Go Hlankela Re Le Batseta Ba Khutšo Ya Modimo
“A ratega bjang maoto a batseta . . . ba ba kwatšago khutšo.”—JESAYA 52:7, PK.
1, 2. (a) Go etša ge go boletšwe e sa le pele go Jesaya 52:7, ke ditaba dife tše dibotse tšeo di swanetšego go goelelwa? (b) Mantšu a Jesaya a boporofeta a be a bolela’ng go Isiraele ya bogologolo?
GO NA le ditaba tše dibotse tše di swanetšego go goeletšwa! Ke ditaba tša khutšo—khutšo ya kgonthe. Ke molaetša wa phološo wo o lego mabapi le Mmušo wa Modimo. Kgale-kgale moporofeta Jesaya o ile a ngwala ka wona, gomme mantšu a gagwe re a boloketšwe go Jesaya 52:7 (PK), moo re balago ka gore: “A ratega bjang maoto a batseta ba ditaba tše dibotse dithabeng, ba ba kwatšago khutšo, ba ba bolelago tše dibotse, ba ba kwatšago tša poloko, ba ba rego go Tsione: Modimo wa gago ke kgoši.”
2 Jehofa o ile a budulela moporofeta wa gagwe Jesaya gore a ngwale molaetša woo bakeng sa go hola Isiraele ya bogologolo le go hola rena lehono. Molaetša woo o bolela’ng? Nakong ya ge Jesaya a be a ngwala mantšu ao, mmušo wa ka leboa wa Isiraele mo gongwe o be o šetše o išitšwe bothopša ke ba-Asiria. Ka morago, badudi ba mmušo wa ka borwa wa Juda ba be ba tla išwa Babele e le mathopša. Yeo e be e le mehla ya masetla-pelo le khuduego setšhabeng ka gobane batho ba be ba sa kwe Jehofa gomme ka go rialo ba se khutšong le Modimo. Bjalo ka ge Jehofa a be a ba boditše, boitshwaro bja bona bjo bobe bo be bo baka karogano magareng ga bona le Modimo wa bona. (Jesaya 42:24; 59:2-4) Lega go le bjalo, Jehofa o ile a bolela e sa le pele ka Jesaya gore ka nako e swanetšego dikgoro tša Babele di be di tla ahlama. Batho ba Modimo ba be ba tla lokologa go ka boela nageng ya gabo bona, ge ba le moo ba tsošološe tempele ya Jehofa. Tsione e be e tla tsošološwa gomme borapedi bja Modimo wa therešo bo be bo tla boela bja tšwetšwa pele Jerusalema.—Jesaya 44:28; 52:1, 2.
3. Ke bjang kholofetšo ya tsošološo ya Isiraele le yona e bego e le boporofeta bja khutšo?
3 Kholofetšo ye ya phološo e be e bile e le boporofeta bja khutšo. Go bušetšwa nageng yeo Jehofa a bego a e neile ba-Isiraele e be e tla ba bohlatse bja kgaugelo ya Modimo le go sokologa ga bona. Go be go tla bontšha gore ba be ba le khutšong le Modimo.—Jesaya 14:1; 48:17, 18.
“Modimo wa Xaxo ó Tšere Boxoši!”
4. (a) Ke ka kgopolo efe go bego go ka bolelwa ka 537 B.C.E. gore ‘Jehofa o tšere bogoši’? (b) Jehofa o ile a tsena ditaba gare bjang bakeng sa go hola batho ba gagwe nywageng ya ka morago?
4 Ge Jehofa a be a phetha phološo ye ka 537 B.C.E., go be go ka dirwa tsebišo ka mo go swanetšego go Tsione ya gore: “Modimo wa xaxo ó tšere boxoši!” Ke therešo gore Jehofa ke “Kgoši ya bosafelego.” (Kutollo 15:3, NW) Eupša go phološwa mo ga batho ba gagwe e be e le ponagatšo e mpsha ya bogoši bja gagwe. Go bontšhitše ka tsela e kgahlišago bogolo bja matla a gagwe ka godimo ga a mmušo o matla kudu wa batho go ba go fihla nakong yeo. (Jeremia 51:56, 57) Ka baka la go šoma ga moya wa Jehofa, maano-mabe a mangwe malebana le batho ba gagwe a ile a šitišwa. (Esitere 9:24, 25) Jehofa o ile a tsena ditaba gare leboelela ka ditsela tše di fapa-fapanego bakeng sa go dira gore kgoši ya ba-Mede le ya ba-Peresia di sepedišane le go phethagatšwa ga thato ya gagwe e le mmuši. (Sakaria 4:6) Ditiragalo tše di kgahlišago tšeo di ilego tša direga mehleng yeo re di ngwaletšwe ka dipukung tša Beibele tša Esera, Nehemia, Esitere, Hagai le Sakaria. Le gona ke mo go tiišago tumelo gakaakang go di boeletša!
5. Ke ditiragalo dife tše bohlokwa tše di bontšhwago go Jesaya 52:13–53:12?
5 Lega go le bjalo, seo se ilego sa direga ka 537 B.C.E. le ka morago ga moo e be e le mathomo feela. Kapejana ka morago ga boporofeta bja tsošološo go kgaolo 52, Jesaya o ile a ngwala ka go tla ga Mesia. (Jesaya 52:13–53:12) Ka Mesia yo a itlhatsetšego e le Jesu Kriste, Jehofa o be a tla nea molaetša wa phološo le khutšo ya bohlokwa bjo bogolo gaešita le go feta seo se diregilego ka 537 B.C.E.
Motseta yo Mogolo Kudu wa Khutšo wa Jehofa
6. Motseta yo mogolo kudu wa khutšo wa Jehofa ke mang, gona ke thomo efe yeo a ilego a e diriša go yena ka noši?
6 Jesu Kriste ke motseta yo mogolo kudu wa khutšo wa Jehofa. Ke yena Lentšu la Modimo, e lego Mmoleledi wa Jehofa ka noši. (Johane 1:14) Ka go dumelelana le se, ka nako e itšego ka morago ga ge a kolobeditšwe Nokeng ya Jorodane, Jesu o ile a ema ka sinagogeng Natsaretha gomme a bala ka go hlaboša thomo ya gagwe go tšwa go Jesaya kgaolo 61 ka lentšu le le phagamego. Thomo yeo e bontšhitše gabotse gore seo a bego a rometšwe go se bolela se be se akaretša “khunoloxô” le “xo alafa,” gotee le go hwetša kamogelo ya Jehofa. Lega go le bjalo, Jesu o ile a dira se se fetago go fo goeletša molaetša wa khutšo. Modimo o be a bile a mo rometše go nea motheo bakeng sa khutšo e swarelelago.—Luka 4:16-21.
7. Ke mafelelo afe ao a tlišwago ke go ba le khutšo le Modimo mo go dirwago gore go kgonege ka Jesu Kriste?
7 Nakong ya go belegwa ga Jesu, barongwa ba ile ba iponagatša go badiši kgaufsi le Betlehema ba tumiša Modimo ba re: “Tumišô a e yê xo Modimo maxodimo-dimong; lefaseng xo bê le khutšô, kxahlišô bathong.” (Luka 2:8, 13, 14, mongwalo o sekamego ke wa rena.) Ee, go be go tla ba le khutšo bakeng sa bao Modimo a ba kgahlegelago ka gobane ba be ba bontšha tumelo tokišetšong yeo a bego a e dira ka Morwa wa gagwe. Seo se be se tla bolela’ng? Se be se tla bolela gore gaešita le ge batho ba belegetšwe sebeng, ba be ba ka hwetša boemo bjo bo hlwekilego pele ga Modimo, e lego tswalano e amogelegago go yena. (Ba-Roma 5:1) Ba be ba ka thabela boiketlo bja ka gare, e lego khutšo e sa kgonegego ka tsela le ge e le efe e nngwe. Ka nako e beilwego ya Modimo, go be go tla ba le go lokologa go ditla-morago ka moka tša sebe sa Adama, go akaretša bolwetši le lehu. Batho ba be ba ka se sa hlwa ba foufala goba ba e-ba difoa goba digole. Bofokodi bjo bo ferekanyago le ditšharakano tša monagano tše di kwešago bohloko di tla be di tlošeditšwe sa ruri. Go be go tla kgonega gore re thabele bophelo ka mo go sa felego re phethagetše.—Jesaya 33:24; Mateo 9:35; Johane 3:16.
8. Khutšo ya Modimo e holofetšwa bomang?
8 Khutšo ya Modimo e holofetšwa bomang? E holofetšwa bohle bao ba bontšhago tumelo go Jesu Kriste. Moapostola Paulo o ngwadile gore ‘Modimo o bone go lokile gore ka Kriste a ipoelanye le dilo tše dingwe ka moka ka madi ao Jesu a a tšholotšego koteng ya tlhokofatšo.’ Moapostola o okeditše ka gore poelanyo ye e be e tla akaretša “tša maxodimong”—ke gore bao e bego e tla ba baja-bohwa-gotee le Kriste legodimong. E be e bile e tla akaretša “tša mo lefaseng”—ke gore bao ba bego ba tla gaugelwa ka sebaka sa go phela ka mo go sa felego lefaseng le, ge le tlišwa boemong bjo bo tletšego bja Paradeise. (Ba-Kolose 1:19, 20) Ka baka la go ikhola ga bona ka mohola wa sehlabelo sa Jesu le ka baka la go kwa ga bona Modimo go tšwa pelong, ba ka moka ba ka thabela bogwera bjo bobotse le Modimo.—Bapiša le Jakobo 2:22, 23.
9. (a) Go ba le khutšo le Modimo go kgoma ditswalano dife tše dingwe? (b) Ka morero wa go tliša khutšo e swarelelago mo gohle, ke matla afe a taolo ao Jehofa a ilego a a nea Morwa wa gagwe?
9 Khutšo e bjalo le Modimo ke e bohlokwa gakaakang! Ge e ba go se na khutšo le Modimo, go ka se be le khutšo e swarelelago goba khutšo e nago le morero tswalanong le ge e le efe e nngwe. Khutšo le Jehofa ke motheo wa khutšo ya kgonthe lefaseng. (Jesaya 57:19-21) Ka mo go swanetšego, Jesu Kriste ke Kgošana ya Khutšo. (Jesaya 9:5 [9:6, NW]) Jehofa gape o gafetše yena yo, yoo batho ba ka boelanywago le Modimo ka yena matla a go buša. (Daniele 7:13, 14) Le gona mabapi le mafelelo a pušo ya Jesu ya bogoši ya go buša batho, Jehofa o holofetša gore: “Go tla ba le khutšo e sa felego.”—Jesaya 9:6 (9:7, NW); Psalme 72:7.
10. Jesu o ile a bea mohlala bjang go goeletšeng molaetša wa khutšo wa Modimo?
10 Molaetša wa khutšo wa Modimo o nyakwa ke batho ka moka. Jesu ka noši o beile mohlala wa phišego tabeng ya go o bolela. O dirile se tikologong ya tempele kua Jerusalema, patogeng ya thaba, tseleng, go mosadi wa mo-Samaria sedibeng le magaeng a batho. Kae le kae moo go bego go e-na le batho, Jesu o ile a dira dibaka tša go bolela ka Mmušo wa Modimo.—Mateo 4:18, 19; 5:1, 2; 9:9; 26:55; Mareka 6:34; Luka 19:1-10; Johane 4:5-26.
Go Tlwaetšwa go Sepela Dikgatong tša Kriste
11. Jesu o ile a tlwaeletša barutiwa ba gagwe modiro ofe?
11 Jesu o ile a ruta barutiwa ba gagwe gore ba bolele molaetša wa khutšo wa Modimo. Ba ile ba lemoga gore go etša ge Jesu e be e le “Hlatse ye e bôtêxaxo” ya Jehofa, le bona ba na le boikarabelo bja go nea bohlatse. (Kutollo 3:14; Jesaya 43:10-12) Ba ile ba lebelela Kriste e le Moetapele wa bona.
12. Paulo o ile a bontšha bjang bohlokwa bja modiro wa boboledi?
12 Moapostola Paulo o ile a nea mabaka mabapi le bohlokwa bja modiro wa boboledi, a re: “Hleng lengwalô le re: E a dumêlaxo a ka se lešwe dihlong.” Ke gore, ga go na motho yo a bontšhago tumelo go Jesu Kriste e le Moemedi yo Mogolo wa Jehofa wa phološo, yo a tlago go nyamišwa. Le gona ga go na setlogo sa motho sa morafo se se dirago gore a se swanelege, ka gobane Paulo o okeditše ka gore: “Xa xo hlaolwe Mo-Juda xoba Mo-Gerika. Morêna wa bohle ké o tee, e a humilexo wa xo kxôna xo nea bohle ba ba mmitšaxo. Xobane xo thwe: Ba xo tlo phološwa ké ba ba bitšaxo ’ina la Morêna.” (Ba-Roma 10:11-13) Eupša batho ba be ba tla ithuta bjang mabapi le sebaka seo?
13. Gore batho ba kwe ditaba tše di lokilego go be go nyakega’ng, gomme Bakriste ba lekgolong la pele la nywaga ba ile ba arabela bjang go senyakwa seo?
13 Paulo o ile a bolela ka go nyakega moo ga thušo ka go botšiša dipotšišo tšeo mohlanka yo mongwe le yo mongwe wa Jehofa a swanetšego go nagana ka tšona. Moapostola o ile a botšiša gore: “Ba tlo bitša bya’ng xe ba sešo ba Mo dumêla? Ba tlo dumêla bya’ng xe ba sešo ba Mo kwa? Ba tlo kwa bya’ng, xe xo se sexoeledi? Xomme ba ka xoêlêla bya’ng xe ba sa rongwe?” (Ba-Roma 10:14, 15) Pego ya Bokriste bja pele e nea bohlatse bjo bo lego molaleng bja gore banna le basadi, ba bafsa le ba bagolo, ba ile ba arabela mohlaleng wo o beilwego ke Kriste le baapostola ba gagwe. Ba ile ba fetoga bagoeledi ba fišegago ba ditaba tše di lokilego. Ka go ekiša Jesu, ba ile ba bolela le batho kae le kae moo ba bego ba ka ba hwetša. Ba ile ba tšwetša pele bodiredi bja bona phatlalatša gotee le ka ntlo le ntlo ba e-na le kganyogo ya go se foše le ge e le ofe.—Ditiro 17:17; 20:20.
14. Go ile gwa ipontšha bjang e le ga therešo gore “maoto” a bao ba goeletšago ditaba tše di lokilego e be e le a ‘rategago’?
14 Go ba gona, ga se motho yo mongwe le yo mongwe yo a ilego a amogela baboledi ba Bakriste ka botho. Lega go le bjalo, seo Paulo a se tsopotšego go Jesaya 52:7 se ile sa ipontšha e le therešo. Ka morago ga go botšiša potšišo e rego, ‘Ba tla bolela bjang ba sa rongwa?’ o ile a oketša ka gore: “Ké tšôna tše di ngwadilwexo xwa thwe: A ratêxa bya’ng maoto a motseta wa ditaba tše botse!” Bontši bja rena ga re nagane ka maoto a rena e le a rategago goba a mabotse. Ka gona, se se bolela’ng? Ke maoto ao ka tlwaelo a sepedišago motho ge a e-tšwa a e-ya go bolela le ba bangwe. Maoto a bjalo ruri a emela motho. Le gona re ka kgodišega gore go ba bantši bao ba ilego ba kwa ditaba tše di lokilego go baapostola le go barutiwa ba bangwe ba lekgolong la pele la nywaga ba Jesu Kriste, Bakriste ba ba pele ruri e be e le selo se sebotse go se bona. (Ditiro 16:13-15) Go feta moo, ba be ba le bohlokwa mahlong a Modimo.
15, 16. (a) Bakriste ba pele ba ile ba bontšha bjang gore e be e le batseta ba khutšo e le ka kgonthe? (b) Ke’ng seo se ka re thušago go phetha bodiredi bja rena ka tsela e swanago le yeo Bakriste ba lekgolong la pele la nywaga ba dirilego ka yona?
15 Balatedi ba Jesu ba be ba e-na le molaetša wa khutšo, gomme ba ile ba o neela ka mokgwa wa khutšo. Jesu o ile a nea barutiwa ba gagwe ditaelo tše: “Mo Le tsênaxo ngwakong, Le thômê xo re: Ngwakô wó a o bê le moláô! Xe xôna-moo xo ka ba le ngwana wa moláô, xôna moláô wa lena ó tlo dula xo yêna; xe a se xôna, moláô wa lena o tlo boêla xo lena.” (Luka 10:5, 6) Sha·lohmʹ goba ‘khutšo’ ke tumedišo e tlwaelegilego ya Sejuda. Lega go le bjalo, ditaelo tša Jesu di be di akaretša go gontši go feta se. Ka ge e be e le “batseta ba ba emelago Kriste,” barutiwa ba gagwe ba ba tloditšwego ba ile ba opeletša batho ka gore: “A nke Le boêlanywê le Modimo!” (2 Ba-Korinthe 5:20, bapiša le NW.) Ka go dumelelana le ditaelo tša Jesu, ba ile ba bolela le batho ka Mmušo wa Modimo le seo o bego o tla se bolela go bona e le batho ka o tee ka o tee. Bao ba ilego ba theetša ba ile ba amogela tšhegofatšo; bao ba ilego ba gana molaetša ba ile ba lahlegelwa.
16 Dihlatse tša Jehofa di tšwetša pele bodiredi bja tšona ka tsela e swanago lehono. Ditaba tše di lokilego tšeo di di išago go batho ga se tša tšona; ke tša Yo a di romilego. Thomo ya tšona ke go di neela. Ge e ba batho ba di amogela, ba ipea boemong bja go hwetša ditšhegofatšo tše di kgahlišago. Ge e ba ba di gana, ba gana go ba le khutšo le Jehofa Modimo le Morwa wa gagwe, Jesu Kriste.—Luka 10:16.
Go ba Khutšong Lefaseng le le Dubegilego
17. Gaešita le ge re lebeletšane le batho ba gobogilego, re swanetše go itshwara bjang gomme ka baka la’ng?
17 Go sa šetšwe karabelo le ge e le efe ya batho, ke gabohlokwa go bahlanka ba Jehofa gore ba gopole gore ke batseta ba khutšo ya Modimo. Batho ba lefase ba ka tsena dingangišanong tše šoro gomme ba bontšha bogale ka go bolela dipolelo tše di hlabago goba ka go goeletša maroga go bao ba ba selekago. Mohlomongwe ba bangwe ba rena re ile ra dira seo dinakong tše di fetilego. Lega go le bjalo, ge e ba re apere motho yo mofsa gomme ga bjale re se karolo ya lefase, re ka se ke ra ekiša ditsela tša bona. (Ba-Efeso 4:23, 24, 31; Jakobo 1:19, 20) Go sa šetšwe kamoo ba bangwe ba itshwarago ka gona, re tla diriša keletšo e rego: “Xe xo kxônêxa ka thokô ya lena, Le phedišanê xa-botse le batho ka moka.”—Ba-Roma 12:18.
18. Re swanetše go arabela bjang ge e ba mohlankedi wa setšhaba a re galefela gomme ka baka la’ng?
18 Bodiredi bja rena ka dinako tše dingwe bo ka re tliša pele ga bahlankedi ba setšhaba. Ka go gatelela matla a bona a taolo, mo gongwe ba ka ‘nyaka ka šiši go rena’ tlhaloso ge e le mabapi le lebaka leo ka lona re dirago dilo tše itšego goba lebaka leo ka lona re efogago go tšea karolo modirong o itšego. Mo gongwe ba ka nyaka go tseba lebaka leo ka lona re bolelago molaetša wo re o bolelago—molaetša woo o pepentšhago bodumedi bja maaka le wo o bolelago ka bofelo bja tshepedišo ya gona bjale ya dilo. Go hlompha ga rena mohlala o beilwego ke Kriste go tla re tutueletša go bonagatša boleta le tlhompho e tseneletšego. (1 Petro 2:23; 3:15) Gantši bahlankedi ba bjalo ba ba ba le ka tlase ga kgateletšo e tšwago go baruti goba mo gongwe e tšwago go bao ba ba phagametšego. Karabo e boleta e ka ba thuša go lemoga gore modiro wa rena ga o kotsi go bona goba khutšong ya setšhaba. Karabo e bjalo e tšweletša moya wa tlhompho, tirišano le khutšo go bao ba e amogelago.—Tito 3:1, 2.
19. Ke medirong efe yeo go yona Dihlatse tša Jehofa le ka mohla di sa akaretšwego?
19 Dihlatse tša Jehofa di tsebja lefaseng ka bophara e le batho bao ba sa tšeego karolo dithulanong tša lefase. Ga di akaretšwe dikgohlanong tša lefase tša mabapi le morafo, bodumedi goba dipolitiki. (Johane 17:14) Ka baka la gore Lentšu la Modimo le re laela gore re “ikokobeletše babuši ba bagolo,” re ka se ke ra ba ra nagana ka go tšea karolo ditirong tša dikhuduego tša setšhaba tša go gana melao ya mmušo. (Ba-Roma 13:1, NW) Dihlatse tša Jehofa le ka mohla di ka se ke tša tlatša mokgatlo le ge e le ofe wo o ikemišeditšego go phekgola mmušo. Ka baka la ditekanyetšo tšeo di beilwego ke Jehofa bakeng sa bahlanka ba gagwe ba Bakriste, go tšea ga tšona karolo tšhollong ya madi goba bošorong bja mohuta le ge e le ofe ke mo go sa swanelago! Bakriste ba therešo ga ba fo bolela ka khutšo; ba phela ka go dumelelana le seo ba se bolelago.
20. Ge e le mabapi le khutšo, Babele o Mogolo o dirile pego ya mohuta mang?
20 Ka go fapana le Bakriste ba therešo, bao ba emelago mekgatlo ya bodumedi ya Bojakane ga se ba itlhatsela e le batseta ba khutšo. Madumedi a Babele o Mogolo—dikereke tša Bojakane le madumedi ao e sego a Bokriste ka mo go swanago—a ile a hlokomologa, a thekga ge e le gabotse le go eta pele dintweng tša ditšhaba. A ile a ba a hlohleletša tlaišo gaešita le polao ya bahlanka ba botegago ba Jehofa. Ka baka leo, Kutollo 18:24 e tsebatša mabapi le Babele o Mogolo gore: “Motseng woo ké mo xo hweditšwexo madi a Baporofeta le a bakxêthwa è le a mantši, le a bohle ba ba bolailwexo mo lefaseng.”
21. Batho ba bantši ba dipelo tše botegago ba arabela bjang ge ba bona phapano boitshwarong bja batho ba Jehofa le bja bao ba dirišago bodumedi bja maaka?
21 Ka go se swane le madumedi a Bojakane le Babele o Mogolo ka moka, bodumedi bja therešo ke matla a kopanyago, a tsepamego. Jesu Kriste o ile a botša balatedi ba gagwe ba therešo gore: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:35) Leo ke lerato leo le fetelago ka kua ga mellwane ya botšhaba, ya tša leago, ya tša boiphedišo le ya bomorafo yeo e aroganyago batho ba bangwe ka moka. Ka ge di bone se, dimilione tša batho go dikologa lefase ka moka di bolela le bahlanka ba Jehofa ba tloditšwego ka gore: “A nkê re yê le lena, ka xobane re kwile xore Modimo ó na le lena.”—Sakaria 8:23.
22. Re lebelela bjang modiro wa go nea bohlatse wo o sa dutšego o nyaka go phethwa?
22 Ka ge re le batho ba Jehofa, re thaba kudu mabapi le seo se šetšego se phethagaditšwe, eupša modiro ga se wa hlwa o phethwa. Molemi ka morago ga go bjala peu le go hlagola tšhemo ya gagwe, ga a kgaotše. O tšwela pele a šoma, kudu-kudu kgabagareng ya nako ya puno. Nako ya puno e nyaka boiteko bjo bo sa kgaotšego le bjo bo tiilego. Le gona, mo nakong ye go na le puno e kgolo ya barapedi ba Modimo wa therešo go feta le ge e le neng pele. Ye ke nako ya go hlalala. (Jesaya 9:2) Ke therešo gore re lebeletšana le kganetšo le go se thabele. Re le batho ka o tee ka o tee, re ka ba re katanela go lebeletšana ka katlego le bolwetši bjo šoro, maemo a thata a lapa goba mathata a tša boiphedišo. Eupša lerato la go rata Jehofa le re tutueletša gore re kgotlelele. Molaetša wo re o neilwego ke Modimo ke selo seo batho ba swanetšego go se kwa. Ke molaetša wa khutšo. Ruri ke molaetša woo Jesu ka noši a ilego a o bolela—e lego ditaba tše di lokilego tša Mmušo wa Modimo.
Karabo ya Gago ke Efe?
◻ Jesaya 52:7 e bile le phethagatšo efe go Isiraele ya bogologolo?
◻ Jesu o ile a itlhatsela bjang e le motseta yo mogolo kudu wa khutšo?
◻ Moapostola Paulo o ile a kgokaganya bjang Jesaya 52:7 le modiro wo Bakriste ba tšeago karolo go wona?
◻ Go ba batseta ba khutšo mehleng ya rena go akaretša’ng?
[Pictures on page 13]
Go swana le Jesu, Dihlatse tša Jehofa ke batseta ba khutšo ya Modimo
[Pictures on page 15]
Dihlatse tša Jehofa di dula di e-na le khutšo go sa šetšwe kamoo batho ba arabelago ka gona molaetšeng wa Mmušo