Kahlolo E Phethwa Moeding Wa Kahlolo

“A ditšhaba . . . di tle moeding wa Josafate; gobane ntshe ke tlo dulela go ahlola ditšhaba.”—JOELE 3:12, PK.

1. Ke ka baka la’ng Joele a bona mašaba a bokane ‘moeding wa kahlolo’?

“ŠE-AO mašaba, mašaba a moedi wa kahlôlô”! Re bala mantšu ao a huduago maikwelo go Joele 3:14. Ke ka baka la’ng mašaba a a bokane? Joele o a araba: “Le kxaufsi, ’tšatši la Morêna.” Ke letšatši le legolo la go itwela ga Jehofa—letšatši la go phetha kahlolo go mašaba a gannego Mmušo o hlomilwego wa Modimo ka tlase ga Kriste Jesu. Mafelelong, “Barongwa ba banê” ba Kutollo kgaolo 7 ba swanelwa ke go lokolla go ngaparela ga bona “diphefô tše nnê tša lefase,” e lego seo se feleletšago ka “ma-setla-pelo . . . a maxolo, a a sešoxo a bônwa xo tloxa mola lefase lè thôma xo ba xôna, a a ka se kexo a ba xôna le ka mohla o mongwê.”—Kutollo 7:1; Mateo 24:21.

2. (a) Ke ka baka la’ng lefelo la go phetha kahlolo ya Jehofa le bitšwa ‘moedi wa Josafate’ ka mo go swanetšego? (b) Josafate o ile a arabela ka mo go swanetšego bjang ge a be a hlaselwa?

² Go Joele 3:12 (PK), lefelo la go phethwa mo ga kahlolo le bitšwa ‘moedi wa Josafate.’ Ka mo go swanetšego, lebakeng la khuduego la historing ya Juda, Jehofa o ile a phetha kahlolo moo legatong la Kgoši Josafate wa go loka yoo leina la gagwe le bolelago gore “Jehofa ke Moahlodi.” Go ela hloko seo se ilego sa direga nakong yeo go tla re thuša go lemoga kaone seo se lego kgaufsi le go direga mehleng ya rena. Pego e hwetšwa go 2 Koronika kgaolo 20. Temaneng ya pele ya kgaolo yeo re bala gore “xwa rotoxa Ba-Moaba, bà na le ba-Amoni, le ba bangwê ba mohuta wa bôná, ba tla xo lwa le Josafate.” Josafate o ile a arabela bjang? O ile a dira seo bahlanka ba botegago ba Jehofa ba se dirago ka mehla ge ba le mathateng. O ile a retologela go Jehofa bakeng sa tlhahlo, a rapela ka go tšwa pelong ka gore: “Modimo wa rena! A O ka se ahlole wa ba lahla naa? Xobane rena xa re na matla xe xo fihla mašaba a makaakaa a re šwahlêla. Xa re tsebe se re kaxo se dira mahlô a rena a lebeletše Wêna.”—2 Koronika 20:12.

Jehofa o Araba Thapelo

3. Ke ditaelo dife tšeo Jehofa a ilego a di nea Juda ge e be e lebeletšane le tlhaselo ya dinaga tša baagišani?

³ Mola “ba-Juda ka moka ba eme pele xa Morêna, le bana ba bôná le basadi ba bôná, le barwa ba bôná,” Jehofa a nea karabelo ya gagwe. (2 Koronika 20:13) Go fo swana le ge a diriša “molaki [wa gagwe] e a bôtêxaxo yo bohlale” lehono, Mokwi yo mogolo wa dithapelo o ile a nea moporofeta wa mo-Lefi e lego Jehasiele matla a gore a nee karabo ya Gagwe go bao ba bego ba bokane. (Mateo 24:45) Re bala gore: “Morêna ó bolêla le lena ó re: Le se kê la boifa mašaba a makaakaa á; Le se kê la a thšoxa; xobane ntwa xa se ya lena, ké ya Modimo. . . . Xa se lena Le tl’o xo hlabana fao. Le batamêlê Le êmê, Le bônê xe Morêna a phološa, à na le lena, . . . Le se kê la boifa; Le se kê la ba thšoxa. Ka moswana Le ba tšwêlê. Morêna ó tlo ba le lena.”—2 Koronika 20:15-17.

4. Ke ka tsela efe moo Jehofa a ilego a nyaka batho ba gagwe gore ba dire se sengwe, e sego gore ba phuthe matsogo ge ba lebeletšane le tlhohlo ya lenaba?

⁴ Jehofa o be a nyaka mo go oketšegilego go Kgoši Josafate le batho ba gagwe go feta gore ba fo dula le go phutha matsogo, ba letetše go phološwa ka mohlolo. Ba be ba swanetše go gata mogato wa pele go lebeletšaneng le tlhohlo ya lenaba. Kgoši le ‘ba-Juda ka moka le bana ba bona le basadi ba bona le barwa ba bona,’ ba ile ba bontšha tumelo e matla ge ka go kwa ba tsoga e sa le ka pela mesong gomme ba gwanta go ya go gahlana le makoko ao a hlaselago. Tseleng kgoši e ile ya tšwela pele e nea tlhahlo ya pušo ya Modimo le kgothatšo, ya ba tutuetša ka gore: “Bôtang Morêna Modimo wa lena; dumêlang baporofeta ba xaxwe, ké mo Le tl’o xo atlêxa.” (2 Koronika 20:20) Go dumela Jehofa! Go dumela baporofeta ba gagwe! Mo ke moo go bego go letše senotlelo sa katlego. Ka mo go swanago le lehono, ge re dutše re tšwela pele re le mafolofolo tirelong ya Jehofa, eka le ka mohla re se ke ra belaela gore o tla dira gore tumelo ya rena e be e fenyago!

5. Dihlatse tša Jehofa lehono ke tšeo di nago le mafolofolo bjang ge di tumiša Jehofa?

⁵ Ka go swana le ba-Juda ba mehleng ya Josafate, re swanetše “[go leboga] Morêna, xobane ké yo botse, yo botho bya neng le neng!” Re mo nea theto ye bjang? Ka go bolela ga rena ka Mmušo ka mafolofolo! Go swana le ge ba-Juda bao ‘ba ile ba ya le megobo le ditheto,’ re okeletša mediro tumelong ya rena. (2 Koronika 20:21, 22) Ee, anke re bontšheng tumelo e swanago e tiilego ge Jehofa a dutše a lokišetša go gata mogato malebana le manaba a gagwe! Gaešita le ge tsela e ka bonala e le e telele, a re ikemišetšeng go kgotlelela, re le mafolofolo tumelong, go fo swana le ge batho ba gagwe ba fenyago ba dira bjalo mafelong a dubegilego a lefase lehono. Dinageng tše dingwe tšeo di hlasetšwego o šoro ke tlaišo, bošoro, tlala le maemo a šoro a tša boiphedišo, bahlanka ba botegago ba Modimo ba thabela mafelelo a makatšago, go etša ge 1998 Yearbook of Jehovah’s Witnesses e bega.

Jehofa o Phološa Batho ba Gagwe

6. Tumelo e tiilego e re thuša bjang gore re be ba botegago ka go se kwanantšhe lehono?

⁶ Ditšhaba tšeo di sa boifego Modimo tšeo di bego di dikologile Juda di ile tša leka go metša batho ba Modimo, eupša ka tumelo e beago mohlala bahlanka ba Jehofa ba ile ba arabela ka go opela ditumišo tša gagwe. Re ka bontšha tumelo e swanago lehono. Ka go tlatša maphelo a rena ka mediro ya go tumiša Jehofa, re matlafatša ditlhamo tša rena tša moya, ra se tlogelele maano a boradia a Sathane go šwahlela. (Ba-Efeso 6:11) Tumelo e tiilego e tla thibela teko ya go arošwa ke boithabišo bjo bo gobogilego, go rata dilo tše di bonagalago le go se šetše mo go hlaolago lefase le le hwago leo le re dikologilego. Tumelo ye yeo e sa fenyegego e tla re boloka re hlankela le “molaki e a bôtêxaxo yo bohlale” ka potego e sa kwanantšhego ge re dutše re fepša ka mo go tšwelago pele ka dijo tša moya tšeo di newago “ka lebaka la xôna.”—Mateo 24:45.

7. Dihlatse tša Jehofa di arabetše bjang ditlhaselong tše fapa-fapanego malebana le tšona?

⁷ Tumelo ya rena yeo e theilwego Beibeleng e tla re matlafaletša go ema re tiile malebana le masolo a lehloyo ao a hlohleletšwago ke bao ba bontšhago moya wa ‘molaki yo mobe’ wa Mateo 24:48-51. Go phethagatša boporofeta bjo ka tsela e makatšago, bahlanogi ka mafolofolo ba bjala maaka le mabarebare dinageng tše dintši lehono, ba bile ba ikgweranya le ba bangwe bao ba lego maemong a taolo gare ga ditšhaba. Moo go swanetšego, Dihlatse tša Jehofa di arabetše bjalo ka ge go hlalositšwe go Ba-Filipi 1:7 (NW), ka go ‘lwela le go hloma ditaba tše di lokilego ka molao.’ Ka mohlala ka September 26, 1996, molatong o tšwago Gerika, baahlodi ba senyane ba Kgoro ya Tsheko ya Yuropa ya Ditokelo tša Batho, kua Strasbourg ba ile ba tiiša lefsa ka lentšu le tee gore “Dihlatse tša Jehofa di wela ka tlase ga tlhaloso ya ‘bodumedi bjo bo tsebjago,’” bjo bo swanelwago ke go ba le tokologo ya kgopolo, ya letswalo le ya tumelo gotee le tshwanelo ya go tsebatša tumelo ya tšona. Ge e le ka bahlanogi, kahlolo ya Modimo e re: “Ba dira tše seêma se rerešaxo xe se re: Mpya e boetše mahlatšeng a yôna; kolobê e hlapetše xo y’o phsikoloxa leraxeng.”—2 Petro 2:22.

8. Mehleng ya Josafate, Jehofa o ile a phetha bjang kahlolo malebana le manaba a batho ba Gagwe?

⁸ Morago kua mehleng ya Josafate, Jehofa o ile a phetha kahlolo malebana le bao ba bego ba nyaka go kweša batho ba Gagwe bohloko. Re bala gore: “Morêna [a ba] a šetše a nthšitše ba sekhung, ba lwa le Ba-Amoni le Ba-Moaba le ba dithabeng tša Seire, ba ba bexo ba tlile xo lwa le Juda, ba ba bolaya. Ba-Amoni le Ba-Moaba ba hlanoxêla bála ba dithabeng tša Seire, ba ba bolaya ba ba fediša; ya re xe ba fedišitše ba dithabeng tša Seire, ba senyana seng sa bôná ba bolayana.” (2 Koronika 20:22, 23) Batho ba Judea ba ile ba bitša lefelo leo Moedi wa Beraka, Beraka yeo e bolelago “Tšhegofatšo.” Le mehleng ya lehono, go phetha ga Jehofa kahlolo godimo ga manaba a gagwe go tla feleletša ka ditšhegofatšo tše dikgolo bakeng sa batho ba gagwe ka noši.

9, 10. Ke bomang bao ba ipontšhitšego ba swanelwa ke kahlolo e sehlogo ya Jehofa?

⁹ Mo gongwe re ka botšiša gore, Ke bomang bao mehleng yeno ba tlago go hwetša kahlolo e sehlogo e tšwago go Jehofa? Gore re hwetše karabo ya potšišo yeo, re swanetše go boela boporofeteng bja Joele. Joele 3:3 (PK) e bolela ka manaba a batho ba gagwe ao a ‘bego a tla tšea mošemanyana, a putsa seotswa ka yena, gomme a reka beine ka ngwanenyana.’ Ee, a lebelela bahlanka ba Modimo e le ba lego ka tlase kudu go ona, bana ba bona ba se na le mohola wa go feta le go hirwa ga seotswa goba tefo ya senwelo sa beine. Ba tla swanelwa ke go ikarabela ka seo.

¹⁰ Bao ba swanetšwego ke kahlolo ka mo go swanago le bona ke bao ba dirago bootswa bja moya. (Kutollo 17:3-6) Bao ba solegago ka mo go kgethegilego ke bao ba tutuetšago mebušo ya dipolitiki gore e tlaiše Dihlatse tša Jehofa le go šitiša modiro wa tšona, go swana le ge baetapele ba bangwe ba bodumedi ba bahlola-mpherefere ba dirile Bohlabela bja Yuropa morago bjale. Jehofa o bolela maikemišetšo a gagwe a go gata mogato malebana le badiri ba bokgopo.—Joele 3:4-8.

“Kgethagatšang Ntwa!”

11. Jehofa o hlohla manaba a gagwe gore a tsene ntweng bjang?

¹¹ Se se latelago Jehofa o laletša batho ba gagwe gore ba bolele tlhohlo gare ga ditšhaba: “Kgethagatšang ntwa! Tsošang banna ba matla! A ba batamele! A ba tle, banna ka moka ba ntwa!” (Joele 3:9, NW) Ye ke tsebišo ya ntwa e sa tlwaelegago—ntwa ya toko. Dihlatse tše di botegago tša Jehofa di ithekgile ka dibetša tša moya ge di ikarabela go mabarebare a maaka, di lwantšha maaka ka therešo. (2 Ba-Korinthe 10:4; Ba-Efeso 6:17) Go se go ye kae Modimo o tla kgethagatša “[ntwa] ya mohla-moxolo wa Modimo Ra-matla-ohle.” (Kutollo 16:14) E tla tloša lefaseng baganetši ka moka ba bogoši bja Modimo. Batho ba gagwe ba lefaseng ba ka se ke ba ba le karolo ka tsela ya kgonthe go yona. Ka tsela ya kgonthe le ya seswantšhetšo ba “[tšere] dithšoša ba rula mexomá ka tšôna, ba tšea marumô ba rula maxwêtla ka ôna.” (Jesaya 2:4) Ka mo go fapanego, Jehofa o hlohla ditšhaba tše di ganetšago gore di dire se se fapanego: “Batolang mexoma Le dirê dithšoša, le dithipa tša lena Le dirê marumô.” (Joele 3:10) O di laletša gore di diriše mokgobo wa tšona ka moka wa metšhene ya ntwa le ditlhamo tša mehleng yeno ntweng. Eupša di ka se ke tša atlega, ka gobane ntwa le phenyo ke tša Jehofa!

12, 13. (a) Go sa šetšwe go fela ga Ntwa ya Molomo, ditšhaba tše dintši di bontšhitše bjang gore di sa loketše go lwa? (b) Ditšhaba ga se tša itokišeletša’ng?

¹² Mathomong a bo-1990, ditšhaba di ile tša tsebatša gore Ntwa ya Molomo e fedile. Ka baka la seo, na pakane e kgolo ya Ditšhaba tše Kopanego ya khutšo le polokego e fihleletšwe? Le ganyenyane! Ditiragalo tša Burundi, Repabliking ya Pušo ka Batho ya Congo, Iraq, Liberia, Rwanda, Somalia le Yugoslavia ya pele di re botša’ng? Go ya ka mantšu a Jeremia 6:14, di re: “Khutšô! Khutšô! mola xò se khutšô.”

¹³ Gaešita le ge ntwa ya go lebanya e kgaoditše mafelong a mangwe, ditšhaba tšeo e lego ditho tša UN di sa dutše di phenkgišana seng sa tšona ka go tšweletša dibetša tše di raraganego kudu tša ntwa. Tše dingwe di tšwela pele di hlokometše mekgobo ya dibetša tša nuclear. Tše dingwe di dira dibetša tša go fediša batho ka bontši tša dikhemikhale goba tša go ba le ditwatši. Ge ditšhaba tšeo di bokanela lefelong la seswantšhetšo leo le bitšwago Haramagedone, o di hlohla ka gore: “Le sekôka se tlê se re: Ke moxale! Akxofang Lê e-tla, lena dithšaba tša mathokô ohle, Le kxobokaneng!” Ke moka Joele o tsena gare ka kgopelo ya gagwe ka noši ka gore: “’Me Wene Morêna, iša baxale b’axo moo.” (Mongwalo o sekamego ke wa rena.)—Joele 3:10, 11.

Jehofa o Šireletša Bao e Lego ba Gagwe

14. Bagale ba Jehofa ke bomang?

¹⁴ Bagale ba Jehofa ke bomang? Modimo wa therešo o bitšwa “Jehofa wa madira” ka makga a ka bago 280 ka Beibeleng. (2 Dikxoši 3:14, NW) Madira a ke mašaba a barongwa ba legodimo ao a dulago a itokišeditše go dira seo Jehofa a se laelago. Ge ba-Siria ba be ba tsoma go swara Elisa, Jehofa mafelelong o ile a bula mahlo a mohlankedi wa Elisa gore a bone lebaka leo ka lona ba bego ba tla palelwa: “[A] bôna thaba è tletše dipitsi le dikoloi tša mollô, di dikaneditše Elisa thokô tšohle.” (2 Dikxoši 6:17) Jesu o ile a bolela gore o be a ka kgopela Tatagwe “Barongwa ba ba fetišaxo madirá a lesome le metšô e mebedi.” (Mateo 26:53) Ge e hlalosa go kata ga Jesu gore a phethe kahlolo ka Haramagedone Kutollo e re: “Ó latêlwa ke madirá a lexodimong, a ba ba nametšexo ’pitsi tše dithšweu, bà apere mašela a bohlôkwa a mašweu a se naxo dithšila. Molomong wa xaxwe xo tšwa lerumô le le boxale, la xore a ôtlê dithšaba ka lôna, a di dišê ka molamo wa thsipi, ké Yêna a tl’o xo fôtla bofôtlelong bya morara wa boxale bya Modimo le wa kxalefô ya Modimo Ra-matla-ohle.” (Kutollo 19:14, 15) Bofotlelo bjoo bja morara bja seswantšhetšo bo hlaloswa ka mantšu a kwalago e le “[bofotlelo] byo boxolo bya boxale bya Modimo.”—Kutollo 14:17-20.

15. Joele o hlalosa bjang ntwa ya Jehofa malebana le ditšhaba?

¹⁵ Ka gona, Jehofa o araba bjang kgopelo ya Joele ya go tliša bagale ba Modimo ka noši? Ke ka mantšu a a hlalosago gabotse: “A ’thšaba di tsoxê, di tlê moeding wa [Josafate, PK] thsêkô ya Morêna; ka xobane ke tlo dula moo kè ahlola bohle ba-ntlê ba mathokong. Tsenyang thipa, mabêlê a budule! Tlang re fôtlê; bo tletše bofôtlêlô bya morara. Dinkxô di bile di a thšoloxa; xobane mabobe a bôná ké a mantši. Še-ao mašaba, mašaba a moedi wa kahlolô; ka xobane le kxaufsi, ’tšatši la Morêna la kahlôlô. ’Tšatši le kxwedi di a fifala, le dinaledi di feletšwe ke phadimô. Morêna ó bôpa à le Tsione; ó hlaboša lentšu à le Jerusalêma; lexodimo le lefase di a thothomêla.”—Joele 3:12-16.

16. Ke bomang bao ba tlago go akaretšwa gare ga bao Jehofa a phethago kahlolo malebana le bona?

¹⁶ Go fo etša le ge ka mo go kgodišago leina Josafate le bolela gore “Jehofa ke Moahlodi,” ka gona go kgodiša mo go bjalo, Modimo Jehofa o tla lwela bogoši bja gagwe ka mo go tletšego ge a phetha kahlolo. Boporofeta bo hlalosa bao ba hwetšago kahlolo e sehlogo e le ‘mašaba, mašaba a moeding wa kahlolo.’ Bathekgi le ge e le bafe ba sa šaletšego ba bodumedi bja maaka ba tla ba gare ga mašaba ao. Gape bao ba tlago go akaretšwa e tla ba bao ba hlalositšwego go Psalme ya bobedi—e lego ditšhaba, dilete, magoši a lefase le babuši—bao ba ratilego tshepedišo e gobogilego ya lefase le go feta go ‘hlankela Morena ba boifa.’ Ba ba gana ‘go atla morwa.’ (Psalme 2:1, 2, 11, 12) Ga ba amogele Jesu e le Kgoši yeo e dirišanago le Jehofa. Go feta moo, mašaba ao a swaetšwego go fedišwa a tla akaretša batho ka moka bao Kgoši yeo ya letago e tlago go ba ahlola e le “dipudi.” (Mateo 25:33, 41) Ge e le nako ya Jehofa e swanetšego ya go bopa a le Jerusalema ya legodimong, Kgoši ya dikgoši yeo a e kgethilego e tla kata bakeng sa go phetha kahlolo yeo. Legodimo le lefase di tla šišinyega e le ka kgonthe! Lega go le bjalo, re kgonthišetšwa gore: “Sethšaba sa Morêna se tlo hwetša ’thšabêlô sa sôná è le Jehofa, è le Yêna sebô sa Ba-Isiraele.”—Joele 3:16.

17, 18. Ke bomang bao ba hlaolwago e le baphologi ba masetla-pelo a magolo gomme ke maemo afe ao ba tlago go a thabela?

¹⁷ Kutollo 7:9-17 e hlaola bao ba phologago masetla-pelo a magolo e le “lešaba le lexolo” leo le bopilwego ke bao ba bontšhago tumelo matleng a lopollago a madi a Jesu. Ba ba hwetša tšhireletšego letšatšing la Jehofa, mola mašaba a bokanago a boporofeta bja Joele a welwa ke kahlolo e sehlogo. Joele o re go baphologi: “Ké mo Le tl’o xo tseba xe Modimo wa lena è le Nna Jehofa; ke dula Tsione, thabeng e kxêthwa ya-ka,” e lego bodulo bja Jehofa bja legodimong.—Joele 3:17a.

¹⁸ Boporofeta ka morago bo re tsebiša gore tikologo ya Mmušo wa Modimo wa legodimong “e tlo ba motse o mokxêthwa, wo o ka se hlwexo o sepelwa ke ba šele.” (Joele 3:17b) Legodimong le tikologong ya lefaseng ya Mmušo woo wa legodimong go ka se be le batho ba šele, ka gobane bohle ba tla ba ba kopane borapeding bjo bo sekilego.

19. Lethabo la paradeiseng la batho ba Modimo lehono le hlaloswa bjang ke Joele?

¹⁹ Gaešita le lehono, khutšo e kgolo e a buša gare ga batho ba Jehofa mo lefaseng. E le batee, ba tsebatša dikahlolo tša gagwe dinageng tša ka godimo ga tše 230 le ka maleme a fetago 300 a fapa-fapanego. Katlego ya bona e porofetwa gabotse ke Joele gore: “Mehleng yeo dithaba di tlo tlôrôma mananose a morara; ’me meboto e tlo êla mafsi; melapong ya Juda yohle xo tlo êla meetse.” (Joele 3:18) Ee, Jehofa o tla tšwela pele a tšhollela bareti ba gagwe lefaseng motlalo wa ditšhegofatšo tše di thabišago le katlego gotee le moela o oketšegago wa therešo e bohlokwa. Bogoši bja Jehofa bo tla ba bo lwetšwe ka mo go feletšego moeding wa kahlolo, gomme lethabo le tla ata ge a dula ka mo go sa felego gare ga batho ba gagwe ba lopolotšwego.—Kutollo 21:3, 4.

Na o a Gopola?

◻ Jehofa o ile a phološa batho ba gagwe bjang mehleng ya Josafate?

◻ Ke bomang bao Jehofa a ba ahlolago ba swanelwa ke go fedišwa ‘moeding wa kahlolo’?

◻ Bagale ba Modimo ke bomang gomme ke karolo efe yeo ba tlago go e tšea ntweng ya mafelelo?

◻ Barapedi ba botegago ba thabela dilo dife tše di thabišago?

[Seswantšho go letlakala 21]

Juda e ile ya botšwa gore: ‘Le se ke la boifa gobane ntwa ga se ya lena ke ya Modimo’

[Seswantšho go letlakala 23]

Jehofa o hlohla manaba a gagwe gore a ‘batole megoma a e dire ditšhoša’

[Seswantšho go letlakala 24]

Beibele e hlaola lešaba le legolo la baphologi ba masetla-pelo a magolo

[Seswantšho go letlakala 25]