Dipotšišo tše Tšwago go Babadi

◼ Na Bakriste ba lekgolong la pele la nywaga ba ile ba dumela gore bofelo bja tshepedišo ye e kgopo bo be bo tla tla nakong ya ge ba sa phela?

Balatedi ba Jesu lekgolong la pele la nywaga ba be ba fišegela kudu gore bofelo bo tle. Go etša ge re tla bona, ba bangwe ba bona ba ile ba phetha ka go re bofelo bo be bo le kgaufsi, bo e-tla ka nako yeo. Pono ya bona e ile ya swanelwa ke go lokišwa. Eupja e tloga e se mo gobe go Bakriste, ba morago kua goba ba gona bjale, go dumela e le ka kgonthe gore bofelo bjo bo boletšwego e sa le pele bo swanetše go lebelelwa bo le kgaufsi kudu gotee le go phela letšatši le letšatši ba phafogile bjalo.

Ge a be a araba potšišo ya barutiwa ba gagwe mabapi le “pontšho” (NW) ya go ba gona ga gagwe, Jesu o ba lemošitše gore: “Ké xôna phakxamang, xobane nakô ya xo tla xa Morêna wa lena xa Le e tsebe.” (Mateo 24:3, 42) Go phakgama mo go bjalo go be go swanetše go kgoma mediro ya bona, ka gobane Kriste o okeditše ka go re: “Fêla, Le itôtê xore dipelo tša lena di se kê tša imêlwa ke bohori le xo boiwa, le dipelaêlô tša bophelô byono, ’me letšatši leo la tlo Le wêla sehloxo. . . . Phakxamang-xe, Le fêlê Le rapêla ka mabaka ohle, xore Le hwetšwê Lè loketše xo phônyôkxa tšeo ka moka di tl’o xo dirêxa, le xo tlo êma pele xa Morwa-motho.”—Luka 21:34-36.

Ela hloko gore Jesu o neile keletšo ye kapejana ka morago ga go lokeletša ditiragalo tšeo di bego di tla bopa “pontšho.” Ka gona baapostola ba be ba phafošeditšwe therešo ya gore dilo tše dingwe di be di swanetše go tšwelela historing pele ga bofelo. Lega go le bjalo, dibeke tše sego kae ka morago, ba ile ba botšiša Jesu yo a tsošitšwego gore: “Morêna! Mmušô wa Isiraele a O tlo o tsoša lebakeng leno?” O arabile ka go re: “Xa se taba ya lena xo tseba mehla le mabaka, a Tate a a beilexo ka matla a xaxwe Yêna mong.”—Ditiro 1:6, 7.

Re ka bona go se gore baletedi ba kgaufsi-ufsi ba Jesu ba be ba fagahlela kudu gore bofelo bo tle ka pela mo e lego gore ba ile ba hlokomologa seo a sa tšwago go ba botša sona ka dipontšho tša kgonthe tšeo di bego di swanetše go tšwelela nakong ya go ba gona ga gagwe pele ga bofelo bjoo.

Re hwetša pontšho e nngwe ya go fagahla ga bona mangwalong a moapostola Paulo a yago go Bakriste ba Thesalonika. O ngwadile mo e ka bago ka 50 C.E. gore: “Xe e le tša mabaka ao le tša nakô ya xôna, Bana bešo, xa e sa le tše Le swanetšexo xo ngwalêlwa tšôna. Xobane lena beng Le tseba xabotse xore letšatši leo la Morêna le tlo tla bo-ka lehodu xe le tla bošexo. Byale xomme, a re se keng ra rôbala bo-ka ba bangwê bao. A re phakxameng rè fahloxile.” (1 Ba-Thesalonika 5:1, 2, 6) Ba bangwe ba Bakriste bao ba tloditšwego ka moya ba ile ba tšea seo se bolela gore go ba gona ga Jesu (gotee le letšatši la Jehofa la go ahlola ba kgopo) go be go e-tla kapejana ka nako yeo.

Eupja go be go se bjalo. Ge e le gabotse, Paulo o ba ngwaletše lengwalong la bobedi gore: “Re na le se re Le kxopêlaxo sôna ka ’baka la xo tla xa Mong wa rena Jesu Kriste, le xo tlo bothêlwa xa rena xo Yêna. Re re: Le se kê la fo šišinywa ka pelá la tloxêlana le thlaoloxanyô la xakanthšwa ka tša môya, le ka thutô, le ka lengwalô le ba rexo le tšwa xo rena, xwa tla xwa thwe: Letšatši la Kriste le kxaufsi! Le se kê la xakišwa ke motho le ka mokxwa ofe, xobane letšatši leo le ka se kê la tla xò sešo xwa tla thlanoxô pele, xe xo sešo xwa tšwêlêla yêna motho wa bobe.”—2 Ba-Thesalonika 2:1-3.

Se se be se sa bolele gore ba be ba ka iketla ge e le mabapi le go ba gona ga Jesu gotee le bofelo bja tshepedišo. Ge ngwaga o mongwe le o mongwe o feta, temošo ya Jesu e be e e-ba e kgomago maikwelo go feta lege e le neng pele: “Ké xona phakxamang, xobane nakô ya xo tla xa Morêna wa lena xa Le e tsebe.”

Ka gona, mo e ka bago nywaga e mehlano ka morago ga ge a ngwadile Ba-Thesalonika ba Bobedi, Paulo o ile a ngwala gore: “Ké nakô ya xo tsoxa borokong, xobane xo phološwa xa rena byale ké xôna xò batametše xo fetiša mola rè sa thôma xo dumêla. Bošexo e šetše e le bya matla-xosa, letšatši le kxaufsi. Ké xôna a re apoleng medirô ya lefsifsi, re apareng marumô a seetša.” (Ba-Roma 13:11, 12) Ka morago ga nywaga e mengwe e mehlano, Paulo o ile a eletša Bakriste ba ba-Hebere gore: “Xo rata xore Le se fêlé pelo, xore ka xo dira thatô ya Modimo Le tšeê se Le se holofedišitšwexo. Xo šetše lebakanyana le sexo le kae ké mo xo tl’o xo tla E a boletšwexo a thwe: Ó e-tla! Xomme a ka se diêxe.” (Ba-Hebere 10:36, 37) Ka morago, temaneng ye e lego ya bobedi ka mafelelong ya Kutollo, moapostola Johane o ngwadile gore: “Yêna Mohlatsedi wa ditaba tšé ó re: Xo byalo! Ke tla tloxa kè e-tla!—Amene! Tlaa Morêna Jesu!”—Kutollo 22:20.

Ka mo go sa belaetšego, morago kua Mokriste e be e ka se be yo a fošitšego ge a nagana gore bofelo bo be bo tla tla a sa phela. Le gona ge e ba ka kotsi goba ka mesepelo ya tlhago a be a ka hwa pele ga bofelo, o be a tla ba a phetše a e-na le kgopolo e swanetšego ya go akgofa yeo Jesu le Mangwalo a boduletšwego ba e boletšego.

Se ka moka e tloga e le se se diregago gaešita le go rena, nakong ya bofelo yeo re phelago go yona. Ge re boeletša mantšu a Paulo, re ka se ke ra ganetša gore ‘bjale phološo ya rena e batametše go feta nakong ya ge Bakriste ba pele ba be ba e-ba badumedi gaešita le go feta nakong ya ge rena ka borena re e-ba badumedi. Bošego ke bja matla-gosa; ka kgonthe letšatši le kgaufsi.’

Re be re dutše re kgona go bona historing go tloga Ntweng ya I ya Lefase bohlatse bja kgonthe bo kgobelelana go lekana le thaba, e lego bohlatse bjo bo hlatselago gore re bofelong bja tshepedišo ya dilo. Go e na le go swarega ka go fetišiša ka go fo akanya ka nako yeo bofelo bo tlago go direga ka yona, re swanetše go swarega ka go bolela ditaba tše di lokilego, tšeo di ka phološago maphelo a rena gotee le maphelo a ba bangwe ba bantši.—1 Timotheo 4:16.

Re na le mabaka a tiilego a go letela gore boboledi bjo bo tla phethwa mehleng ya rena. Na seo se bolela gore e tla ba pele go e-tla kgwedi e mpsha, ngwaga o mofsa, ngwaga-some o mofsa, ngwaga-kgolo o mofsa? Ga go motho yo a tsebago, ka gobane Jesu o boletše gore ‘gaešita le barongwa ba legodimo’ ba be ba sa tsebe. (Mateo 24:36) Go oketša moo, ga se ra swanela go tseba ge re sa dutše re dira seo Morena a re laetšego gore re tšwele pele re se dira. Se e lego sa bohlokwa kudu-kudu ke gore thato ya Modimo le modiro di dirwe le gore re be le karolo e tletšego go seo. Ka gona “[re] hwetšwê [re] loketše xo phônyôkxa tšeo ka moka di tl’o xo dirêxa, le xo tlo êma pele xa Morwa-motho.”—Luka 21:36.