Bothata bja Thutatumelo

“KGOPOLO ya go se hwe ga moya le tumelo ya go dumela tsogong ya bahu . . . ke dikgopolo tše pedi tšeo di lego maemong a mabedi ao a fapanego ka mo go feletšego, ao go swanetšego go dirwa kgetho magareng ga ona.” Mantšu a a Philippe Menoud a akaretša ka boripana bothata bjo bo-rathutatumelo ba Protestanta le ba Katholika ba lebanego le bjona mabapi le boemo bja bahu. Beibele e bolela ka kholofelo ya tsogo ya “letšatši la mafêlêlô.” (Johane 6:39, 40, 44, 54) Rathutatumelo Gisbert Greshake o re, eupša kholofelo ya badumedi ba bantši “e theilwe godimo ga go se hwe ga moya wo o aroganago le mmele lehung gomme wa boela go Modimo, mola kholofelo ya tsogo e hweletše ka karolo e kgolo ge e ba e se ka mo go feletšego.”

Boemong bjoo, Bernard Sesboüé o hlalosa gore go rotoga bothata bjo bogolo: “Boemo bja bahu ke bofe nakong ya ‘lebaka’ la magareng ga lehu la bona la mmele le tsogo ya mafelelo?” Bothata bjoo go bonala e be e le bjona taba-kgolo ngangišanong ya thutatumelo nywageng e sego kae e fetilego. Ke’ng seo se lebišitšego go bjona? Sa bohlokwa kudu, kholofelo ya kgonthe bakeng sa bahu ke efe?

Mathomo le go Gola ga Bothata

Bakriste ba pele ba be ba e-na le kwešišo e botse tabeng ye. Ba be ba tseba go tšwa Mangwalong gore bahu ga ba kwe selo, gobane Mangwalo a Sehebere a re: “Ba ba phelaxo ba a tseba xore ba tlo hwa; ’me xo bahu xa xo se se tsebyaxo . . . xobane kwa bo-dula-bahu mo O yaxo xôna, xa xo na modirô, xa xo na kxopolô, xa xo tsebô le bohlale.” (Mmoledi 9:5, 10) Bakriste bao ba be ba e-na le kholofelo go tsogo yeo e bego e tla direga nakong e tlago ya “maboô a Morêna.” (1 Ba-Thesalonika 4:13-17) Ga se ba ka ba letela go ba ba phelago felo tsoko ge ba sa dutše ba letetše nako yeo. Joseph Ratzinger, yo mo nakong ye e lego mookamedi wa Phuthego ya Vatican ya Thuto ya Tumelo, o re: “Kerekeng ya bogologolo ga go na kgonthišetšo yeo e bego e le gona ya thuto ya tumelo ya mabapi le go se hwe ga moya.”

Lega go le bjalo, Nuovo dizionario di teologia e hlalosa gore ge re bala mangwalo a bo-Tate ba Kereke ba bjalo ka Augustine goba Ambrose, “re thoma go lemoga selo se sengwe se sefsa mabapi le setšo sa Beibele—go tšwelela ga thuto ya dilo tša mafelelo ya Segerika, yeo e fapanego kudu-kudu ya Bakriste ba ba-Juda.” Thuto ye e mpsha e be e theilwe go “go se hwe ga moya, go ahlolelwa ga motho ka o tee ka o tee moputso goba kotlo kapejana ka morago ga lehu.” Ka gona, go ile gwa rotošwa potšišo mabapi le “boemo bja magareng”: Ge e ba moya o phologa lehu la mmele, go direga’ng ka wona ge o sa dutše o letile tsogo ya “letšatši la mafelelo”? Bjo ke bothata bjoo bo-rathutatumelo ba ilego ba katana le go bo rarolla.

Lekgolong la botshelela la nywaga C.E., Mopapa Gregory I o ile a ganetša gore lehung, meoya e-ya gatee-tee lefelong la yona la mafelelo. Mopapa John XXII wa lekgolong la bo-14 la nywaga, o be a kgodišegile gore bahu ba tla amogela moputso wa bona wa mafelelo Letšatšing la Kahlolo. Lega go le bjalo, Mopapa Benedict XII o ile a ganetša yo a tlilego pele ga gagwe. Taelong ya bo-mopapa ya Benedictus Deus (1336), o ile a tsebiša gore “meoya ya bahu e tsena boemong bja lethabo [legodimo], go hlwekišwa [pakatori], goba thogako [dihele] kapejana ka morago ga lehu, moo e tlago go kopanywa gape le mebele ya yona e tsošitšwego bofelong bja lefase.”

Go sa šetšwe phenkgišano le ngangišano, bjo e bile boemo bja dikereke tša Bojakane ka makgolo a nywaga, le ge dikereke tša Protestanta le tša Orthodox ka kakaretšo di sa dumele go pakatori. Lega go le bjalo, go tloga bofelong bja lekgolo le le fetilego la nywaga, palo e oketšegago ya dirutegi e hlokomedišitše ka setlogo seo e sego sa Beibele sa thuto ya go se hwe ga moya gomme ka baka leo, “thutatumelo ya mehleng yeno gantši e leka go lebelela motho bjalo ka selo se tee se se bopaganego seo se hwelelago ka mo go feletšego lehung.” (The Encyclopedia of Religion) Ka fao, bahlalosi ba Beibele ba hwetša go le thata go lokafatša go ba gona ga “boemo bja magareng.” Na Beibele e bolela ka bjona, goba na e nea kholofelo e fapanego?

Na Paulo o be a Dumela go “Boemo bja Magareng”?

Catechism of the Catholic Church e re: “Go tsoga le Kriste, re swanetše go hwa le Kriste: re swanetše ‘go tšwa mmeleng gomme re be gae le Morena.’ [2 Ba-Korinthe 5:8] ‘Go tlogeng’ moo e lego ka lehu, moya o aroganywa le mmele. [Ba-Filipi 1:23] O tla kopanywa gape le mmele letšatšing la tsogo ya bahu.” Eupša ditemaneng tše di tsopotšwego mo, na moapostola Paulo o bolela gore moya o phologa lehu la mmele gomme ka morago wa letela “Kahlolo ya Mafelelo” gore o tle o kopanywe gape le mmele?

Go 2 Ba-Korinthe 5:1, Paulo o šupa go lehu la gagwe gomme o bolela ka “mošaša wa mo faseng” wo o tlago go “phušolwa.” Na o be a nagana ka mmele wo o bego o tla tlogelwa ke moya wa wona o sa hwego? Aowa. Paulo o be a dumela gore motho ke moya, e sego gore o na le moya. (Genesi 2:7; 1 Ba-Korinthe 15:45) Paulo e be e le Mokriste yo a tloditšwego ka moya yoo kholofelo ya gagwe, go swana le yeo ya banababo ba lekgolong la pele la nywaga, a bego a e ‘beetšwe magodimong.’ (Ba-Kolose 1:5, PK; Ba-Roma 8:14-18) Ka gona, ‘tlhologelo’ ya gagwe e be e le go tsošetšwa legodimong bjalo ka sebopiwa se se sa hwego sa moya ka nako e beilwego ya Modimo. (2 Ba-Korinthe 5:2-4) Ge a bolela ka kholofelo ye, o ngwadile gore: “Xe e le lebopô le šele re tlo fiwa bohle . . . ka moletšô wa phalafala ya bofêlô; xobane e tlo lla, bahu ba tlo tsoxa ba se sa tlo bôla; ’me rena re tlo fiwa lebopô le šele.” (Mongwalo o sekamego ke wa rena.)—1 Ba-Korinthe 15:51, 52.

Go 2 Ba-Korinthe 5:8, Paulo o re: “Re betile pelo rè hloloxetšwe xa-xolo xo khuduxa fa mmeleng, le xo y’o xôrôxa Moreneng.” Ba bangwe ba dumela gore mantšu a a šupa go boemo bja magareng bja go leta. Batho ba bjalo gape ba šupa go kholofetšo ya Jesu go balatedi ba gagwe ba botegago ya gore o be a e-ya go ba lokišetša sebaka moo a bego a tla ‘ba tšea gore ba be le yena.’ Eupša ditebelelo tše bjalo di be di tla phethagatšwa neng? Kriste o boletše gore e tla ba ge a ‘boa’ nakong ya go ba gona ga gagwe ga nako e tlago. (Johane 14:1-3) Ka mo go swanago, go 2 Ba-Korinthe 5:1-10, Paulo o boletše gore kholofelo e swanago go Bakriste ba ba tloditšwego e be e le go rua bophelo legodimong. Se se tla phethagala e sego ka kgopolo ya go se hwe ga moya, eupša ka tsogo nakong ya go ba gona ga Kriste. (1 Ba-Korinthe 15:23, 42-44) Mohlatholodi Charles Masson o phetha ka gore 2 Ba-Korinthe 5:1-10 “gona e ka kwešišwa gabotse ka ntle le go retologela boikgopolelong bja ‘boemo bja magareng.’”

Go Ba-Filipi 1:21, 23, Paulo o re: “Mo xo nna xo phela ké Kriste, xo hwa ké leruô. Ke sa fara-farwa ke tše pedi: Ke na le thloloxêlô ya xore ke tloxê ke y’o ba le Kriste, xobane ké sôna se se kaxo phala tšohle kxolê.” Na Paulo mo o bolela ka “boemo bja magareng”? Ba bangwe ba nagana bjalo. Lega go le bjalo, Paulo o re o be a le ka tlase ga kgatelelo ya dikgonagalo tše pedi—bophelo le lehu. O ile a oketša ka gore, “ke na le thloloxêlô” gomme a bolela kgonagalo ya boraro, “ya xore ke tloxê ke y’o ba le Kriste.” Na ke go ‘tloga’ go yo ba le Kriste kapejana ka morago ga lehu? Ee, bjalo ka ge go šetše go bonwe, Paulo o be a dumela gore Bakriste ba ba botegago bao ba tloditšwego ba be ba tla tsošwa nakong ya go ba gona ga Kriste. Ka gona, o swanetše go ba a be a nagana ka ditiragalo tša nako yeo.

Se se ka bonwa mantšung a gagwe ao a hwetšwago go Ba-Filipi 3:20, 21 le go 1 Ba-Thesalonika 4:16. Go ‘tloga’ mo go bjalo nakong ya go ba gona ga Kriste Jesu go be go tla dira gore Paulo a kgone go amogela moputso woo Modimo a mo lokišeditšego wona. Taba ya gore ye e be e le kholofelo ya gagwe e bonwa mantšung a gagwe go lesogana Timotheo: “Mphapahlôxô wa xo re ke lokile o šetše o beilwe pele xa-ka; ké wo ke tl’o xo o newa ke Morêna Moahlodi wa xo loka ka letšatši leo; è se nna fêla; ó tlo o nea bohle ba ba ratilexo xe a bônaxala.”—2 Timotheo 4:8.

Tsogo—Therešo e Kgahlišago ya Beibele

Bakriste ba pele ba be ba tšea tsogo e le tiragalo yeo e bego e tla thoma nakong ya go ba gona ga Kriste, gomme ba ile ba amogela matla le khomotšo therešong ye e kgahlišago ya Beibele. (Mateo 24:3; Johane 5:28, 29; 11:24, 25; 1 Ba-Korinthe 15:19, 20; 1 Ba-Thesalonika 4:13) Ba ile ba letela ka potego lethabo leo la nako e tlago, ba gana dithuto tša bohlanogi tša moya o sa hwego.—Ditiro 20:28-30; 2 Timotheo 4:3, 4; 2 Petro 2:1-3.

Ee, tsogo ga se ya lekanyetšwa feela go Bakriste bao ba nago le kholofelo ya legodimong. (1 Petro 1:3-5) Bapatriareka le bahlanka ba bangwe ba bogologolo ba Modimo ba ile ba bontšha tumelo bokgoning bja Jehofa bja go bušetša bahu bophelong mo lefaseng. (Jobo 14:14, 15; Daniele 12:2; Luka 20:37, 38; Ba-Hebere 11:19, 35) Gaešita le batho ba dimilione tše dikete bao ka makgolo a nywaga ba sa kago ba tseba Modimo le ka mohla, ba na le sebaka sa go bušetšwa bophelong paradeiseng ya lefase, ka ge “bahu ba tlo tsoxa, bohle baloki le ba s’a lokaxo.” (Ditiro 24:15; Luka 23:42, 43) Na ye ga se kholofelo e kgahlišago?

Go e na le go re dira gore re dumele gore tlaišego le lehu di tla dula di le gona ka mehla, Jehofa o šupa go nako yeo ka yona ‘lenaba la bofelo, lehu,’ le tlago go tlošetšwa ruri gomme batho ba ba botegago ba tlago go phela ka mo go sa felego lefaseng le le fetotšwego Paradeise. (1 Ba-Korinthe 15:26; Johane 3:16; 2 Petro 3:13) E tla ba mo go thabišago gakaakang go bona baratiwa ba rena ba boela bophelong! Kholofelo ye ya kgonthe e kaone gakaakang go feta boikgopolelo bja go se hwe ga moya wa motho—thuto yeo e theilwego e sego Lentšung la Modimo, eupša godimo ga filosofi ya ba-Gerika! Ge e ba o thea kholofelo ya gago godimo ga kholofetšo ya kgonthe ya Modimo, le wena ka mo go swanago o ka kgonthišega gore kgaufsinyane “lehu le ka se hlwê le e-ba xôna”!—Kutollo 21:3-5.

[Seswantšho go letlakala 31]

Tsogo ke therešo e kgahlišago ya Beibele