Na o tla Holwa ke Botho bjo bo sa Swanelago?

FRANK o itše: “Ge ke be ke dutše ke tšwela pele ke ithuta ka ditekanyetšo tša Modimo ka Beibeleng, ke ile ka ikwa ke se ka swanelwa ke kamogelo ya gagwe le tšhegofatšo.” Kgahlego ya gagwe Beibeleng e ile ya tsošwa ge a be a le kgolegong ka baka la melato ya go diriša dihlare-tagi. O ile a bala kopi ya puku Therešo e Išago Bophelong Bjo bo sa Felego,a a ikwa a kgodišegile gore seo e se bolelago ke therešo, gomme ka morago ga gore a lokollwe kgolegong, a ya go Dihlatse tša Jehofa gore a ithute ka mo go oketšegilego ka Beibele.

Ke ka baka la’ng go ithuta Beibele go ile gwa mo dira gore a ipone e le yo a sa swanelegego? Ka gobane bophelong bja gagwe bja nakong e fetilego o be a ile a tshela melao e mentši ya Modimo ya motheo. Go diriša dihlare-tagi gampe, go diriša dino tše tagago gampe, le mekgwa e mengwe e fapa-fapanego e mebe go be go mo sentše mo ka nako e nngwe lephodisa le lengwe le ilego la re go yena: “Na o ka se ke wa nnea aterese ya legaeng la gago? Ke nyaka gore ke tsebe moo ke tlago go romela setopo sa gago gona!”

Lega go le bjalo, seo ka morago se ilego sa mo dira gore a ikwe e le yo a sa swanelegego kudu e bile gore go sa šetšwe go leka ga gagwe ka thata, o be a thatafalelwa ke go fenya mekgwa ye ya ditšhila e nweletšego kudu. Ka mohlala, bokgoba bjo bo theolago seriti bja bjala bo nyakile bo mo fenya. O boletše gore: “Ke ile ka palelwa o šoro gantši-ntši gomme ka ferekana kudu. Ke ile ka nyaka ke itlhoboga, ke nagana gore nka se sa loka le gatee.”

Ba bangwe ba ka ba ba sa ka ba ba maemong a go swana le a Frank nakong e fetilego. Lega go le bjalo, mo gongwe ba ka ikwa ba sa swanelege. Se se ka bakwa ke gore ba ipeela ditekanyetšo tše kgolo kudu ge ba dutše ba leka go phetha seo ba naganago gore ke seo Modimo a se nyakago. Ge ba palelwa, ba ikwa ba e-na le molato. Ngaka Claire Weekes pukung ya gagwe ya Self-Help for Your Nerves o hlalosa gore, “Maikwelo a molato e ka ba a boifišago, kudu-kudu go bao ba lekago go ipeela ditekanyetšo tše phagamego.” Mokriste a ka dira’ng ge e ba a e-na le maikwelo a bjalo a go se swanelege?

Leboga Botho bjo bo sa Swanelago

Frank o boletše gore, “Selo se sengwe seo se ilego sa nthuša kudu e bile go lemoga seo Beibele e se bolelago go Ba-Hebere 4:​15, 16.” Moo moapostola Paulo o re gopotša gore Jesu ke mothuši yo a kgomegago ka rena yo ‘a kgonago go re kwela bohloko ge re fokola’ le yo a dirilego gore go kgonege gore “re hwetšê kxauxêlô ya xo hlakodišwa lebakeng la xôna.”

Na o ka rata go hwetša senotlelo sa go fenya go ikwa o sa swanelege? Ke se: Gopola gore Jehofa Modimo le Jesu Kriste ba a tseba gore re a fokola ka baka la go se phethagale ga leabela. Ba a kwešiša gore ga re kgone go fihlelela ditekanyetšo tše di lokilego ka mo go feletšego. (Psalme 51:5; Ba-Roma 3:​23; 5:​12, 18; Jakobo 3:2) Ka gona ga ba a letela gore re dire seo se fetago seo re ka kgonago go se nea. Ba hlokometše dintlha tše botse go rena e sego tše mpe. Mopsalme o ile a botšiša: “Xe Wene Morêna Ò latiša molato, xôna xo ka êma mang?” (Psalme 130:3) O tla lemoga gore ga go le o tee wa rena yo a bego a ka ema. Lega go le bjalo, ka sehlabelo sa Jesu Kriste sa topollo, Jehofa ka kgaugelo a ka re nea boemo bjo bo hlwekilego go sa šetšwe go se phethege ga rena. (1 Johane 2:2; 4:​9, 10) Re ka hwetša “tebalelô ya dikaroxô”​—gomme ka tsela ye re thušwe go fenya maikwelo lege e ka ba afe a go ikwa re se ba swanelegago​—“ka lehumô la kxauxêlô ya xaxwe.”​—Ba-Efeso 1:7.

Lebelela taba ye ka tsela ye. Batho bao ba ratago dilo tša bokgabo ba dira matsapa a magolo a go lokiša diswantšho tše di thadilwego tšeo di sentšwego o šoro goba dilo tše dingwe tša bokgabo. Ka mohlala, ka morago ga gore motho o mongwe a senye seswantšho sa Leonardo da Vinci sa £20 million (diranta tše dimilione tše 84) sa National Gallery ya kua London, Engelane ka sethunya se senyenyane, ga go motho yo a ilego a šišinya gore ka ge seswantšho bjale se sentšwe se lahlwe. Modiro wa go lokiša selo sa bohlokwa seo se nago le nywaga e 487 se le gona o ile wa thoma ka bjako. Ka baka la’ng? Ka gobane se be se le bohlokwa mahlong a barati ba dilo tša bokgabo.

Na wena ga o yo bohlokwa go feta seswantšho seo se thadilwego ka tšhoko le ka phensele e ntsho? O bjalo mahlong a Modimo​—go sa šetšwe gore o ka ba o sentšwe ke sebe sa leabela gakaakang. (Psalme 72:​12-14; Mateo 20:​28) Jehofa Modimo, e lego Mmopi yo bohlale wa lapa la motho, o tla dira se se nyakegago bakeng sa go bušetša phethegong batho ba lapa leo bao ba nyakago go amogela tlhokomelo ya gagwe e lerato.​—Bapiša le Ditiro 3:​21; Ba-Roma 8:​20-22.

Amogela Botho bjo bo sa Swanelago

Latela mohlala wa moapostola Paulo. O ile a leboga botho bja Modimo kudu ka gore ka kgaugelo a mo lebalele dibe tša gagwe tša nakong e fetilego gaešita le ka go mo thekga ka dinako tšohle ntweng ya gagwe ya go fenya mafokodi ao a ipoeletšago. (Ba-Roma 7:​15-25; 1 Ba-Korinthe 15:​9, 10) Paulo o ile a lokiša tsela ya gagwe ya bophelo gomme a ba a ‘laya mmele wa gagwe a o dira lekgoba’ e le gore a dule tseleng e amogelwago ke Modimo. (1 Ba-Korinthe 9:27) Ga se a ka a dumelela gore mmele wa gagwe ka ditshekamelo tša wona tša nama le tša maikwelo o mo dire lekgoba.

Amogela botho bjo bo sa swanelago bja Modimo, gomme o bo dumelele gore bo go iše tshokologong. (Ba-Roma 2:4; 2 Ba-Korinthe 6:1) Ge e ba diphošo tša nakong e fetilego di go hlokiša khutšo, di lokiše gomme o dumele kholofetšo ya Jehofa ya gore o go lebaletše. (Jesaya 1:​16-18; Ditiro 2:​38) Ge e ba o hlomarelwa ke mafokodi, tšwela pele o a lwantšha. Rapelela thušo ya Jehofa ka pelo ka moka gore o a fenye mola o dutše o ithekgile ka yena. (Psalme 55:​22) Frank ge a lebiša phihlelong ya gagwe ka noši o eletša gore: “Ge motho yo a itšego ka dinako tše dingwe a ka palelwa ntweng ya gagwe ya go lwa le mokgwa o itšego o mobe, ga se a swanela go lebelela seo e le go palelwa go gogolo, eupja o swanetše go se lebelela e le go palelwa ga nakwana fela.” Ge e ba ba bangwe ba go okeletša mathata ka go nyaka mo gontši kudu go wena go feta seo o ka kgonago go se nea, gopola gore ke Modimo yo o lekago go mo kgahliša, e sego batho.​—Ba-Galatia 1:10.

Ge o dutše o lwela go dira se se nepagetšego, itiše malebana le “dipoxo” tša Sathane, e lego seo se ka bitšwago “maano-mabe a Diabolo.” (Ba-Efeso 6:​11, mongwalo wa tlase wa Reference Bible; Today’s English Version) Ela hloko ‘maano a mabedi a mabe’ ao a tlago go a diriša go leka go go amoga mehola ya botho bjo bo sa swanelago.

“Maano-Mabe” a Sathane

Sathane o diriša gampe maikwelo a go ikwa o sa swanelege e le gore a leke go go gogela kgole le Modimo. Taba ya mathomo, Sathane ke yena mothopo wa sebe seo se ilego sa go senya. Bjale a ka leka go godiša maikwelo a gore ga o swanelege mahlong a Modimo, bjalo ka ge Bilidada a ile a leka go dira bjalo go Jobo. (Jobo 25:​4-6; Johane 8:​44) Batho ba ile ba fenywa dintweng tše dintši gakaakang ka baka la gore madira a ile a ya ntweng a nyemile moko! Ka gona, o se ke wa lesa Sathane a go nyemiša moko. (Ba-Efeso 6:​10-13) Go tseba maano a Sathane go swanetše go go tutueletša go lwa ka matla a oketšegilego e le gore o dire se se nepagetšego.​—2 Ba-Korinthe 2:11.

Ge e ba ka dinako tše dingwe o nyamišwa ke diphošo tše itšego, kgonthišetša gore o se ke wa “metšwa ke nyamô.” (2 Ba-Korinthe 2:7) Dr. Claire Weekes o ile a bolela ka tshekamelo ya batho ba bangwe ya go dumelela mafokodi a nako e fetilego go ba nyamiša kudu ka gore: “Go dumelela gore phošo ya nakong e fetilego e šitiše seo se dirwago mo nakong ye ke go phela bophelo bjo bo lego kotsi.”​—Bona Ditiro 3:19.

Ge re be re ka kgona go phetha melao ka moka ya Modimo ka mo go feletšego, go re nea ga gagwe ditšhegofatšo tšeo a di holofeditšego e tla ba botho bjo bo re swanetšego. Eupja Jehofa Modimo le Jesu Kriste ba re bontšha botho “bjo bo sa swanelago.” A Greek-English Lexicon of the New Testament, ka J. H. Thayer, e hlalosa seo se bolelwago ke lentšu leo le dirišitšwego ke moapostola Paulo bakeng sa go hlalosa seka se sa Modimo: “Lentšu [khaʹris] le na le kgopolo ya botho bjo bo bontšhwago go motho yo bo sego bja mo swanela.” Ga go mediro ya rena yeo e ka re dirago gore re swanelwe ke ditšhegofatšo tša Modimo. Bjalo ka ge Paulo a bolela, ke botho bjo bo sa swanelago. Ge e be o dira ka mešego fela go phetha boikarabelo bja gago go Modimo, gona thabela go dira seo. Jehofa ga a sa nyaka se sengwe gape go wena.

Lega go le bjalo, hlokomela ‘maano-mabe a mangwe a Sathane.’ O aroša ba bangwe ka go ba dira gore ba nyatše botho bjo bo sa swanelago bja Modimo ba nagane gore kgaugelo ya gagwe e ba ana hlogo. Jehofa ka lerato o lebalela mafokodi a rena, eupja seo ga se bolele gore re swanetše go kgaotša go katanela go a fenya. Paulo o ile a hlalosa ba bangwe e le bao ba “xataketšexo Morwa wa Modimo ka maoto, . . .[ba] nyatša Môya wa kxauxêlô.” (Ba-Hebere 10:​29) Ba ke ba sa kago ba bontšha tlhompho melaong ya motheo e lokilego le ba ilego ba nyatša melao ya Modimo, ba ipea boemong bja go se lokišege. Juda, Ngwanabo Jesu, yo a ilego a bona kotsi yeo e tlišwago ke boradia bjo bo bjalo bja Sathane, o ile a ngwala gore: “Xo na le batho ba ba Le khukhunetšexo [ka diphuthegong], . . . ba ba sa boifexo Modimo, ba ba retollaxo tše Modimo wa rena a re xauxetšexo ka tšôna ba di dira tša maiphsinô.”​—Juda 4.

Sathane a ka foretša batho ba ba bjalo gore ba nagane gore ba ka nwelela ka boomo diphošong gomme ba kgopela Modimo gore a ba lebalele sebe sa bona. Eupja Jehofa a ka se ke a lebalela batho ba ba bjalo bao ba robago melao ya gagwe ka boomo. O ‘tletše ka botho bjo lerato’ go bao ba katanelago go mo direla ka matla a bona ka moka go sa šetšwe go se phethagale ga bona. “Fêla a [ka] se kê a lesa xo ôtla mosenyi” ge go swanetše.​—Ekisodo 34:​6, 7.

O ka Holwa ke Botho bjo sa Swanelago

Ke mo go homotšago go tseba gore Jehofa ga a go lebelele feela boemong bja gago bja go se phethagale, bjo bo senyegilego. O

tseba seo o ka bago sona ge matla a tsošološago a sehlabelo sa topollo sa Jesu a dirišitšwe ka botlalo. Ka gona, rapela Jehofa o holofetše bjalo ka mopesalome Dafida. Dafida o ile a re: “Modimo, nthšôkêlwê, ka xobane O yo botho. Mphomolê bosenyi, ka xobane kxauxêlô ya’xo ké e kxolo. Napa O nthlatswê molato, O nthseketšê, ke tšwe dibe. Xobane nna, bosenyi bya-ka ke a bo tseba, ’me sebe sa-ka xa se tloxe pele xa-ka. . . . Dibe tša-ka O se kê wa hlwa Ò di bôna; . . . Pelo xe e rôbêxilê, xe e setlêxile, Wene Modimo O ka se e nyatše.”​—Psalme 51:​1-3, 9, 17.

Dibe tša gago le diphošo tša gago di ka go tshwenya ka dinako tšohle. Ka dinako tše dingwe o ka ba wa ikwa bjalo ka morwa wa lehlaswa yo a boletšwego ke Jesu. Ka morago ga gore lesogana le le boele gae ka morago ga go tšitlanya bohwa bja lona ka tsela e gobogilego mafelong a šele, o ile a llela tatagwe ka gore: “Xa k’a swanêla xo hlwa kè bitšwa morwa wa xaxo.” (Luka 15:​21) Lega go le bjalo lesogana le le be le e-na le kgopolo e botse. Ga a ka a gana botho bja tatagwe goba go leka go bontšha eka bo mo swanetše. Ka gona tatagwe ka lerato o ile a mo amogela gape ka lapeng. (Luka 15:​20-24) Jehofa lehono o thabela go dira ka mo go swanago go batho ba sebe bao ba lekago ka matla go dira thato ya gagwe.​—Psalme 103:​8-14; Jesaya 55:7.

Frank ga se a dumelela maikwelo a go ba yo a sa swanelegego gore a mo fenye. O ile a amogela botho bjo bo sa swanelago bja Modimo, gomme mo nakong ye o dira e le mohlanka wa bodiredi phuthegong e nngwe ya Dihlatse tša Jehofa. O re: “Bjale ke a hlalala ge ke nagana ka seo Jehofa Modimo le Jesu Kriste ba re diretšego sona le seo ba sa tlago go re direla sona!”

[Mongwalo wa tlase]