“E A Balaxo A A Di Phafoxêlê”

“Xe Le tlo bôna makxapha a thšwalalanyô, . . . à eme felô xokxêthwa, . . . Xôna ba ba lexo naxeng ya Judea ba thšabêlê dithabeng.”​—MATEO 24:​15, 16.

1. Temošo yeo Jesu a e neilego bjalo ka ge e hwetšwa go Luka 19:​43, 44 e bile le mafelelo afe?

GO PHAFOŠETŠWA ga rena kotsi e tlago go ka re dira gore re kgone go e phema. (Diema 22:3) Ka gona nagana ka boemo bja Bakriste Jerusalema ka morago ga tlhaselo ya ba-Roma ka 66 C.E. Jesu o be a lemošitše gore motse o be o tla dikanetšwa gomme wa senywa. (Luka 19:​43, 44) Ba-Juda ba bantši ba ile ba mo hlokomologa. Eupša barutiwa ba gagwe ba ile ba ela hloko keletšo ya gagwe. Ka baka leo ba ile ba phološwa kotsing ya 70 C.E.

2, 3. Ke ka baka la’ng re swanetše go kgahlegela boporofeta bja Jesu bjo bo begilwego go Mateo 24:​15-21?

² Boporofeteng bjo bo nago le seo bo se bolelago bakeng sa rena lehono, Jesu o lokeleditše pontšho e bopaganego yeo e akaretšago dintwa, tlhaelelo ya dijo, ditšhišinyego tša lefase, leuba la malwetši le go tlaišwa ga Bakriste bao ba bolelago ka Mmušo wa Modimo. (Mateo 24:​4-14; Luka 21:​10-19) Jesu gape o ile a nea sešupo seo se bego se tla thuša barutiwa ba gagwe go tseba gore bofelo bo be bo batametše​—e lego ‘makgapha a tšhwalalanyo a emego felo gokgethwa.’ (Mateo 24:​15) Anke re hlahlobišišeng mantšu ao a bohlokwa gore re bone kamoo a ka kgomago maphelo a rena ka gona, gona bjale le nakong e tlago.

³ Jesu ka morago ga go lokeletša pontšho o itše: “Xe Le tlo bôna makxapha a thšwalalanyô, a a boletšwexo ke Daniele moporofeta à eme felô xokxêthwa (e a balaxo a a di phafoxêlê), xôna ba ba lexo naxeng ya Judea ba thšabêlê dithabeng; e a nametšexo seokamô sa ntlo, a se kê a foloxa a y’o tšea selô mo ntlong ya xaxwe. Le e a lexo mašemong, a se kê a boêla xaê a y’o tšea kobô ya xaxwe. Ba madi-mabe mehleng yeo e tlo ba baima le ba ba amušaxo. Xomme Le rapêlê xore mothšabô wa lena e se bê wa lebaka la marexa le wa letšatši la Sabatha. Xobane ma-setla-pelo a mohla woo e tlo ba a maxolo, a a sešoxo a bônwa xo tloxa mola lefase lè thôma xo ba xôna.”​—Mateo 24:​15-21.

4. Ke’ng seo se bontšhago gore Mateo 24:​15 e ile ya phethagala lekgolong la pele la nywaga?

⁴ Dipego tša Mareka le Luka di nea ditaba tše di tlaleletšago. Moo Mateo a dirišago “à eme felô xokxêthwa,” Mareka 13:​14 e re “à eme mo xo sa swanêlaxo.” Luka 21:​20 e oketša ka mantšu a Jesu a rego: “Xe Le bôna motse wa Jerusalêma ò dikilwe ke makôkô a madirá, xôna Le tsebê xore xo batametše xo phušolwa xa wôna.” Se se re thuša go bona gore go phethagala ga pele go akaretša tlhaselo ya Roma ya go hlasela Jerusalema le tempele ya yona​—yeo e bego e le lefelo le lekgethwa go ba-Juda eupša e be e se sa le lefelo le lekgethwa go Jehofa​—yeo e thomilego ka 66 C.E. Tšhwalalanyo e feletšego e diregile ge ba-Roma ba be ba senya motse gotee le tempele ka 70 C.E. Morago kua “makxapha” e be e le eng? Le gona a ile a ‘ema bjang felo gokgethwa’? Dikarabo tša dipotšišo tše di tla thuša go hlalosa phethagalo ya mehleng yeno ka mo go kwagalago.

5, 6. (a) Ke ka baka la’ng babadi ba Daniele kgaolo 9 ba be ba tla nyaka temogo? (b) Boporofeta bja Jesu mabapi le “makxapha” bo ile bja phethagala bjang?

⁵ Jesu o ile a opeletša babadi gore ba diriše temogo. Babadi ba eng? Go bonala go be go bolelwa ka babadi ba Daniele kgaolo 9. Moo re hwetša boporofeta bjo bo bontšhago nako yeo ka yona Mesia a bego a tla tšwelela le go bolela e sa le pele gore o be a tla “tlošwa” ka morago ga nywaga e meraro le seripa. Boporofeta bo re: “Mosenyi ó tlo tla ka diphêxô tša makxapha; yêna mosenyi a tlo bá a thšoloxêlwa ke kôtlô ye e mmeetšwexo.” (Mongwalo o sekamego ke wa rena.)​—Daniele 9:​26, 27; bona gape le Daniele 11:​31; 12:11.

⁶ Ba-Juda ba be ba nagana gore se se be se šoma tabeng ya go gobošwa ga tempele ke Antiochus IV mo e ka bago nywaga e 200 pele ga moo. Lega go le bjalo, Jesu o ile a bontšha se se fapanego, a opeletša gore go dirišwe temogo ka gobane “makxapha” a be a sa tlile go tšwelela gomme a ema “felô xokxêthwa.” Go molaleng gore Jesu o be a šupa go madira a Roma ao a bego a tla tla ka 66 C.E. ka difoka tše di bonagalago. Difoka tšeo e bego e le kgale di dirišwa di be di nyaka e le medimo ya diswantšho gomme e be e le makgapha go ba-Juda.a Lega go le bjalo, a be a tla ‘ema felo gokgethwa’ neng? Seo se ile sa direga ge madira a Roma ao a bego a swere difoka, a be a hlasela Jerusalema le tempele ya yona yeo ba-Juda ba bego ba e lebelela e le e kgethwa. Ba-Roma ba ile ba ba ba thoma go epolla morako wa tikologong ya tempele. Ruri seo e bego e le kgale e le makgapha bjale se be se eme lefelong le lekgethwa!​—Jesaya 52:1; Mateo 4:5; 27:​53; Ditiro 6:13.

“Makxapha” a Mehleng Yeno

7. Ke boporofeta bofe bja Jesu bjo bo phethagalago mehleng ya rena?

⁷ Ga e sa le go tloga Ntweng ya I ya Lefase re bone go phethagala ka tekanyo e kgolwanyane ga pontšho ya Jesu yeo e begilwego go Mateo kgaolo 24. Lega go le bjalo, gopola mantšu a gagwe a a rego: “Xe Le tlo bôna makxapha a thšwalalanyô . . . à eme felô xokxêthwa, . . . Xôna ba ba lexo naxeng ya Judea ba thšabêlê dithabeng.” (Mateo 24:​15, 16) Karolo ye ya boporofeta e swanetše go phethagala le mehleng ya rena.

8. Dihlatse tša Jehofa di ile tša hlaola bjang “makxapha” a mehleng yeno ka nywaga e mentši?

⁸ Morokami wa January 1, 1921 (wa Seisemane), ge o bontšha kgodišego ya bahlanka ba Jehofa ya gore boporofeta bjo bo be bo tla phethagala, o ile wa lebiša tlhokomelo go bjona mabapi le ditiragalo tša Bohlabela bja Magareng. Ka morago ga moo, Morokami (wa Seisemane) tokollong ya wona ya December 15, 1929, go letlakala 374 o itše: “Tshekamelo ka moka ya Kgwerano ya Ditšhaba ke go dira gore batho ba furalele Modimo le Kriste, ka gona ke sebaki sa tšhwalalanyo, setšweletšwa sa Sathane le selo se se šišimišago mahlong a Modimo.” Ka gona ka 1919 “makxapha” a ile a tšwelela. Ge nako e dutše e e-ya Kgwerano ya Ditšhaba e ile ya šuthelela Ditšhaba tše Kopanego. Ke kgale Dihlatse tša Jehofa di pepentšha mekgatlo ye ya batho ya khutšo e le makgapha mahlong a Modimo.

9, 10. Kwešišo ya pejana ya masetla-pelo a magolo e ile ya tutuetša bjang pono ya rena ka nako yeo ka yona “makxapha” a bego a tla ema felo gokgethwa?

⁹ Sehlogo se se fetilego se akareditše pono e lokišitšwego ya karolo e kgolo ya Mateo dikgaolo 24 le 25. Na go nyakega tlhaloso e itšego mabapi le ‘makgapha a emego felo gokgethwa’? Go bonagala go le bjalo. Boporofeta bja Jesu bo gokaganya kgaufsi-ufsi go ‘ema felo gokgethwa’ le go phulega ga ‘masetla-pelo’ ao a boletšwego e sa le pele. Ka gona, gaešita le ge “makxapha” e le kgale a le gona, fela tswalano magareng ga ‘go ema ga ona felo gokgethwa’ le masetla-pelo a magolo di swanetše go kgoma tsela yeo re naganago ka yona. Di swanetše go e kgoma bjang?

¹⁰ Batho ba Modimo ba kile ba kwešiša gore karolo ya pele ya masetla-pelo a magolo e thomile ka 1914 le gore karolo ya mafelelo e be e tla tla ntweng ya Haramagedone. (Kutollo 16:​14, 16; bapiša le Morokami (wa Seisemane) wa April 1, 1939, letlakala 110.) Ka gona re ka kwešiša lebaka leo ka lona go kilego gwa naganwa gore “makxapha” a mehleng yeno ya morago a swanetše go ba a ile a ema felo gokgethwa gatee-tee ka morago ga Ntwa ya I ya Lefase.

11, 12. Ka 1969, go ile gwa newa pono efe e lokišitšwego ka masetla-pelo a magolo?

¹¹ Lega go le bjalo, re ile ra tla ra bona dilo ka mo go fapanego nywageng ya ka morago. Ka Labone, July 10, 1969, Kopanong ya Ditšhaba-tšhaba ya “Khutšo Lefaseng” yeo e bego e swaretšwe New York City, F. W. Franz, yoo ka nako yeo e bego e le motlatša-mopresidente wa Watch Tower Bible and Tract Society, o ile a nea polelo e šišinyago. Ngwanabo rena Franz ge a boeletša kwešišo ya nakong e fetilego ya boporofeta bja Jesu, o itše: “Go be go neilwe tlhaloso ya gore ‘masetla-pelo a magolo’ a be a thomile ka 1914 C.E. le gore ga se a dumelelwa gore a phethege ka mo go feletšego ka nako yeo, go e na le moo Modimo o ile a kgaotša Ntwa ya I ya Lefase ka November ya 1918. Go tloga ka nako yeo go ya pele Modimo o be a dumelela sebaka bakeng sa modiro wa mašaledi a gagwe a tloditšwego a Bakriste ba kgethilwego pele ga ge a dumelela karolo ya mafelelo ya ‘masetla-pelo a magolo’ e thoma gape ntweng ya Haramagedone.”

¹² Ke moka go ile gwa newa tlhaloso e lokišitšwego kudu e rego: “Bakeng sa go dumelelana le ditiragalo tša lekgolong la pele la nywaga, . . . ‘masetla-pelo a magolo’ a swantšheditšwego ga se a thoma ka 1914 C.E. Go e na le moo, seo se ilego sa diragalela Jerusalema ya mehleng yeno ya seswantšhetšo ka 1914-1918 e be e le feela ‘mathômô a ditlalêlô’ . . . ‘Masetla-pelo a magolo’ a a ka se kego a ba gona gape le ka mohla a se tla, ka gobane a bolela go fedišwa ga mmušo wa lefase wa bodumedi bja maaka (go akaretša le Bojakane) a latelwa ke ‘ntwa ya mohla-mogolo wa Modimo Ra-matla-ohle’ ka Haramagedone.” Se se be se bolela gore masetla-pelo a magolo ka moka a be a se tla.

13. Ke ka baka la’ng e le mo go kwagalago go bolela gore go tla ba le ‘go ema felo gokgethwa’ ga nakong e tlago ga “makxapha”?

¹³ Se se tswalana ka go lebanya le go lemoga nako yeo ka yona “makxapha” a emego felo gokgethwa. Gopola seo se diragetšego lekgolong la pele la nywaga. Ba-Roma ba ile ba hlasela Jerusalema ka 66 C.E., eupša ba goma ka bjako, e lego seo se ilego sa nea “nama” yeo e lego Bakriste sebaka sa go phološwa. (Mateo 24:​22) Ka mo go swanetšego, re letetše gore masetla-pelo a magolo a thome ka bjako, eupša a tla fokotšwa ka baka la bakgethwa ba Modimo. Hlokomela ntlha ye ya motheo: Mohlaleng wa bogologolo, ‘makgapha a emego felo gokgethwa’ a be a tswalanywa le go hlasela ga Roma ka tlase ga Molaodi wa Madira Gallus ka 66 C.E. Tlhaselo ya mehleng yeno ye e swanago le yeo​—e lego go phulega ga masetla-pelo a magolo​—e se tla. Ka gona, “makxapha a thšwalalanyô,” ao a bilego gona ga e sa le go tloga ka 1919, go molaleng gore a sa dutše a tla ema felo gokgethwa.b Se se tla direga bjang? Le gona re ka kgomega bjang?

Tlhaselo ya Nakong e Tlago

14, 15. Kutollo kgaolo 17 e re thuša bjang go kwešiša ditiragalo tšeo di lebišago go Haramagedone?

¹⁴ Puku ya Kutollo e hlalosa tlhaselo e senyago ya nakong e tlago ya go hlaselwa ga bodumedi bja maaka. Kgaolo 17 e bolela ka kahlolo ya Modimo malebana le “Babele o moxolo, Mma xo diotswa le makxapha a lefase”​—mmušo wa lefase wa bodumedi bja maaka. Bojakane bo kgatha tema ya motheo gomme bo ipolela gore bo na le tswalano ya kgwerano le Modimo. (Bapiša le Jeremia 7:4.) Bodumedi bja maaka, go akaretša le Bojakane, ke kgale bo dutše bo dirišana ka mo go sa dumelelwago le “maxoši a lefase” eupša se se tla feleletša ka go šwalalanywa ga madumedi ao. (Kutollo 17:​2, 5) Diatleng tša mang?

¹⁵ Kutollo e hlalosa ka “sebata se sehubedu,” seo se tšwelelago ka nakwana, sa timelela, gomme sa boa. (Kutollo 17:​3, 8) Sebata se se thekgwa ke babuši ba lefase. Ditaba ka botlalo tšeo di neilwego boporofeteng di re thuša go hlaola sebata se sa seswantšhetšo e le mokgatlo wa khutšo wo o thomilego go ba gona ka 1919 e le Kgwerano ya Ditšhaba (“makxapha”) le wo ga bjale e lego Ditšhaba tše Kopanego. Kutollo 17:​16, 17 e bontšha gore Modimo o sa tlile go tsenya dipelong tša babuši ba bangwe ba lefase bao ba tumilego ‘sebateng’ se gore ba šwalalanye mmušo wa lefase wa bodumedi bja maaka. Tlhaselo yeo e swaya go phulega ga masetla-pelo a magolo.

16. Ke ditiragalo dife tše di lemogegago tšeo di lego mabapi le bodumedi tšeo di diregago?

¹⁶ Ka ge masetla-pelo ao a magolo a se tla, na go ‘ema felo gokgethwa’ go sa dutše go e-tla? Go molaleng gore go bjalo. Gaešita le ge “makxapha” a tšweletše mathomong a lekgolong le la nywaga, ka go rialo a bile gona ka nywaga-some e mentši, a tla ema ‘felo gokgethwa’ ka tsela ya moswana-noši kgaufsinyane. Go etša ge balatedi ba lekgolong la pele la nywaga ba Kriste ba swanetše go ba ba ile ba leta ka go fagahla gore ba bone kamoo ‘go ema felo gokgethwa’ go bego go tla direga ka gona le Bakriste ba mehleng yeno ba letile ka go fagahla. Re dumela gore re tla swanelwa ke go letela go phethagala ga kgonthe gore re tle re tsebe ditaba ka moka ka botlalo. Lega go le bjalo, ke mo go lemogegago gore dinageng tše dingwe go šetše go e-na le bonaba bjo bo lemogegago le bjo bo golago malebana le bodumedi. Ditho tše dingwe tša dipolitiki tšeo di lego kgweranong le bao e kilego ya ba Bakriste bao ba ikarotšego bodumeding bja therešo, di hlohleletša bonaba malebana le bodumedi ka kakaretšo le malebana le Bakriste ba therešo ka mo go kgethegilego. (Psalme 94:​20, 21; 1 Timotheo 6:​20, 21) Ka baka leo, mebušo ya bopolitiki gaešita le gona bjale e “hlabana le Kwana,” gomme go etša ge Kutollo 17:​14 e bontšha, ntwa ye e tla loya. Gaešita le ge ba ka se iše Kwana ya Modimo diatla ka go lebanya​—e lego Jesu Kriste a le boemong bja gagwe bjo bo phagamego, bja letago​—ba tla tšwela pele ka go lebiša kganetšo ya bona malebana le barapedi ba therešo ba Modimo, e lego “bakxêthwa” ba gagwe ka mo go kgethegilego. (Daniele 7:​25; bapiša le Ba-Roma 8:​27; Ba-Kolose 1:2; Kutollo 12:​17.) Re na le kgonthišetšo e tšwago go Modimo ya gore Kwana le bao ba nago le yona ba tla fenya.​—Kutollo 19:​11-21.

17. Ka ntle le go bolela ka go tia, re ka re’ng ge e le mabapi le kamoo “makxapha” a tlago go ema ka gona felo gokgethwa?

¹⁷ Re a tseba gore bodumedi bja maaka bo emetšwe ke go šwalalanywa. Babele o Mogolo o “taxilwe ke madi a bakxêthwa” gomme o itirile kgošigadi, eupša go fedišwa gona o tla fedišwa. Tutuetšo e sa hlwekago yeo bo bilego le yona godimo ga dikgoši tša lefase e tla fetoga o šoro ge tswalano e fetoga lehloyo le lešoro go tšwa go ‘dinaka tše lesome tša sebata.’ (Kutollo 17:​6, 16; 18:​7, 8) Ge “sebata se sehubedu” se hlasela seotswa sa bodumedi, “makxapha” a tla be a eme ka tsela ya go hlasela lefelong leo go thwego ke le lekgethwa la Bojakane.c Ka gona, tšhwalalanyo e tla thoma ka Bojakane bjo bo se nago tumelo, bjo bo itšweletšago e le bjo bokgethwa.

‘Go Tšhaba’​—Bjang?

18, 19. Ke mabaka afe a newago bakeng sa go bontšha gore ‘go tšhabela dithabeng’ go ka se bolele go fetoša bodumedi?

¹⁸ Jesu ka morago ga go bolela e sa le pele ka ‘go ema ga makgapha felo gokgethwa,’ o lemošitše bao ba nago le temogo gore ba gate mogato. Na o be a bolela gore nakong yeo ya ge maloba e tla be e le maabane​—ya ge “makxapha” a “eme mo xo sa swanêlaxo”​—batho ba bantši ba tla tšhaba bodumeding bja maaka gomme ba amogela borapedi bja therešo? Le gatee. Ela hloko go phethagala ga pele. Jesu o itše: “Ba ba lexo naxeng ya Juda ba thšabêlê dithabeng. E a nametšexo seokamô sa ntlo, a se kê a foloxa a y’o tšea selô ntlong ya xaxwe. E a lexo mašemong, a se kê a boêla xaê à re ke y’o tšea kobô. Ba madi-mabe mehleng yeo e tlo ba baima le ba amušaxo. Xomme Le rapêlê xore mothšabô wa lena e se bê wa lebaka la marexa.” (Mongwalo o sekamego ke wa rena.)​—Mareka 13:​14-18.

¹⁹ Jesu ga se a bolela gore e be e le feela bao ba bego ba le Jerusalema bao ba bego ba swanelwa ke go tšwa, mo nkego ntlha yeo a bego a nyaka go e gatelela e be e le gore ba be ba swanetše go tšwa lefelong la borapedi bja Sejuda; le gona temošo ya gagwe ga se ya ka ya bolela ka go fetoša bodumedi​—e lego go tšhaba go bja maaka le go amogela bja therešo. Barutiwa ba Jesu ba be ba tloga ba sa nyake temošo mabapi le go tšhaba bodumeding bjo bongwe go ya go bjo bongwe; e be e šetše e le Bakriste ba therešo. Le gona tlhaselo ya 66 C.E. ga se ya tutueletša bao e bego e le balatedi ba tshepedišo ya Sejuda bao ba bego ba le Jerusalema le Judea ka moka gore ba lahle bodumedi bjoo gomme ba amogele Bokriste. Moprofesara Heinrich Graetz o bolela gore bao ba ilego ba rakediša ba-Roma bao ba bego ba tšhaba ba ile ba boela motseng: “Ma-Zealot ao a bego a goeletša dikoša tša phenyo tša ntwa, a ile a boela Jerusalema (ka la 8 October), dipelo tša ona di betha ka kholofelo ya lethabo ya khunologo le boipušo. . . . Na Modimo o be a se a ba thuša ka kgaugelo go etša ge A be a ile a thuša bo-rakgolokhukhu ba bona? Ma-Zealot a be a sa tšhoge selo ka bokamoso.”

20. Bakriste ba pele ba ile ba arabela bjang temošong ya Jesu ya go tšhabela dithabeng?

²⁰ Ka gona palo e nyenyane ya bakgethwa morago kua e gatile bjang mogato ka go dumelelana le keletšo ya Jesu? Ka go tloga Judea le go tšhabela dithabeng ka mošola wa Jorodane, ba ile ba bontšha gore e be e se karolo ya tshepedišo ya Sejuda ka tša bopolitiki goba tša bodumedi. Ba ile ba tlogela mašemo le magae, ba se kgoboketše gaešita le dithoto tšeo di lego ka dintlong tša bona. Ka ge ba be ba kgodišegile ka tšhireletšo le thekgo ya Jehofa, ba ile ba etiša borapedi bja gagwe pele ga selo le ge e le sefe se sengwe seo se bego se ka bonagala se le bohlokwa.​—Mareka 10:​29, 30; Luka 9:​57-62.

21. Ke’ng seo re sa swanelago go se letela ge “makxapha” a hlasela?

²¹ Bjale ela hloko go phethagala ka tekanyo e kgolo. E šetše e le nywaga-some e mentši re opeletša batho gore ba tšwe bodumeding bja maaka gomme ba amogele borapedi bja therešo. (Kutollo 18:​4, 5) Ba dimilione ba dirile bjalo. Boporofeta bja Jesu ga bo bontšhe gore gatee-tee ge masetla-pelo a magolo a phulega, mašaba a tla retologela borapeding bjo bo sekilego; ga go pelaelo gore ga se gwa ba le go sokologa ga ba-Juda e le mašaba ka 66 C.E. Lega go le bjalo, Bakriste ba therešo ba tla ba le tutuetšo e kgolo ya gore ba diriše temošo ya Jesu gomme ba tšhabe.

22. Go diriša ga rena keletšo ya Jesu mabapi le go tšhabela dithabeng go ka akaretša eng?

²² Ga bjale re ka se be le ditaba ka botlalo mabapi le masetla-pelo a magolo, eupša ka mo go kwagalago re ka phetha ka gore tabeng ya rena, go tšhaba mo Jesu a boletšego ka gona go ka se be ka kgopolo ya kgonthe. Batho ba Modimo ba šetše ba le gona lefaseng ka moka, mo e nyakilego go ba kae le kae. Lega go le bjalo, re ka kgodišega gore ge go tšhaba go nyakega, Bakriste ba tla swanelwa ke go tšwela pele ba kgomarela phapano e lego molaleng magareng ga bona le mekgatlo ya bodumedi bja maaka. Gape go bohlokwa gore Jesu o ile a lemoša mabapi le go se boele morago ga motho ntlong ya gagwe bakeng sa go yo tšea dikobo goba dithoto tše dingwe. (Mateo 24:​17, 18) Ka gona, mo gongwe go ka ba go e-na le diteko tše di lego ka pele ge e le mabapi le kamoo re lebelelago dilo tše di bonagalago ka gona; na ke selo se bohlokwa kudu, goba na ke phologo yeo e tlago go tlela bohle bao ba lego ka lehlakoreng la Modimo yeo e lego bohlokwa kudu? Ee, go tšhaba ga rena mo gongwe go ka akaretša go ba le mathata a itšego le go se be le dilo tše dingwe. Re tla swanelwa ke go dira sohle seo se nyakegago, go etša ge go dirile magagabo rena a lekgolong la pele la nywaga ao a ilego a tloga Judea a tšhabela Perea ka mošola wa Jorodane.

23, 24. (a) Ke kae feela moo re tla hwetšago tšhireletšo? (b) Temošo ya Jesu mabapi le ‘makgapha a emego felo gokgethwa’ e swanetše go ba le mafelelo afe go rena?

²³ Re swanetše go kgonthišetša gore sebo sa rena se tšwela pele e le Jehofa le mokgatlo wa gagwe o swanago le thaba. (2 Samuele 22:​2, 3; Psalme 18:2; Daniele 2:​35, 44) Ke gona moo re tlago go hwetša tšhireletšego! Re ka se ke ra ekiša mašaba a batho ao a tlago go tšhabela “mefomeng” gomme ba iphihla “maxaxeng a dithaba”​—e lego mekgatlo ya batho yeo mo gongwe e ka šalago ka lebakanyana ka morago ga ge Babele o Mogolo e šwalalantšwe. (Kutollo 6:​15; 18:​9-11) Ke therešo gore go ka thatafala kudu​—go etša ge go ka ba go bile bjalo ka 66 C.E. go basadi ba baimana bao ba ilego ba tšhaba Judea goba go mang le mang yo a bego a swanelwa ke go sepela boemong bja leratadima bja go tonya le pula. Eupša re ka kgonthišega gore Modimo o tla dira gore go phologa go kgonege. Anke gaešita le gona bjale re tiiše go ithekga ga rena ka Jehofa le Morwa wa gagwe, yo mo nakong ye a bušago e le Kgoši ya Mmušo.

²⁴ Ga go na lebaka la gore re phele ka go boifa seo se tlago go direga. Jesu morago kua o be a sa nyake gore barutiwa ba gagwe ba boife, le gona ga a nyake gore re boife, e ka ba gona bjale goba matšatšing a tlago. O re phafošeditše gore re tle re lokiše dipelo tša rena le menagano ya rena. Go ba gona, Bakriste ba kwago ba ka se ke ba otlwa ge tshenyego e tlela bodumedi bja maaka le tshepedišo ye ka moka e kgopo. Ba tla diriša temogo gomme ba ela hloko temošo ya mabapi le ‘makgapha a emego felo gokgethwa.’ Le gona ba tla gata mogato ka go tia mabapi le tumelo ya bona e sa šišinyegego. Anke le ka mohla re se ke ra lebala seo Jesu a se holofeditšego: “E a tl’o xo tiišetša xo fihla bofelong, ké yêna a tl’o xo phološwa.”​—Mareka 13:13.

[Mengwalo ya tlase]

Na o a Gopola?

◻ “Makxapha a thšwalalanyô” a ile a iponagatša bjang lekgolong la pele la nywaga?

◻ Ke ka baka la’ng e le mo go kwagalago go nagana gore “makxapha” a mehleng yeno a tla ema felo gokgethwa nakong e tlago?

◻ Ke tlhaselo efe yeo e dirwago ke “makxapha” yeo e bolelwago e sa le pele go Kutollo?

◻ Ke ‘go tšhaba’ ga mohuta ofe mo go sa dutšego go ka nyakega go rena?

[Seswantšho go letlakala 16]

Babele o Mogolo e bitšwa “Mma xo diotswa”

[Seswantšho go letlakala 17]

Sebata se sehwibidu sa Kutollo kgaolo 17 ke “makxapha” ao Jesu a boletšego ka ona

[Seswantšho go letlakala 18]

Sebata se sehwibidu se tla etelela pele tlhaselo e šwalalanyago ya go hlasela bodumedi