Lethabo le Kgonthišeditšwe!

JESU KRISTE o itše: “Go thabile ba ba lemogago dinyakwa tša bona tša moya.” (Mateo 5:⁠3, NW) Go fapana le bohlale bjo bo tlwaetšwego, Jesu o ile a šupa go kgotsofatšwa ga senyakwa sa motho sa moya e le setswaki se bohlokwa bakeng sa katlego go phegeleleng lethabo go e na le go kgotsofatša dikganyogo tša dilo tše di bonagalago. Mantšu ao a Jesu ge a latelwa, a bjalo ka kgonthišetšo ya lethabo.

Lega go le bjalo, go lemoga dinyakwa tša motho tša moya go bolela se se fetago go fo tseba gore senyakwa se se bjalo se gona. Gantši kudu senyakwa se se sa kgotsofatšwego ke mothopo wa pelaelo le pefelo go e na le go ba wa lethabo. Seema sa Beibele se bea se ka tsela ye: “Sellêlwa-seletetši se lwadiša pelo.” (Diema 13:​12) Ka gona, lethabo le gola ge motho a gata mogato wa go hlaola le go kgotsofatša senyakwa sa gagwe sa moya. Se se ka dirwa bjang?

Mo ke moo Beibele e tsenago gona. Ka baka la’ng? Ka gobane ke yona e nnoši yeo e ka neago dikarabo tša dipotšišo tšeo e lego kgale ba bantši ba nagana ka tšona ba sa hwetše dikarabo tše kgotsofatšago. Ka mohlala, na o kile wa ipotšiša gore, ‘Morero wa bophelo ke eng? Ke ka baka la’ng motho a le lefaseng? Bokamoso bo swere’ng?’ Ka ntle le go nea dikarabo tše kgotsofatšago tša dipotšišo tše gotee le tše dingwe tše dintši, Beibele e bile e nea tlhahlo ya go phela yeo e thušitšego ba dimilione go lebeletšana ka katlego le mathata a raranego ao ka moka ga rena re lebanago le ona lehono le ao gantši a thibelago go tsoma ga rena lethabo. Mopsalme o re: “’Ntšu la [Modimo] ké lebônê la dinaô tša-ka, ké seetša tseleng ya-ka.” (Psalme 119:​105) Ee, Beibele ke tlhahlo e kgonthišeditšwego yeo e ka go thušago gore o atlege go phegeleleng lethabo. Ela hloko mehlala ye e mebedi ya kgonthe bophelong.

Go Tloga Pefelong go ya Lethabong la Lenyalo

Lenyalo e ka ba mothopo wa lethabo goba wa manyami. Ka manyami, go ba bantši ke wa se se boletšwego mafelelong. Lega go le bjalo, keletšo ya Beibele ge e dirišwa e thušitše ba bantši go hwetša lethabo lenyalong leo e kilego ya ba le le se nago lethabo.

Yungk’un le Meihsiu ba bile le phihlelo e bjalo. Yungk’un o ntšha sa mafahleng ka gore: “Nywaga e šupago ya pele ya lenyalo la rena e be e se ya lethabo. Ke be ke fetša nako e nyenyane kudu le mosadi wa-ka le barwedi ba-ka ba babedi. Ge e le gabotse, gantši ke be ke robala lefelong la-ka la mošomo.” Lege ba be ba e-⁠na le sohle seo ba bego ba se nyaka sa dilo tše di bonagalago, ba be ba se ba thaba. Mosadi wa gagwe o oketša ka gore: “Ka ntle le go re nea dilo tše di bonagalago, monna wa-ka o be a tlogeletše ditaba ka moka tša lapa ka diatleng tša-ka. Ke be ke tloga ke hloile seo.” Ba ile ba ba ba nagana ka go arogana.

Yungk’un o be a e-⁠na le mathata a mangwe gape le ba leloko. Ka baka la mathata a nakong e fetilego ka lapeng, o be a se a ka a boledišana le kgaetšedi ya gagwe ka nywaga e šupago. Se se bile bjalo go sa šetšwe gore ba be ba dula bokgole bja dimithara tša ka tlase ga tše lekgolo go yo mongwe le yo mongwe wa bona. Lega go le bjalo, bjale o thabela lenyalo le le thabilego le tswalano e botse le kgaetšedi ya gagwe. Ke ka baka la’ng go bile le phetogo e kgolo gakaakaa?

Yungk’un o hlalosa gore: “Nna le mosadi wa-ka re ile ra thoma go ithuta Beibele le Dihlatse tša Jehofa le go ba gona dibokeng tša tšona tša Beibele tša beke le beke.” Kgaetšedi ya gagwe e ile ya dira se se swanago. Ba ile ba thoma go diriša dilo tšeo ba bego ba ithuta tšona gomme ba makatšwa ke mafelelo a seo. Yungk’un o ile a hwetša mošomo wo o bego o mo dumelela gore a hlokomele e sego feela dinyakwa tša dilo tše di bonagalago tša lapa la gagwe, eupja le dinyakwa tša lona tša moya le tša maikwelo. Bjale ba thabela bophelo bja lethabo le bja botee bja lapa.

O Hweditše Morero Bophelong

Ba ba ithutago ka tlhago ya motho ba boletše gore, gore re thabe re swanetše go ba le lebaka la go phela, e lego morero bophelong. Bophelo bjo bo theilwego go phegeleleng ka boithati dilo tše di bonagalago ga bo kgotsofatše senyakwa se. Lini wa nywaga e 26 o hweditše se e le sa therešo.

O re: “Ke be ke šoma diiri tše 12 ka letšatši ka matšatši a šupago ka beke. Pakane ya-ka e be e le go bula lefelo le legolo la go lokiša meriri.” Lege a be a le kgaufsi le go phethagatša toro ya gagwe, o ile a ikwa gore go na le selo se hlaelago bophelong bja gagwe. “Ke be ke e-⁠hlwa ke ipotšiša ka morero wa bophelo. Na e be e fo ba go šoma gomme wa hwetša tšhelete?”

Ka gona ka letšatši le lengwe motho yo mongwe o ile a tla lebenkeleng la gagwe gomme a mmotšiša potšišo yona yeo a bego a ipotšiša yona. O ile a botšwa gore Beibele e be e ka araba potšišo yeo. Lege a be a se a ka a bala Beibele pele, o ile a dumela go beela iri ka thoko bekeng e nngwe le e nngwe gore a e hlahlobe.

Thutong ya gagwe ya beke le beke, Lini o ile a lemoga gore Beibele e be e boletše e sa le pele dilo tše dintši tšeo a bego a di bona letšatši le lengwe le le lengwe. O be a makaditšwe ke kamoo Beibele e bego e hlalositše ka go nepa ka gona e sa le pele ka ditshekamelo tše di bego di mo dikologilego, e bolela e sa le pele gore “batho e tlo ba ba xo ithata, ba mexabaru, [barati ba tšhelete, NW], ba lenyatšô le baikxoxomoši, le ba maroxa, le ba xo se kwe batswadi, ba xo se leboxe, ba xo se ile selô. E tlo ba ba-hlala-leratô, babata-sekxoro, e tlo ba dihwirihwiri, le ba ba sa tsebexo xo ithswara, manaba a tše boló; e tlo ba baeki, baipuši, baikxanthši ba xo iphsina ba lahlile Modimo.” O ile a ithuta ka diporofeto tše dingwe tše di šupago tlaišego e sa lekanywego yeo e bakilwego ke dintwa, ditlala le dikotsi tša tlhago tše di bonwago lefaseng ka moka.​—⁠2 Timotheo 3:​1-⁠5; Mateo 24:​7, 12.

Ka gona Lini o ile a ithuta selo se se ilego sa mo thabiša kudu​—⁠maemo a a lefase ao gantši a amogago batho lethabo ke pontšho ya gore mehla e mefsa historing ya motho e kgaufsi. (Mateo 24:​3-14) O ile a ba a bala ka Beibeleng gore Mmopi wa batho o rera go hloma lefase le lefsa mo lefaseng, moo katlego ya dilo tše di bonagalago yeo motho yo a sa phethagalago a sa kago a e bona e tlago go aparela lefaseng ka bophara. (Psalme 72:​16; Jesaya 65:​17, 18, 21, 22) Lefase le le le atlegago la nakong e tlago le ka se ke la senywa ke go ba gona ga megabaru, boithati le go rata dilo tše di bonagalago gotee le ditla-morago tša tšona tše mpe ka moka. (Psalme 37:​9-11, 29; 1 Ba-Korinthe 6:​9, 10) O be a thabile kudu ge a be a bala mantšu a Beibeleng: “Se re se letetšexo ka xo kwa dikholofedišô tša xaxwe ké maxodimo a mafsa le lefase le lefsa, moo xo axilexo tokô.”​—⁠2 Petro 3:⁠13.

O Letetšwe ke Lethabo

Go e na le go fetša nako ya gagwe ka moka a phegelela dipakane tša dilo tše di bonagalago, Lini bjale o fetša nako ya gagwe e ntši a botša ba bangwe ka dilo tšeo a ithutilego tšona. Na o tla rata go tseba mo go oketšegilego ka dikholofetšo tše tše botse? Na o tla rata go ithuta kamoo Beibele e ka go thušago ka gona go hwetša lethabo leo Lini, Yungk’un, Meihsiu le ba bangwe ba dimilione ba le hweditšego? Dihlatse tša Jehofa di tla thabela kudu go go thuša.

Mmopi wa rena o rera go hloma paradeise ya lefaseng