Go ba Batee Tlemong e Phethagetšego ya Lerato

“E-bang bao ba kopanego gotee ka go kwana ka lerato.”—BA-KOLOSE 2:2, NW.

1, 2. Ke tutuetšo efe e bakago karogano yeo e kwewago ka mo go kgethegilego lehono?

THEETŠA! Lentšu le legolo le goeletša legodimong ka moka le re: “Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” (Kutollo 12:12) Ge ngwaga o mongwe le o mongwe o feta, molaetša woo e ba o hlobaetšago ka mo go oketšegago go baagi ba lefase.

² Lenaba le legolo la Jehofa ke kgale le tsebja e le moganetši (Sathane) le mothomeletši (Diabolo). Eupja moradia yo bjale o kgatha tema e nngwe e boifišago—o fetogile modimo yo a galefilego! Ka baka la’ng? Ka gobane o rakilwe legodimong ke Mikaele le barongwa ba gagwe ntweng e ilego ya thoma legodimong ka 1914. (Kutollo 12:7-9) Diabolo o a tseba gore o šaletšwe ke nako e nyenyane gore a hlatsele tlhohlo ya gagwe ya gore a ka aroša batho ka moka gore ba se rapele Modimo. (Jobo 1:11; 2:4, 5) Ka ge ba se na moo ba ka tšhabelago gona, yena le batemona ba gagwe ba bjalo ka motšhitšhi o befetšwego wa dinose tše di tšhollelago kgalefo ya tšona go mašaba a sa dudišegego a batho.—Jesaya 57:20.

3. Mafelelo a go goboga ga Sathane e bile afe mehleng ya rena?

³ Ditiragalo tše tše di sa bonwego ke mahlo a batho di hlalosa lebaka leo ka lona go nago le go senyega ga kakaretšo ga boitshwaro gare ga batho. Di bile di hlalosa maiteko a bogafsi a batho a go lokiša dikarogano tša ditšhaba tše di tlogago di sa kgone go phela ka kwano. Dihlopha tša meloko le tša setšhaba di hlaselana o šoro, di dira gore go be le batho ba dimilione ba ba se nago magae le ba ba hudušitšwego nageng. Ga go makatše ge go hloka molao go oketšega ka tekanyo e sa lekanywego! Go etša ge Jesu a boletše e sa le pele, ‘lerato la batho ba bantši le a notlega.’ Kae le kae mo o lebelelago gona, go se kwane le go hloka lerato di swaya batho ba ba sa dudišegago ba lehono.—Mateo 24:12.

4. Ke ka baka la’ng batho ba Modimo ba le kotsing e kgethegilego?

⁴ Ka baka la boemo bja lefase, thapelo ya Jesu bakeng sa balatedi ba gagwe e ba ya bohlokwa bjo bo tseneletšego: “Xa ke kxopele xore O ba tlošê lefaseng; ke ba kxopêlêla [gore o ba hlokomele ka baka la yo mobe, NW]. Bôná xa se ba lefase, byalo ka Nna kè se wa lefase.” (Johane 17:15, 16) Lehono, “yo mobe” o tšhollela bogale bja gagwe ka mo go kgethegilego go “ba ba xomaretšexo melaô ya Modimo ba ba naxo le bohlatse bya Jesu.” (Kutollo 12:17) Ge nkabe e se ka baka la tlhokomelo ya Jehofa e lerato, Dihlatse tša gagwe tše di botegago di be di tla fedišwa. Maphelo a rena a ithekgile ka go ikhola ga rena ka ditokišetšo ka moka tšeo Modimo a di dirilego bakeng sa tšhireletšego le go phela ga rena gabotse moyeng. Seo se akaretša go katanela ga rena go itumelelanya le go šoma ga moya wa Gagwe ka Kriste, go etša ge moapostola a kgothaleditše go Ba-Kolose 1:29.

5, 6. Moapostola Paulo o ile a ikwa bjang ka Bakriste ba Kolose, gona ke ka baka la’ng temana ya sehlogo ya 1995 e le e swanetšego?

⁵ Gaešita le ge go ka direga gore Paulo o be a se a ka a ba bona ba lebantše difahlego, o be a rata banababo ba Kolose. O ile a ba botša gore: “Ke duma eka le ka kwešiša kamoo pelaelo ya-ka e lego e kgolo ka gona ka baka la lena.” (Ba-Kolose 2:1, The New Testament in Modern English, ka J. B. Phillips) Ka ge balatedi ba Jesu e se karolo ya lefase, “yo mobe” o tla tšwela pele a leka go senya botee bja banababo rena ka go bjala moya wa lefase gare ga bona. Ditaba tšeo Epafora a di tlišitšego di e-tšwa Kolose di ile tša bontšha gore se se be se dutše se direga ka tekanyo e itšego.

⁶ Se sengwe sa dilo tšeo Paulo a bego a di kgahlegela kudu ka banababo ba Bakriste se ka hlaloswa ka boripana ka mantšu a rego: “E-bang bao ba kopanego gotee ka go kwana ka lerato.” Mantšu a gagwe a na le tlhaloso e kgethegilego lehono lefaseng le le tletšego go se kopane le go hloka lerato. Ge e ba re nweletša keletšo ya Paulo pelong, re tla hlokomelwa ke Jehofa. Gape re tla ba le matla a moya wa gagwe maphelong a rena, a re thuša go lwantšha dikgateletšo tša lefase. Keletšo ye ke e bohlale gakaakang! Ka gona, Ba-Kolose 2:2 e tla ba temana ya rena ya sehlogo bakeng sa 1995.

7. Go swanetše go hwetšwa kwano ya mohuta mang gare ga Bakriste ba therešo?

⁷ Lengwalong la pejana le le bego le e-ya go ba-Korinthe, moapostola o dirišitše mmele wa motho e le seswantšho. O ile a ngwala gore “xo se bê le diphapang” phuthegong ya Bakriste ba tloditšwego, eupja a re “dithô di babalêlanê ka xo kwana.” (1 Ba-Korinthe 12:12, 24, 25) Ke seswantšho se se kgahlišago gakaakang! Ditho tša rena di a thušana, se sengwe le se sengwe se gomaretše mmele ka moka. Go bjalo le ka mokgatlo wa rena wa lefase ka bophara wa barwarre o bopilwego ke batlotšwa gotee le ba dimilione ba ba nago le kholofelo ya go phela lefaseng la paradeise. Ga se ra swanela go ikarola sehlopheng sa Bakriste-gotee le rena gore re iphelele re nnoši! Moya wa Modimo o elelela go rena ka tekanyo e kgolo ka go kopanela ga rena le banababo rena, o šoma ka Kriste Jesu.

Kwano e Tswalana le Tsebo

8, 9. (a) Motheo wa go tlaleletša ga rena kwanong ya phuthego ke ofe? (b) O hweditše bjang tsebo ka Kriste?

⁸ E nngwe ya dintlha tše dikgolo tša Paulo e be e le gore kwano ya Bokriste e tswalane le tsebo, kudu-kudu e lego mabapi le Kriste. Paulo o ngwadile gore Bakriste ba swanetše gore e ‘be ba ba kopanego gotee ka go kwana ka lerato ba lebeletše mahumong ka moka a kgonthišetšo e tletšego ya kwešišo ya bona, ba hwetše tsebo e nepagetšego ya sephiri se sekgethwa sa Modimo, e lego Kriste.’ (Ba-Kolose 2:2, NW) Re hweditše tsebo—ditherešo—ga e sa le re thoma go ithuta Lentšu la Modimo. E le karolo ya go hwetša kwešišo ya kamoo bontši bja ditherešo tše di tsenago ka gona morerong wa Modimo, re bona karolo e bohlokwa ya Jesu. “Ké Yêna Kriste yo mahumô ka moka a bohlale le a tsebô a fihlilwexo mo xo Yêna.”—Ba-Kolose 2:3.

⁹ Na ke kamoo o ikwago ka gona ka Jesu le karolo ya gagwe morerong wa Modimo? Ba bantši Bojakaneng ba akgofela go bolela ka Jesu, ba bolela gore ba mo amogetše le gore ba phološitšwe. Eupja na ba mo tseba e le ka kgonthe? Le gatee, ka gobane ba bantši ba dumela thutong e sego ya Mangwalo ya Boraro Botee. Ga se feela gore o tseba therešo tabeng ye, eupja mo gongwe o na le tsebo e nabilego kudu ya seo Jesu a se dirilego le seo a se boletšego. Ba dimilione ba thušitšwe tabeng ye ke thuto e neago tsebišo go dirišwa puku ya Motho yo a Phagamego Kudu yo a Kilego a Phela. Lega go le bjalo, re swanetše go dula re godiša tsebo ya rena ka Jesu le ditsela tša gagwe.

10. Re hwetša tsebo e fihlilwego ka tsela efe?

¹⁰ Polelo e rego “mahumô ka moka a bohlale le a tsebô” a ‘fihlilwe’ go Jesu ga e bolele gore tsebo e bjalo ga se yeo re ka e fihlelelago. Go e na le moo, e bjalo ka moepo o bulegilego. Ga re swanelwe ke go tsoma lefelong le legolo re ipotšiša mo re ka thomago go epa gona. Re šetše re tseba—tsebo ya kgonthe e thoma ka seo Beibele e se utollago ka Jesu Kriste. Ge re dutše re lemoga ka mo go tletšego kudu karolo ya Jesu phethagalong ya morero wa Jehofa, re hwetša mahumo a bohlale bja kgonthe le tsebo e nepagetšego. Ka gona seo re se nyakago ke go epa go iša fase kudu, re ntšhe mahumo a oketšegilego goba dilo tše bohlokwa tše di hwetšagalago mothopong wo wo re šetšego re epile go wona.—Diema 2:1-5.

11. Re ka oketša bjang tsebo ya rena le bohlale ka go naganišiša ka Jesu? (Bontšha ka go hlapiša ga Jesu barutiwa ba gagwe maoto goba o diriše mehlala e mengwe.)

¹¹ Ka mohlala, re ka ba re tseba gore Jesu o ile a hlapiša baapostola ba gagwe maoto. (Johane 13:1-20) Lega go le bjalo, na re ile ra naganišiša ka thuto yeo a bego a e ruta le kgopolo yeo a e bontšhitšego? Ge re dira bjalo, mo gongwe re ka epolla lehumo la bohlale bjo bo re dirago gore re kgone—ee, bjo bo re tutueletšago—go fetoša tsela yeo re dirišanago ka yona le ngwanabo rena goba kgaetšedi yoo semelo sa gagwe e lego kgale se re selekiša. Goba ge re neilwe kabelo yeo re tlogago re sa e rate, re ka arabela ka tsela e fapanego ge re šetše re hweditše kgopolo e humilego ya Johane 13:14, 15. Yeo ke tsela yeo tsebo le bohlale di re kgomago ka yona. Mafelelo e ka ba afe go ba bangwe ge re dutše re itumelelanya kudu le tsebo e okeditšwego ya Kriste? Mohlomongwe mohlape e tla ‘ba o kopanego gotee ka go kwana ka lerato.’a

Phapogo e ka Senya Kwano

12. Re swanetše go itiša malebana le tsebo efe?

¹² Ge e ba tsebo e nepagetšego e dira gore go be bonolo go rena go ba “bao ba kopanego gotee ka go kwana ka lerato,” ke eng se se bakwago ke se se ‘bitšwago ka maaka gore ke tsebo’? Ke se se fapanego—ngangišano, go se kwane le go aroga tumelong. Ka gona re swanetše go itiša malebana le tsebo e bjalo e fošagetšego, bjalo ka ge Paulo a lemošitše Timotheo. (1 Timotheo 6:20, 21, PK) Paulo o ngwadile gape gore: “Xe ke bolêla tšeo, ké xore Le se kê la xakanthšwa ke motho ka dipolêlô tša maanô. Le phafoxê xore xo se bê le a kaxo Le thopa ka mabohlale, ka xo Le fora ka mafêla, ka xo ya ka melawana ya batho, le ka dithutô tša mathômô a lexohle, è se xo ya le Kriste.”—Ba-Kolose 2:4, 8.

13, 14. (a) Ke ka baka la’ng banababo rena ba Kolose ba be ba le kotsing mabapi le tsebo? (b) Ke ka baka la’ng ba bangwe lehono ba ka nagana gore ga ba kotsing e swanago?

¹³ Bakriste ba Kolose ba be ba dikologilwe ke tutuetšo ya bohwirihwiri ya se se swanago le se se bitšwago ka maaka gore ke tsebo. Batho ba bantši kua Kolose le tikologong ya yona ba be ba hlompha difilosofi tša ba-Gerika kudu. Go be go bile go e-na le balatedi ba bo-Juda ba ba bego ba nyaka gore Bakriste ba boloke Molao wa Moše, bjalo ka matšatši a wona a menyanya le melao ya dijo. (Ba-Kolose 2:11, 16, 17) Paulo o be a sa ganetše banababo go hwetša tsebo ya therešo, eupja ba be ba swanetše go phafoga gore go se be le motho yo a ba arošago e le bahlaselwa, a diriša dipolelo tša maano bakeng sa go ba kgodiša gore ba amogele pono ya motho feela ka bophelo le ditiro. O ka lemoga gore ge e ba ba bangwe ka phuthegong ba dumelela kgopolo ya bona le diphetho gore di hlahlwe ke dikgopolo tše bjalo tšeo e sego tša Mangwalo le ditshekamelo ka bophelo, seo se tla lwantšhana le kwano le lerato magareng ga ditho tša phuthego.

¹⁴ O ka nagana gore, ‘Ee, ke bona kotsi yeo ba-Kolose ba bego ba lebeletšane le yona, eupja ga ke kotsing ya go tutuetšwa ke dikgopolo tša ba-Gerika tše bjalo ka ya moya o sa hwego goba modimo wa boraro botee; le gona ga ke bone kotsi le ge e le efe ya go goketšwa ke matšatši a maikhutšo a boheitene a bodumedi bja maaka bjo ke bo tlogetšego.’ Go lokile. Ke mo gobotse go kgodišega ka go tia ka go phagama ga therešo e bonolo e utolotšwego ka Jesu le e hwetšwago ka Mangwalong. Lega go le bjalo, na go ka direga gore re kotsing ya difilosofi tše dingwe goba dikgopolo tša batho tše di atilego lehono?

15, 16. Ke pono efe ka bophelo e ka kgomago tsela yeo Mokriste a naganago ka yona?

¹⁵ Kgopolo e nngwe e bjalo ke kgale e le gona: “Bjale e kae kholofetšo ya go tla ga gagwe? Bo-tatago rena ba robaditšwe ba khutšišwa, eupja dilo ka moka di sa dutše di tšwela pele kamoo di bego di le ka gona ka mehla.” (2 Petro 3:4, The New English Bible) Polelo yeo e ka hlaloswa ka mantšu a mangwe, eupja kgopolo ke e swanago. Ka mohlala motho yo mongwe a ka nagana gore, ‘Ge ke be ke thoma go ithuta therešo nywaga-someng e mentši e fetilego, bofelo bo be bo le “kgaufsi-ufsi.” Eupja le gona bjale ga se bja hlwa bo e-tla, gona ke mang a tsebago nako yeo bo tlago go tla ka yona?’ Ke therešo gore ga go na motho yo a tsebago nako yeo bofelo bo tlago go tla ka yona. Lega go le bjalo, ela hloko pono yeo Jesu a e kgothaleditšego: “Fahloxang, Le phakxamê . . . xobane lebaka la tšôna xa Le le tsebe.”—Mareka 13:32, 33.

¹⁶ E tla ba kotsi gakaakang go amogela kgopolo ya gore ka ge re sa tsebe nako yeo bofelo bo tlago go tla ka yona, re swanetše go rulaganyetša bophelo bjo bo tletšego le “bjo bo tlwaelegilego”! Kgopolo yeo e ka bonagatšwa ka go nagana gore, ‘Mohlomongwe le nna nka gata megato yeo e tlago go ntumelela (goba ya dumelela bana ba-ka) go hwetša modiro o hlomphegago o lefago gabotse gomme wa ntira gore ke kgone go thabela bophelo bja boiketlo. Ee, ke tla ya dibokeng tša Bokriste gomme ka tšea karolo go se nene modirong wa boboledi, eupja ga go na lebaka la gore ke katane goba ke dire boikgafo bjo bogolo.’—Mateo 24:38-42.

17, 18. Jesu le baapostola ba re kgothaleditše go ba le kgopolo efe?

¹⁷ Lega go le bjalo, ga go ganwe gore Jesu le baapostola ba gagwe ba eleditše gore re phele re e-na le kgopolo ya go akgofa mabapi le go bolela ditaba tše di lokilego, re katana le go ikemišetša go dira boikgafo. Paulo o ngwadile gore: “Ke rata xo botša lena bana bešo, xore lebaka ké la pitlaxanô wa xo re ba ba naxo le basadi ba bê byalo ka ba ba se naxo nabô. . . . Ba ba rêkaxo ba etšê ba ba hlôkaxo. Ba ba phelaxo ka tša lefase ba etšê ba ba sa phelexo ka tšôna, xobane sebopêxô sa lefase leno se a lôba.”—1 Ba-Korinthe 7:29-31; Luka 13:23, 24; Ba-Filipi 3:13-15; Ba-Kolose 1:29; 1 Timotheo 4:10; 2 Timotheo 2:4; Kutollo 22:20.

¹⁸ Go e na le go šišinya gore re dire bophelo bja boiketlo pakane ya rena, Paulo o ngwadile a le ka tlase ga pudulelo gore: “Xobane mola rè e-tla lefaseng, xa ra ka ra tla le selô; le xo tloxa re ka se kxône xo tloxa le selô. Ké xôna, xe re na le dijô le diaparô, a re kxolweng ke tšôna. . . . Hlabana thlabanô e botse ya tumêlô, O thopê bophelô byo bo sa felexo, byo O bileditšwexo byôna, wa ipolêla o botse pele xa dihlatse tše ntši.”—1 Timotheo 6:7-12.

19. Phuthego e kgongwa bjang ge ba ba lego ka go yona ba amogela kgopolo ya bophelo yeo Jesu a e kgothaleditšego?

¹⁹ Ge phuthego e e-na le Bakriste ba mafolofolo ba ba katanago kudu bakeng sa go “ipolêla o botse,” kwano e fo itlela. Ga ba ineele kgopolong ya gore, ‘O na le dilo tše dintši tše dibotse tše di lekanetšego nywaga e mentši; khutša, o je, o nwe, o ipshine.’ (Luka 12:19) Go e na le moo, ba kopane boitekong bjo bo swanago ba ikemišeditše go dira boikgafo bja gore ba be le karolo e tletšego ka mo go kgonegago modirong wo o ka se kego wa boeletšwa.—Bapiša le Ba-Filipi 1:27, 28.

Go ba Šedi Mabapi le Dipolelo tša Maano

20. Karolo e nngwe yeo Bakriste ba ka arošwago go yona ke efe?

²⁰ Ee, go na le ditsela tše dingwe tšeo Bakriste ba ka ‘arošwago ka dipolelo tša maano’ ka tšona goba bofora bja lefela bjo bo šitišago go ‘ba ba ba kopanego gotee ka go kwana ka lerato.’ Ofisi ya Mokgatlo wa Watch Tower kua Jeremane e ngwadile gore: “Tiragalo e nngwe e ile ya lebiša ngangišanong, bagoeledi gaešita le bagolo ba tšea lehlakore ge e le ka mohuta wa kalafo e dirišwago ke ngwanabo rena.” Ba okeditše ka gore: “Ka baka la mehuta e mentši e fapa-fapanego e dirišwago le palo e kgolo ya balwetši, ye ke taba yeo go ka ngangišanwago ka yona, le gona ge e ba mekgwa ya kalafo e e-na le tlhaloso ya boloi e ka baka kotsi.”—Ba-Efeso 6:12.

21. Mokriste a ka lahlegelwa bjang ke pono e nepagetšego lehono?

²¹ Bakriste ba nyaka go dula ba phela e bile ba phela gabotse mmeleng e le gore ba kgone go rapela Modimo. Lega go le bjalo, tshepedišong ye re a tšofala le go babja ka baka la go se phethagale. Go e na le go gatelela ditaba tša tša maphelo, re swanetše go tsepamiša kgopolo tharollong ya kgonthe bakeng sa rena le ba bangwe. (1 Timotheo 4:16) Kriste ke motheo wa tharollo yeo, go fo swana le ge e be e le motheo wa keletšo ya Paulo go ba-Kolose. Eupja gopola gore Paulo o bontšhitše gore ba bangwe ba ka tla le “dipolêlô tša maanô” ba tloša tlhokomelo ya rena go Kriste, mohlomongwe ba di lebiša mekgweng ya go hlahloba, dikalafong goba dijong.—Ba-Kolose 2:2-4.

22. Re swanetše go ba le kgopolo efe e leka-lekanego mabapi le dipolelo tše dintši tša mekgwa ya go hlahloba le kalafo?

²² Batho lefaseng ka bophara ba tšhollelwa diphatlalatšo tša tša papatšo le dipolelo tša bohlatse mabapi le mehuta ka moka ya dikalafo le ditsela tša go hlahloba. Tše dingwe tša tšona di dirišwa le go tsebja gohle; tše dingwe di swawa diphošo goba di belaelwa gohle.b Motho yo mongwe le yo mongwe o na le boikarabelo bja go kgetha seo a tlago go se dira mabapi le boemo bja gagwe bja tša maphelo. Eupja ba ba amogelago keletšo ya Paulo e lego go Ba-Kolose 2:4, 8 ba tla šireletšwa go gogolweng ke “dipolêlô tša maanô” goba “bofora bja lefeela” (NW) bjo bo arošago ba bantši ba ba hlologetšego kimollo, ka ge ba se na kholofelo ya Mmušo. Gaešita le ge e ba Mokriste a kgodišegile gore kalafo e itšego e bonala e mo loketše, ga se a swanela go e bolelela borwarreng bja Bokriste ka gobane e ka baka poledišano e apareditšego le ngangišano. Ka go dira bjalo a ka bontšha gore o hlompha kudu bohlokwa bja kwano ka phuthegong.

23. Ke ka baka la’ng re e-na le lebaka la go thaba ka mo go kgethegilego?

²³ Paulo o gateletše gore kwano ya Bokriste ke motheo wa lethabo la kgonthe. Mehleng ya gagwe palo ya diphuthego e be e le e nyenyane kudu go ya lehono. Lega go le bjalo o kgonne go ngwalela ba-Kolose gore: “Le xe ka mmele kè le mono kxolê, ka môya ke na le lena; ke bôna bothakxa bya lena kè bo thabêla, le ka mo Le tiišaxo xo dumêla Kriste.” (Ba-Kolose 2:5; bona le Ba-Kolose 3:14.) Re na le lebaka le legolo gakaakang la go thaba! Re ka bona bohlatse bja kgonthe bja kwano, thulaganyo e botse le go tia ga tumelo ka phuthegong ya gabo rena yeo e bonagatšago boemo bja kgonthe bja batho ba Modimo lefaseng ka bophara. Ka gona nakong e kopana e šetšego tshepedišong ya gona bjale, anke ka moka ga rena re ikemišetše go ‘ba ba ba kopanego gotee ka go kwana ka lerato.’

[Mengwalo ya tlase]

Na o Etše Hloko?

◻ Sehlogo sa ngwaga sa Dihlatse tša Jehofa sa 1995 ke sefe?

◻ Ke ka baka la’ng Bakriste ba Kolose ba ile ba swanelwa ke go ba ba ba kopanego gotee ka go kwana ka lerato, gona ke ka baka la’ng re swanelwa ke go dira bjalo lehono?

◻ Ke pono efe e mpe ka bophelo yeo Bakriste ba swanetšego go itiša ka mo go kgethegilego malebana le yona lehono?

◻ Ke ka baka la’ng Bakriste ba swanetše go phafogela gore ba se arošwe ke dipolelo tša maano tše di lego mabapi le tša maphelo le ditsela tša go hlahloba?

[Pictures on page 17]

Na dithulaganyo tša gago tša bokamoso di theilwe go go ba gona ga Jesu?