Therešo Mabapi le Barongwa

Gantši go tlwaelana le motho yo mongwe go akaretša go ithuta se sengwe ka lapa la gabo. Go bjalo le ka go tseba Jehofa Modimo. Go akaretšwa mo gontši go feta go fo ithuta leina la gagwe. Re swanetše go tseba se sengwe le ka “lapa” la gagwe legodimong. (Bapiša le Ba-Efeso 3:14, 15.) Beibele e bitša barongwa gore ke “barwa” ba Modimo. (Jobo 1:6) Ge re seka-seka karolo ya bona e bohlokwa ka Beibeleng, re swanetše go nyaka go tseba mo gontši ka bona gore re kwešiše lefelo la bona morerong wa Modimo.

SETŠO se sefsa se a tšwelela. Ga se feela gore batho ba bantši ba bolela gore ba dumela go barongwa; palo e oketšegago e bolela gore e ile ya kgongwa ke bona ka tsela e itšego. Ge ma-Amerika a 500 a be a botšišwa gore, “Na wena ka noši o kile wa kwa go ba gona ga barongwa bophelong bja gago?” mo e nyakilego go ba tee-tharong e arabile ka go re ee. Se sengwe se se makatšago ke palo ya bafsa bao ba ipolelago gore ba dumela go barongwa—go ya ka nyakišišo e nngwe kua United States, ke 76 lekgolong e tletšego! Go molaleng gore batho ba kgahlegela barongwa. Eupša kgopolo ya gona bjale mabapi le barongwa e dumelelana bjang le therešo ya Beibele?

Go Hlokomologa Karolo ya Sathane

Ge re bolela ka barongwa, ga se ra swanela go hlokomologa barongwa ba kgopo bao e lego dibopiwa tša legodimong tšeo Beibele e rego di rabetše malebana le Modimo. Wa pele go ba ke Sathane. Puku e tumilego kudu yeo e bitšwago Ask Your Angels e bolela gore Sathane ke feela “karolo ya Modimo” yeo e thušago batho go matlafatša “digoba tša bona tša moya” ka teko e sa kgaotšego. Mongwadi o bolela gore go sa šetšwe “maikemišetšo a lerato” a Sathane, o ile a tswalanywa ka phošo le bokgopo nywaga-kgolong ka moka. Ba oketša ka gore Sathane le Jesu “le ge ba sa tlatšane ka botlalo, bonyenyane ba ka lehlakoreng le tee e le ditho tše kopanego tša motho o tee.” Tše ke dipolelo tše di tlabago, eupša Beibele e re’ng?

Beibele e bolela ka mo go kwalago gore Sathane ga se “karolo ya Modimo” eupša ke lenaba la Modimo. (Luka 10:18, 19; Ba-Roma 16:20) O hlohla bogoši bja Jehofa, gomme maikemišetšo a gagwe ka batho ga se “a lerato” le gatee. O tšhollela ka ntle le kwelo-bohloko bogale bja gagwe godimo ga bahlanka ba Modimo ba lefaseng. O ba bega pele ga Modimo mosegare le bošego!a (Kutollo 12:10, 12, 15-17) Sathane o ikemišeditše go ba senya go sa šetšwe se se ka diregago. Go tlaiša ga gagwe Jobo monna wa moloki ka go hloka kgaugelo go utolotše kgopolo ya gagwe e se nago kwelo-bohloko ka tlaišego ya batho.—Jobo 1:13-19; 2:7, 8.

Go e na le go ba “ka lehlakoreng le tee,” Sathane le Jesu ke ba ganetšanago ka mo go feletšego. Ee, ga go pelaelo gore ke Sathane yo a ilego a tutueletša Herode go ntšha taelo ya polao e kgolo ya bana—sohle se dirwa e le boiteko bja go bolaya ngwana yo monyenyane Jesu! (Mateo 2:16-18) Le gona ditlhaselo tše sa kgaotšego tša Sathane di ile tša tšwela pele go ba go fihla lehung la Jesu. (Luka 4:1-13; Johane 13:27) Ka go rialo, go e na le go ba “ditho tše kopanego tša motho o tee,” Jesu le Sathane ba fapane ka mo go feletšego. Boporofeta bja Beibele bo bontšha gore bonaba bja bona ke bjo bo sa phemegego. (Genesi 3:15) Ka mo go swanetšego, ke Jesu yo a tsošitšwego yo a tlago go fediša Sathane ka nako e swanetšego ya Modimo.—Kutollo 1:18; 20:1, 10.

Dithapelo di ya go Mang?

Baboleledi ba bangwe ba mokgatlo wa barongwa ba kgothaleletša go naganišiša le mekgwa e mengwe e le gore go boledišanwe le barongwa. Puku e nngwe e re: “Kgopelo ya potego ya go ikopanya le setho le ge e le sefe sa lapa la legodimong e ka se ke ya hlokomologwa. Kgopela gomme o tla arabja.” Mikaele, Gabariele, Uriel le Raphael ba gare ga barongwa bao puku e kgothaletšago gore go ikopanywe le bona.b

Lega go le bjalo, Jesu o rutile balatedi ba gagwe gore ba rapele Modimo, e sego barongwa. (Mateo 6:9, 10) Ka mo go swanago, Paulo o ngwadile gore: “Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô.” (Ba-Filipi 4:6, mongwalo o sekamego ke wa rena.) Ka gona, Bakriste dithapelong tša bona ga ba batamele motho le ge e le mang ka ntle le Jehofa, gomme ba dira bjalo ka leina la Jesu Kriste.c—Johane 14:6, 13, 14.

Na Barongwa ga ba na Bodumedi bjo bo Rulagantšwego?

Go ya ka Eileen Elias Freeman yo a okametšego AngelWatch Network, “barongwa ba phagame go feta bodumedi bjo bongwe le bjo bongwe, filosofi e nngwe le e nngwe le tumelo e nngwe le e nngwe. Ge e le gabotse, barongwa ga ba na bodumedi bjalo ka ge re tseba.”

Lega go le bjalo, Beibele e bolela ka mo go kwalago gore barongwa ba botegago ba na le bodumedi; ba rapela Modimo wa therešo Jehofa yo a sa kgotlelelego go phenkgišana le medimo e mengwe. (Doiteronomio 5:6, 7; Kutollo 7:11) Ka go rialo, morongwa yo bjalo o ile a itlhalosa go moapostola Johane e le “mohlanka” gotee le bao ba kwago melao ya Modimo. (Kutollo 19:10) Ka Beibeleng ga go na moo re balago ka barongwa ba botegago ba phagamiša sebopego le ge e le sefe se sengwe sa borapedi. Ba nea Jehofa boineelo bjo bo feletšego.—Ekisodo 20:4, 5.

“Rra-xo-moaketši”

Makga a mantši ao go thwego ke a go gahlana le barongwa a akaretša go boledišana le bahu. Mosadi yo a bitšwago Elise o bolela ka morago ga ge a amogetše seo a bego a nagana gore ke pontšho gore: “Ke ile ka ba le maikwelo a gore malome o be a hweditše tsela ya go mphihlelela le go ntsebiša gore o be a thabile mafelelong.” Terri ka mo go swanago o gopola mogwera yo a rategago yo a hwilego. O re: “Beke ka morago ga poloko, o ile a tla go nna go seo ke ilego ka nagana gore ke toro. O ile a mpotša gore ga ke a swanela go hlokofalela lehu la gagwe ka gobane o be a thabile e bile a e-na le khutšo.”

Eupša Beibele e bolela gore bahu “ga ba tsebe selo.” (Mmoledi 9:5, PK) Gape e bolela gore ge motho a e-hwa, “mohla woo ké mo xo fêlaxo maanô a motho.” (Psalme 146:4, mongwalo o sekamego ke wa rena.) Lega go le bjalo, Sathane ke “rra-xo-moaketši.” (Johane 8:44) Ke yena a thomilego maaka a gore moya wa motho o phologa lehu. (Bapiša le Hesekiele 18:4, PK.) Batho ba bantši lehono ba dumela se, e lego seo se swanelago morero wa Sathane ka gobane se ganetša go nyakega ga go ba le tumelo tsogong—e lego thuto ya motheo ya Bokriste. (Johane 5:28, 29) Ka gona, go botšiša bahung goba seo se bonalago e le go amogela melaetša e tšwago go bona ke sebopego se sengwe gape sa mokgatlo wa barongwa seo se sa amogelwego ke Modimo.

Na ke go Batamela Barongwa Goba Batemona?

Karolo e kgolo ya mokgatlo wa barongwa e diriša boloi. Ela hloko phihlelo ya Marcia. O re: “Go tloga ka September go ya go December 1986, ke ile ka thoma go amogela melaetša e tšwago ‘ka mošola wa karolo ya boraro.’ Ke be ke bona diriti ke bile ke lora ditoro tše di boifišago tša ‘bophelo bja nakong e fetilego.’ Ke ile ka ikopanya le bagwera bao ba hwilego gomme ka ba le dipono tše dingwe tše dintši tšeo go tšona ke bego ke tseba dilo tše di lego mabapi le batho bao ke bego ke sa tšwa go kopana le bona. Gape ke ile ka šegofatšwa ka mpho ya go ngwala ka ntle le go itemoga gotee le go fetiša melaetša e tšwago go diphedi tša moya. Ba bangwe bao le ka mohla ke bego ke se ka ka ka gahlana le bona bophelong bja bona bja lefaseng ba be ba fetišetša melaetša go ba bangwe ka nna.”

Go diriša bonoge e le tsela ya go “boledišana” le barongwa ga se mo go sa tlwaelegago. Mothopo o mongwe wa tsebišo o kgothaletša babadi ba wona ka go lebanya gore ba diriše mafsika a maleatlana, dikarata tša tarot, ditšhelete tša tšhipi tša I Ching, go laola ka methalo ya diatla le bolepi bja dinaledi. Bangwadi ba ngwala gore: “Dumelela bowena bja ka gare go go lebiša go mmaditsela yo a nepagetšego wa meoya gomme o holofele gore morongwa o tla gahlana le wena moo.”

Lega go le bjalo, go ya ka Beibele selo le ge e le sefe se se ‘gahlanago le wena moo’ ruri ga se yo mongwe wa barongwa ba Modimo. Ka baka la’ng? Ka gobane bonoge bo ganetšana ka go lebanya le Modimo, ka gona barapedi ba therešo—legodimong le lefaseng—ga ba bo diriše. Ee, Isiraeleng bonoge e be e le molato o swanelwago ke kotlo ya lehu! Molao o itše: “Ba ba diraxo tše byalo, Morêna ó bôna e le makxapa.”—Doiteronomio 13:1-5; 18:10-12.

“Morongwa wa Seetša”

Ga se gwa swanela go re makatša gore Diabolo a ka kgona go dira bonoge gore bo bonale bo hola, gaešita le go ba le thekgo ya barongwa. Beibele e bolela gore Sathane “ó ikxanthša a itira Morongwa wa seetša.” (2 Ba-Korinthe 11:14) A ka ba a dira le dipontšho tša bofora tša ditiragalo tše di tlago ke moka a dira gore e phethagale, a fora babogedi gore ba nagane gore pontšho e tšwa go Modimo. (Bapiša le Mateo 7:21-23; 2 Ba-Thesalonika 2:9-12.) Eupša mediro ka moka ya Sathane—go sa šetšwe kamoo e ka bonalago e le e lokilego goba e le e mebe ka gona—e phetha o mongwe wa merero e mebedi: go dira gore batho ba furalele Jehofa goba go fo foufatša dikgopolo tša bona e le gore “ba se bônêxêlwê ke lebônê la Ebangedi ya letaxô la Kriste.” (2 Ba-Korinthe 4:3, 4) Mokgwa wo o boletšwego mafelelong wa go fora ke o atlegago gantši.

Ela hloko pego ya Beibele ya ngwanenyana wa molata wa lekgolong la pele la nywaga. Dipolelelo-pele tša gagwe di be di humiša beng ba gagwe kudu. O ile a latela barutiwa ka matšatši a mantši a bolela gore: “Batho bá ké bahlanka ba Modimo Yo xodimo-dimo; ké bôná ba Le tsebišaxo tsela ya phološô.” Mantšu a gagwe e be e le a therešo. Lega go le bjalo, pego e re botša gore o be a sa dirišwe ke morongwa, eupša o be a dirišwa ke “môya wa bonoxê.” Mafelelong, Paulo “a retoloxa, a bolêla le môya woo, a re: Ke Xo laêla ka Leina la Jesu Kriste ke re: Tšwaa xo motho é! Môya woo wa tloxa ka lôna lebaka leo.”—Ditiro 16:16-18.

Ke ka baka la’ng Paulo a ile a leleka moya wo? Godimo ga moo o be o tlišetša beng ba ngwanenyana yo a dirišwago ke batemona ditseno tše dintši. Ka matla a phagametšego a tlhago, ngwanenyana wa molata a ka ba a ile a botša balemi nako yeo ba swanetšego go bjala ka yona, le nako yeo dikgarebe di ka nyalwago ka yona, gomme ba tša meepo a ba botša moo ba ka nyakago gauta gona. Ee, moya wo o ile wa ba wa tutuetša ngwanenyana go bolela mantšu a therešo a reta barutiwa phatlalatša!

Lega go le bjalo, e be e le “môya wa bonoxê.” Ka baka leo, o be o se na tshwanelo ya go dira dikgoeletšo ka Jehofa le tokišetšo ya gagwe ya phološo. Polelo ya wona ya theto yeo mohlomongwe e bego e bolelwa bakeng sa go dira gore dipolelelo-pele tša ngwanenyana di dumelwe e ile ya dira gore babogedi ba hlokomologe balatedi ba therešo ba Kriste. Ka lebaka le kwalago, Paulo o ile a lemoša Ba-Korinthe gore: “Le ka se kxône xo ba ba xo abêlwa moxopo wa Morêna, la tla la abêlwa le moxopo wa diriti.” (1 Ba-Korinthe 10:21) Ka mo go sa makatšego, Bakriste ba lekgolong la pele la nywaga ba ile ba senya dipuku tša bona ka moka tšeo di bego di tswalana le bonoge.—Ditiro 19:19.

‘Morongwa yo a Fofago Gare ga Legodimo’

Bjalo ka ge re bone, Beibele e pepentšha karolo e kgolo ya ditiro tša mokgatlo wa gona bjale wa barongwa e le wo o kgokaganego kudu le Lenaba la Modimo, Sathane Diabolo. Na se se bolela gore barongwa ba bakgethwa ga ba akaretšwe ditabeng tša batho? Ka mo go fapanego, mo nakong ye ba dira modiro o matla lefaseng. Ke modiro ofe? Gore re arabe, re swanetše go hlahloba puku ya Beibele ya Kutollo. Barongwa ba bolelwa ka makga a mantši kudu ka pukung ye go feta ka pukung le ge e le efe e nngwe ya Beibele.

Go Kutollo 14:6, 7, re bala pego ya moapostola Johane ya pono ya boporofeta yeo a e amogetšego: “Ka bôna Morongwa e mongwê à fofa xare xa lexodimo à swere Ebangedi ya neng le neng ya xo tsebišwa ba ba axilexo lefaseng, dithšaba tšohle le meloko yohle, le maleme ohle le merafô yohle; a bolêla ka lentšu le lexolo, a re: Boifang Modimo Le rêtê Yêna, xobane nakô ya kahlolô ya xaxwe e tlile. Le khunamêlê Yêna E a dirilexo lexodimo le lefase le lewatlê le didiba tša meetse.”

Lengwalo le le gatelela modiro o mogolo kudu wa barongwa lehono. Ba swaregile kabelong e tlago pele-pele—e lego ya go tsebatša ditaba tše di lokilego tša Mmušo wa Modimo. E be e le mabapi le modiro wo ge Jesu a be a holofetša balatedi ba gagwe gore: “Ke na le lena ka mehla xo fihla bofelong bya lefase.” (Mateo 28:18-20) Jesu o na le balatedi ba gagwe bjang? Tsela e nngwe ke ka go ba nea thušo ya barongwa e le gore modiro wo o mogolo o phethwe.

Dihlatse tša Jehofa di fetša diiri tše fetago dimilione tše sekete ka ngwaga di bolela ditaba tše di lokilego tša Mmušo wa Modimo. Ge di dutše di phetha modiro wo, di bona bohlatse bja tlhahlo ya barongwa. Bodireding bja tšona bja ntlo le ntlo, go ile gwa direga gantši gore di gahlane le batho bao ba bego ba sa tšwa go rapelela gore motho yo mongwe a tle a ba thuše go kwešiša merero ya Modimo. Tlhahlo ya barongwa gotee le go gata mogato pele ga Dihlatse ka noši, e feleleditše ka gore ba dikete tše makgolo ba tsebe Jehofa ngwageng o mongwe le o mongwe!

Na o theetša morongwa yo a fofago gare ga legodimo? Ge Dihlatse tša Jehofa di etela, ke ka baka la’ng o sa boledišane le tšona ka botlalo ka molaetša wo wa barongwa?

[Mengwalo ya tlase]

[Lepokisi go letlakala 8]

BARONGWA KE BOMANG?

GO FAPANA le seo ba bantši ba se dumelago, barongwa ga se meoya e tšwilego ya batho bao ba hwilego. Beibele e bolela ka mo go kwalago gore bahu “ga ba tsebe selo.” (Mmoledi 9:5, PK) Ka gona, barongwa ba be ba e-tšwa kae? Beibele e bontšha gore yo mongwe le yo mongwe wa bona o bopilwe ke Modimo pele lefase le thewa. (Jobo 38:4-7) Bogolo bja lapa la Modimo la legodimong e ka ba la ba dimilione tše makgolo, mohlomongwe ba dimilione tše dikete goba go feta moo! Barongwa ba bangwe ba ile ba tlatša Sathane borabeleng bja gagwe.—Daniele 7:10; Kutollo 5:11; 12:7-9.

Ka ge Jehofa e le Modimo wa thulaganyo, ga go makatše gore lapa la gagwe le legolo la barongwa le na le thulaganyo.—1 Ba-Korinthe 14:33.

• Morongwa yo a fetago bohle bobedi ka matla le ka taolo, ke morongwa yo mogolo Jesu Kriste, yoo gape a bitšwago Mikaele. (1 Ba-Thesalonika 4:16; Juda 9) Barongwa-batuki, bakerubi le barongwa ba ka tlase ga taolo ya gagwe.

• Barongwa-batuki ba dikologile sedulo sa bogoši sa Modimo. Go molaleng gore kabelo ya bona e akaretša go tsebatša bokgethwa bja Modimo le go boloka batho ba gagwe ba hlwekile.—Jesaya 6:1-3, 6, 7.

• Bakerubi le bona ba bonwa ba le pele ga Jehofa. Bjalo ka barwadi goba bafelegetši ba sedulo sa bogoši sa Modimo, ba phagamiša bogolo bja Jehofa.—Psalme 80:1; 99:1; Hesekiele 10:1, 2.

• Barongwa (se se bolelago “baromiwa”) ke baemedi le batseta ba Jehofa. Ba phetha thato ya Modimo go sa šetšwe ge e ba e akaretša go phološwa ga batho ba Modimo goba go fedišwa ga ba kgopo.—Genesi 19:1-26.

[Pictures on page 7]

Na o theetša morongwa yo a fofago gare ga legodimo?