“Le ke Letšatši le le Phalago Matšatši Ohle”
“Ka pudulelo ke ile ka ba letšatšing la Morena.”—KUTOLLO 1:10, “NW.”
1. Ke “letšatši” lefe leo re phelago go lona, gomme ke ka baka la’ng therešo ye e le e thabišago gakaakaa?
“LE KE letšatši le le phalago matšatši ohle. Bonang, Kgoši e a buša!” Mantšu a a matla ao a ilego a bolelwa ke mookamedi wa bobedi wa Watch Tower Bible and Tract Society morago kua ka 1922 a sa dutše a re thabiša le lehono. A tšwela pele go re gopotša gore re phela mehleng e thabišago kudu historing ka moka, e lego mehla yeo ka Beibeleng e bitšwago “letšatši la Morêna.” (Kutollo 1:10) Ka kgonthe ke “letšatši le le phalago matšatši ohle,” ka gobane ke mehla yeo ka yona Jehofa ka Mmušo wa Kriste a tlago go phetha merero ya Gagwe ka moka e megolo le go kgethagatša leina la Gagwe le lekgethwa pele ga tlholo ka moka.
2, 3, (a) Letšatši la Morena le tšea lebaka le le kaaka’ng? (b) Re ka nyakišiša kae mabapi le letšatši le?
2 Letšatši le le thomile ka 1914 nakong ya ge Jesu a be a bewa e le Kgoši ya Mmušo wa Modimo. Le tla tšwela pele go fihla bofelong bja Pušo ya Nywaga e Sekete, ge Kriste a tla ‘bušetša mmušo go Modimo wa gagwe le Tatagwe.’ (1 Ba-Korinthe 15:24) Bakriste ba botegago ba ile ba lebelela pele letšatšing la Morena ka makgolo a mantši a nywaga. Bjale mafelelong ke le le fihlile! ‘Letšatši le le le phalago matšatši ohle’ le ile la bolela’ng go batho ba Modimo le go lefase ka kakaretšo?
3 Puku ya Beibele yeo e re botšago kudu ka letšatši la Morena ke Kutollo. Mo e ka bago diporofeto ka moka tša puku ye di phethagatšwa nakong ya letšatši la Morena. Eupja Kutollo ke feela seremo sa lelokelelo la dipuku tša boporofeta tšeo di re botšago ka letšatši leo. Gare ga dipuku tše dingwe, Jesaya, Jeremia, Hesekiele le Daniele le tšona di re botša mabapi le lona. Gantši seo di se bolelago se re thuša go kwešiša kaone diporofeto tša Kutollo. Anke re boneng kamoo puku ya Hesekiele ka mo go kgethegilego e neago seetša mabapi le go phethagatšwa ga Kutollo nakong ya letšatši la Morena.
Banamedi ba Dipitsi ba Bane
4. Go ya ka Kutollo kgaolo 6, ke’ng seo se ilego sa direga mathomong, a letšatši la Morena?
4 Ka mohlala, kgaolong ya botshelela ya Kutollo, moapostola Johane o hlalosa pono e matla: “Ka lebelêla ka bôna pitsi e thšweu; e a e nametšexô à swere borá, a fiwa mphapahlôxo, a tšwa è le mofenyi le wa xo tlo fenya.” (Kutollo 6:2) Monamedi yo wa pitsi wa mofenyi ke mang? Ga go yo mongwe ge e se Jesu Kriste yo a beilwego e le Kgoši ya Mmušo wa Modimo le yo a katelago go ya go fenya manaba a gagwe. (Psalme 45:3-6; 110:2) Go kata ka mokgwa wa phenyo ga Jesu go thomile morago kua ka 1914, mathomong-thomong a letšatši la Morena. (Psalme 2:6) Phenyo ya gagwe ya mathomo-thomo e bile ya go lahlela Sathane le batemona ba gagwe lefaseng. Se se feleleditše ka eng go batho? “Ba madimabe ké lena ba Le axilexo lefaseng le lewatleng.”—Kutollo 12:7-12.
5. Ke diphedi dife tše boifišago tše latelago Monamedi wa pitsi e tšhweu, gomme ke matla afe ao sephedi se sengwe le se sengwe se nago le ona?
5 Ponong yeo go ile gwa latela diphedi tše tharo tše boifišago: pitsi e khulong yeo e swantšhetšago ntwa, pitsi e ntsho yeo e swantšhetšago tlala, le pitsi e tshehla yeo monamedi wa yona a bego a bitšwa “Lehu.” Re bala mabapi le pitsi ye ya bone gore: “Ka bôna xò tšwêlêla pitsi e thsêhla, e a e nametšexo, leina la xaxwe ké Lehu; ô latêlwa ke bodula-bahu. Ba fiwa matla a xo bolaya karolô ya bonê ya ba mo lefaseng ka lerumô le ka tlala le ka dinkhu, le ka dibata tša naxa.”—Kutollo 6:3-8; Mateo 24:3, 7, 8; Luka 21:10, 11.
6. Mafelelo a dipitsi tše tše tharo tše boifišago le banamedi ba tšona e bile afe lefaseng?
6 Ka go dumelelana le boporofeta bjo, batho ba ile ba tlaišwa o šoro ke ntwa, tlala le bolwetši ga e sa le go tloga ka 1914. Eupja monamedi wa pitsi wa bone gape o bolaya ka “dibata tša naxa.” Na se e ile ya ba selo seo se lemogegago ga e sa le go tloga ka 1914? Go ela hloko boporofeta bjo bo swanago bja Hesekiele go re thuša go lemoga sebopego se sa boporofeta.
7. (a) Ke boporofeta bofe bjoo Hesekiele a ilego a bo bolela mabapi le Jerusalema? (b) Boporofeta bjo bo ile bja phethagatšwa bjang?
7 Hesekiele o porofetile ka kotlo e šoro bakeng sa ba-Juda ka baka la go se botege ga bona ge a be a ngwala mo e ka bago nywageng e mehlano pele ga go senywa ga Jerusalema ka 607 Pele ga Mehla ya Rena. O ile a ngwala ka tlase ga pudulelo gore: “[Go tla ba bjalo] Le xe nka roma kôtlô tša-ka tše nnê tše bohloko tšé, lerumô, tlala, dibata, dinkhu, xore xo fedišwê batho le dikxomo motseng wa Jerusalêma.” (Hesekiele 14:21, bapiša le NW; Hes 5:17) Na se se ile sa phethagala e le ka kgonthe morago mehleng yeo? Ka ntle le pelaelo Jerusalema e ile ya tlaišwa ke tlala le ntwa ge bofelo bja yona bo be bo dutše bo batamela. Le gona gantši tlala e baka bolwetši. (2 Koronika 36:1-3, 6, 13, 17-21; Jeremia 52:4-7; Dillo tša Jeremia 4:9, 10) Na go ile gwa ba gape le kotlo ya kgonthe ya dibata nakong yeo? Go bonala go ile gwa ba le mabaka ao ka wona batho ba ilego ba gogobišwa goba mohlomongwe gaešita le go bolawa ke diphoofolo, ka ge Jeremia le yena a ile a bolela ka se e sa le pele.—Lefitiko 26:22-33; Jeremia 15:2, 3.
8. Ke karolo efe yeo dibata di bilego le yona nakong ya letšatši la Morena go fihlela ga bjale?
8 Go thwe’ng ka lehono? Dinageng tšeo di tšwetšego pele diphoofolo tša naga ga di sa le bothata bjo šoro go etša kamoo di bego di le ka gona pele. Lega go le bjalo, dinageng tše dingwe diphoofolo tša lešoka di tšwela pele di tsoma bao di ka ba hlaselago, kudu-kudu ge re akaretša dinoga le dikwena gare ga “dibata tša naxa.” Mahu a bjalo a bohloko a begwa ka sewelo ka dipukung tša ditšhaba tšohle, eupja a a lemogega. Puku Planet Earth—Flood e bolela ka ba bantši kua India le Pakistan bao “ba ilego ba hwa gabohloko ka go longwa ke dinoga tša mpholo” ge ba be ba leka go tšhaba mafula. India Today e begile ka motsana o mongwe kua Bengal Bodikela moo basadi ba akanyetšwago go 60 ba ilego ba lahlegelwa ke banna ba bona ka baka la go hlaselwa ke dinkwe. Ditiragalo tše bjalo tše bohloko mo gongwe e tla ba tšeo di tlwaetšwego kudu nakong e tlago ge lekoko la batho le arogana gomme tlala e oketšega.
9. Ke mohuta ofe o mongwe wa “phoofolo” woo o ilego wa baka tshenyo le tlaišo gare ga batho lekgolong le la nywaga?
9 Eupja Hesekiele o be a šupa go mohuta o mongwe wa “phoofolo” ge a be a re: “Baporofeta ba yôna ba lakane; ba etša ‘tau tša dibata di bôpaxo; ba Ile batho . . . Bakxôma ba xôna ba byalo ka diphiri tša dibata.” (Hesekiele 22:25, 27) Ka gona batho le bona ba ka dira bjalo ka diphoofolo, gomme batho ba ile ba tlaišwa gakaakang ke batlaiši ba bjalo mehleng ya rena! Ba bantši ba ile ba hwa ba bolawa ke dikebekwa tšeo di nago le moya wa bophoofolo wa bošoro le batšhošetši. Ee, lehu le ile la tšea maphelo a mantši kudu ka “dibata tša naxa” ka ditsela tše dintši.”
10. Ke eng seo go lokeletša ga Johane ntwa, tlala, bolwetši le dibata e le dilo tšeo di bakago lehu go re thušago go se bona?
10 Go lokeletšwa ga ntwa, tlala, bolwetši le dibata ponong ya Johane go re thuša go bona gore masetla-pelo ao a ilego a wela Jerusalema ka 607 Pele ga Mehla ya Rena a be a swanetše go swantšhwa ka makga a mantši mehleng ya rena. Ka gona letšatši la Morena le šetše le boletše go tlaišega ga lefase, kudu-kudu ka gobane babuši ba batho ba ganne go ikokobeletša monamedi yola wa pele wa pitsi, e lego Kgoši yeo e beilwego sedulong sa bogoši Jesu Kriste. (Psalme 2:1-3) Ka gona go thwe’ng ka batho ba Modimo? Letšatši la Morena le boletše’ng go bona?
Go Ela Tempele
11. Go Kutollo 11:1, ke’ng seo Johane a ilego a laelwa gore a se dire, gomme se se be se le mabapi le tempele efe?
11 Go Kutollo 11:1 moapostola Johane o re: “Ka nêwa lehlaka le e kexo ké lehlôtlô; xwa thwe: Êma O êlê Ntlo-kxêthwa ya Modimo, le aletare, le ba ba rapêlaxo mo xo yôna.” Go elwa mo ga ponong ga tempele e be e le gabohlokwa kudu bakeng sa batho ba Modimo. Ke tempele efe yeo Johane a ilego a e ela? E be e se tempele ya kgonthe ya ba-Juda moo Johane a ilego a rapela gona pele a e-ba Mokriste. Tempele yeo e ile ya lahlwa ke Jehofa, gomme e ile ya senywa ka 70 Mehleng ya Rena. (Mateo 23:37–24:2) Go e na le moo, e be e le thulaganyo ya tempele e kgolo ya moya ya Jehofa. Bakriste ba tloditšwego ba dira e le baperisita ba ka tlase lapeng la lefase ka tempeleng ye ya seswantšhetšo.—Ba-Hebere 9:11, 12, 24; 10:19-22; Kutollo 5:10.
12. Tempele yeo e ile ya thoma go ba gona neng, gomme ke ditiragalo dife tšeo di ilego tša direga mabapi le yona lekgolong la pele la nywaga?
12 Tempele yeo e ile ya thoma go ba gona ka 29 Mehleng ya Rena nakong ya ge Jesu a be a tlotšwa e le moperisita o mogolo. (Ba-Hebere 3:1; 10:5) E be e tla ba le baperisita ba ka tlase ba 144 000 gomme lekgolong la pele la nywaga ba bantši ba ba ba ile ba kgethwa, ba swawa gomme ka morago ba hwa ba botega. (Kutollo 7:4; 14:1) Eupja nakong ya ge Bakriste bao ba lekgolong la pele la nywaga ba be ba e-hwa, ba ile ba robala lebitleng, ba se tsošetšwe legodimong ka bjako. (1 Ba-Thesalonika 4:15) Go feta moo, ka morago ga lekgolo la pele la nywaga go ile gwa tsena bohlanogi bjo bogolo, gomme Bakriste ba tloditšwego ba boperisita ba ile ba dikologwa ke “mefoka” e atago e lego bahlanogi. (Mateo 13:24-30) Go theoša le makgolo a mantši a nywaga ga e sa le go tloga moo, mo gongwe go ka be go ile gwa botšišwa ka tshwanelo gore: ‘Na baperisita ba ka tlase ka moka ba 144 000 ba be ba tla ka ba swawa?’ ‘Na bao ba ilego ba hwa ba botega ba be ba tla ka ba tsošwa gore ba yo dira sekgethweng sa legodimong?’ Go elwa ga ponong ga tempele go bontšhitše gore karabo go e nngwe le e nngwe ya dipotšišo tše ke ee. Ka baka la’ng?
13. Go ela ga Johane tempele go be go tiišetša’ng, gomme ke’ng seo se ilego sa direga mathomong a letšatši la Morena?
13 Ka gobane ka boporofeteng bja Beibele go ela selo se itšego gantši go bontšha gore morero wa Jehofa ka selo seo o tla phethega e le ka kgonthe. (2 Dikxoši 21:13; Jeremia 31:39; Dillo tša Jeremia 2:8) Ka gona, go ela ga Johane ga ponong tempele e be e le tiišetšo ya gore nakong ya letšatši la Morena, merero ya Jehofa ka moka ya mabapi le tempele e be e tla phethega. Ka go dumelelana le se le go ya ka bohlatse ka moka, batlotšwa bao ba bego ba šetše ba hwile ba botega ba ile ba thoma go tsošetšwa lefelong leo ba le holofeditšwego sekgethweng sa legodimong go thoma ka 1918. (1 Ba-Thesalonika 4:16; Kutollo 6:9-11) Eupja go thwe’ng ka bao ba šetšego ba ba 144 000?
14. Ke’ng seo se ilego sa diragalela Bakriste ba tloditšwego pele le nakong ya ntwa ya pele ya lefase?
14 Bakriste ba tloditšwego bao ba ilego ba tšwa Bojakaneng bja bohlanogi ba ile ba thoma go kgobokana phuthegong e arogilego gaešita le pele ga letšatši la Morena. Ba ile ba aga pego e botse ya potego tabeng ya go tsebiša bohlokwa bja ngwaga wa 1914, eupja ngwageng woo wa bohlokwa, nakong ya ge ntwa ya pele ya lefase e be e thoma, ruri ba ile ba thoma go tlaišwa ke kgatelelo, ‘ba thothomela.’ Se se ile sa fihla seremong ka 1918 nakong ya ge balaodi ba Mokgatlo wa Watch Tower ba be ba tswalelelwa kgolegong, gomme modiro o rulagantšwego wa boboledi wa nyaka o kgaotša. Ka nako yeo ba be ba nyakile ba ‘hwile.’ (Kutollo 11:2-7) Ke’ng seo se bego se bolelwa ke go ela tempele go Bakriste ba?
15. Go elwa ga tempele ya ponong go be go bolela’ng go batho ba Modimo mehleng ya Hesekiele?
15 Ngwageng wa 593 Pele ga Mehla ya Rena, e lego nywaga e 14 ka morago ga ge tempele kua Jerusalema e sentšwe, Hesekiele o ile a bona ntlo ya Jehofa ponong. O ile a tšeišwa leeto le letelele la go bona tempele ye gomme a bona ge se sengwe le se sengwe sa dikarolo tša yona di be di elwa ka kelohloko. (Hesekiele, dikgaolo 40–42) Se se be se bolela’ng? Jehofa ka noši o hlalositše gore: go elwa ga tempele go be go bolela teko go batho ba gabo Hesekiele. Ge e ba ba be ba ka ikokobetša, ba sokologa diphošong tša bona, gomme ba dumelelana le melao ya Jehofa, gona ba be ba tla botšwa meelo ya tempele. Se go molaleng gore se be se tla ba kgothaletša go holofela gore batho ba Jehofa ka letšatši le lengwe ba be ba tla lokollwa Babele gomme ba buša ba rapela Jehofa gape tempeleng ya gagwe ya kgonthe.—Hesekiele 43:10, 11.
16. (a) Go ela ga Johane tempele go be go kgonthišetša batho ba Modimo eng morago kua ka 1918? (b) Se se ile sa phethagatšwa bjang?
16 Ka mo go swanago, ge e ba Bakriste bao ba bego ba nyamile morago kua ka 1918 ba be ba ka ikokobetša gomme ba sokologa diphošong lege e le dife tša bona tšeo ba bego ba ile ba di dira, ba be ba tla lokollwa gore ba hwetše tšhegofatšo ya Jehofa gomme ba be le karolo e tletšego thulaganyong ya gagwe ya tempele. Se ke seo se ilego sa direga. Go ya ka Kutollo 11:11, ba ile ba ‘ema,’ goba ka tsela ya seswantšhetšo ba ile ba tsošwa. Tsogo e tswalanago le ye ponong ya Hesekiele e be e swantšhetša go bušetšwa ga ba-Juda nageng ya gabo bona. (Hesekiele 37:1-14) ‘Tsogo’ ye ya mehleng yeno e ile ya fetoga go tsošološwa ga batho ba Modimo boemong bja bona bja go nyama le bja go se dire selo, go ya boemong bja go ba mafolofolo bjo go bjona ba bego ba tla ba le karolo e tletšego tirelong ya Jehofa. ‘Tsogo’ e bjalo e diregile ka 1919.
Lengwalonyana
17. (a) Hlalosa pono ya Johane go Kutollo 10:1. (b) Morongwa yoo Johane a ilego a mmona e be e le mang, gomme ke letšatšing lefe moo pono e bego e tla phethagatšwa?
17 Go Kutollo 10:1, Johane o bone “Morongwa e moxolo yo matla à foloxa lexodimong à apere leru, hloxong ya xaxwe xò le molalatladi, sefahloxô sa xaxwe se le byalo ka letšatši, maoto a xaxwe à le byalo ka ‘kôkwane tša mollô.” Se se swana ka tsela e itšego le dipono tša Jehofa tšeo di bonwego nakong e fetilego ke Hesekiele le Johane ka noši. (Hesekiele 8:2; Kutollo 4:3) Eupja Johane mo o bone morongwa, e sego Jehofa. Ka gona e swanetše go ba e be e le Morwa o mogolo yo e lego morongwa wa Jehofa, Jesu Kriste, yoo e lego “Yêna seswantšhô sa Modimo e a sa bonwexo.” (Ba-Kolose 1:15) Go feta moo, Kutollo 10:2 e bontšha Jesu a eme boemong bja matla a magolo, ka “leoto la xaxwe la le letona a xata lewatlê, ka le lethsadi a xata lefase.” Ka gona morongwa o emela Jesu nakong ya letšatši la Morena.—Bona Psalme 8:4-8; Ba-Hebere 2:5-9.
18. (a) Ke’ng seo Johane a ilego a laelwa gore a se je? (b) Ponong e swanago, Hesekiele o ile a laelwa gore a je eng, gomme ka mafelelo afe?
18 Jesu sebopegong se se kgahlišago sa pono, o swere lengwalonyana ka seatleng sa gagwe gomme Johane o laelwa gore a tšee lengwalo a le je. (Kutollo 10:8, 9) Ka tsela ye, Johane o na le phihlelo yeo e swanago kudu le ya Hesekiele, yoo le yena a ilego a laelwa gore a je lengwalo la ponong. Tabeng ya Hesekiele, Jehofa ka noši o ile a nea moporofeta lengwalo, gomme Hesekiele o ile a bona gore “le ngwadilwe tša dillô le tša diphêxêlô le tša mahlomola.” (Hesekiele 2:8-10) Hesekiele o a bega: “Nna ka le ja, ka kwa lè le bose boka nose ka xanong.” (Hesekiele 3:3) Go ja lengwalo go be go bolela’ng go Hesekiele?
19. (a) Ke’ng seo se bego se emelwa ke go ja ga Hesekiele lengwalo? (b) Ke bomang bao ba bego ba tla amogela melaetša e babago yeo Hesekiele a bego a laetšwe gore a e bolele?
19 Go molaleng gore lengwalo le be le rwele tsebišo e buduletšwego ya boporofeta. Ge Hesekiele a jele lengwalo, o ile a amogela thomo ya go bolela tsebišo ye mo e lego gore e ile ya ba ya fetoga karolo ya gagwe. (Bapiša le Jeremia 15:16.) Eupja dikagare tša lengwalo e be e se tše bose go ba bangwe. Lengwalo le be le tletše “tša dillô le tša diphêxêlô le tša mahlomola.” Molaetša wo o babago e be e le wa bomang? Mathomong Hesekiele o ile a botšwa gore: “Ngwan’a motho! Sepela O yê xo ba moloko wa Isiraele, o ba botšê mantšu a-ka.” (Hesekiele 3:4) Ka morago, molaetša wa Hesekiele o ile wa katologa gore o akaretše ditšhaba tša baheitene tšeo di bego di ba dikologile.—Hesekiele, dikgaolo 25–32.
20. Ke’ng seo se ilego sa direga ge Johane a e-ja lengwalonyana, gomme ke’ng seo se ilego sa tlišwa ke go dira ga gagwe bjalo?
20 Tabeng ya Johane, mafelelo a go ja ga gagwe lengwalo e bile a swanago. O bega gore: “Ka tšea lengwalônyana leo seatleng sa Morongwa, ka le metša; mo xanong la ntsefêla wa dinose; ka re xo le metša la mpabiša mala.” (Kutollo 10:10) Go ja lengwalo go be go tsefela le Johane gape. E be e le mo go thabišago gore lentšu la Jehofa le fetoge karolo ya gagwe. Eupja molaetša o be o e-na le karolo e babago. E be e baba go bomang? Johane o ile a botšwa gore: “Sa xaxo e tlo ba xo buša xo porofetêla merafô le dithšaba le maleme le dikxoši tše ntši.”—Kutollo 10:11.
21. (a) Ke’ng seo Bakriste ba tloditšwego ba ilego ba se dira ka 1919 seo se bego se dumelelana le go ja ga Johane lengwalonyana, gomme ka mafelelo afe? (b) Mafelelo e bile afe go Bojakane le lefase ka kakaretšo?
21 Tše ka moka di ile tša phethagatšwa bjang nakong ya letšatši la Morena? Go ya ka ditherešo tša histori, morago kua ka 1919 Bakriste ba botegago ba ile ba amogela tokelo ya go direla Jehofa ka botlalo mo e lego gore go ile gwa fetoga karolo ya bona, gomme se se be se le bose e le ka kgonthe. Eupja tšhegofatšo ya bona le tokelo di ile tša ipontšha e le tše di babago go ba bangwe, kudu-kudu go baruti ba Bojakane. Ka baka la’ng? Ka gobane Bakriste ba ba tloditšwego ba botegago ka sebete ba ile ba goeletša molaetša wa Jehofa ka moka go batho. Ga se ba bolela feela “ditaba tše di lokilego tša mmušo” eupja ba ile ba pepentšha gape le boemo bja go hwa moyeng bja Bojakane le lefase ka kakaretšo.—Mateo 24:14, NW; Kutollo 8:1–9:21; 16:1-21.
22. (a) Ke ka tsela efe e kgolo yeo ka yona batlotšwa ba ilego ba dirišwa ke Jehofa nakong ya letšatši la Morena go fihlela ga bjale? (b) Letšatši la Morena le ile la bolela’ng go lefase la Sathane le go batho ba Modimo?
22 Sehlopha se se se botegago sa Bakriste se ile sa dirišwa ke Jehofa go kgoboketša ba mafelelo ba ba 144 000 gore ba swawe, gomme ba etelela pele go kgoboketšwa ga lešaba le legolo, leo le nago le kholofelo ya lefaseng. (Kutollo 7:1-4, 9, 10) Lešaba le le legolo le na le karolo e bohlokwa mererong ya Jehofa ka lefase le, gomme ponagalo ya lona e tlišitše lethabo le legolo legodimong gotee le mo lefaseng. (Kutollo 7:11-17; Hesekiele 9:1-7) Ka gona ‘letšatši le le le phalago matšatši ohle’ le šetše le boletše tlaišo go lefase la Sathane eupja la bolela ditšhegofatšo tše humilego go batho ba Jehofa. Bjale anke re bone kamoo se se tlago go ba sa therešo ka gona ge letšatši la Morena le dutše le tšwela pele.
Na o ka Hlalosa?
◻ Letšatši la Morena ke eng?
◻ Ke karolo efe ya go senya yeo “dibata tša naxa” di bago le yona nakong ya letšatši la Morena?
◻ Ke kgonthišetšo efe yeo Jehofa a ilego a e nea ka go ela ga Johane sekgethwa sa tempele?
◻ Go ja ga Johane lengwalonyana go ile gwa bolela’ng go mašaledi a tloditšwego ka 1919?
◻ Go fihlela ga bjale, letšatši la Morena le boletše’ng go batho ba Modimo le go lefase ka kakaretšo?
[Seswantšho go letlakala 13]
Go ela ga Johane tempele go ile gwa nea tiišetšo go batlotšwa letšatšing la Morena