogela seo ka gobane bohlatse bja thutamahlale bo a se thekga.

Se se kwalago kudu ke sefe, ruri na ke gore legohle ke le le dirilwego ke Mmopi yo a phelago le o bohlale? goba gore le swanetše go ba le tšweletše feela ka noši ka go tšwa mothopong o sa phelego ka ntle le go hlahlwa ka bohlale? Batho ba bangwe ba dumela kgopolo e boletšwego morago, ka gobane go dumela ka tsela e nngwe go be go tla bolela gore ba tla swanelwa ke go dumela go ba gona ga Mmopi yoo dika tša gagwe di ka se kego tša kwešišwa ka botlalo. Eupja go tsebja gabotse gore bo-ra-thutamahlale ga ba kwešiše ka botlalo kamoo leabela le dirago ka gona dikarolwaneng tše di phelago, leo le bontšhago kamoo tše di tlago go gola ka gona. Le gona ga ba kwešiše ka botlalo kamoo bjoko bja motho bo dirago ka gona. Fela, ke mang yo a tlago go gana go ba gona ga tše? Na ruri re swanetše go lebelela go kwešiša dilo ka moka ka Motho yo e lego o mogolo kudu moo a bego a ka dira gore legohle le be gona gotee le tharano ya lona ka moka le bogolo bjo bo makatšago bja lona?

Na ke gabohlokwa go diriša leina la Modimo?

Ba-Roma 10:13, PK: “E mongwe le e mongwe e a tlo go bitša leina la [Jehofa], o tlo bolokega.”

Hesek. 39:6, PK: “[Batho] ba tlo tseba gobane ke nna Jehofa.”

Jesu o itše go Tatagwe: “Ke ba [balatedi ba gagwe ba therešo] tsebišitše ’ina l’axo; ’me ke sa tlo ba tsebiša lôna.”—Joh. 17:26.

Bona gape le matlakala 210, 211, tlase ga “Jehofa.”

Na ke gabohlokwa gore re direla Modimo ofe ge feela re le bodumeding?

1 Ba-Kor. 10:20, PK: “Dihlabelo tše baditšhaba ba di dirago, ba di direla bo-diabolo, e sego Modimo.”

2 Ba-Kor. 4:4, NW: “Modimo wa tshepedišo ye ya dilo o foufaditše dikgopolo tša bona tša go se dumele, gore ba se ke ba phadimelwa ke seetša sa ditaba tše di lokilego tša letago la Kriste, yo e lego seswantšho sa Modimo.” (Diabolo mo o bolelwa e le “modimo.” Bona 1 Johane 5:19; Kutollo 12:9.)

Mat. 7:22, 23: “Ké ba bantši ka mohla woo bà tl’o xo nthêra ba re: Morêna! Morêna! A xa ra ka ra porofeta ka leina la xaxo? A xa ra ka ra lêlêka meôya e mebe ka leina la xaxo? A xa ra ka ra dira matete ka leina la xaxo? Ké mo Nna ke tl’o xo fetola ka la-ka ka re: Xa ke ešo ka ba ka Le tseba; ntloxeleng lena ba-dira-bokxôpô!” (Gaešita le go ipolela ka go ba Mokriste ga go tiiše gore re direla Modimo wa therešo ka mo go amogelwago.)

Bona le matlakala 72, 73, ka tlase ga hlogo ya ditaba ya “Bodumedi.”

Ge e ba Jehofa e le ‘Modimo o nnoši wa therešo,’ gona Jesu ke “Modimo” wa mohuta ofe?

Jesu ka noši o boletše ka Tatagwe e le “Modimo-dimo Ò le Nnoši [wa therešo].” (Joh. 17:3) Jehofa ka noši o itše: “Xa xo Modimo xe e se Nna.” (Jes. 44:6) Moapostola Paulo ge a ngwalela Bakriste ba therešo o itše: “Xo na le . . . Modimo . . . o tee fêla, Yêna Tata-wešo.” (1 Ba-Kor. 8:5, 6) Jehofa ke yena a nnoši; ga go na e mongwe yo a ngwathelanago boemo bja gagwe le yena. Jehofa o fapane e le ka kgonthe le dilo tše di bjalo tša borapedi tše di swanago le medimo ya diswantšho, batho bao ba rapelwago le ka yena Sathane. Tše ka moka ke medimo ya maaka.

Jesu o bolelwa Mangwalong e le ‘modimo,’ gaešita le go bolelwa e le “Modimo yo matla.” (Joh. 1:1; Jes. 9:5) Eupja ga go na moo a bolelwago gona e le Ra-Matla-ohle, go etša ge Jehofa a le bjalo. (Gen. 17:1) Jesu o bolelwa e le “seetša sa xo tšwa letaxong la Modimo,” eupja Tate ke mothopo wa letago leo. (Ba-Heb. 1:3) Jesu le ka mohla ga se a ka a llela boemo bja Tatagwe. O itše: ‘O tlo khunamela Jehofa Modimo wa gago, o direle Yena a Nnoši.’ (Luka 4:8) O ka “lebôpô le Modimo a lexo ka lôna” gomme Tate o laetše gore “Leineng la Jesu xo khunamê matolo ohle,” gomme se ka moka se dirwa gore ‘go retwe Modimo Tatagwe.’—Ba-Fil. 2:5-11; bona gape le matlakala 215-220.

Ge e ba o Mongwe a Bolela Gore

‘Ga ke dumele Modimo’

Mo gongwe o ka araba ka gore: ‘Na ka mehla o bile ka yona tsela yeo? . . . Pele ga ge o ka ba le kgopolo ye, ruri na o ile wa hlahloba sehlopha sa bohlatse bjo o hwetšago gore bo go gapeletša go dira bjalo?’ Mo gongwe o ka oketša ka gore: ‘Ye ke taba yeo e nkgahlišago kudu gomme ke e etše hloko kudu. Dintlha tše dingwe tšeo ke hweditšego di thuša kudu ke tše: . . . (Letlakaleng 332, hle bona sehlogwana se se rego “Na go na le mabaka a kwalago a go dumela Modimo?” gape bona le matlakala 417-419, tlase ga “Tlholo.”)

Goba o ka re: ‘Na o bolela gore ga o dumele gore go na le Mmopi, goba na ke ka gobane o bone boikaketši bjo bogolo kudu dikerekeng moo o sa dumelego seo di se rutago?’ Ge e ba e le taba yeo e boletšwego morago, gona mo gongwe o ka oketša ka gore: ‘Go na le phapano e kgolo kudu magareng a dikereke tša Bojakane le Bokriste bja therešo. Ke therešo gore Bojakane bo hlakišitše batho kudu, eupja Bokriste ga se bja dira bjalo. Bojakane bo lwele dintwa, eupja Bokriste ga se bja dira bjalo. Bojakane bo paletšwe ke go nea tlhahlo ya tshwanelo ya boitshwaro, eupja Bokriste ga se bja dira bjalo. Lentšu la Modimo, Beibele, ga le thekge Bojakane. Go e na le moo, le nyatša Bojakane.’

Tsela e nngwe ya go araba: ‘Ke boledišane gantši ka mo go kgahlišago le ba bangwe bao ba kwago ka tsela yeo o ikwago ka yona. Ba bangwe ba bona ba bolela gore ba ka se ke ba dumela e le ka kgonthe go Modimo, mola go e-na le mahloko a makaakaa le bokgopo lefaseng. Na ke kamoo o ikwago ka gona? (Ge e ba go le bjalo, gona diriša taba ye e lego go letlakala 333, tlase ga sehlogwana se se rego “Na go ba gona ga bokgopo le mahloko go bontšha gore ga go na Modimo?”)’

‘Ke dumela feela seo ke se bonago, gomme ga se ka ka ka bona Modimo le ka mohla’

Mo gongwe o ka araba ka gore: ‘Kgopolo yeo e tlwaetšwe kudu lehono. Go na le lebaka bakeng sa yona. Re phela lekokong leo le gatelelago kudu mahumo a dilo tše di bonagalago. Eupja o motho yo a ratago go ela dilo hloko, na ga o yena?’ Mo gongwe o ka oketša ka gore: (1) ‘Na go na le dilo tše dingwe tšeo re ka se kego ra di bona ka mahlo a rena, eupja e le tšeo re dumelago gore di gona ka baka la mabaka a kwalago a go dira bjalo? Go thwe’ng ka moya wo re o hemago? Re ka o kwa ge o foka. Re ka bolela gore o tlatša maswafo a rena gaešita lege re sa o bone. Eupja ka gobane re bona dilo tšeo di dirwago ke wona, ruri go na le lebaka le le botse la go dumela go wona, na ga go bjalo?’ (2) ‘Re ka se ke ra bona matla-kgogedi. Eupja ge re wiša selo se sengwe re bona bohlatse bja gore matla-kgogedi a gona. Le gona ga re bone menkgo, eupja dinko tša rena di a e dupelela. Re ka se ke ra bona medumo, eupja ditsebe tša rena di a e-kwa. Ka gona, re dumela dilong tšeo re sa di bonego ge feela go e-na le lebaka le le botse la go dira bjalo, na ga go bjalo?’ (3) ‘Na go na le bohlatse bja gore Modimo e a sa bonagalego o gona e le ka kgonthe? (Diriša taba e lego matlakaleng 332, 333, tlase ga sehlogwana se se rego “Na go na le mabaka a a kwalago a go dumela go Modimo?”)’

‘Ke na le kgopolo ya-ka ka Modimo’

Mo gongwe o ka araba ka gore: ‘Ke thabela go kwa gore o motho yo a etšego taba ye hloko, le gore o dumela go Modimo. Na nka go botšiša, Kgopolo ya gago ke efe ka Modimo?’ Mo gongwe o ka oketša ka gore: ‘Ke holofela gore o lemoga gore ke gabohlokwa go tiiša gore eng le eng yeo re e dumelago ke yeo e dumelelanago le seo Modimo ka noši a se bolelago. Na nka abelana le wena ntlha ka e tee feela e tšwago Beibeleng ka taba ye? (Ek. 6:3)’