Go Amogela Baeng ga Bokriste Lefaseng le Aroganego
“Ka baka leo, re swanetše go amogela batho ba ba bjalo ka botho, e le gore re ka ba badirišani therešong.”—3 JOHANE 8, NW.
1. Ke dimpho dife tše di kgahlišago kudu tšeo Mmopi a di neilego batho?
“MOTHO fá tlase xa letšatši xa a na se se botse, xe e se xo ja le xo nwa le xo thaba. Tšôna-tšeo a di bê naê’ ditapišong tša xaxwe mehleng yeno, Modimo à sa mo file bophelô fá tlase xa letšatši.” (Mmoledi 8:15) Ka mantšu ao mokgobokanyi wa bogologolo wa mo-Hebere o re botša gore ga se feela gore Jehofa Modimo o nyaka gore dibopiwa tša gagwe tšeo e lego batho e be tše di thabilego le tše di hlalalago, eupša o bile o nea ditsela tša go dira bjalo. Historing ka moka ya motho kganyogo e tee e swanago gare ga batho kae le kae go bonala e le gore ba thabe gomme ba ipshine.
2. (a) Batho ba dirišitše gampe bjang seo Jehofa a bego a ba reretše sona? (b) Mafelelo ke afe?
2 Lehono re phela lekokong le le ratago boithabišo leo go lona batho ba swaregilego kudu ka go phegelela boithabišo le maipshino. Go etša ge Beibele e boletše e sa le pele, batho ba bantši ba fetogile “baithati, . . . barati ba maipshino go e na le go ba barati ba Modimo.” (2 Timotheo 3:1-4, NW) Ee, se ke go kgopamišwa mo gogolo ga seo Jehofa Modimo a bego a se rerile. Ge go phegelela maipshino go fetoga pakane goba ge go ikgotsofatša go fetoga morero o nnoši, ga go na kgotsofalo ya kgonthe gomme ‘tšohle e ba lefeela le go phuthela phefo ka kobo.’ (Mmoledi 1:14; 2:11) Ka baka le, lefase le tletše batho ba lewago ke bodutu le ba ferekanego, e lego seo le sona se lebišago mathateng a mantši setšhabeng. (Diema 18:1) Batho ba a gononelana gomme ba arogana ka merafo, ditšhaba, tša leago le tša boiphedišo.
3. Re ka hwetša bjang lethabo la kgonthe le kgotsofalo?
3 Dilo e be e tla ba tše di fapanego gakaakang ge nkabe batho ba be ba ekiša tsela ya Jehofa ya go dirišana le ba bangwe—e e-ba ba botho, ba fago kudu le ba amogelago baeng! O bontšhitše gabotse gore sephiri sa lethabo la kgonthe ga se sa ithekga ka go leka ga rena go kgotsofatša dikganyogo tša rena ka noši. Go e na le moo, senotlelo se se: “Lešexo la monei le phala la monewa.” (Ditiro 20:35) Gore re hwetše lethabo la kgonthe le kgotsofalo, re swanetše go fenya mapheko le dikarogano tšeo di ka re thibelago. Le gona re swanetše go amogela bao re hlankelago Jehofa le bona. Ke gabohlokwa gore re ele hloko keletšo e rego: “Ka baka leo, re swanetše go amogela batho ba ba bjalo ka botho, e le gore re ka ba badirišani therešong.” (3 Johane 8, NW) Go bontšha moya wa go amogela baeng go bao ba swanetšego go fihla moo maemo a rena a re dumelelago, ke mo go holago ka ditsela tše pedi—go hola banei gotee le baamogedi. Ka gona, ke bomang bao ba lego gare ga ba swanetšego bao re swanetšego go ba ‘amogela ka botho’?
“Xo Hlôla Dišuana le Bahlôlôxadi”
4. Ke phetogo efe ditswalanong tša lapa yeo e bonwago gaešita le gare ga ba bangwe ba batho ba Jehofa?
4 Malapa a tsepamego le manyalo a thabilego a hwetšwa ka sewelo lehono. Ditekanyo tše di phagamago tša tlhalo le palo e oketšegago ya bo-mma ba sa nyalwago go dikologa lefase di fetotše lapa la setšo kudu. Ka baka leo, ba bantši bao e bilego Dihlatse tša Jehofa nywageng ya morago bjale ba tšwa malapeng a thubegilego. Ba hlalane goba ba arogane le balekane ba bona ba lenyalo, goba ba dula malapeng a motswadi o tee. Go oketša moo, go etša ge Jesu a boletše e sa le pele, therešo yeo a e rutilego e feleleditše ka dikarogano ka malapeng a mantši.—Mateo 10:34-37; Luka 12:51-53.
5. Jesu o boletše’ng seo e ka bago mothopo wa kgothatšo go bao ba lego ka malapeng a aroganego?
5 Go thabiša dipelo tša rena go bona ba bafsa ba emela therešo ka go tia gomme gantši re ba homotša ka kholofetšo ya Jesu e kgothatšago e rego: “Ruri, ke a Le botša, xa xo e a tloxetšexo lapa, xoba bana babô, xoba dikxaetšedi, xoba tat’axwe, xoba mm’axwe, xoba mosadi, xoba bana, xoba mašemo, è le ka ’baka la-ka le ka ’baka la Ebangedi, e a se tl’o xo boêlwa ke lekxolo ka se tee sa tšôna, è sa le bophelong byono, a hwetša malapá, le bana babô, le dikxaetšedi, le bô-mm’axwe, le bana, le mašemo, le tšôna ditlaišexô; ’me mehleng e tl’o xo tla ó tlo hwetša bophelô byo bo sa felexo.”—Mareka 10:29, 30.
6. Re ka ba bjang ‘barwarre, dikgaetšedi, bo-mma le bana’ go “dišuana le bahlôlôxadi” bao ba lego gare ga rena?
6 Ka gona, ‘banababo rena [ba] le dikgaetšedi le bo-mma le bana’ ke bomang? Go fo bona palo e kgolo ya batho Holong ya Mmušo, gantši e le ba lekgolo goba go feta moo bao ba ipitšago banababo rena le dikgaetšedi ga go fo dira motho gore a ikwe gore ba ke banababo, dikgaetšedi, bo-mmagwe le bana ba gagwe. Ela hloko ntlha ye: Morutiwa Jakobo o re gopotša gore e le gore borapedi bja rena e be bjo bo amogelegago go Jehofa, re swanetše go ‘hlola ditšhiwana le bahlologadi mahlokong a bona le go itota gore lefase le se re šilafatše.’ (Jakobo 1:27) Seo se bolela gore ga se ra swanela go dumelela boemo bja kgopolo bja lefase bja boikgogomošo bja tša boiphedišo le go phagama ga sehlopha sa tša leago di thibela kwelobohloko ya rena go “dišuana le bahlôlôxadi” ba bjalo. Go e na le moo, re swanetše go gata mogato pele bakeng sa go ba bontšha bogwera bja rena le moya wa go amogela baeng.
7. (a) Morero wa kgonthe wa go ba ba amogelago baeng go “dišuana le bahlôlôxadi” ke ofe? (b) Ke bomang gape bao ba ka bago le karolo go bontšheng moya wa go amogela baeng ga Bokriste?
7 Go bontšha moya wa go amogela baeng go “dišuana le bahlôlôxadi” ga se ka mehla go akaretšago go nea seo ba ka bago ba se hloka dilong tše di bonagalago. Malapa a motswadi o tee goba malapa ao a aroganego ka bodumedi ga se gore a na le bothata bja tša ditšhelete. Lega go le bjalo, bogwera bjo bo agago, moya wa lapa, bogwera le batho ba nywaga e fapa-fapanego le go abelana dilo tše dibotse tša moya—tše ke dibopego tša bophelo tšeo di lebelelwago e le tše bohlokwa. Ka go rialo, ka go gopola gore sa bohlokwa ga se bogolo bja tiragalo eupša ke moya wa lerato le botee, ke mo gobotse gakaakang ka dinako tše dingwe mo e lego gore gaešita le “dišuana le bahlôlôxadi” ba ka tšea karolo go bontšheng moya wa go amogela baeng go Bakriste-gotee le bona!—Bapiša le 1 Dikxoši 17:8-16.
Na go na le Batšwa-Gošele Gare ga Rena?
8. Ke phetogo efe yeo e bonwago ka diphuthegong tše dintši tša Dihlatse tša Jehofa?
8 Re phela nakong ya go huduga mo gogolo ga baagi. World Press Review e re: “Batho ba fetago dimilione tše 100 go dikologa lefase ba dula dinageng tšeo e sego badudi ba tšona ba setlogo gomme ba dimilione tše 23 ba gapeletšwa go huduga dinageng tša gabo bona.” Mafelelo a lebanyago a se e bile gore mafelong a mantši kudu-kudu metseng e megolo kudu, diphuthego tša batho ba Jehofa tšeo pele di bego di bopša kudu ke morafo o tee goba setšhaba, gona bjale di na le batho ba tšwago dikarolong tše di fapa-fapanego tša lefase. Mohlomongwe se ke sa therešo mo o lego gona. Ka gona, re swanetše go lebelela bjang “badiiledi” ba le “batšwa-gošele” go etša ge lefase le ka ba bitša bao leleme la bona, ditlogo le mokgwa wa bona wa go phela di ka bago di fapane le tša rena bjalo?
9. Ke morero ofe o mogolo wo o ka re tanyago mabapi le kgopolo ya rena ka “badiiledi” le “batšwa-gošele” bao ba tlago ka phuthegong ya Bokriste?
9 Go bea se gabonolo, ga se ra swanela go dumelela ditshekamelo le ge e le dife tša go boifa le go hloya batho bašele di re dira gore re ikwe re swanelwa kudu ka tsela e itšego ke tokelo ya go tseba therešo go feta bao ba tšwago nageng e šele goba yeo go thwego ke ya boheitene; le gona ga se ra swanela go ikwa bjalo ka ge eka batho ba bao ba sa tšwago go fihla ba tshela molao wa go dirišwa ga Holo ya Mmušo goba mafelo a mangwe. Moapostola Paulo o ile a swanelwa ke go gopotša Bakriste ba bangwe ba ba-Juda ba lekgolong la pele la nywaga bao ba bego ba e-na le dikgopolo tše bjalo gore ge e le gabotse go be go se na yo a swanelegago; e be e le botho bjo bo sa swanelago bja Modimo bjo bo dirilego gore go kgonege gore motho le ge e le ofe a hwetše phologo. (Ba-Roma 3:9-12, 23, 24) Re swanetše go thabela gore botho bjo bo sa swanelago bja Modimo bjale bo fihlelela batho ba bantši gakaakaa bao ba bego ba ganetšwa sebaka sa go kwa ditaba tše di lokilego ka tsela e itšego. (1 Timotheo 2:4) Re ka bontšha bjang gore lerato la rena go bona ke la kgonthe?
10. Re ka bontšha bjang gore re bao ba amogelago baeng e le ka kgonthe go “batšwa-gošele” bao ba lego gare ga rena?
10 Re ka latela temošo ya Paulo e rego: “Amoxêlanang byalo ka xe Yêna Kriste a Le amoxetše, e bê xôna xo leboxa Modimo.” (Ba-Roma 15:7) Ka go lemoga gore batho ba tšwago dinageng goba ditšong tše dingwe gantši ke bao ba hlokago, re swanetše go ba bontšha botho le go kgomega ge e ba re kgona go dira bjalo. Re swanetše go ba amogela magareng ga rena, yo mongwe le yo mongwe wa bona re mo sware “byalo ka motho wa xeno e a tswaletšwexo xaê” gomme “o mo ratê ka mokxwa wo O ithataxo ka wôna.” (Lefitiko 19:34) Se go ka fo se be bonolo go se dira, eupša re tla atlega ge e ba re gopola keletšo e rego: “Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.”—Ba-Roma 12:2.
Abelanang le Bakgethwa
11, 12. Ke tlhokomelo efe e kgethegilego yeo e ilego ya newa bahlanka ba itšego ba Jehofa (a) Isiraeleng ya bogologolo (b) lekgolong la pele la nywaga?
11 Gare ga bao ba swanelwago e le ka kgonthe ke tlhokomelo ya rena le moya wa go amogela baeng ke Bakriste ba godilego ka tsebo bao ba šomago ka thata bakeng sa boiketlo bja rena bja moya. Jehofa o ile a direla baperisita le ba-Lefi ditokišetšo tše di kgethegilego Isiraeleng ya bogologolo. (Numeri 18:25-29) Lekgolong la pele la nywaga, Bakriste le bona ba ile ba kgothaletšwa go hlokomela bao ba bego ba ba hlankela maemong a kgethegilego. Pego e lego go 3 Johane 5-8 e re nea tshedimošo ya tlemo ya kgaufsi ya lerato yeo e bego e le gona gare ga Bakriste ba pele.
12 Moapostola Johane yo a tšofetšego o ile a leboga kudu botho le moya wa go amogela baeng tšeo Gayo a ilego a di bontšha go banababo ba itšego ba basepedi bao ba bego ba rometšwe go etela phuthego. Bana ba babo rena—go akaretša le Demetrio yoo mohlomongwe a bego a tlišitše epistola—ka moka e be e le batho bašele go Gayo goba a be a se a ka a ba tseba. Eupša ba ile ba amogelwa ka botho ka “xobane ba wetše tsela bà dirêla ’ina la [Modimo].” Johane o e bea ka tsela ye: “Ka baka leo, re swanetše go amogela batho ba ba bjalo ka botho, e le gore re ka ba badirišani therešong.”—3 Johane 1, 7, 8, bapiša le NW.
13. Ke bomang gare ga rena lehono bao ba swanelwago ka mo go kgethegilego ke go ‘amogelwa ka botho’?
13 Lehono ka gare ga mokgatlo wa Jehofa, go na le ba bantši bao ba ikgafago ka mafolofolo bakeng sa mokgatlo ka moka wa barwarre. Ba ba akaretša balebeledi ba basepedi bao ba dirišago nako ya bona le matla beke le beke ba aga diphuthego; baromiwa bao ba tlogelago malapa le bagwera bakeng sa go bolela dinageng dišele; bao ba hlankelago magaeng a Bethele goba diofising tša makala bao ba ithapetšego go thuša bakeng sa go thekga modiro wa boboledi wa lefase ka bophara; le bao ba lego tirelong ya bobulamadibogo bao ba dirišago karolo e kgolo ya nako ya bona le matla bodireding bja tšhemo. Ge e le gabotse, ba ka moka ba šoma ka thata e sego bakeng sa go ikhweletša kgodišo le ge e le efe goba go ikhola, eupša ka baka la lerato la go rata borwarre bja Bokriste le Jehofa. Re swanetše go ba ekiša ka baka la boineelo bja bona bja moya ka moka gomme ba swanelwa ke go ‘amogelwa ka botho.’
14. (a) Re ba Bakriste ba bakaone bjang ge re bontšha moya wa go amogela baeng go ba botegago? (b) Ke ka baka la’ng Jesu a ile a bolela gore Maria o kgethile “kabêlô e botse”?
14 Moapostola Johane o bontšhitše gore ge re “amogela batho ba ba bjalo ka botho,” re “ba badirišani therešong.” Ka kgopolo e itšego re ba Bakriste bakaone ka baka la seo. Se ke ka gobane mediro ya Bokriste e akaretša go dira botse go badumedi-gotee le rena. (Diema 3:27, 28; 1 Johane 3:18) Go na le meputso le ka tsela e nngwe. Ge Maria le Mareta ba be ba amogetše Jesu legaeng la bona, Mareta o be a nyaka go ba mong-gae yo botse ka go lokišetša Jesu “tše ntši.” Maria o ile a bontšha moya wa go amogela baeng ka tsela e fapanego. O ile “a dula fase ’naong tša Jesu, a theetša tše Jesu a di bolêlaxo,” gomme Jesu o ile a mo reta ka baka la go kgetha ga gagwe “kabêlô e botse.” (Luka 10:38-42) Go swara mehlamu gotee le go boledišana le bao ba nago le nywaga e mentši ya phihlelo gantši ke ditiragalo tše dikgolo tša mantšiboa ao a fetšwago re na le bona.—Ba-Roma 1:11, 12.
Meletlong e Kgethegilego
15. Ke meletlo efe e kgethegilego yeo e ka ipontšhago e le dinako tša lethabo bakeng sa batho ba Jehofa?
15 Gaešita le ge Bakriste ba therešo ba sa latele mekgwa e tumilego goba go boloka matšatši a maikhutšo a lefase le menyanya, go na le dinako tšeo ka tšona ba bokanago bakeng sa go thabela bogwera bja yo mongwe le yo mongwe wa bona. Ka mohlala, Jesu o ile a ya monyanyeng wa lenyalo Kana gomme a tlaleletša lethabong la moletlo ka go dira mohlolo wa gagwe wa pele moo. (Johane 2:1-11) Ka mo go swanago lehono, batho ba Jehofa ba ba le dinako tša lethabo ba le gotee meletlong e swanago e kgethegilego, gomme monyanya o swanetšego o tlaleletša mo gontši ditiragalong tše bjalo. Ka gona, ke’ng seo se swanetšego?
16. Ke tlhahlo efe yeo re nago le yona ka boitshwaro bjo bo swanetšego gaešita le meletlong e kgethegilego?
16 Go tšwa thutong ya rena ya Beibele re ithuta seo boitshwaro bjo bo swanetšego bo lego sona bakeng sa Bakriste, gomme se re se latela ka dinako tšohle. (Ba-Roma 13:12-14; Ba-Galatia 5:19-21; Ba-Efeso 5:3-5) Dipokano tša bogwera, go sa šetšwe ge e ba di tswalana le manyalo goba le lebaka le ge e le lefe le lengwe, ga di re nee tumelelo ya go lahla ditekanyetšo tša rena tša Bokriste goba go dira selo seo ka tlwaelo re bego re ka se se dire; le gona ga re gapeletšege go latela mekgwa ka moka ya naga yeo re dulago go yona. E mentši ya yona e theilwe mekgweng goba ditumela-khweleng tša bodumedi bja maaka, gomme tše dingwe di akaretša boitshwaro bjo bo tlogago bo sa amogelege go Bakriste.—1 Petro 4:3, 4.
17. (a) Ke mabaka afe ao a bontšhago gore monyanya wa lenyalo wa Kana o be o rulagantšwe gabotse e bile o hlokometšwe ka tshwanelo? (b) Ke’ng se se bontšhago gore Jesu o ile a amogela moletlo woo?
17 Ge re bala Johane 2:1-11, ga go thata go rena go lemoga gore moletlo e be e le o mogolo le gore go be go e-na le palo e kgolo kudu ya baeng. Lega go le bjalo, Jesu le barutiwa ba gagwe e be e le baeng ba “laleditšwego” (NW); ga se ba fo itlela, gaešita le ge bonyenyane ba bangwe ba bona mohlomongwe ba be ba tswalana le mong-gae. Re lemoga le gore go be go e-na le bao e bego e le “bahlanka” gotee le “mmuši wa monyanya” (PK) yo a bego a ka nea ditaelo ge e le ka seo se bego se solwa goba se dirwa. Se ka moka se bontšha gore monyanya o be o rulagantšwe gabotse le go hlokomelwa ka mo go swanetšego. Pego e phetha ka go bolela gore ka seo a se dirilego monyanyeng, Jesu o ile “a bônaxatša letaxô la xaxwe.” Na o be a ka ba a ile a kgetha sebaka seo go dira seo ge nkabe e be e le moletlo wa lešata le o sa laolegego? Ka ntle le pelaelo ga go bjalo.
18. Ke’ng seo se swanetšego go naganišišwa kudu mabapi le tiragalo le ge e le efe ya bogwera?
18 Ka gona-ge, go thwe’ng ka meletlo le ge e le efe e kgethegilego yeo re ka e rulaganyago? Re swanetše go gopola gore morero wa go amogela ba bangwe ka botho ke gore ka moka re ‘be badirišani therešong.’ Ka go rialo, ga se gwa lekana go bitša pokano gore ke “ya Dihlatse.” Go ka botšišwa potšišo e rego, Na ge e le gabotse ke bohlatse bja seo re lego sona le seo re se dumelago? Le ka mohla ga se ra swanela go lebelela meletlo e bjalo e le dibaka tša go bona bokgole bjo re ka fihlago go bjona ka go phenkgišana le lefase ditseleng tša lona ka go nwelela go “kxanyoxô ya nama, le kxanyoxô ya mahlô, le xo phela ka xo ikxoxomoša.” (1 Johane 2:15, 16) Go e na le moo, meletlo ye e swanetše go bonagatša ka mo go swanetšego karolo ya rena re le Dihlatse tša Jehofa gomme re swanetše go kgonthišetša gore seo re se dirago se tlišetša Jehofa tumišo le kgodišo.—Mateo 5:16; 1 Ba-Korinthe 10:31-33.
‘Amogelang Baeng ka Ntle le go Ngongorega’
19. Ke ka baka la’ng re swanetše “xo thabêlana le baeng; xo se [na] le xo ngôngôrêxa”?
19 Ge maemo a lefase a dutše a tšwela pele a senyega gomme batho e e-ba ba aroganego ka mo go oketšegilego, re swanetše go dira sohle seo re ka se kgonago go matlafatša tlemo ya kgaufsi yeo e lego magareng ga Bakriste ba therešo. (Ba-Kolose 3:14) Gore go phethwe se, re swanetše go ba le “leratanô le tletšexo” go etša ge Petro a re kgothaleditše. Ka morago o oketša ka mantšu a kwalago gore: “Le bê ba xo thabêlana le baeng; xo se bê le xo ngôngôrêxa.” (1 Petro 4:7-9) Na re ikemišeditše go gata mogato pele bakeng sa go bontšha moya wa go amogela baeng go banababo rena, re katanele go ba ba botho le ba thušago? Goba na re a ngongorega ge sebaka se se bjalo se tšwelela? Ge e ba re ngongorega, re fediša lethabo leo re ka bego re bile le lona gomme ra lahlegelwa le ke moputso wa go thabela go dira botse.—Diema 3:27; Ditiro 20:35.
20. Ke ditšhegofatšo dife tšeo di re letetšego ge e ba re bontšha moya wa go amogela baeng lefaseng la lehono le le aroganego?
20 Go šoma kgaufsi le Bakriste-gotee le rena, go ba ba botho le go amogela baeng di tla tliša ditšhegofatšo tše dintši kudu. (Mateo 10:40-42) Jehofa o holofeditše ba bjalo gore o tla “ba khutiša Ngwakong wa xaxwe. Ba ka se kê ba hlwa bà e-ba le tlala le xe e le lenyôra.” Go ba ka ngwakong wa Jehofa ke go thabela tšhireletšo ya gagwe le moya wa gagwe wa go amogela baeng. (Kutollo 7:15, 16; Jesaya 25:6) Ee, kua pejana go na le tebelelo ya go thabela moya wa Jehofa wa go amogela baeng ka mo go sa felego.—Psalme 27:4; 61:3, 4.
Na o ka Hlalosa?
◻ Ke’ng seo re sa swanelago go se tshediša mahlo ge e ba re nyaka go hwetša lethabo la kgonthe le kgotsofalo?
◻ “Dišuana le bahlôlôxadi” ke bomang, gona re swanetše go ba “hlôla” bjang?
◻ Re swanetše go lebelela bjang “badiiledi” le “batšwa-gošele” bao ba lego gare ga rena?
◻ Ke bomang bao ba swanelwago ke go elwa hloko ka mo go kgethegilego lehono?
◻ Meletlo e kgethegilego e swanetše go bonagatša bjang moya wa kgonthe wa go amogela baeng?
[Pictures on page 16, 17]
Re ka ba ba amogelago baeng go batšwa-gošele, ditšhiwana, bao ba lego tirelong ya nako e tletšego le baeng ba bangwe meletlong ya menyanya