Ba Dirile Thato Ya Jehofa

Jesu O Roma Barutiwa Ba 70

E BE e le lehlabula la 32 C.E. Go be go šetše dikgwedi tše tshela feela pele ga lehu la Jesu. Ka gona, e le gore a akgofiše modiro wa boboledi le go tšwetša pele tlwaetšo ya ba bangwe ba balatedi ba gagwe, o ile a kgetha barutiwa ba 70 gomme “a ba roma ba mo êta-pele ka babedi [ka] babedi, ba ya metseng le metsaneng ka moka ye a tl’o xo tla xo yôna.”—Luka 10:1.a

Jesu o ile a romela barutiwa ba gagwe “ba mo êta-pele” e le gore batho ba kgone go kgetha kapejana ge e ba ba be ba thekga goba ba sa thekge Mesia ge Jesu ka boyena a be a tla fihla ka morago. Eupša ke ka baka la’ng a ile a ba roma “ka babedi [ka] babedi”? Go molaleng gore e be e le gore ba kgothatšane ge ba be ba lebane le kganetšo.

Ge a gatelela go akgofa ga modiro wa bona wa boboledi Jesu o ile a botša balatedi ba gagwe gore: “Punô ké e ntši; ’me badiri xa ba nene. Ké xôna kxopêlang Mong wa punô, a romê badiri punong ya xaxwe.” (Luka 10:2) Go swantšhwa le puno go be go swanetše, ka gore tiego le ge e le efe nakong ya puno e be e ka feleletša ka go senyega ga dibjalo tša bohlokwa. Ka mo go swanago, ge barutiwa ba be ba ka se šetše kabelo ya bona ya go bolela, maphelo a bohlokwa a be a ka lahlega!—Hesekiele 33:6.

Badiredi Bao ba sa Šitišwego

Jesu o ile a tšwela pele go laela barutiwa ba gagwe gore: “Le se kê la ya Lè rwele sekhwama, le xe e le mokotla, le xe e le diêta; le xôna Le se kê la akêlana le motho tseleng.” (Luka 10:4) E be e le mo go tlwaetšwego gore mosepedi a sware e sego feela sekhwama le dijo, eupša gotee le para e nngwe ya diramphašane ka gore disola tša dieta di be di ka fela le marala a be a ka kgaoga. Eupša barutiwa ba Jesu ba be ba se ba swanela go tshwenyega ka dilo tše bjalo. Go e na le moo, ba be ba swanetše go holofela gore Jehofa o be a tla ba hlokomela ka go diriša ba-Isiraele-gotee le bona bao gare ga bona go amogela baeng e bego e le mokgwa wo o tlwaetšwego.

Eupša ke ka baka la’ng Jesu a ile a botša barutiwa ba gagwe gore ba se ke ba gokarelana le motho? Na ba be ba swanetše go ba ba sego borutho gaešita le go ba ba šoro? Le gatee! Lentšu la Segerika e lego a·spaʹzo·mai leo le bolelago go gokarela ka go dumediša le ka bolela se se fetago “dumelang” goba “thobela” e lokilego. E ka ba ya bolela go atlana mo go tlwaetšwego, go gokarelana le go bolela nako e telele mo go ka thomago ge batho ba babedi ba tlwaelanego ba gahlane. Mohlalosi yo mongwe o re: “Ditumedišo gare ga batho ba ka Bohlabela di be di sa dirwe, bjalo ka ge go le bjalo go rena ka go inama go se nene goba go otlolla letsogo, eupša go be go dirwa ka dikgokarelo tše dintši le go inama gaešita le go khunama. Tše ka moka di be di nyaka nako e ntši.” (Bapiša le 2 Dikxoši 4:29.) Ka gona Jesu o ile a thuša balatedi ba gagwe go phema ditšhitišo tšeo di sa nyakegego gaešita le ge e be e le tše tlwaetšwego.

Sa mafelelo, Jesu o ile a botša barutiwa ba gagwe gore ge ba be ba tsena ka ngwakong gomme ba amogelwa, ba be ba swanetše go ‘dula ba je ba nwe tše ba [bego ba tla ba] ba e-na le tšona.’ Eupša ge ba be ba tsena motseng gomme ba se amogelwe gabotse, ba be ba swanetše ‘go tšwela mekgotheng ya gona ba re, Le lerole la motse wa lena le le re gomaretšego dinao, re le hlohlorela go lena.’ (Luka 10:7, 10, 11) Go phumola goba go hlohlora lerole maotong a motho go be go tla swantšhetša gore barutiwa ba be ba tlogelela ka khutšo ngwako goba motse woo o sa amogelego mafelelo ao a bego a tla tšwa go Modimo. Eupša bao ba amogetšego barutiwa ba Jesu ka botho ba be ba itokišeletša ditšhegofatšo. Nakong e nngwe Jesu o ile a botša barutiwa ba gagwe gore: “E a Le amoxêlaxo, ó amoxêla Nna; xomme e a amoxêlaxo Nna, ó amoxêla E a nthomilexo. E a xêlaxo e mongwê wa banyenyane bá sexô sa meetse a bataxo, ka xe a na le leina la morutiwa, ruri ke a Le botša, a ka se tingwê moputsô wa xaxwe.”—Mateo 10:40, 42.

Dithuto go Rena

Thomo ya go bolela ditaba tše di lokilego tša Mmušo wa Modimo le go dira barutiwa bjale e dirwa ke Dihlatse tša Jehofa tše di fetago 5000 000 lefaseng ka bophara. (Mateo 24:14; 28:19, 20) Di lemoga gore molaetša wa tšona ke wo o akgofilego. Ka gona di diriša nako ya tšona gabotse kudu, di phema ditšhitišo tšeo di ka di thibelago go nea kabelo ya tšona e bohlokwa tlhokomelo e tletšego.

Dihlatse tša Jehofa di leka go ba borutho go bohle bao di kopanago le bona. Lega go le bjalo, ga di fo swara mehlamo ya go se re selo, le gona ga di tsenele dingangišano ka ditaba tša leago goba maiteko a palelwago a lefase le a go lokiša go hloka toka. (Johane 17:16) Go e na le moo, di lebiša polelo ya tšona go tharollo e nnoši ya mathata a batho—e lego Mmušo wa Modimo.

Gantši kudu Dihlatse tša Jehofa di bonwa di šoma ka babedi ka babedi. Na go be go ka se fihlelelwe mo gogolo ge nkabe yo mongwe le yo mongwe wa bona a be a šoma a nnoši? Mohlomongwe. Lega go le bjalo, Bakriste lehono ba lemoga bohlokwa bja go šoma gotee le modumedi-gotee. Go nea tšhireletšego e itšego ge go newa bohlatse mafelong a kotsi. Go šoma le modirišani le gona go dira gore ba bafsa ba holwe ke bokgoni bja bagoeledi bao ba nago le phihlelo e kgolo ba ditaba tše di lokilego. Ka kgonthe, bobedi bja bona ba ka tlaleletša go kgothatšaneng.—Diema 27:17.

Ka ntle le pelaelo, modiro wa boboledi ke modiro wo o akgofilego kudu wo o dirwago “mehleng [ye] ya bofêlô.” (2 Timotheo 3:1) Dihlatse tša Jehofa di thabela go ba le thekgo ya borwarre bja lefase ka bophara bjoo go bjona di šomago ka go “tšea kxopu [di] hlabanêla tumêlô ya Ebangedi.”—Ba-Filipi 1:27.

[Mengwalo ya tlase]