Bokamoso bjo bo Bolokegilego, Kamoo o ka bo Hwetšago ka Gona

1. Ke polokego ya mohuta ofe yeo o tlago go e rata go wena le baratiwa ba gago?

BATHO ba mehuta yohle ba na le kganyogo ya kgonthe ka polokego. Ruri, seo ke seo o se nyakago go wena le go baratiwa ba gago. Batho ba bantši ba nyaka se segolo go feta go holofetšwa fela maemo a kaone ao a tlago go tla nakong e itšego e tlago, yeo e sa tsebjego. Go na le mathata a tlago ka lebelo a bophelo, ao a lebanego le rena mo nakong ye. Seo se nyakegago ke selo seo se ka neago polokego ya kgonthe mo nakong ye, gomme e le seo se ka tšwelago pele go e nea gaešita le nywageng e sa tlago. Na polokego e bjalo e a kgonega?

2. (a) Beibele go Jesaya 32:17, 18, e bolela’ng ka polokego? (b) Na maemo a bjalo a go thabiša?

² Go na le batho ba merafo yohle bao ba phelago dikarolong tšohle tša lefase, bao ba dumelago gore e a kgonega. Polokego yeo e ba thabišago ke yeo e ilego ya bolelwa kgale-kgale ke moporofeta yo a buduletšwego wa Modimo, yo a ilego a ngwala ka gore: “Modirô wa tokô e tlo ba kaxišô; ’me tokô e tlo tliša xo iketla le xo holofêla ka xo sa felexo. Sethšaba sa-ka se tlo dula maxaeng a moláô, nywakong e bôtêxaxo madulong a xo iketla.” (Jesaya 32:17, 18)a Batho ba makgolo a dikete ba lego dikarolong tšohle tša lefase ba šetše ba thomile go thabela polokego ya khutšo go sa hlokomelwe mefere-fere ya lefase ya mehleng yeno, gomme ba na le lebaka la go lebelela pele ešita le ka bokamosong bjo bo phadimago kudu. Le wena, o ka ba le kabelo meholeng e bjalo gotee le bona.

3. Na go na le selo se sengwe se Beibele e se holofetšago, seo se tlago go feleletša ka polokego bathong? (Kutollo 21:4, 5)

³ Batho ba ba lebeletše nako yeo mo nakong ye e lego kgaufsi kudu, yeo ka yona ‘go ka se bego le motho e a ba tšhošago,’ e lego nako ya ge bosenyi bo tla fela gomme go fele mokgwa wa go senywa ga dithoto tša motho le go senywa ga motho ka noši. (Mika 4:4) Ba na le lebaka le le kwalago la go dumela gore batho ba bantši bao ba phelago mo nakong ye, ba tla bona letšatši leo tlala e tlago go fela ka lona, ka ge “xo tlo ba le mohora wa mabêlê mo naxeng.” (Psalme 72:16) Ba lebeletše pele gore ba iponele go phethega ga kholofetšo ya gore “Modimo o tlo phumola mexôkxô ka moka mahlong a bôná; le lehu le ka se hlwe le e-ba xôna; le xe e le manyami le dillô le bohloko, di ka se hlwe di e-ba xôna; xobane tša pele di fetile.” (Kutollo 21:3, 4) Ba ka kgonthiša bjang gore dilo tše di bjalo di tla direga e le ka kgonthe? Ke ka gobane dikholofetšo tše di hwetšwa Lentšung leo e lego la Modimo, Beibele.

4. Ešita lege batho ba ile ba dirišwa gore ba ngwale, ke ka baka la’ng dilo tše di ngwadilwego Beibeleng ruri e le tšeo di tšwago go Modimo? (2 Timotheo 3:16, 17)

⁴ Seo Beibele e se bolelago ka bokamoso bja rena, ga se feela seo se tšweleditšwego ke maiteko a motho a go hlalosa mekgwa ya histori. Batho ba ile ba dirišwa gore ba ngwale, eupja megopolo ya bona e be e sepedišwa ke moya wa Modimo. Ka gona, molaetša o tšwa go Modimo. Beibele ge e bolela ka mothopo wa ditaba tša yona, e re: ‘Ga go porofeto e kago hlathollwa ka boithatelo, gobane ga go ešo gwa ba gwa tšwelela porofeto ka go ithatela ga motho, gobane batho ba bakgethwa ba Modimo ba boletše ba išwa ke moya o mokgethwa.’ (2 Petro 1:20, 21) Ga se gwa swanela go ba thata go rena lehono, go kwešiša kamoo Modimo a bego a ka dira se. Ešita le batho bao ba yago sebakabakeng ba kgonne go romela melaetša lefaseng, gomme ye e amogetšwe ka mokgwa o kwalago gabotse. Na Modimo yo a lego legodimong gomme e le ka mokgwa o phagamego kudu, o be a ka se ke a kgona go fetišetša melaetša bathong ba botegago, bao ba bego ba kwana le yena? Ruri, o be a ka dira! Ka gona, re go kgopela re e-na le lebaka le le botse gore o hlahlobe seo Beibele e se bolelago ka mokgwa woo o ka hwetšago bokamoso bjo bo bolokegilego.

MOO GO KA HWETŠWAGO THUŠO YA KGONTHE GONA

5. Ke pono efe ya tlhaologanyo yeo Beibele e re kgothaletšago go ba le yona malebana le tšhelete le mahumo a mangwe a dilo tše di bonagalago? (Mmoledi 7:12)

⁵ Beibele e re thuša gore re lebelele bophelo ka tsela ya tlhaologanyo. Ka baka la go gopola ka boiketlo bja rena bjo bo sa felego, ruri e re kgothatša gore re holofele seo se tlago go ba gona ka mehla. Batho ba dimilione lehono ba holofela mahumo a dilo tše di bonagalago. Beibele ešita lege e dumela mohola wa tšhelete le mahumo a mangwe a dilo tše di bonagalago, fela e bontšha gore a ga se wona selo se segolo bophelong. E bolela therešo e ka se kego ya ganwa ya gore, “bophelô bya motho xa bo tšwe lehumong le xo tše a di ruilexo.” (Luka 12:15) Mahumo a ka felelwa ke mohola wa wona. A ka utswiwa goba a senywa. Bophelo bja mong a wona bo ka ba bja gobatšwa ke motho yoo a lekago go utswa tšhelete ya gagwe. Polokego ya kgonthe e swanetše go ba gona tulong e nngwe. Kae?

6. Ke ka baka la’ng e se ga hlaloganyo go mediša dikholofelo tša rena ka moka ka bokamoso go seo se holofetšwago ke baetapele ba batho?

⁶ Go na le batho bao ba medišago dikholofelo tša bona ka bokamoso go seo se holofetšwago ke baetapele ba batho. Na o swanetše go dira bjalo le wena? Ka ntle le go botšiša mabapi lege e ba baetapele ka noši e le bao ba botegago goba ba kgonago dilo, ruri Beibele e utolla seo e lego taba ka go re gopotša gore ka moka ga bona ba hwa. E eletša ka bohlale gore: “Se boteng maxoši e lexo bana ba batho, bao xo sexo phološô xo bôná. Môya wa motho o a tloxa, ’me yêna ó boêla mmung wa xaxwe; mohla woo ké mo xo fêlaxo maanô a motho.” (Psalme 146:3, 4) Gabotse-botse, baeta-pele ba batho ba tutuetša ditaba tša karolo ya batho ka nywaga e se mekae. Ge e le ka ga polokego ya nako e telele, ruri ba ka se ke ba go nea yona go swana lege ba ka se ke ba kgona go itirela yona.

7. (a) Ke mang yo ruri a kgonago go re nea polokego ya nako e telele, gomme ka baka la’ng? (Ditiro 17:28) (b) Ke’ng yeo re e nyakago ge e ba re tla thabela polokego yeo?

⁷ Go na le Motho yoo a ka kgonago go e nea. Ke Mmopi wa magodimo le lefase. O be a le gona pele ga ge lefase le le ka bopja; gomme le ka morago ga ge lekgolo le la nywaga la masome a mabedi le fetile, o tla tšwela pele go ba gona. Go bjale ka ge Psalme 90:2 e bolela ka yena gore: “Wa mehla e se naxo mathômô, e se naxo mafêlô; O Modimo.” Ke Mothopo wa bophelo le Motho yo a neilego Lefase matla a go thuša diphedi. Ka gona, bophelo bja rena bja mehleng yeno le ditebelelo tša rena ka bokamoso, di ithekgile ka yena. Ke ka lebaka leo re nyakago kwano e botse le yena, ge e ba re tla thabela polokego ya kgonthe.

8. (a) Modimo o lebelela batho ba mohuta ofe? (b) Ka gona, ke’ng yeo rena ka noši re swanetšego go rata go e dira e le gore re tle re dumelelane le se se nyakegago seo? (Mateo 7:21-23)

⁸ Na se se bolela gore se se nyakegago fela ke go ba le bodumedi bjo bo itšego bophelong bja motho? E tla ba phošo go phetha ka go bolela bjalo. Batho bao Modimo a ba dirago gore ba kwane le yena, ruri ke mohuta o itšego wa batho. Mohuta ofe? Beibele e ba hlalosa ka tsela ye: ‘Barapedi ba makgonthe ba tlo rapela Tate ka moya le ka therešo. Le gona Tate o nyaka ba ba mo rapelago ka mokgwa woo. Modimo ke moya; gomme ba ba mo rapelago ba tlo mo rapela ka moya le ka go rereša.’ (Johane 4:23, 24) Na o motho yo a rapelago Modimo “ka therešô”? Na o kile wa hlahloba tumelo ya gago seetšeng sa Lentšu la Modimo, e le gore o bone ge e ba ruri e dumelelana e le ka kgonthe le seo se bontšhitšwego moo ka “Modimo-mmotexi”? (Psalme 31:5) Na o rata go dira bjalo? Dithuto le mekgwa yeo e sa dumelelanego le therešo, ga di hole mothong lege e le ofe. Di bakela batho gore ba hlokomologe tsela yeo dilo di lego ka yona e le ka kgonthe; di iša batho phošong. Kgotsofalo e tlišwago ke polokego ya kgonthe e ka hwetšwa feela ge e ba motho a rata e le ka kgonthe go tseba therešo, gomme a rata go dira diphetogo ge go nyakega gore a tle a dire gore bophelo bja gagwe bo dumelelane le therešo. E nngwe ya ditherešo tše bohlokwa e akaretša go tsebja ga Modimo ka noši.

9. (a) Leina la Modimo ke mang? (b) Ke temana efe yeo o ka e dirišago go hlatselela mogwera seo e lego leina la Modimo?

⁹ Na o tseba leina la gagwe? Ga se “Modimo” goba “Morena.” A ke direto go swana lege “Mohlomphegi” le “Kgoši,” e le direto. Lega go le bjalo, ka go ya ka Phetolelo ya Kgale ya Sepedi Psalme 83:19 83:18, NW, e re: “Ke wena o nnoši yo a bitšwago Jehofa, yo godimo-dimo ka godimo ga lefase ka moka.” Le ga se leina leo batho ba le neilego Modimo. Bjale ka ge go bontšhitšwe Phetolelong ya Kgale ya Sepedi, ruri Modimo o ipolela ge a re: “Ke nna Jehofa, ke lona leina la-ka.” (Jesaya 42:8) Diphetolelo tše dingwe tša Mangwalo a Sehebere a mathomo, di tšweletša leina e le “Yahweh.”

10. (a) Na ruri ke gabohlokwa go tseba le go diriša leina la Modimo? (Ditiro 15:14) (b) Ge e ba re rata Jehofa, gona rena ka noši re tla diriša bjang leina leo? (Jesaya 43:10)

¹⁰ Bafetoledi ba bangwe mo gongwe ba ka gopola gore ba dira gore Beibele e amogelwe ke batho ba bantši, ka go lesa go diriša leina leo e lego la Modimo, fela na ruri ke bafetoledi ba botegago ge ba leka go uta leina leo le tšwelelago gantši go feta leina lege e le lefe le lengwe mangwalong a leleme la mathomo? Modimo wa therešo o rata batho ba tseba leina la gagwe. O bontšhitše se gabotse nakong ya ge a be a botša mohlanka wa gagwe Moše gore a tsebiše mmuši wa Egipita ya kgale, lebaka leo Modimo a mo tlogetšego go fihlela nakong yeo. Ke ka baka la’ng a ile a dira bjalo? Modimo o itše: “Ke sa Xo lesitše xore ke Xo bonthšê matla a-ka, xore leina la-ka le bolêlwê lefaseng ka moka.” (Ekisodo 9:16) Ke gabohlokwa go rena gore re diriše leina la Modimo, gomme re dire bjalo ka tlhompho. Ge e ba re rata therešo, gona re ka se ke ra dika-dika go ipontšha re le barapedi ba Jehofa Modimo o nnoši wa therešo.

11. Modimo o lebelela bjang go dirišwa ga diswantšho borapeding? (Psalme 115:3-8; Doiteronomio 7:25)

¹¹ Lega go le bjalo, re swanetše go hlokomela gore re se ke ra kopanya leina la Modimo le selo seo a sa se amogelego. Gopola, “Modimo ké Môya; xomme ba ba Mo rapelaxo ba tlo Mo rapêla ka môya le ka xo rereša.” (Johane 4:24) Ge e ba re lemoga taba ya gore “Modimo ke Môya,” gomme ge e ba re mo rapela “ka môya,” ke gore ka ditsela tša moya, gona re ka se ke ra diriša dilo tše di dirilwego gore di emele Modimo. Ka go ya ka Johane 1:18, ‘ruri ga go e a kilego a bona Modimo,’ ka gona ga go kgonege go dira seswantšho lege e le sefe goba go betla seo se ka mo emelago. Seswantšho seo se ka se kego sa kgona go bona goba go kwa goba go bolela, seo se ka se kego sa kgona go emiša ešita le ka monwana go thuša batho bao ba rapelago pele ga sona, se ka se ke sa kgona go emela Modimo yo a phelago. Ee, diswantšho tše dingwe di bolelwa gore ga di emele Modimo ka noši, gomme potšišo e botšišwago ke ye, Na ke didirišwa tša boineelo bja bodumedi? Nakong ya ge Modimo a be a nea Melao e Lesome, o ile a bolela e le ka kgonthe gore go se ke gwa ba le diswantšho tšeo di ka direlwago morero o bjalo. O laetše gore: “O se kê wa itirêla modimo wa xo betlwa, le xe e le seswanthšô se sengwê . . . O se kê wa di khunamêla.” (Ekisodo 20:4, 5) Go e na le go diriša ga rena dilo tšeo Jehofa a sa di amogelego, gona lerato la go rata therešo le tla re thuša go tseba Modimo kamoo a lego ka gona.

12. (a) Jehofa ke Modimo wa mohuta ofe? (b) Ke sefe sa dika tša gagwe seo se go kgahlišago kudu?

¹² Dika tša gagwe ke tšeo ruri di gapago kholofelo ya motho o mongwe le o mongwe yoo a ratago go loka. Tše dingwe tša dika tše tšeo e lego matla a gagwe a magolo le bohlale bjoo bo fetago bjoo bja motho, ruri di bonwa medirong ya gagwe ya tlholo yeo a e hlodilego. Na ga o dumele gore botse bja go sobela ga letšatši, melodi e thabišago ya dinonyana, monkgo wa matšoba le dilo tše dintši tšeo o di thabelago ruri ka moka di bonagatša lerato la Modimo bathong? Beibele e re botša se segolo go feta se, e re botša go gontši ka Modimo. E utolla gore Modimo o rata seo se lokilego, le gore ke yoo a kwelago bohloko le go naganela. E mo hlalosa ka tsela ye: “[Jehofa], [Jehofa], Modimo yo mabobo le kxauxêlô, wa xo se fele pelo, wa botho byo boxolo le therešo, wa xo bolokêla ba dikete-kete botho, wa xo lebalêla batho bokxôpô le dikaroxô le dibe; fêla, a se kê a lesa xo ôtla mosenyi.” (Ekisodo 34:6, 7) Beibele gape e bolela ka ditirišano tša Modimo tša makgolong a nywaga a mantši gotee le setšhaba sa Isiraele ya kgale, e lego tšeo ruri di bontšhago dika tšeo. Pego yeo e ngwadilwego e bontšha le gore “Modimo xa a bebe motho, anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” (Ditiro 10:34, 35) O rata gore batho ba mehuta yohle, ba thabele kwano e botse le yena, gomme o dirile ka botho tokišetšo e le gore se se tle se kgonege.

13. Bophelo bja motho bo kgongwa bjang ge a botile Jehofa e le ka kgonthe? (Diema 3:5, 6)

¹³ Ge motho a dutše a bontšha tebogo ya go leboga dika tše ntši tše rategago tša Modimo wa therešo, gona go direga’ng? “Leina” la Modimo le thoma go ba le seo le se bolelago go yena. O bota Jehofa, o dira dilo ka tsela ya Modimo gomme o phetha ka go bona tšhireletšo ya gagwe. Go bjale ka ge Diema 18:10 e bolela: “’Ina la [Jehofa] ké sebô se sethata; moloki ó thšabêla xôna a pholoxa.”

14. (a) Ke ka baka la’ng bokamoso bja rena bo ithekgile ka Jehofa? (b) Ke phetho efe e kgolo yeo e lebanego le motho o mongwe le o mongwe? (Doiteronomio 30:19, 20)

¹⁴ Tšhireletšo yeo e akaretša ditebelelo tša motho ka bokamoso. Ruri, ke go Jehofa moo bokamoso bja batho ka moka bo ithekgilego. Ka baka la’ng? Ka gobane lefase le hlodilwe ke yena, gomme tšohle tšeo di phelago go lona di ithekgile ka ditokišetšo tša gagwe tša go thuša bophelo. O boletše morero wa gagwe Beibeleng wa gore o tla nea maemo a bolokegilego, a thabišago bathong ba gagwe gore ba phele go wona. Legodimong goba lefaseng ruri ga go na seo se ka thibelago Modimo Ra-matla-ohle gore a se ke a phetha morero wa gagwe. Lega go le bjalo, morero woo ga o re amoge tokologo. Ga o akanye mafelelo a motho o mongwe le o mongwe wa rena ka ntle le gore rena re ikarabele. Eupja, o re dira gore re itirele phetho e kgolo: Na tebogo ya go leboga dilo ka moka tšeo Jehofa a re diretšego tšona le tšeo a sa tlago go re direla tšona nakong e tlago, e re kgoromeletša gore re dire maphelo a rena gore a dumelelane le thato ya gagwe? Go palelwa ga motho ke go dumela go ka se ke gwa fetola taba ya gore Jehofa ke Modimo wa therešo, goba lege e le gore go ka šitiša morero wa Gagwe. Go e na le moo, go tla bontšha ge e ba motho ka noši a holwa ke morero woo wa lerato. Ruri, kgetho e dirwa magareng a bophelo le lehu.

Lebaka Leo go se Bolokege go Senyago Bophelo bja Batho

15. Ke dilo dife tše dingwe tšeo di dirago bophelo lehono gore e be bjo bo se bja bolokegago?

¹⁵ Go lemoga kamoo morero wa Jehofa o feleletšago ka polokego ya kgonthe ka gona, gona re ka thoma ka go ikgopotša dilo tše dingwe tšeo di dirago gore bophelo lehono e be bjo bo se bja bolokegago. Go hloka lerato, go nyatša molao, go palelwa ke go hlompha dithoto tša ba bangwe, go itahlela maakeng le bošorong e le gore motho a tle a ikhweletše mehola, di gare ga dilo tše. Le gona, re ka se ke ra hlokomologa bolwetši le temogo ya go lemoga gore batho gatee-tee goba ka morago, ruri ba hwa. Go tšwa phihlelong yeo e lego ya rena gotee le kamoo re hlokomelago ka gona, re tseba kamoo dilo tše di kgomago bophelo bja motho. Tše ka moka di bile gona bjang? Karabo e hwetšwa Beibeleng.

16. Mathomong, ruri ke’ng yeo e ilego ya oketša polokego ye e bego e thabelwa ke Adama le Efa? (Genesi 1:31; 2:8, 15)

¹⁶ Puku yeo e lego ya pele ya Beibele e re botša gore nakong ya ge Jehofa a bopa batswadi ba rena ba pele ba batho, Adama le Efa, ruri modiro wa gagwe e be e le o botse kudu. Go be go se na phošo ka go bopja ga bona, yeo e bego e tla feleletša ka bolwetši; ba be ba lebeletše go phela ka mo go sa felego. Modimo o ile a ba nea ka lerato tšhemo e botse, paradeise ya Edene e le legae la bona. O ile a akaretša e le ka kgonthe legaeng la bona dimela tše dintši tše di bego di tšweletša peu gotee le dihlare tša dienywa gore di ba fepe. Le gona, o ile a dira gore maphelo a bona a be le morero ka go ba laela gore ba buše dihlapi, dinonyana le diphoofolo ka moka, go lema lefase gomme ba le tlatše ka bana ba bona go fihlela ge lefase ka moka le be le tla swana le paradeise yeo a bego a ba beile go yona. Lefelong le le bjalo, ruri go kwa o bolokegile e be e le tlhago. Fela go be go nyakega selo se sengwe go bona, ge e ba ba be ba tla tšwela pele ba thabela polokego.

17. (a) Ke’ng yeo e bego e nyakega go Adama le Efa, ge e ba ba be ba tla tšwela pele ba bolokegile? (b) Jehofa o ile a leka bjang go kwa ga bona, gomme ke ka baka la’ng se e be e le taba e bohlokwa? (Luka 16:10)

¹⁷ Ba be ba swanetše go lemoga boemo bja bona mabapi le Modimo. Lefase le dilo ka moka tše di bego di le go lona e be e le la Mmopi wa bona, gomme o be a e-na le tshwanelo ya go bolela kamoo tše di bego di ka dirišwa ka gona. Bophelo ka bobjona e be e le mpho ye yago ka mabaka; ke gore Adama le Efa ba be ba ka tšwela pele ba bo thabela fela ge ba be ba ka tšwela pele ba e-kwa taelo ya go kwa Tat’ago bona wa legodimo ka go rata. Go gatelela bohlokwa bja taelo ye, ruri Jehofa o ile a bea molao wo mothong: “Dihlare ka moka tša tšhemo yé O ka di ja. Fêla, sehlare sa xo tseba botse le bobe sôna O se ke wa se ja; ka xobane mohla ò tl’o xo se ja O tlo hwa lehu.” (Genesi 2:16, 17) Go kwa go be go tla bontšha go amogela ga motho Modimo e le Mmuši; go se kwe go be go tla bolela go gana thato e phethagetšego ya Modimo. Molao wo o be o sa akaretše bothata lege e le bofe; o be o sa ganetše motho selo lege e le sefe seo a bego a se nyaka, eupja o be o beile moleko o bonolo ešita lege o be o bolela go gogolo, wona woo o bego o swanela maemo ao motho a bego a phela go wona. O ile wa nea Adama le mosadi wa gagwe Efa, sebaka sa go bontšha lerato la bona go Tat’ago bona wa legodimo.

18. (a) Ke dilo dife tšeo di bakago go se bolokege tšeo di ilego tša bonwa pele mabapi le sebe sa Adama le Efa, ešita le ka morago? (b) Bjale ka ge go hlalositšwe go Ba-Roma 5:12, ruri bana ba Adama ka moka ba kgomilwe bjang?

¹⁸ Pego ya Beibele e lego go Genesi kgaolo 3 ya boraro e bontšha gore ba ile ba palelwa. Ba ile ba ja ka boithatelo sehlare seo Modimo a bego a se “ileditše.” Go bolokega moo go bego go kile gwa thabelwa ke batho ba babedi, gwa senywa. Dilo tšona tše di bakago go se bolokege lehono di ile tša thoma go tšwelela nakong yona yeo. Go ile gwa ba le go hlaelelwa ga lerato la go rata Modimo, go nyatša molao wa gagwe le go palelwa ke go hlompha thoto ya gagwe. Adama le Efa ka baka la go se amogelwe ke Modimo, ba ile ba lelekwa Edene. Bana ba bona ba bantši go akaretša Kaine, ba ile ba thoma go tšwela pele ba nyatšega ka ntle ga paradeise, ge ba dutše ba ineela bosenying. Ešita le batho bao ba se ba kago ba gana molao wa Modimo ka boomo, ruri ba kwele mafelelo a bohwa bja sebe mebeleng ya bona. Go bjale ka ge Ba-Roma 5:12 e hlalosa: “Sebe sé tsene lefaseng ka motho [Adama] o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.”

19. (a) Borabele Edene bo thomile ka mang? (Kutollo 12:9) (b) O bile Sathane Diabolo bjang? (Jakobo 1:14, 15)

¹⁹ Lega go le bjalo, go swanetše go lemogwa gore mogato wa pele wa go iša borabeleng ga se wa thongwa ke Adama goba mosadi wa gagwe. Beibele e bolela ka “noxa” e le e boletšego le Efa, gomme ya mo fora gore a robe molao wa Modimo. Ee, noga-noga ga e kgone go bolela; gomme Beibele ka morago e bontšhitše matla a bego a le ka morago ga noga yeo, le motho wa moya yo a sa bonagalego. Motho yo wa moya o be a se a bopelwa gore e be o mobe. Ee, go swana lege e be e le therešo ka batho, ruri morwa yo wa moya wa Modimo o be a lokologile a ka kgona go kgetha kamoo a ka dirišago matla a gagwe ka gona. Ka go gokotla dikganyogo tše mpe, o ile a ikgogomoša; a rata gore dibopiwa tše dingwe di mo rapele e le modimo. Ka tsela yeo a ilego a phegelela gore a fihlele pakane ya gagwe, o ile a itira ka noši moganetši wa Modimo, Sathane, le mosebi, Diabolo.

20. (a) Sathane ge a be a boledišana le Efa, ruri ke dipolelo dife tšeo a ilego a di bolela? (b) Ke ka baka la’ng Efa a se a ka a kaonefatša boemo bja gagwe ka go dira seo Sathane a ilego a mmotša sona?

²⁰ O ile a tla go Efa gomme a thoma ka go mmotšiša dipotšišo tšeo ka morago a ilego a ganetša Modimo ka go botša Efa gore: “Le ka se kê la hwa lehu [ge e ba le ka ja dienywa tše di ileditšwego]. Xe e le Modimo, yêna ó tseba xore mohla Lè se jaxo mahlô a lena a tlo buduloxa la ba byalo ka Modimo, la tseba botse le bobe.” (Genesi 3:1-5) Se se ile sa kwala ekare ke se se kaone go mosadi go phala seo a bego a le sona. Eupja ka go dumela seo, ruri na o ile a hwetša a bolokegile kudu? Na monna wa gagwe o ile a hwetša se sengwe ka go ba gotee le yena phapogong ya gagwe? Aowa; e be e le maaka feela. Ruri, se se ile sa hlatselwa gabotse nakong ya ge ba e-hwa, gomme batho ba sa dutše ba e-hwa go fihlela mehleng yeno.

21. (a) Ke dikgang dife tše dikgolo tšeo di ilego tša ngangwa moo Edene, gomme tše di kgoma bjang polokego ya tlholo ka moka? (b) Mehleng ya Jobo, ruri ke go bewa molato gofe mo go ilego gwa dirwa, gomme go ile gwa tiiša’ng? (Jobo 1:7-12; 2:1-5)

²¹ Dikgang tše dikgolo di ile tša ngangwa moo Edene, gomme tše di kgoma go bolokega ga tlholo ka moka. Go ba ga Modimo wa go rereša go ile gwa ganetšwa, gomme se sa baka pelaelo ya go belaela tshwanelo le go loka ga pušo ya gagwe. Go ile gwa bonwa gore motho o tla ba boemong bjo bo kaone ge a itirela diphetho tšeo e lego tša gagwe, ge e le ka seo e lego se se botse le seo e lego se sebe gomme a ipeela melao yeo e lego ya gagwe, a itira mmuši ka noši. Borabele bja Sathane le go palelwa ga batho ba pele ba babedi ke go botega go Modimo, go ile gwa baka pelaelo ya go belaela seo dibopiwa tše dingwe tše di hlalefilego tša Modimo di bego di tla se dira. Na go na le motho yo a bego a tla dula a botega go Modimo? Ee, Sathane mehleng ya Jobo o ile a bea molato wa gore batho bao ba direlago Modimo ba mo direla bjalo feela ka baka la mabaka a boithati e sego ka gobane ba mo rata. Sathane a re: “A O re Jobo xe a boifa Modimo, ó dira fêla?” (Jobo 1:9) A tiiša gore ga go na motho yo a ka botegago pušong ya Jehofa ge yena lenaba la Modimo, a ka dumelelwa gore a mo leke. Batho ba be ba ka se ke ba thabela gape polokego e feleletšego go fihlela ge dikgang tše di ka lokišwa. Lega go le bjalo, Jehofa o be a tseba gore dikgang tšeo di be di ka lokišwa ka go kgotsofatša e le ka kgonthe barati ka moka ba go loka, gomme o ile a dira ditokišetšo a dutše a gopola ka se.

Ditokišetšo Tšeo di Dirago Gore Bokamoso bjo bo Bolokegilego bo Kgonege

22. (a) Jehofa ge a be a ahlola batswadi ba rena ba pele, o ile a dira gore go kgonege eng go rena? (2 Petro 3:9) (b) Tokišetšo ya Jehofa ka bokamoso bja batho e theilwe godimo ga mang?

²² Nakong ya ge kahlolo e be e dirwa batswading ba rena ba pele ka baka la borabele bja bona malebana le Modimo, ruri Jehofa o ile a se ke a lebala bana ba bona ba bego ba sešo ba belegwa. O ile a dira ka lerato morero woo o ilego wa dira gore go kgonege go o mongwe le o mongwe wa rena go ikgethela ge e ba a rata go phela tlase ga pušo ya Modimo. Morero woo o thekgilwe go Morwa wa Modimo, Jesu Kriste.

23. (a) Ke bophelo bja mohuta ofe bjoo Jesu a bego a e-na le bjona pele ga ge e ka ba motho? (b) Ke ka baka la’ng re se ra swanela go bolela ka yena e le Modimo goba motho yo a lekanago le Modimo? (Johane 17:3)

²³ Morwa yo ke yena wa pele wa go hlolwa ke Jehofa mmušong wa legodimo. Beibele e re botša gore: “Tšohle tša kwa maxodimong le mo ’faseng di hlodilwe ke Yêna.” (Ba-Kolose 1:15-17) Nakong e beilwego ya Modimo, ruri Morwa wa gagwe o ile a tlogela letago la gagwe la legodimo gomme a belegwa ka mohlolo e le motho lefaseng. Morongwa Gabriele yo a ilego a rongwa e sa le pele gore a ye go tsebiša ka tswalo ya gagwe, ga se a ka a bolela gore ngwana yo a bego a tla belegwa e be e tla ba Modimo. Go e na le moo, o e tsebišitše e le go belegwa ga “Morwa-Modimo.” (Luka 1:35) Jesu ka noši ga se a ka a ipolela gore ke Modimo. Ga se a ka a dira go etša Sathane yoo a ilego a nyaka gore a rapelwe. O boletše ka go rereša gore: “Tate ó mpheta ka boxolo.” (Johane 14:28) Ka baka leo, gore re tle re thabele tswalano ya tshwanelo le Modimo wa therešo, gona ga se ra swanela go nea Morwa wa gagwe tulo e fapanego, ra bolela ka yena a le bjale ka Modimo goba bjale ka motho yo a lekanago le Modimo.

24. Ke’ng yeo e ilego ya dirwa ke go ipontšha ga Jesu ka go botega tlase ga go gateletšwa o šoro e le motho lefaseng?

²⁴ Jesu mo lefaseng o ile a feta diphihlelong tšeo a bego a se a ka a ba le tšona pele. O bile yo a hlokago molato legodimong ge a be ba dira thato ya Tat’agwe. Eupja, na o be a tla tšwela pele a ipontšha a botega e le motho lefaseng, kudu ge a be a tla kwešwa bohloko le go nyatšwa ka phošo? Sathane o be a ikemišeditše go hlatsela gore ga go na motho, gaešita le ka yena Morwa yo wa Modimo yo a bego a ka botega nakong ya ge a lekwa. Fela, Jesu o ile a kgomarela Lentšu la Modimo ka go botega, a ithekga ka lona e le mohlahli wa gagwe gomme a le tsopola ge a gana meleko. A gana a tiile ge a be a gapeletšwa gore a dire phošo, ka gore: “Ntloxêlê, Sathane, xobane xo ngwadilwe xwa thwe: O khunamêlê [Jehofa] Modimo wa xaxo, O dirêlê Yêna à nnoši!” (Mateo 4:10) Jesu o kgomaretše potego ya gagwe go Jehofa ka ge e le Mmuši go fihlela lehung la gagwe, gomme a dira se tlase ga meleko yeo e bego e le e megolo kudu go phala wola Adama a ilego a lebana le wona. Jesu ka tsela ye, o ile a hlatswa leina la Tat’agwe melatong ya maaka yeo e bego e dirilwe ke Sathane. Jesu ka mohlala wa gagwe, o re bontšhitše kamoo re ka fenyago meleko ka gona le kamoo re ka bontšhago gore le rena re bakgomaredi ba botegago ba pušo ya Jehofa.

25. Ke’ng e nngwe yeo e tlišitšwego ke lehu la Jesu e le motho yo a phethagetšego, gomme se se dira gore go kgonege eng go rena? (1 Timotheo 2:3-6)

²⁵ Lega go le bjalo, se se fetago mohlala o botse fela se ile sa neelwa go rena ke Morwa wa Modimo. Jesu ka noši o boletše gore o tletše “xo neêla bophelô bya xaxwe xore e bê topollô ya ba bantši.” (Mareka 10:45) Se se be se swanetše tabeng ya ge e ba batho ba be ba tla phetha ka go imollwa sebeng, bolwetšing le lehung, tšeo di bakilwego ke sebe. Ka go ya ka molao wa Modimo, ruri theko ya topollo e be e swanetše go ba bophelo bjo bo phethagetšego bja motho e le gore bo tle bo dumelelane le bophelo bjo bo phethagetšego bjoo bo bego bo timeditšwe ke Adama. Ga go na setlogolo se se se sa phethegago sa Adama seo se bego se ka e neela. Jehofa ka noši ka boithatelo o ile a e lokišetša. O ile a romela Morwa yoo e bego e le wa gagwe lefaseng. Go latela lehu la Jesu, ruri Modimo o ile a mo tsošetša bophelong gape gomme nakong ye e le motho wa moya, gomme a amogela mohola wa bophelo bja gagwe bja motho e le sehlabelo bakeng sa batho. Se se re buletše tokelo ya go hwetša seo Adama a bego a se timeditše. Bjale ka ge Beibele e hlalosa: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) A ditebelelo tše di kgahlišago gakaakang tšeo di dirilwego gore di kgonege go rena ge e ba ruri re ka dumela go Morwa wa Modimo, ra ithuta seo a se rutilego gomme ra phela ka go dumelelana e le ka kgonthe le sona!

26. (a) Ke ka baka la’ng Jesu a se a ka a itsenya ditabeng tša bopolitiki? (Johane 18:36) (b) Ke kgopolo efe malebana le mebušo yeo Jesu a ilego a ruta balatedi ba gagwe gore ba be le yona? (Mateo 22:17-21)

²⁶ Tumelo e bjalo e akaretša temogo ya go lemoga karolo yeo Jehofa a e neilego Morwa wa gagwe mmušong. Jesu ga se a ka a itsenya ditabeng tša bopolitiki tša mehleng ya gagwe; o tsebile gore ga go na mmušo wa motho woo o bego o thekga pušo ya Jehofa. Go sa hlokomelwe seo babuši ba bjalo ba ka bego ba se bolela ka tumelo ya go dumela Modimo, ruri ka moka ga bona ba be ba ipeela melao yeo e lego ya bona ge e le tabeng ya seo e lego se se botse le seo e lego se sebe. Ka gona, ešita lege e ba ba be ba go dumela goba ba sa go dumele, ruri ka moka ga bona ba be ba latela boetapele bja lenaba la Modimo, Sathane Diabolo, yoo Beibele e mmolelago e le “mmuši wa lefase.” (Johane 14:30) Jesu o rutile barutiwa ba gagwe gore ba tšhele metšhelo ya bona, ba kwe molao ge feela Modimo a sa dumeletše mebušo ya batho gore e-be gona. O bontšhitše kgakala gore kholofelo feela ka bokamoso bjo bo bolokegilego e tla tlišwa ke Mmušo wa Modimo e lego mmušo o lokilego e le ka kgonthe o tlago go dira o e-tšwa legodimong gomme o laole godimo ga batho ka moka. Ka gona, o ba rutile gore ba rapele Modimo, ka gore: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” Jesu o ba eleditše gore ba phele ka go dumelelana le melao ya Mmušo woo go etša ge e ngwadilwe Beibeleng. O ba romile gore ba bolele “ditaba tše tše di lokilego tša mmušo” bathong kae le kae.—Mateo 6:10; 24:14, NW.

27. Mmušo wa Modimo ke’ng, gomme re ka bontšha bjang tebogo ya rena ya go o leboga? (Mateo 6:33)

²⁷ Mmušo wo ke sedirišwa sa Jehofa sa go phetha thato ya gagwe. O tla kopanya gape tlholo yohle e bohlale tlase ga bogoši bja Jehofa. Dithong tšeo tša mmušo woo wa legodimo go tla akaretšwa batho ba tlago go tšewa lefaseng le, bao ba ipontšhitšego ba thuša ka go botega bogoši bja Jehofa, e lego pušo ya gagwe. Ba ba bolelwa e le “mohlatswana o monyenyane.” (Luka 12:32) Puku ya mafelelo ya Beibele e bontšha gore ba dira feela palo ya “dikete tše lekxolo le naxo le masome a manê a metšô e menê, ba ba rekolotšwexo lefaseng.” (Kutollo 14:1, 3) Lega go le bjalo, o mogolo yoo a neilwego matla a bogoši ke Morwa yo e lego wa Modimo, Jesu Kriste. Go phethagatša boporofeta bja Modimo, ruri ke yena yoo Jehofa a mo neago “boxoši le kxodišô le mmušô; dithšaba ka moka le merafô le maleme ya ba bahlanka ba xaxwe.” (Daniele 7:13, 14) Ke gabohlokwa go o mongwe le o mongwe wa rena go phela ka go dumelelana le tokišetšo yeo ya Modimo. Batho bao ba tlago go gana go dira bjalo, ba ka se ke ba dumelelwa ka mo go sa felego gore ba šuhle go bolokega ga ba bangwe.

28. (a) Pušo ya motho e bile gona ka nako e kaakang, gomme ke ka baka la’ng e ka se ke ya tšwela pele kudu mo nakong ye? (Jeremia 17:5) (b) Se se tla bolela’ng go Sathane? (c) Go tla direga’ng mebušong ya batho? (d) Go tla ba’ng ka batho ba babe? (e) Go tla direga’ng ka batho bao ba hlokomologago pušo ya Jehofa? (2 Ba-Thesalonika 1:6-9)

²⁸ Ga e sa le go tloga borabeleng bja Edene, ruri batho ba bile le nywaga e dikete tše tshelelago ba dutše ba e-ja dienywa tša pušo ya motho. E bile tshenyo feela. Beibele e šupa ka tshwanelo moloko wo e le woo nakong ya wona, Modimo a tlago go phetha kahlolo ya gagwe. Se se tla bolela’ng go lenaba le legolo la batho, Sathane Diabolo? Yena le bademona ba gagwe ba tla tlošetšwa ruri modirong wa bona gomme ba ‘lahlelwe sekoting,’ e le gore ba se sa kgona go timetša batho. (Kutollo 20:1-3) Go phethwa ga dikahlolo tša Modimo go tla bolela’ng mebušong ya batho? Beibele e boletše e sa le pele, gore: “Mmušo . . . o tlo phšatla mebušo [ya batho] e mengwê ka moka wa e fediša; xe e le wôna, o tlo êma xo ya xo ile.” (Daniele 2:44) Go tla bolela’ng go baaketši, mahodu le batho bao ba senyago? “E mobe ó tlo ba a ile; O tlo boxa lešope, yêna a se xôna.” (Psalme 37:10) Go tla bolela’ng bathong ba ganago pušo ya Jehofa ka go ithatela? Mehleng ya Noage “ba be ba sa šetše selô; meetse-fula a bá a tla a ba tšea ka moka,” gomme e tla ba selo se swanago le mo nakong ye, nakong ya ge Modimo a diriša Morwa wa gagwe go phetha kahlolo ya go loka.—Mateo 24:39.

29. Tše ka moka di tla bolela’ng bathekging ba botegago ba pušo ya Jehofa? (Kutollo 7:9, 10, 13, 14)

²⁹ Se ka moka se tla bolela’ng bathong bao ba ipontšhitšego gore ke bathekgi ba botegago ba pušo ya Jehofa? Go tla bolela go phološetšwa tokišong e mpsha ya Modimo ya go loka. Ditirišanong tša Modimo le setšhaba sa kgale sa Isiraele, ruri mohlala o ile wa newa wa mafelelo ao se se bego se tla a tliša bophelong. Go ile gwa direga ka mokgwa woo Modimo a bego a laetše Moše gore a bolele: “Le sa tlo . . . dula naxeng ye [Jehofa] Modimo wa lena a tl’o xo Le nea yôna ya ba ya lena; ó tlo Le khutšiša manaba a lena thokô tšohle, la dula Lè iketlile.” (Doiteronomio 12:10) Mabapi le maemo a nakong ya pušo ya Kgoši Salomo, go ngwadilwe gore: “Ba-Juda le Ba-Isiraele ba be ba dutše bà ikêtlile moriting wa merara ya bôná le wa mexo ya bôná, xo tloxa ka Dani [e lego leboa] xo fihla ka Bereseba [e lego ka borwa].” (1 Dikxoši 4:25) Lapa le lengwe le le lengwe ka go dumelelana le molao wa Modimo, ruri le be le e-na le naga ya lona gore le e leme le gore le dule go yona. Go kwa Modimo go ile gwa tliša tšhegofatšo ya gagwe, gomme se sa akaretša ‘go na ga pula nageng ka lebaka la gona,’ ka ge a be a holofeditše. (Doiteronomio 11:13-15) Go be go e-na le go bolokega ka tša boiphedišo.

30. Ka ge go hlalositšwe go Psalme 72, ruri ke maemo afe ao a bakelago go bolokega ao a tlago go aparetša lefase ka moka tlase ga Mmušo wa Modimo?

³⁰ Se se ngwadilwe Beibeleng e sego feela go ba taba ya rekoto ya histori, eupja gore se re kgothatše. Morena Jesu Kriste yena yoo Jehofa a mmeilego go ba kgoši godimo ga lefase ka moka, o bolelwa Mangwalong e le “Yo e lexo e moxolo xo Salomo.” (Luka 11:31) Tlase ga pušo ya Kriste, ruri maemo a phalago le ale a bego a le gona Juda le Isiraele mehleng ya Salomo, a tla ba gona lefaseng lohle. Psalme 72, e hlalosa ditšhegofatšo tše ka bothakga, ka tsela ye: “Mehleng ya xaxwe xo taxê moloki, moláô o xolê ò e-ya le dikxwedi di sa kxaotše xo balama. Mmušô wa xaxwe o tlo xoma ka lewatle thokô tšohle, xo tloxa nokeng [Eforate] xo fihla mafelelong a lefase. Meôya ya bôná ó tlo e lokolla mohlakong, le bošorong; ’me madi a bôná ó tlo a sema selô se bohlôkwa. Xo tlo ba le mohora wa mabêlê mo naxeng; ’phoxong tša thaba meré ya dienywa e tlo xwaša.” (Psalme 72:7, 8, 14, 16) Boemo bjo bo tlago go aparetša nakong yeo, e tla ba bjola bja go hlaloswa ke Jesu Kriste go motho yo a bego a mo kgopela gore a mo gopole nakong ya ge a tsena Mmušong wa gagwe. Jesu o itše go yena: “O tlo ba le Nna Paradeiseng.”—Luka 23:43.

31. (a) Go tla kgonega bjang gaešita le ka bahu go holwa ke ditokišetšo tše tše dikgolo? (b) Ba ba tsošitšwego ba tla bušetšwa kae? (Hesekiele 18:4; Jobo 14:13)

³¹ Bao mo gongwe ba ka bago ba šetše ba hwile ka baka la go abela ga bona sebe go Adama, ba ka se ke ba lebalwa. Le bona ba akaretšwa sehlabelong sa topollo sa Morwa wa Modimo. Beibele e bolela ka mokgwa o kgothatšago ka gore: “Bahu ba tlo tsoxa, bohle, baloki le ba s’a lokaxo.” (Ditiro 24:15) Se se bolela’ng? Beibele e bolela gore “ba ba phelaxo ba tseba xore ba tlo hwa; ’me xo bahu xa xo se se tsebyaxo.” (Mmoledi 9:5) Ga ba phele kua mabitleng. Tsogo e bolela go bušetšwa bophelong. Ka ntle le bao ba “mohlatswana o monyenyane” bao ba tlago go abelana bophelo bja legodimo le Jesu Kriste, ruri batho ka moka bao ba tlago go tsošwa e tla ba batho bao ba lebeletšego go phela ka mo go sa felego gona mo lefaseng.

32. (a) Bolwetši le lehu di tla tlošwa ka’ng? (Mareka 2:1-12) (b) Na wena ka noši o rata go holwa ke ditokišetšo tše, tšeo Jehofa a di diretšego bokamoso bjo bo bolokegilego?

³² Ye e tla ba nako ya mpshafatšo lapeng la motho. Tlase ga tshepedišo ya Mmušo wa legodimo, ruri dibe tša mehuta yohle gotee le mafelelo a tšona di tla tlošwa ka go dirišwa ga mohola wa sehlabelo sa Jesu bathong ka moka bao ba dumelago. Jesu nakong ya ge a be a le lefaseng, o ile a bontšha seo se bego se tla bolelwa ke se bathong. O ile a fodiša malwetši a mehuta yohle gomme a ba a dira gore difofu di bone, a fodiša le ka digole. Tokišong e mpsha ya Modimo, lefase le tla tlala batho ba tlago go ba le ditšhegofatšo tše di bjalo. Kholofetšo ya Modimo ke ye: “Modimo ó tlo phumola mexôkxô ka moka mahlong a bôná; le lehu le ka se hlwe le e-ba xôna; le xe e le manyami le dillô le bohloko, di ka se hlwe di e-ba xôna; xobane tša pele di fetile.” (Kutollo 21:4) Ee, dilo ka moka tšeo di baketšego gore bophelo e be bjo bo se bja bolokegago, di tla ba di fedišitšwe. Ye ke tebelelo e kgahlišago gakaakang!

33. Na go na le polokego ya kgonthe yeo e ka thabelwago gona mo nakong ye?

³³ Ga se dilo ka moka tšeo di tlišago polokego tšeo di boloketšwego bokamoso. Tše dintši di ka thabelwa le mo nakong ye.

Polokego ye e ka Thabelwago mo Nakong ye

34. Ke dilo dife tše di bolelwago mo tšeo di tlago go feleletša ka polokego ya kgonthe ya motho?

³⁴ Go sa hlokomelwe maemo a mangwe bophelong ao motho a swanetšego go lebana le wona, ruri batho ba bantši ba tla dumela gore mang le mang yoo a nago le dijo tša letšatši le lengwe le le lengwe le diaparo tše di lekanego, o lebelelwa a bolokegile e le ka kgonthe. Ee, ge e ba batho bao a phelago le bona ba be ba ka ratana e le ka kgonthe, gona se se be se ka oketša karolo e nngwe polokegong. Le gona ge e ba a be a ka tseba seo bokamoso bo se huperego, gona se le sona se be se ka thuša go tloša maikwelo lege e le afe a go boifa. Eupja batho ba bantši ga ba thabele maikwelo a bjalo a go bolokega. Na se se bolela gore dikholofetšo tša polokego tšeo di neilwego Lentšung la Modimo, di tla ba tša therešo feela bokamosong? Goba na batho le gona mo nakong ye ba ka hwetša polokego ka go dumela dikholofetšong tše, gomme ba dira ka go dumelelana le tšona? Na go na le batho ba ba dirago bjalo mo nakong ye ka tsela ya go kwana?

35. (a) Ke tlase ga maemo afe moo Modimo a bolelago gore o tla nea dijo tša letšatši le letšatši gotee le diaparo gona mo nakong ye? (b) Ke bomang bao ba thabelago polokego e bjalo, gomme ba hwetša bjang ditokišetšo tše? (Ba-Efeso 4:28)

³⁵ Bakriste bao ba tsebjago e le Dihlatse tša Jehofa ba hweditše Lentšu la Modimo e le la therešo, gomme ba bone gore go le diriša maphelong a bona go tliša mehola e megolo gona mo nakong ye. Mehola yeo e tlišwa ke go nea bohlokwa bjo bo nepagetšego ditabeng tša moya bophelong bja motho bja letšatši le letšatši. Ee, mang le mang lefaseng go sa hlokomelwe ge e ba a rata dilo tša moya goba a se bjalo, ruri a ka holwa ke seo lefase le se tšweletšago. Beibele e bontšha gore Modimo o kgahlišwa e le ka kgonthe ke boiketlo bja batho bao ba etišago tirelo ya gagwe pele. Jesu ge a be a matlafatša tumelo ya barutiwa ba gagwe, o itše: “Lesang xo belaêla la re: Re tlo ja’ng? Re tlo nwa’ng? Re tlo apara’ng? Tšeo ka moka ké tše ba dithšaba ba di tsomaxo ka kudu. Xe e le Tata-weno wa maxodimong ó tseba xobane le lena tšeo ka moka Le phêla ka tšôna. Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.” (Mateo 6:31-33) Fela ba hwetša bjang “tšeo ka moka,” e lego dilo tšeo di nyakegago go thuša motho mmeleng? Ga se gore phuthego ya Bokriste e ba thuša ka tša ditšhelete. Go e na le moo, ka moka ga bona ke badiri ba ba ratago modiro. Ge batho ruri ba dira Mmušo wa Jehofa le go loka ga gagwe dilo tše dikgolo maphelong a bona, gona Modimo o šegofatša maiteko a bona a go hwetša dilo tše di nyakegago tša bophelo. O araba thapelo ya bona ya gore, “re fê lehono boxôbê bya rena bya ka mehla.” (Mateo 6:11) Jehofa ga a holofetše bahlanka ba gagwe mahumo a dilo tše di bonagalago ge fela lefase le la mehleng yeno le sa dutše le le gona, eupja o ba holofetša gore ba tla ba le seo ba se nyakago e le ka kgonthe. Ga go na e mongwe yo a ka kgonago go bona kaone gore ba hwetša seo.

36. (a) Ke boitshwaro bja mohuta ofe le kgopolo tšeo di bakago go se bolokege? (b) Gabotse-botse, ke seka sefe se bago gona gare ga batho ba mohuta woo? (c) Jesu o boletše gore lerato le le bjalo le tla hwetšwa kae?

³⁶ Molokišetši o mogolo wa dilo tše di nyakegago tše di bonagalago le gona o dira gore se sengwe se be gona, selo seo e lego sa bohlokwa gore re bolokege mo nakong ye. Ka ge o ka hlokomela gabotse, ruri go ba le dilo tše di nyakegago tše di bonagalago tša bophelo go ka se ke gwa dira motho gore a kwe a kgotsofetše le go bolokega, ge e ba bagwera ba gagwe e le batho bao ba sa kgahlišwego ke yena e le ka kgonthe. Go se bolokege go ata kudu ge batho ba bolela maaka le go hlalefetšana; ge ba diriša maleme a bona ka go se šetše maikwelo a ba bangwe; ge ba ahlola ba bangwe motheong wa mahumo a dilo tše di bonagalago, mmala wa letlalo goba setšhaba; le ge “botho” ka mehla e le bjoo bo bakwago ke maikwelo a utamego a boithati. Seo se hlaelelago kudu gare ga batho ba mohuta woo ke lerato, e lego go kgongwa ga kgonthe mo e sego ga boithati ke batho ba bangwe. Na lerato le le bjalo ruri le ka hwetšwa e sego fela gare ga batho ba sego bakae, eupja e le mokgwa o kgahlišago wa lekoko ka moka la batho? Jesu Kriste o re holofetša gore le ka ba gona. O itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” O tsebile gore go tla ba le batho ba ba bjalo mehleng ya rena, ka gobane o boditše barutiwa ba gagwe gore: “Tsebang, ke na le lena ka mehla xo fihla bofelong bya lefase.”—Johane 13:35; Mateo 28:20.

37. Beibele e re thuša bjang gore re tsebe batho bao ba nago le lerato le le bjalo? (1 Johane 4:20, 21)

³⁷ Ge e ba o hwetša gore lerato le ga le gona gare ga bagwera ba gago, gona o swanetše go retologela go gongwe. Beibele go 1 Johane 4:8, e nea tlhahlo e nyakegago, ka gore: “E a se naxo leratô xa a tsebe Modimo, xobane Modimo ké Yêna leratô.” Ka gona, ke gare ga batho bao ba ‘tsebago Modimo,’ moo lerato le le bjalo le ka hwetšwago. Se ruri, ga se bolele gore o tla le hwetša bathong bao e lego ba bodumedi; o tseba gore seo ga se bjalo. Eupja, o tla le hwetša gare ga batho bao ba tsebago Jehofa Modimo o nnoši wa therešo, bao ba hlomphago leina la gagwe gomme e le bao ba lekago e le ka kgonthe go bapiša maphelo a bona le thato ya gagwe. Mehola e tšwago bagwereng ba ba bjalo e a bonagala.

38. Ka ntle le go ba fela gare ga batho ba ba bjalo, ruri ke’ng se sengwe seo motho a ka se dirago seo se tlago go thuša polokegong ya gagwe le go thabela ga gagwe bophelo?

³⁸ Ee, motho ka tsela ye ga se a swanela go kwa ekare o tla phemišwa mafelelo a boitshwaro bjo bobe bja batho ba bangwe ba lefase. Lega go le bjalo, ge yena ka noši a lemoga go ithekga ga gagwe ka Modimo gomme a amogela e le ka kgonthe ditekanyo tša Modimo tša se se lokilego le sa phošo bjale ka ge di ngwadilwe Beibeleng, gona o holega kudu. O šireletšwa malebana le go itsenya medirong yeo e ka feleletšago feela ka bohloko bja pelo le go imelwa. Bjale ka ge Diema 1:33 e bolela: “Xe e le eo a kwaxo nna [ke gore, bohlale bja Modimo], ó tlo dula a iketla, ó ikaxêla à sa šie kotsi.” Bophelo bja gagwe bo ka ba le morero, ge e ba a bo diriša ka go dumelelana le thato ya Mmopi. Go e na le gore a selekege ka mokgwa woo batho ba bantši ba dirago ka wona, ruri a ka hwetša lethabo leo le tlišwago ke go thuša batho ba bangwe go ithuta ka sehlare seo e lego sona feela sa kgonthe mathateng a batho, e lego Mmušo wa Modimo. Jesu Kriste o boletše ka modiro o bjalo, ka gore: “Ditaba tše tše di lokilego tša mmušo di tlo bolelwa lefaseng ka moka le le agilwego gore e be bohlatse go ditšhaba ka moka; gomme e tlo ba gona bofelo bo ka fihlago.”—Mateo 24:14, NW.

39. Dihlatse tša Jehofa ba ikwa bjang ka bokamoso, gomme ka baka la’ng? (Luka 21:28-32)

³⁹ Ka ge e le batho bao ba nago le karolo modirong wo wa go bolela, ruri ge ba lebelela bokamoso ga ba boife. Ka go ithuta Beibele le ka go dumela seo e se bolelago, ba tseba seo bokamoso bo se huperego. Go e na le go selekwa ke leema-ema le le sa thabišego la ditaba tša lefase, ruri dilong tše ba bona phethagatšo ya diporofeto tša Beibele mabapi le bofelo bja tshepedišo ye ya dilo. Ba tseba gore kgaufsinyane bjale gona mo molokong wo, Modimo o tla senya batho ka moka bao ba tšwelago pele ba sa hlomphe pušo ya gagwe ya go loka le bao ba phegelelago go senya lethabo la go thabela bophelo la magagabo bona. Ba lebeletše pele ka kholofelo go phethagatšwa ga kholofetšo yeo e lego go 2 Petro 3:13, yeo e rego: “Se re se letetšexo ka xo kwa dikholofedišo tša xaxwe ké maxodimo a mafsa le lefase le lefsa, moo xo axilexo tokô.”

40, 41. (a) Ka gona, ke ka baka la’ng go bolelwa gore Dihlatse tša Jehofa ba thabela tekanyo e kgolo ya polokego mo nakong ye, gaešita lege ba phela gare ga lefase le le lego mathateng? (b) Na polokego yeo e thabelwago ke Dihlatse tša Jehofa ke selo seo o se nyakago?

⁴⁰ Wo ke mohuta wa polokego yeo e thabelwago gona mo nakong ye ke barapedi ba Bakriste ba Jehofa Modimo, e lego batho bao ba ‘rapelago Tate ka Moya le ka therešo.’ E tlišwa ke go ikokobetša ga bona melaong e lokilego ya Jehofa, le go dira gore e dire maphelong a bona. Bjale ka ge go boletšwe go Jesaya 32:17, 18: “Modirô wa tokô e tlo ba kaxišô; ’me tokô e tlo tliša xo iketla le xo holofêla ka xo sa felexo. Sethšaba sa-ka se tlo dula maxaeng a moláô, nywakong e bôtêxaxo, madulong a xo iketla.” Ke bathekgi ba ba botegago ba bogoši bja Jehofa. Ga ba ipeele melao ya bona ka go loka le bobe. Ga ba leke go lokiša mathata a lefase ka noši. Ba amogela le go thuša ka lethabo tokišetšo ya lerato yeo Jehofa a e dirilego, e lego Mmušo wa gagwe diatleng tša Jesu Kriste.

⁴¹ Na o ka rata go ba le karolo polokegong yeo ba e thabelago? O ka ba le yona.

Seo o ka se Dirago ka Yona

42. Ka go ya Holong ya Mmušo ya Dihlatse tša Jehofa, o tla kgona go iponela’ng?

⁴² O mongwe wa megato ya pele ke go kopanela le batho bao ba thabelago polokego e bjalo. Ka tsela ye o ka iponela ge e ba ye e le polokego yeo ruri o dutšego o e nyaka. Dihlatse tša Jehofa ba go laletša ka borutho gore o tle dibokeng tša bona Holong ya Mmušo yeo e lego lefelong la geno. O tla hwetša gore diboka tša bona ga se tša tirelo ya mokgwa, gomme ga go na dikoleke tšeo di tšewago. Go e na le moo, go na le poledišano e nago le morero ya Lentšu la Modimo gotee le kamoo le kgomago maphelo a rena ka gona. Beibele e a eletša: “A re hlôkômêlaneng seng sa rena, re išanê leratong le medirong e botse. Re se ngale phuthêxô ya xešo ka mokxwa wa ba bangwê; sa rena e bê xo eletšana.” (Ba-Hebere 10:24, 25) Ke wona moya wo woo o tlago go o hwetša Holong ya Mmušo.

43. (a) Ge e ba wena ka noši o tla thabela polokego yeo o e bonago maphelong a batho ba bangwe ba lego Holong ya Mmušo, gona ke’ng yeo o e nyakago? (b) Ke ka baka la’ng go se le o mongwe wa rena yo a ka swarago kwano e bjalo ka go e nyefiša, fela e ka hwetšwa bjang?

⁴³ Go ba gona dibokeng tše di bjalo go tla go thuša gore o bone polokego yeo batho ba bangwe ba e thabelago, gomme ka ntle le pelaelo o tla thabela bogwera bja bona. Eupja go na le selo se sengwe se segolo seo se nyakegago, ge e ba o tla ba le polokego e bjalo wena ka noši. Se segolo seo o se nyakago ke kwano e amogelwago ke Jehofa Modimo. Ke Yena yoo bophelo bja gago bja nakong ye gotee le ditebelelo ka moka tša gago ka bokamoso, bo ithekgilego ka yena. Kwano e bjalo ga se selo seo mang le mang wa rena a ka se swarago ka go se nyefiša. Ga se ra tswalwa le yona. Ka moka ga rena re ditlogolwana tša Adama wa modiradibe gomme re tswetšwe lapeng la batho leo le furaletšego Modimo. Gore re tle re gaugelwe ke Jehofa, gona re swanetše gore re boelanywe le yena gomme se se kgonega feela motheong wa tumelo ya go dumela tokišetšo ya lerato yeo a e dirilego ka sehlabelo sa Morwa wa gagwe. Bjale ka ge Jesu ka noši a boletše: “Tsela ké Nna, le therešo, le bophelô. Xa xo e a tlaxo xo Tate xe e se ka Nna.”—Johane 14:6.

44. (a) Re swanetše go thoma ka go lemoga’ng ka bophelo, gomme maphelo a rena a swanetše go dirišwa bjang? (Kutollo 4:11) (b) Gore re thabiše Jehofa, ruri rena ka noši re swanetše go kwa bjang ka yena? (c) Ke ka baka la’ng go kolobetšwa ga meetseng e le gabohlokwa, gomme ke’ng seo se nyakegago pele ga ge motho a ka itokišetša go kolobetšwa? (Mateo 28:19, 20)

⁴⁴ Re swanetše go lemoga gore re kolota maphelo a rena go Modimo, le gore go palelwa lege e le gofe tabeng ya go diriša maphelo a rena ka go kwa Modimo ke phošo. Ge e ba re swabišwa e le ka kgonthe ke go palelwa lege e le gofe ga nakong e fetilego tabeng ya go diriša maphelo a rena ka go dumelelana le thato ya Modimo, gona re tla lahla tsela e mpe gomme re sokologe re dire gore maphelo a rena a dumelelane le thato ya Modimo. Se se akaretša go dira seo Jesu a boletšego gore barutiwa ba gagwe ba swanetše go se dira, e lego, ‘go ikgafa.’ (Mateo 16:24) Motho yo a dirago se ruri ga a sa hlwa a ipolela gore o na le “tshwanelo” ya go phela bophelo bja gagwe e le fela gore a kgotsofatše dikganyogo tšeo e lego tša gagwe tša boithati, a sa kgongwe ke seo e lego thato ya Modimo. Go e na le moo, o ikokobetša e le ka kgonthe tabeng ya go dira thato ya Modimo ka ge e bontšhitšwe ke Morwa wa gagwe. O dira se ka gobane e le se se swanetšego le ka gobane a kgodišega gore selo se sengwe le se sengwe seo Jehofa a se dirago, se na le morero o botse le o lokilego, le gore seo Modimo a se dirago se tla feleletša ka ditšhegofatšo go rena ge e ba re rata go loka. Ruri o rata Jehofa ‘ka pelo ya gagwe ka moka, ka moya wa gagwe ka moka, ka tlhaologanyo ya gagwe ka moka le ka matla a gagwe ka moka.’ (Mareka 12:29, 30) Ka go dira boineelo bjo bo bjalo pelong ya gagwe, gona o itokišetša go ihlagiša pele ga bohle ka go kolobetšwa meetseng ka go ekiša Jesu Kriste, le ka go kwa ditaelo tšeo a di neilego barutiwa ba gagwe. Ke ka tsela ye feela yeo e bontšhitšwego Lentšung la Modimo moo motho a ka bago kwanong e amogelwago ke Modimo wa therešo, gomme a ba le karolo polokegong yeo bahlanka ba gagwe ba e thabelago.

45. Re bontšha bjang gore re nyaka e le ka kgonthe gore Jehofa e-be Mmuši wa rena?

⁴⁵ Ka gona, ke gabohlokwa gore o tšwele pele o bontšha gore o lahlile e le ka kgonthe tsela ya boipušo yeo e boleletšwego ke Sathane; gore ga o ipeele molao woo e lego wa gago ka botse le bobe; gore o rata e le ka kgonthe gore Jehofa e be Mmuši wa gago. O tla swanela go dira go etša ge go boletšwe go Diema 3:5, 6: “Bôta [Jehofa] Modimo ka pelo ka moka; O se kê wa ithekxa ka xo fo re: Ke n’e thlaoloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Ee, o tla sepediša maoto a gago tseleng ya therešo le polokegong ya ka mo go sa felego.

46. Ke polokego efe yeo e tlelago batho ba amogelegago e le ka kgonthe ditokišetšo tša lerato tša Jehofa?

⁴⁶ A ditšhegofatšo tše dikgolo gakaakang tšeo di tlelago batho ka moka bao ba amogelago e le ka kgonthe ditokišetšo tša lerato tšeo Jehofa a di diretšego batho! Ka go ema ba tiile tlase ga pušo ya gagwe, ruri ba šireleditšwe mo nakong ye gomme ba lebeletše bokamosong ka kholofelo. Ka baka la botho bjo lerato bja Jehofa le therešo ya gagwe, ba tla ba le karolo polokegong e kgotsofatšago e le ka kgonthe yeo e tlago go tlela batho tlase ga Mmušo wa Modimo diatleng tša Morwa wa gagwe, Jesu Kriste.

[Mongwalo wa tlase]

[Study Questions]

[Seswantšho go letlakala 4]

Batho bao ba phelago mo nakong ye, ba tla bona letšatši leo tlala e tlago go fela ka lona

[Seswantšho go letlakala 7]

Ditebelelo tša rena ka bokamoso di ithekgile ka Motho yoo a bopilego magodimo le lefase

[Seswantšho go letlakala 13]

Pego ya Beibele ka batswadi ba rena ba pele, e bontšha lebaka leo go se bolokege go sentšego bophelo bja batho lehono

[Seswantšho go letlakala 22]

Tlase ga Mmušo wa Modimo go tla fela bokebekwa, gomme go fele le dikotsi tše di ka welago thoto ya motho le mothong ka noši

[Seswantšho go letlakala 24]

Lentšu la Modimo le holofetša gore bolwetši le lehu di tla fedišwa, ee, gaešita le baratiwa ba rena ba ba hwilego ba tla tsošetšwa bophelong gape