Ebangedi ya Luka

10 Ka morago Morena o ile a kgetha barutiwa ba bangwe ba 70, a ba roma e le ba babedi ba babedi+ gore ba mo ete pele, ba tsene motseng o mongwe le o mongwe le lefelong le lengwe le le lengwe leo a bego a tlo ya go lona. 2 Ke moka a re go bona: “Mošomo wa go buna ke o mogolo eupša bašomi ga se ba bantši. Ka baka leo, kgopelang Mong wa tšhemo gore a romele bašomi gore ba tle ba bune tšhemong ya gagwe.+ 3 Bjale sepelang, eupša le hlokomeleng! Ke le roma le le bjalo ka dinku tšeo di yago gare ga diphiri.+ 4 Le se ke la swara sekhwama sa tšhelete, mokotlana wa dijo goba dieta,*+ ebile le se ke la dumediša motho le ge e le ofe ge le le tseleng.* 5 Ntlo e nngwe le e nngwe yeo le tsenago ka go yona, le thomeng ka go dumediša le re: ‘Eka go ka ba le khutšo ka mo lapeng le.’+ 6 Ge e ba le ka hwetša motho wa go rata khutšo ka moo, gona anke a be le khutšo yeo le mo kganyogelago yona. Eupša ge e ba go se na motho yo a ratago khutšo, gona khutšo yeo e tla boela go lena. 7 Ka gona, le dule ntlong+ ya motho yoo a ratago khutšo, le je le be le nwe dilo tšeo a le fago tšona,+ ka gobane motho yo a šomago o swanetše go patelwa mogolo wa gagwe.+ Le se ke la tloga ntlong yeo gomme la nyaka dintlo tše dingwe gore le dule go tšona.

8 “Le gona, motseng o mongwe le o mongwe woo ba le amogelago, le je seo ba le fago sona, 9 gomme le fodiše batho ba moo le be le ba botše le re: ‘Mmušo wa Modimo o batametše.’+ 10 Eupša motseng o mongwe le o mongwe woo ba sa le amogelego, le tšwele ka ntle le ye diterateng tša motse woo tše dikgolo le re: 11 ‘Re hlohlora lerole leo le kgomaretšego dinaong tša rena leo le tšwago motseng wa lena.+ Eupša le dule le gopola gore Mmušo wa Modimo o batametše.’ 12 Ruri ke le botša gore: Seo se tlago go diragalela motse wo Letšatšing la Kahlolo, e tla ba se segolo go feta seo se ilego sa diragalela motse wa Sodoma.+

13 “Go madimabe lena badudi ba Koratsina le Betsaida! Ka gobane ge nkabe mehlolo yeo ke e dirilego metseng ya gabo lena ke be ke e dirile motseng wa Tiro le wa Sidone, badudi ba yona nkabe e le kgale ba itshotše. Ba be ba tla apara diaparo tša go dirwa ka lesaka ba dula meloreng.+ 14 Ka baka leo, seo se tlago go le diragalela Letšatšing la Kahlolo, e tla ba se segolo go feta seo se ilego sa diragalela Tiro le Sidone. 15 Lena badudi ba Kaperenaume, na le tla išwa legodimong? Ga go bjalo. Le tla išwa Lebitleng!”*

16 A tšwela pele ka gore: “Mang le mang yo a le theetšago, o theetša le nna.+ Le gona mang le mang yo a sa le theetšego, le nna ga a ntheetše. Go oketša moo, mang le mang yo a sa ntheetšego, ga a theetše le yo a nthomilego.”+

17 Ke moka barutiwa ba Jesu ba 70 bao a bego a ba romile, ba boa ba thabile ba re: “Morena, matemona le ona a a re kwa ge re diriša leina la gago.”+ 18 Ge ba realo, a re go bona: “Ke bona Sathane a šetše a wele+ legodimong tše e kego ke legadima leo le tšwago legodimong. 19 Bjale, ke le file maatla a go gatakela dinoga le diphepheng ka maoto le a go fenya lenaba le maatla,+ ebile ga go na selo le se setee seo se ka le gobatšago. 20 Le ge go le bjalo, le se ke la thabišwa ke gore le kgona go laola meoya e mebe, eupša le thabišwe ke gore maina a lena a ngwadilwe magodimong.”+ 21 Ka yona nako yeo, moya o mokgethwa o ile wa mo dira gore a thabe kudu, a re: “Tate, wena Morena wa legodimo le lefase, ke go tumiša pele ga batho ka moka, ka gobane o utetše batho ba bohlale le bao ba nago le kwešišo+ dilo tše gomme wa di utollela bana. Wena Tate, o dirile se ka gobane o be o nyaka gore dilo di direge ka tsela ye.+ 22 Tate o mphile dilo ka moka, le gona ga go na motho yo a tsebago Morwa gabotse ge e se Tate, ebile ga go na motho yo a tsebago Tate gabotse ge e se Morwa+ gotee le motho yo mongwe le yo mongwe yoo Morwa a ratago go mo hlalosetša gore ge e le gabotse Tate ke mang.”+

23 Ke moka a bolela le barutiwa ba gagwe ge ba be ba le noši a re: “Go thaba batho bao ba bonago dilo tšeo le di bonago.+ 24 Ka gobane ke re go lena: Baporofeta ba bantši le dikgoši ba be ba dumile go bona dilo tše le di bonago eupša ga se ba di bona,+ ebile ba be ba dumile go kwa dilo tše le di kwago eupša ga se ba di kwa.”

25 Bjale monna yo mongwe yo a tsebago Molao a emelela gore a mo leke, a re: “Morutiši, ke swanetše go dira eng e le gore ke tle ke hwetše bophelo bjo bo sa felego?”+ 26 A re go yena: “Molao o reng? Wena ge o o bala o o kwešišitše bjang?” 27 Monna yoo a re go yena, o re: “‘O rate Jehofa* Modimo wa gago ka pelo ya gago ka moka, ka moya* wa gago ka moka, ka monagano wa gago ka moka le ka maatla a gago ka moka,’+ o be o rate ‘moagišane wa gago ka tsela yeo o ithatago ka yona.’”+ 28 A re go yena: “O opile kgomo lenaka. ‘Tšwela pele o dira sona seo gomme o tla hwetša bophelo bjo bo sa felego.’”+

29 Eupša ka ge monna yoo a be a nyaka go bontšha gore o lokile,+ a re go Jesu: “Bjale moagišane wa ka ke mang?” 30 Jesu a mo araba a re: “Go be go na le monna yo mongwe yoo a bego a theoga a etšwa Jerusalema a eya Jeriko, monna yoo o ile a kopana le dikebekwa gomme tša mo tšeela diaparo tšeo a bego a di apere le dilo tša gagwe ka moka, tša mmetha, gomme tša mo tlogela a le magareng ga lehu le bophelo. 31 Ka nako yeo, go be go na le moperisita yo mongwe yoo le yena a bego a theoga ka tsela yeo a etšwa Jerusalema, eupša eitše ge a mmona, a arogela ka thoko ya tsela gomme a feta. 32 Ka mo go swanago, Molefi le yena ge a fihla lefelong leo gomme a mmona, o ile a arogela ka thoko ya tsela ke moka a feta. 33 Eupša go ile gwa feta Mosamaria+ yo mongwe tseleng yeo, a bona monna yoo gomme a mo kwela bohloko. 34 A mmatamela, a tlotša dintho tša gagwe ka makhura le beine gomme a di pantiša. Ke moka a mo nametša tonki ya gagwe, a mo iša ntlong ya baeti, gomme a mo hlokomela. 35 Letšatšing le le latelago o ile a tšea ditenariase* tše pedi a di fa mohlokomedi wa ntlo ya baeti, a re: ‘Ke kgopela gore o mo hlokomele. Ge o ka šomiša ditenariase tša go feta tše ke go filego tšona, ke tla tla ke go patela ge ke boa.’ 36 Gare ga banna ba ba bararo, ke mang yo a bonagalago a itirile moagišane yo mobotse+ wa monna yo dikebekwa di mo hlasetšego?” 37 A re: “Ke yo a kwetšego monna yoo bohloko.”+ Ke moka Jesu a re go yena: “Le wena sepela o ye o dire se se swanago.”+

38 Bjale ge ba dutše ba sepela, o ile a tsena motsaneng o mongwe. Go be go na le mosadi yo mongwe yo a bitšwago Mareta+ gona moo. Mosadi yoo o ile a mo amogela ntlong ya gagwe. 39 Le gona, o be a na le ngwanabo yo a bitšwago Maria. Maria o ile a dula kgauswi le maoto a Morena gomme a tšwela pele a theeditše seo Morena a bego a se bolela. 40 Mareta yena o be a palelwa ke go theetša Jesu ka baka la mešomo e mentši yeo a bego a swaregile ka yona. Ke moka a tla go Jesu a re: “Morena, o ikwa bjang ge ngwanešo a sa tle go nthuša ka mešomo ebile a ntlogetše gore ke dire dilo ka moka ke le tee? Mmotše gore a tle a nthuše.” 41 Ke moka Morena a re go yena: “Mareta, Mareta, ke ka baka la eng o tshwenyega ka dilo tše dintši? 42 Ga go nyakege gore re dire dilo tše dintši, go no nyakega gore re dire selo se setee goba tše sego kae feela. Maria yena o kgethile selo se sebotse,+ ebile ga go na motho yo a ka mo tšeelago sona.”