“Ditaba tše di Lokilego di Swanetše go Bolelwa Pele”
“Le gona, ditaba tše di lokilego di swanetše go bolelwa pele ditšhabeng ka moka.”—MAREKA 13:10, NW.
1. Selo setee seo se dirago gore Dihlatse tša Jehofa e be tše fapanego go mehuta-huta ka moka ya bodumedi bja Bojakane ke sefe, gomme ka baka lang?
GO BOHLE bao ba ipolelago e le Bakriste, ke Dihlatse tša Jehofa feela bao ba lebelelago boboledi bja ditaba tše di lokilego e le bja bohlokwa kudu. Ba bopa sehlopha se nnoši seo go sona setho se sengwe le se sengwe se ikwago se gapeletšega ka noši go ya go moagišane wa sona gantši e le gore a bolele le yena mabapi le merero ya Modimo. Ke ka baka la’ng se se le bjalo? Ka gobane Hlatse e nngwe le e nngwe e nagana gore ka ge e le Mokriste, gona e swanetše go ba molatedi yo a sepelago mehlaleng ya Kriste. (1 Petro 2:21) Se se akaretša eng?
2. Batho ba bantši ba lebelela Jesu Kriste bjang, eupja modiro wa gagwe o mogolo lefaseng e be e le ofe?
2 Dikgopolong tša ba bantši, Jesu Kriste e be e fo ba monna yo a bego a dira mediro e mebotse. O ile a fodiša balwetši, a fepa bao ba swerwego ke tlala, gomme a bontšha lerato le botho go bao ba nyakago thušo. Eupja Jesu o dirile se se fetišago se. E bile wa mathomo wa baboledi ba mafolofolo ba ditaba tše di lokilego tša Mmušo wa Modimo. Dikgweding tše sego kae ka morago ga kolobetšo ya gagwe nokeng ya Jorodane, ruri Jesu o ile a thoma go bolela phatlalatša a re: “Sokoloxang, xobane mmušô wa maxodimo o batametše.” (Mateo 4:17) Pego ya Mareka e bolela gore: “Jesu o ile Galilea, a xoêlêla Ebangedi ya mmušô wa Modimo. A re: Lebaka le tlile; mmušô wa Modimo o batametše; sokoloxang Le dumêlê Ebangedi.”—Mareka 1:14, 15.
3, 4. (a) Gaešita lege Jesu a ile a fodiša mohuta o mongwe le o mongwe wa bolwetši, fela ke’ng seo a ilego a se gatelela bodireding bja gagwe? (b) Ke ka baka la’ng Jesu a ile a rongwa? (c) Jesu o ile a swantšha modiro wa gagwe wa boboledi le eng, gomme ke’ng seo a ilego a botša barutiwa ba gagwe gore ba se dire?
3 Jesu o ile a bitša Petro, Andrea, Jakobo le Johane gore ba mo latele, gomme re a bala: “Byale Jesu a sepela le naxa ya Galilea ka moka, a fêla a ruta diphuthexong tša bôná, a tsebatša Ebangedi ya mmušô wa maxodimong, a fodiša malwetši ka moka le mefôkôlô ka moka mo bathong.” Nakong ya ge mašaba a leka go mo swara kua Galilea o itše: “Le metse e mengwê ke swanetše xo e botša ditaba tše botse tša mmušô wa Modimo, ké sôna se ke rometšwexo sôna.” Ka morago o ile a ya go bolela disinagogeng tša Judea.—Mateo 4:18-23; Luka 4:43, 44.
4 Jesu ge a boela Galilea, “a thôma xo ya le metse le metsana à xoêlêla a bolêla Ebangedi ya mmušô wa Modimo.” (Luka 8:1) O ile a swantšha modiro wa gagwe wa go bolela le go buna gomme a re: “Punô ké e ntši; ’me badiri xa ba nene. Ké xôna kxopêlang Mong wa punô a romêlê badiri punong ya xaxwe.” (Mateo 9:35-38) Gaešita lege mašaba a be a sa mo nee nako ya go khutša, “yêna a ba xahlanêtša, a ba botša tša mmušô wa Modimo, a fodiša ba ba tletšexo xo fodišwa.”—Luka 9:11.
5. Nakong ya ge Jesu a roma baapostola ba gagwe le barutiwa ba bangwe bodireding, ke ditaelo dife tšeo a ilego a ba nea tšona?
5 Ke therešo gore Jesu o ile a fodiša balwetši gomme ka nako e nngwe a fepa bao ba swerwego ke tlala, eupja se se fetago tše ka moka, o be a swaregile a botša batho ka Mmušo wa Modimo. Le gona o be a rata gore balatedi ba gagwe ba dire se se swanago. Ge a šetše a tlwaeditše baapostola ba gagwe, o ile a ba roma ka babedi ka babedi gore ba yo bolela a re: “Le sepele Le tšamê Lè re: Mmušô wa maxodimo o batametše.” (Mateo 10:7) Luka e bolela gore: “A ba roma a re ba y’o xoêlêla tša mmušô wa Modimo, ba y’o fodiša balwetši.” (Luka 9:2) Jesu go barutiwa ba 70 le gona o neile taelo ya gore “Le fodišê balwetši ba xôna, ’me Le ba botšê Le re: Mmušô wa Modimo o batametše.”—Luka 10:9.
6. Pele Jesu a rotogela legodimong, ke ditaelo dife tša mabapi le bodiredi bja bona tšeo a ilego a di nea balatedi ba gagwe?
6 Pele ga ge a rotogela legodimong, Jesu o ile a laela balatedi ba gagwe gore ba tšwetše pele modiro wa boboledi. O ile a ba laela ka gore: “Ké xôna yang Le dirê dithšaba ka moka barutiwa . . . ka xo ba ruta xo boloka tšohle tše ke Le laetšexo tšôna. Xomme tsebang, ke na le lena ka mehla xo fihla bofelong bya lefase.” (Mateo 28:19, 20) Go oketša moo o itše: “Lena Le tlo fiwa matla xe Môya-mokxêthwa ò theoxêla xo lena, la tlo ba dihlatse tša-ka motseng wa Jerusalêma le naxeng ka moka ya Juda le ya Samaria, xo fihla maxomong a lefase.” (Ditiro 1:8) Ka gona, Jesu gotee le baapostola ba gagwe ba ile ba nea boboledi bja ditaba tše di lokilego tša Mmušo wa Modimo tlhokomelo ya pele.
Go Swanetše go Bolelwa ka Mmušo Mehleng ya Rena
7. Ke’ng seo Jesu a ilego a se bolela mabapi le modiro wa boboledi wo o bego o tla dirwa “bofelong bja tshepedišo ya dilo”?
7 Jesu boporofeteng bja gagwe bja mabapi le ditiragalo tšeo di bego di tla direga “bofelong bja tshepedišo ya dilo,” o itše: “Gomme ditaba tše tše di lokilego tša mmušo di tla bolelwa lefaseng ka moka le le agilwego gore e be bohlatse go ditšhaba ka moka gomme e tla ba gona bofelo bo fihlago.” (Mateo 24:3, 14, NW) Goba ka ge go boletšwe go Mareka 13:10, NW: “Le gona, ditaba tše di lokilego di swanetše go bolelwa pele ditšhabeng ka moka.”—Bona le Kutollo 14:6, 7.
8. (a) Ditaba tše di lokilego di be di akaretša’ng mehleng ya baapostola? (b) Molaetša wa ditaba tše di lokilego o akaretša’ng lehono?
8 “Mehleng ya bofelo,” ditaba tše di lokilego tša Mmušo di akaretša se se fetago seo di bego di se akaretša nakong ya ge Jesu a be a le lefaseng. Jesu o ile a bolela gore Mmušo o be o batametše, a lebiša tlhokomelo go therešo ya gore o be a le gare ga batho e le Mesia le Kgoši. (2 Timotheo 3:1; Mateo 4:17; Luka 17:21) Ditaba tše di lokilego tšeo di bego di bolelwa ke Bakriste ba pele di be di akaretša taba ya tsogo ya Jesu le go rotogela legodimong, gomme se se ile sa kgothaletša ba bonolo gore ba bee kholofelo Mmušong o tlago. (Ditiro 2:22-24, 32; 3:19-21; 17:2, 3; 26:23; 28:23, 31) Mo nakong ye ka ge re fihlile “bofelong bja tshepedišo ya dilo,” go bolelwa ga ditaba tše di lokilego tša Mmušo go akaretša molaetša o kgahlišago wa gore Mmušo o hlomilwe magodimong.—Kutollo 11:15-18; 12:10.
Ke Bomang Bao ba Tlago go Bolela Ditaba tše di Lokilego?
9. (a) Ba bangwe ba ka gana bjang gore boboledi bja “ditaba tše di lokilego” ga se boikarabelo bja Bakriste ka moka lehono? (b) Jehofa o ile a diriša bomang nakong e fetilego go bolela lentšu la gagwe, gomme se se bolela’ng go rena lehono?
9 Ke bomang lehono bao ba swanetšego go ba le karolo modirong wa boboledi? Go bonala Bojakane bo nagana gore ga se boikarabelo bja o mongwe le o mongwe, gomme ke therešo gore nakong ya ge Jesu a be a bolela gore ditaba tše di lokilego di be di tla bolelwa, ga se a ka a bontšha gore ke bomang bao ba bego ba tla dira modiro wo. Ka gona, ke bomang bao Jehofa a bego a tla ba dirišetša modiro woo ka ntle le ba ba ilego ba bea kholofelo Lentšung la gagwe gomme ba thoma go le diriša maphelong a bona? Nakong ya ge Jehofa a be a nagana ka go lemoša lefase le kgopo la batho ka tshenyego e tlago mehleng ya Noage, o dirišitše monna “wa xo sepela a na le Modimo.” (Genesi 6:9, 13, 14; 2 Petro 2:5) Nakong ya ge a be a nyaka gore molaetša wa boporofeta o išwe Isiraele, o ile a roma ‘bahlanka ba gagwe, e lego baporofeta.’ (Jeremia 7:25; Amosi 3:7, 8) Setšhaba se ineetšego sa Isiraele e be e le setšhaba sa dihlatse tša gagwe. (Ekisodo 19:5, 6; Jesaya 43:10-12) Ee, Jehofa o diriša bahlanka ba gagwe ba ineetšego e le dihlatse tša gagwe.
10. Go ka bonwa bjang go ya ka peakanyo ya mantšu a Mateo 28:19, 20 gore taelo ya go dira barutiwa e dira go Bakriste ka moka?
10 Ba bangwe ba boletše gore taelo ya go dira barutiwa yeo e neilwego go Mateo 28:19, 20, e be e neilwe feela baapostola gomme ka go rialo ga e dire go Bakriste ka kakaretšo. Eupja ela hloko seo Jesu a se boletšego: “Ké xôna yang Le dirê dithšaba ka moka barutiwa . . . ka xo ba ruta xo boloka tšohle tše ke Le laetšexo tšôna.” Balatedi ba Jesu ba be ba swanetše go ruta barutiwa ba bafsa go boloka tšohle tšeo Jesu a ba laetšego tšona. Se sengwe sa dilo tše a ba laetšego tšona e be e le ‘go dira barutiwa.’ Ka kgonthe barutiwa ba bafsa ka moka le bona ba be ba swanetše go rutwa go boloka yona taelo ye.
11. (a) Ke boikarabelo bofe bjo bo bego bo rwelwe ke phuthego ya Bokriste lekgolong la pele la nywaga? (b) Go nyakega’ng gore motho a phološwe, gomme se se akaretša’ng?
11 Phuthego ya Bokriste ya lekgolong la pele la nywaga e be e bitšwa ‘batho ba Modimo bao a ithuetšego bona ka mo go kgethegilego gore ba kwatše ka gohle ditaba tše di botse tša yoo a ba biditšego lefsifsing a ba tliša seetšeng sa gagwe se makatšago.’ (1 Petro 2:9) Ditho tša yona di be di nea bohlatse ka Mmušo wa Modimo ka mafolofolo. (Ditiro 8:4, 12) “Bakxêthwa,” e lego Bakriste ka moka ba tloditšwego, kua Roma ba ile ba botšwa gore “O ipolêla ka molomo wa tseb’o phološwa,” le gore “ba xo tlo phološwa ké ba ba bitšaxo ’ina la Morêna.” (Ba-Roma 1:7; 10:9, 10, 13) Boipolelo bjo bja phatlalatša bakeng sa phološo, bjo bo dirwago nakong ya go kolobetšwa ga motho, bo akaretša le go bolela phatlalatša ditaba tše di lokilego tša Mmušo wa Jehofa.
12, 13. (a) ‘Go bolela kholofelo ya rena phatlalatša’ mo go boletšwego go ba-Hebere 10:23 go akaretša’ng? (b) Psalme 96 e bontšha bjang go nyakega ga go bolela phatlalatša ka ntle ga phuthego gomme Kutollo 7:9, 10 e thekga se bjang?
12 Moapostola Paulo o ile a ngwalela Bakriste ba ba-Hebere gore: “A re xomareleng moênô wa kholofêlô ya rena rè sa šišinyexe; xobane e a re holofeditšexo ó a bôtêxa.” (Ba-Hebere 10:23) Go ipolela phatlalatša mo ga go a lekanyetšwa feela dibokeng tša phuthego. (Psalme 40:9, 10) Go Psalme 96:2, 3, 10, NW, re bona gabotse taelo ya boporofeta ya go bolela ka ntle ga phuthego, ditšhabeng ka mantšu a: “Bolelang ditaba tše di lokilego tša phološo ka yena letšatši le letšatši. Bolelang gare ga batho ka moka mediro ya gagwe e mebotse. Bolelang gare ga ditšhaba gore: ‘Jehofa ke kgoši.’” Ka kgonthe, go Mateo 28:19, 20 le go Ditiro 1:8, Jesu o laetše Bakriste gore ba bolele ditšhabeng.
13 Boboledi bjo bja phatlalatša bo bolelwa ka mo go oketšegilego mantšung a mangwe a Paulo ao a yago go Bakriste ba tloditšwego ba ba-Hebere: “Ka yena Anke ka mehla re neeng Modimo sehlabelo sa theto, ke gore seenywa sa melomo yeo e bolelago phatlalatša ka leina la gagwe.” (Ba-Hebere 13:15, NW) Pukung ya Kutollo “lešaba le lexolo” leo le kgobokeditšwego go tšwa ditšhabeng ka moka, le lona le bonwa le goeletša ka lentšu le phagamego le re: “Xo phološa ké xa Modimo wa rena e a dutšexo sedulong sa boxoši, ké xa Kwana.” (Kutollo 7:9, 10) Ka gona, mehleng ye ya bofelo ya tshepedišo ya dilo, boboledi bja ditaba tše di lokilego bo dirwa ke Dihlatse tše ineetšego tša Jehofa, e lego mašaledi a banababo Kriste ba moya le bagwera ba bona bao ba swanago le dinku bao ba bopago “lešaba le lexolo.” Eupja ge e le gabotse ba be ba swanetše go dira modiro wo bjang?
“Phatlalatša le ka Ntlo le Ntlo”
14. Jesu o be a dira boboledi bja gagwe kae, gomme ke molao ofe wa motheo woo re ka ithutago wona go se?
14 Jesu o be a bolela ka go lebanya le batho. Ka mohlala, re bala gore o be a bolela disinagogeng. Ka baka la’ng? Ka gobane batho ba be ba bokana moo ka Sabatha gomme ba theetša go balwa le poledišano ya Mangwalo. (Mateo 4:23; Luka 4:15-21) Jesu le gona o ile a bolela le batho hleng ga tsela, go bapa le lewatle, patogeng ya thaba, sedibeng ka ntle ga motse, le magaeng. Kae le kae moo go bego go e-na le batho, Jesu o be a bolela le bona.—Mateo 5:1, 2; Mareka 1:29-34; 2:1-4, 13; 3:19; 4:1, 2; Luka 5:1-3; 9:57-60; Johane 4:4-26.
15. (a) Ke ditaelo dife tšeo Jesu a ilego a di nea barutiwa ba gagwe ge a be a ba roma gore ba yo bolela? (b) Bahlalosi ba bangwe ba Beibele ba ile ba hlalosa se bjang?
15 Nakong ya ge Jesu a be a roma barutiwa ba gagwe gore ba yo bolela, le gona o ile a ba roma ka go lebanya go batho. Se se bonwa ditaelong tšeo di ngwadilwego go Mateo 10:1-15, 40-42. Go Mat 10 temana 11, NW, o itše: “Motseng o mongwe le o mongwe goba motsaneng wo le tsenago go wona, le tsome go wona ge go e-na le yo a swanelegago, gomme le dule moo go fihla ge le tloga.” The Jerusalem Bible e fetolela temana ye ka gore: “Botšišang ge go e-na le motho lege e le ofe yo a swanelegago,” e le mo ekarego barutiwa ba be ba tla botšiša motho yo a tumilego goba yo a tsebjago motsaneng e le gore ba hwetše yo a bego a e-na le botumo bjo botse gomme ka go rialo a swanelwa ke molaetša. (Bona le Weymouth gaešita le King James Version.) Ye ke tlhaloso yeo bahlalosi ba bangwe ba Beibele ba e neago ka Mat 10 temana 11.
16. Ke go hlahlobišiša gofe mo go nago le morero kudu ga mantšu a Jesu go Mateo 10:11 moo go bontšhago kamoo baapostola ba bego ba swanetše go tsoma ba swanelegago ka gona?
16 Lega go le bjalo, go swanetše go dulwa go gopolwa gore ka kakaretšo baruti ba Bojakane ga ba ye ka ntlo le ntlo, le gore bahlalosi ba bantši ba Beibele ba sekametše go hlatholleng Mangwalo ka go latela phihlelo yeo e lego ya bona. Go hlahlobišišwa mo go nago le morero ga taelo ya Jesu go bontšha gore o be a bolela ka go tsoma ga barutiwa ba gagwe ka noši batho, go sa šetšwe ge e ba e le ka ntlo le ntlo goba phatlalatša, gomme ba ba nea molaetša wa Mmušo. (Mateo 10:7) Go arabela ga bona go be go tla bontšha ge e ba ba be ba swanelega goba go se bjalo.—Mateo 10:12-15.
17. Ke eng seo se kgonthišetšago gore barutiwa ba Jesu ba be ba sa fo etela batho ba swanelegago ka go ithekga ka go bolelwa ga bona goba ka tumelelano ya ketelo?
17 Se se bonwa mantšung a Jesu go Mateo 10:14: “Xe motho a sa Le amoxele, a xana xo kwa le dipolêlô tša lena, Le tloxê lapeng leo, le xe e le motseng woo, Le hlohlorê le lerole la ’naong tša lena.” Jesu o be a bolela ka go dira ga barutiwa ba gagwe maeto ao e sego a go laletšwa go batho e le gore ba bolele le bona. Ke therešo gore gape ba be ba tla amogela go dula lapeng le lengwe la malapa ao a arabelago molaetšeng. (Mateo 10:11) Eupja selo se segolo e be e le modiro wa boboledi. Go Luka 9:6 go boletšwe gore: “Barutiwa ba tšwa ba ya le metse, ba iša ditaba tše di botse, ba fodiša balwetši mo xohle.” (Bona le Luka 10:8, 9.) Bao ba swanelegago bao ba ilego ba amogela barutiwa magaeng a bona e le baporofeta, mohlomongwe ka go ba nea ‘sego sa meetse a tonyago’ goba gaešita le bodulo, ba be ba ka se lahlegelwe ke moputso wa bona. Ba be ba tla kwa molaetša wa Mmušo.—Mateo 10:40-42.
18, 19. (a) Go ya ka Ditiro 5:42, Bakriste ba pele ba ile ba dira bjang modiro wa bona wa boboledi? (b) Mantšu a Paulo go Ditiro 20:20, 21 a bontšha bjang gore o be a bolela ka bodiredi go batho bao ba sa dumelego, e sego modiro wa bodiši wa batho ba ka phuthegong?
18 Ka morago ga ge phuthego ya Bokriste e hlomilwe, re bala mabapi le baapostola gore: “Gomme ba ile ba tšwela pele ba ruta ka ntle le go kgaotša letšatši le lengwe le le lengwe tempeleng le ka ntlo le ntlo gomme ba bolela ditaba tše di lokilego ka Kriste Jesu.” (Ditiro 5:42, NW; bona mongwalo wa ka tlase, wa Reference Bible.) Polelo ya Segerika yeo e fetoletšwego “ka ntlo le ntlo” ke katʹ oiʹkon. Mo ka·taʹ e ka kgopolo ya go aba. Ka gona go ka bolelwa gore boboledi bja barutiwa bo be bo abja ka ntlo le ntlo. Ba be ba sa fo dira maeto a bogwera ao a rulagantšwego e sa le pele. Go dirišwa mo go swanago ga ka·taʹ go hwetšwa go Luka 8:1 polelong e rego ‘ka motse le motse le ka motsana le motsana.’
19 Polelo yona yeo ka bontši, kat’ oiʹkous, e dirišwa ke moapostola Paulo go Ditiro 20:20, NW. Moo o itše: “Ga se ka ka ka lesa go . . . le ruta phatlalatša le ka ntlo le ntlo.” Polelo “ka ntlo le ntlo” e fetoletšwe e le “malapeng a lena” diphetolelong tše dingwe. Ka gona, ba bangwe ba bahlalosi ba Beibele ba Bojakane ba bolela gore Paulo mo o bolela ka maeto a bodiši magaeng a badumedi. Eupja mantšu a latelago a Paulo a bontšha gore o be a bolela ka bodiredi go bao ba sa dumelego, ka gobane o bolela gore: “Ya ba xo hlatsêla Ba-Juda le ba-Gerika xore ba boêlê xo Modimo, ba dumêlê Morêna wa rena Jesu Kriste.”—Ditiro 20:21.
20. (a) Dihlatse tša Jehofa di boletše ditaba tše di lokilego tša Mmušo go fihla bokgoleng bofe mehleng ya rena? (b) Ba bangwe ba ka lebelela bjang taba ya go tšwela pele ka boboledi?
20 Ka gona mokgwa wo wa go fihlelela batho o swanetše go dirišwa mehleng ya rena ge “ditaba tše di lokilego tša mmušo” di swanetše go “bolelwa lefaseng ka moka le le agilwego gore e be bohlatse go ditšhaba ka moka.” (Mateo 24:14, NW) Ka nywaga e fetago 65, Dihlatse tša Jehofa di ile tša tšwela pele di bolela ka mafolofolo ditaba tše di lokilego tša Mmušo o hlomilwego wa Modimo phatlalatša le ka ntlo le ntlo, gomme mo nakong ye ba dira bjalo dinageng tše 210. Ke bohlatse bjo bogolo gakaakang bjo bo phethilwego! Se se dirwa go sa šetšwe therešo ya gore batho ba bantši lehono ba kwa molaetša ‘ka ntle le go arabela,’ ba bangwe gaešita le ka go galefa. (Mateo 13:15) Ke ka baka la’ng Dihlatse tša Jehofa ba phegelela go bolela mafelong ao go ona batho ba ganago go theetša goba gaešita le go ba ganetša? Potšišo ye e tla hlaloswa sehlogong se se latelago.
O tla Araba Bjang?
◻ Mangwalo a bontšha’ng ge e le ka bodiredi bja Jesu?
◻ Ke ditaelo dife tšeo di ilego tša newa baapostola bodireding bja bona?
◻ Ke modiro ofe wo o swanetšego go dirwa mehleng ya rena, gomme ka baka la’ng?
◻ Ke bomang bao Jehofa a bego a tla ba diriša go bolela ditaba tše di lokilego mehleng ya rena?
◻ Modiro wa boboledi o swanetše go dirwa kae gomme bjang?