Kgaolo 32

Bogale bja Modimo bo Fihla Pheletšong

1. Go tla ba go diregile’ng ge merufsi e šupago e tšholotšwe go fihla pheletšong, gomme ke dipotšišo dife tšeo bjale di rotogago mabapi le merufsi?

JOHANE o šetše a boletše ka barongwa bao ba romilwego go tšholla merufsi e šupago. O re go rena “ke tša mafelelo gobane ka tšona bogale bja Modimo bo fihla pheletšong.” (Kutollo 15:1; 16:1) Dikotlo tše tšeo di utollago dithibelo tša Jehofa tšeo di tlišwago ka baka la bokgopo bjo bo lego lefaseng, di swanetše go tšhollwa go fihla pheletšong. Ge di fetile, dikahlolo tša Modimo di tla ba di phethilwe. Lefase la Sathane le ka se sa hlwa le e-ba gona! Dikotlo tše di bolela’ng go batho le go babuši ba tshepedišo ya gona bjale e mpe? Bakriste ba ka phema bjang go otlwa gotee le lefase le le le ahlotšwego? Tše ke dipotšišo tše bohlokwa gomme bjale di tla arabja. Bohle bao ba ratago gore toka e fenye ba tla thabela kudu se se latelago seo Johane a se bonago.

Bogale bja Jehofa “Lefaseng”

2. Ke’ng seo se tšweletšwago ke go tšhollela ga morongwa wa pele morufsi wa gagwe lefaseng, gomme ke’ng seo se swantšhetšwago ke ‘lefase’?

² Morongwa wa pele o thoma modiro! “Wa pele a ya gomme a tšhollela morufsi wa gagwe lefaseng. Batho bao ba bego ba e-na le leswao la sebata le bao ba bego ba rapela seswantšho sa sona ba tšwa sešo se bohloko se bolayago.” (Kutollo 16:2) Go swana le tabeng ya go letšwa ga phalafala ya pele, ‘lefase’ mo le swantšhetša tshepedišo ya bopolitiki yeo e bonalago e tiile ye Sathane a thomilego go e aga mo lefaseng morago kua mehleng ya Nimirode, nywageng e fetago 4 000 e fetilego.—Kutollo 8:7.

3. (a) Mebušo e mentši e nyakile bjang seo se lekanago le borapedi go balata ba yona? (b) Ke eng seo ditšhaba di se tšweleditšego e le seo se tšeelago Mmušo wa Modimo sebaka, gomme mafelelo ke afe go bao ba rapelago seo?

³ Mehleng ye ya bofelo mebušo e mentši e ile ya nyaka seo se lekanago le borapedi go balata ba yona, gomme ya phegelela gore Mmušo o swanetše go phagamišwa go feta Modimo goba selo le ge e le sefe seo o ka se botago. (2 Timotheo 3:1; bapiša le Luka 20:25; Johane 19:15.) Ga e sa le go tloga ka 1914 e bile mo go tlwaetšwego gore ditšhaba di ngwadišetše bafsa ba tšona go tsenela tša bohlabani e le gore ba kgone go lwa, goba gore e be bao ba loketšego go lwa, e lego go lwa ntwa ya kgonthe yeo e thankgeditšego pego ya histori ya mehleng yeno ka madi. Nakong ya letšatši la Morena ditšhaba di tšweleditše seswantšho sa sebata, e lego Kgwerano ya Ditšhaba le mohlatlami wa yona e lego Ditšhaba tše Kopanego e le tšeo di tšeelago Mmušo wa Modimo sebaka. A thogako e kaakang go bolela gore mokgatlo wo wo o hlamilwego ke batho ke kholofelo e nnoši ya ditšhaba ya khutšo go etša ge go boletše bo-mopapa ba morago bjale! O ganetša Mmušo wa Modimo ka matla. Bao ba o rapelago ba šilafala moyeng, gomme ba tšwa dišo go swana le ge Baegipita bao ba bego ba ganetša Jehofa mehleng ya Moše ba ile ba otlwa ka go tšwa dišo tša kgonthe.—Ekisodo 9:10, 11.

4. (a) Dikagare tša morufsi wa pele wa bogale bja Modimo di gatelela’ng ka matla? (b) Jehofa o lebelela bjang bao ba amogelago leswao la sebata?

⁴ Dikagare tša morufsi wo di gatelela ka matla kgetho yeo e lego ka pele ga batho. Ba swanetše go tlaišwa ke go se amogelwe ke lefase goba ke bogale bja Jehofa. Batho ba gapeleditšwe go amogela leswao la sebata, ka morero wa gore “go se be le yo a kgonago go reka goba go rekiša ka ntle le motho yo a nago le leswao, leina la sebata goba palo ya leina la sona.” (Kutollo 13:16, 17) Eupša ba tla buna moputso wa se! Jehofa o lebelela bao ba amogelago leswao e le bao ba otlilwego ka “sešo se bohloko se bolayago.” Ga e sa le go tloga ka 1922 ba ile ba swawa phatlalatša e le bao ba furaletšego Modimo yo a phelago. Maano a bona a bopolitiki ga a atlege, gomme ba tlalelong. Ba šilafetše moyeng. Ka ntle le ge ba ka sokologa, bolwetši bjo bjo “bohloko” e tla ba bjo bo išago lehung, ka gobane bjale ke letšatši la Jehofa la kahlolo. Ga go na boema-gare magareng ga go ba karolo ya tshepedišo ya dilo ya lefase le go direla Jehofa o le ka lehlakoreng la Kriste wa gagwe.—Luka 11:23; bapiša le Jakobo 4:4.

Lewatle le Fetoga Madi

5. (a) Go direga’ng ge morufsi wa bobedi o tšhollwa? (b) Jehofa o lebelela bjang bao ba dulago lewatleng la seswantšhetšo?

⁵ Morufsi wa bobedi wa bogale bja Modimo bjale o swanetše go tšhollwa. Se se tla bolela’ng go batho? Johane o re botša gore: “Wa bobedi a tšhollela morufsi wa gagwe lewatleng. La fetoga madi a bjalo ka a mohu, gomme gwa hwa moya o mongwe le o mongwe o phelago, ee, dilo tše di lego ka lewatleng.” (Kutollo 16:3) Ka go swana le go letšwa ga phalafala ya bobedi, morufsi wo o lebišitšwe “lewatleng,” e lego batho ba bantši bao ba bilokanago, ba borabele le bao ba furaletšego Jehofa. (Jesaya 57:20, 21; Kutollo 8:8, 9) Mahlong a Jehofa, ‘lewatle’ le le swana le madi, gomme ke leo le se la swanelwago ke gore diphedi di dule go lona. Ke ka baka leo Bakriste ba sego ba swanela go ba karolo ya lefase. (Johane 17:14) Go tšhollwa ga morufsi wa bobedi wa bogale bja Modimo go utolla gore batho ka moka bao ba lego ka lewatleng le ba hwile mahlong a Jehofa. Ka lebaka la molato wa setšhaba, batho ba na le molato wa go tšholla madi a mantši o šoro a batho bao ba se nago molato. Ge letšatši la bogale bja Jehofa le fihla, ba tla hwa e le ka kgonthe diatleng tša madira a gagwe ao a tlago go phetha kahlolo.—Kutollo 19:17, 18; bapiša le Baefeso 2:1; Bakolose 2:13.

Go ba Nea Madi Gore ba nwe

6. Go direga’ng ge morufsi wa boraro o tšhollwa, gomme ke mantšu afe ao a kwewago a e-tšwa go morongwa le aletareng?

⁶ Morufsi wa boraro wa bogale bja Modimo ka go swana le go letšwa ga phalafala ya boraro, o kgoma methopo ya meetse a sekilego. “Wa boraro a tšhollela morufsi wa gagwe dinokeng le methopong ya meetse. Tša fetoga madi. Ka kwa morongwa yo a lego godimo ga meetse a re: ‘Wena, Yo a lego gona le yo a bego a le gona, Mmotegi, o lokile, gobane o dirile diphetho tše, gobane ba tšholotše madi a bakgethwa le a baporofeta, o ba neile madi gore ba a nwe. Ba swanelwa ke se.’ Ka kwa aletare e re: ‘Ee, Jehofa Modimo, Ra-matla-ohle, diphetho tša gago tša boahlodi ke tša therešo le tša go loka.’”—Kutollo 16:4-7.

7. ‘Dinoka le methopo ya meetse’ di swantšhetša’ng?

⁷ ‘Dinoka tše le methopo ya meetse’ di swantšhetša seo se bitšwago methopo e mebotse ya tlhahlo le bohlale yeo e amogelwago ke lefase le, go swana le difilosofi tša bopolitiki, tša boiphedišo, tša thutamahlale, tša thuto, tša leago le tša bodumedi tšeo di hlahlago ditiro le diphetho tša batho. Batho go e na le go lebelela go Jehofa, Mothopo wa bophelo, bakeng sa therešo yeo e neago bophelo ruri ba ‘fatile didiba tša bona tša go gopa’ gomme ba nwa kudu ‘bohlale bja lefase le bjo Modimo a bo bonago e le bošilo.’—Jeremia 2:13; 1 Bakorinthe 1:19; 2:6; 3:19; Psalme 36:9.

8. Batho ba ithwešitše molato wa madi ka ditsela dife?

⁸ “Meetse” a bjalo a šilafetšego a dirile gore batho ba be le molato wa madi, ka mohlala, ka go ba kgothaletša gore ba tšholle madi ka tekanyo e kgolo kudu dintweng, tšeo lekgolong la nywaga le le fetilego di bolailego batho ba fetago dimilione tše lekgolo. Batho ba ile ba “kxanyêla xo thšolla madi a se naxo molato,” kudu-kudu Bojakaneng moo dintwa tše pedi tša lefase di thomilego gona, gomme se se akareditše madi a dihlatse tša Modimo. (Jesaya 59:7; Jeremia 2:34) Le gona batho ba ithwešitše molato wa madi ka go diriša gampe ga bona madi a mantši kudu bakeng sa tšhelo ya madi, e le ge ba roba melao ya Jehofa ya go loka. (Genesi 9:3-5; Lefitiko 17:14; Ditiro 15:28, 29) Tabeng ye, ba šetše ba bunne masetlapelo ka go ata ga AIDS, bolwetši bja sebete le malwetši a mangwe ka baka la tšhelo ya madi. Moputso o tletšego wa dibopego ka moka tša go ba le molato wa madi o tla tla kapejana ge bafoši ba hwetša kotlo e tšwago godimo, gomme ba gatakelwa “segatelong sa morara se segolo sa bogale bja Modimo.”—Kutollo 14:19, 20.

9. Go tšhollwa ga morufsi wa boraro go akaretša’ng?

⁹ Mehleng ya Moše, ge Noka ya Nile e be e fetolwa madi, Baegipita ba ile ba kgona go tšwela pele ba phela ka go nyaka methopo e mengwe ya meetse. (Ekisodo 7:24) Lega go le bjalo, lehono nakong ya kotlo ya moya ga go na lefelo leo go lona batho ba ka hwetšago meetse a neago bophelo lefaseng le la Sathane. Go tšhollwa ga morufsi wo wa boraro go akaretša go bolela gore ‘dinoka le methopo ya meetse’ tša lefase di swana le madi, gomme di tliša lehu la moya go bohle bao ba nwago meetse a tšona. Ka ntle le ge batho ba ka retologela go Jehofa, ba tla hwetša kahlolo ya gagwe e sehlogo.—Bapiša le Hesekiele 33:11.

10. “Morongwa yo a lego godimo ga meetse” o tsebatša’ng, gomme ke bohlatse bofe bjoo “aletare” e bo oketšago?

¹⁰ “Morongwa yo a lego godimo ga meetse,” e lego morongwa yo a tšhollelago morufsi wo meetseng, o godiša Jehofa e le Moahlodi wa Legohle, yo dikahlolo tša gagwe tša go loka di sekilego. Ka gona, o bolela ka kahlolo ye gore: “Ba swanelwa ke se.” Ka ntle le pelaelo morongwa ka noši o bone go tšhollwa mo gontši ga madi le ditiro tša sehlogo tšeo dithuto tša maaka le difilosofi tša lefase le le lebe di di tutueleditšego nywageng e dikete. Ka gona, o tseba gore kahlolo ya Jehofa ke e nepagetšego. Gaešita le “aletare” ya Modimo e hlatsela se. Go Kutollo 6:9, 10, go bolelwa ka meoya ya bao ba ilego ba bolaelwa tumelo e le ka tlase ga aletare yeo. Ka gona “aletare” e nea bohlatse bjo matla bjo bo oketšegilego bja dikahlolo tša Jehofa tša toka le tša go loka.a Ruri ke mo go swanetšego gore bao ba tšholotšego madi a mantši gakaakaa le go a diriša gampe ba a nwešwe ka kgapeletšo, e le go swantšhetša go ahlolelwa ga bona lehu ke Jehofa.

Go Fiša Batho ka Mollo

11. Morufsi wa bone wa bogale bja Modimo o hlasela’ng, gomme go direga’ng ge o tšhollwa?

¹¹ Morufsi wa bone wa bogale bja Modimo o hlasela letšatši. Johane o re botša gore: “Wa bone a tšhollela morufsi wa gagwe letšatšing; gomme letšatši la dumelelwa gore le fiše batho ka mollo. Batho ba fišwa ke phišo e kgolo, eupša ba roga leina la Modimo yo a nago le matla godimo ga dikotlo tše, gomme ba se ke ba itshola e le gore ba mo nee letago.”—Kutollo 16:8, 9.

12. ‘Letšatši’ la lefase le ke’ng, gomme letšatši le la seswantšhetšo le newa’ng?

¹² Lehono, bofelong bja tshepedišo ya dilo, bana babo Jesu ba moya ba “taga bjalo ka letšatši mmušong wa Tatago bona.” (Mateo 13:40, 43) Jesu ka noši ke “’tšatši la tokô.” (Maleaki 4:2) Lega go le bjalo, batho ba na le “letšatši” la bona ka noši, e lego babuši ba bona ka noši bao ba lekago go taga ka go lwantšhana le Mmušo wa Modimo. Go letšwa ga phalafala ya bone go boletše gore ‘letšatši, kgwedi le dinaledi’ tšeo di lego magodimong a Bojakane e tloga e le methopo ya lefsifsi, e sego ya seetša. (Kutollo 8:12) Morufsi wa bone wa bogale bja Modimo bjale o bontšha gore “letšatši” la lefase le be le tla fiša wa go se kgotlelelege. Bao go lebelelwago go bona e le baetapele bao ba swanago le letšatši ba tla ‘fiša’ batho. Se se tla newa letšatši la seswantšhetšo. Ka mantšu a mangwe, Jehofa o tla dumelela se e le karolo ya kahlolo ya gagwe yeo e fišago bjalo ka mollo bathong. Go fišwa mo go diregile ka tsela efe?

13. Babuši bao ba swanago le letšatši ba lefase le ba ‘fišitše’ batho bjang?

¹³ Ka morago ga ntwa ya pele ya lefase, babuši ba lefase le ba ile ba bopa Kgwerano ya Ditšhaba ka boiteko bja go rarolla mathata a tšhireletšego ya lefase, eupša se se ile sa palelwa. Ka gona go ile gwa lekwa mehuta e mengwe ya mebušo, go swana le mmušo wa Bofasi le wa Bonazi. Bokomanisi bo ile bja tšwela pele bo gola. Go e na le go kaonefatša dilo tšeo di tshwenyago batho, babuši bao ba swanago le letšatši ditshepedišong tše ba ile ba thoma go ‘fiša batho ka phišo e kgolo.’ Dintwa tša selegae kua Sepania, Ethiopia le Manchuria di ile tša baka ntwa ya bobedi ya lefase. Histori ya mehleng yeno e bega gore Mussolini, Hitler le Stalin ka ge e le babuši ba dinkgwete ba ile ba ikarabelela ka go lebanya le ka go se lebanye ka mahu a batho ba dimilione tše dintši, go akaretša le batho ba bantši ba ditšhaba tša bona. Dintwa tša ditšhaba-tšhaba goba tša selegae gona bjale di ‘fišitše’ batho ba dinaga tša go etša Vietnam, Kampuchea, Iran, Lebanon le Ireland gotee le dinaga tša kua Latin America le Afrika. Go okeletša go tšona go na le ntwa yeo e dutšego e tšwela pele magareng ga mebušo e megolo, yeo dibetša tša yona tša nuclear tše boifišago o šoro di ka kgonago go fiša batho ka moka lore-lore. Mehleng ye ya bofelo, batho ba lebane le ‘letšatši’ le le fišago o šoro, e lego babuši ba bona bao ba sa lokago. Go tšhollwa ga morufsi wa bone wa bogale bja Modimo go tšweleditše ka go lebanya ditherešo tše tša histori, gomme batho ba Modimo ba di boletše lefaseng ka moka.

14. Dihlatse tša Jehofa di rutile eng di sa feto-fetoge e le tharollo e nnoši mathateng a batho, gomme batho ka kakaretšo ba ile ba arabela bjang?

¹⁴ Dihlatse tša Jehofa di rutile di sa feto-fetoge gore tharollo e nnoši ya mathata ao a dirago gore batho ba tlalelwe ke Mmušo wa Modimo woo ka wona Jehofa a rerilego go dira gore leina la gagwe le kgethagatšwe. (Psalme 83:4, 17, 18; Mateo 6:9, 10) Lega go le bjalo, batho ka kakaretšo ba ithibile ditsebe mabapi le tharollo ye. Ba bantši bao ba ganago Mmušo ba bile ba roga leina la Modimo, go etša ge Farao a dirile ge a be a gana go amogela bogoši bja Jehofa. (Ekisodo 1:8-10; 5:2) Baganetši ba bao ba sa ratego Mmušo wa Mesia ba kgetha go tlaišega ka tlase ga ‘letšatši’ la bona ka noši le le fišago tšhiritšhiri la pušo e gatelelago ya batho.

Sedulo sa Bogoši sa Sebata

15. (a) Morufsi wa bohlano o tšhollelwa go eng? (b) ‘Sedulo sa bogoši sa sebata’ ke’ng, le gona ke’ng seo se akaretšwago tabeng ya go tšhollelwa ga morufsi go sona?

¹⁵ Morongwa yo a latelago o tšhollela morufsi wa gagwe kae? “Wa bohlano a tšhollela morufsi wa gagwe sedulong sa bogoši sa sebata.” (Kutollo 16:10a) “Sebata” ke tshepedišo ya mebušo ya Sathane. Ga se na sedulo sa bogoši sa kgonthe, go swana le ge sebata ka noši e se sa kgonthe. Lega go le bjalo, go bolelwa ga sedulo sa bogoši go bontšha gore sebata se bušitše batho; se se dumelelana le therešo ya gore lenaka le lengwe le le lengwe la sebata le na le mphapahlogo wa bogoši. Ge e le gabotse, ‘sedulo sa bogoši sa sebata’ ke motheo goba mothopo wa pušo yeo.b Beibele e utolla boemo bja kgonthe bja bogoši bja sebata ge e bolela gore, “drakone ya nea sebata matla a sona le sedulo sa bogoši sa sona le taolo e kgolo.” (Kutollo 13:1, 2; 1 Johane 5:19) Ka gona, go tšhollelwa ga morufsi sedulong sa bogoši sa sebata go akaretša polelo yeo e utollago karolo ya kgonthe yeo Sathane a bilego le yona le yeo a sa dutšego a e-na le yona ya go thekga le go dira gore sebata se atlege.

16. (a) Ditšhaba di hlankela mang, go sa šetšwe gore di lemoga seo goba di sa se lemoge? Hlalosa. (b) Lefase le bontšha bjang dika tša Sathane? (c) Sedulo sa bogoši sa sebata se tla phekgolwa neng?

¹⁶ Tswalano ye ya magareng ga Sathane le ditšhaba e thekgwa bjang? Ge Sathane a be a leka Jesu, o ile a mmontšha mebušo ka moka ya lefase ponong gomme a mo holofetša “bolaodi bjo ka moka le letago la yona.” Eupša go be go e-na le lebaka le le beilwego—lebaka leo e be e le gore Jesu a thome ka go dira tiro ya borapedi pele ga Sathane. (Luka 4:5-7) Na re ka nagana gore mebušo ya lefase e hwetša bogoši bja yona ka ntle le go dira tiro yeo ya borapedi? Le gatee-tee. Go ya ka Beibele, Sathane ke modimo wa tshepedišo ye ya dilo, mo e lego gore go sa šetšwe ge e ba ditšhaba di lemoga seo goba di sa se lemoge, fela di a mo hlankela. (2 Bakorinthe 4:3, 4)c Boemo bjo bo bonala sebopegong sa tshepedišo ya lefase ya gona bjale, yeo e bopilwego ka botšhaba bjo bošoro, lehloyo le boithati. E rulagantšwe ka tsela yeo Sathane a e nyakago, e lego go dira gore batho ba dule ba le ka tlase ga taolo ya gagwe. Kgobogo yeo e lego mmušong, go ba le kganyogo e matla ya go buša, ditherišano tša ditšhaba tše tletšego maaka le go phenkgišana ka dibetša—tše ka moka di bontšha go ba ga Sathane yo mobe kudu. Lefase le thekga melao e sa lokago ya Sathane, gomme le mo dira modimo wa lona. Sedulo sa bogoši sa sebata se tla phekgolwa ge sebata seo se fedišwa gomme Peu ya mosadi wa Modimo mafelelong e lahlela Sathane ka noši sekoting.—Genesi 3:15; Kutollo 19:20, 21; 20:1-3.

Lefsifsi le Bohloko bjo bo Šiišago

17. (a) Go tšhollwa ga morufsi wa bohlano go tswalana bjang le lefsifsi la moya leo le apareditšego mmušo wa sebata ka mehla? (b) Batho ba itshwara bjang mabapi le go tšhollwa ga morufsi wa bohlano wa bogale bja Modimo?

¹⁷ Mmušo wa sebata se o bile lefsifsing la moya ga e sa le go tloga mathomong a wona. (Bapiša le Mateo 8:12; Baefeso 6:11, 12.) Morufsi wa bohlano o tšweletša tsebišo ya phatlalatša e matla kudu ya lefsifsi le. O bile o diragatša se, ka gore morufsi wo wa bogale bja Modimo o tšhollelwa sedulong sa bogoši sa sebata sa seswantšhetšo. “Mmušo wa sona wa fsifala, ba thoma go itoma maleme ka baka la bohloko, eupša ba roga Modimo wa legodimo ka baka la mahloko le ka baka la dišo tša bona, gomme ba se ke ba itshola medirong ya bona.”—Kutollo 16:10b, 11.

18. Ke go swana gofe mo go lego gona magareng ga go letšwa ga phalafala ya bohlano le morufsi wa bohlano wa bogale bja Modimo?

¹⁸ Go letšwa ga phalafala ya bohlano ga go swane gabotse le morufsi wa bohlano wa bogale bja Modimo, ka ge go letšwa ga phalafala go tsebišitše kotlo ya ditšie. Eupša ela hloko gore ka go lokollwa ga kotlo yeo ya ditšie, letšatši le moya di ile tša fsifala. (Kutollo 9:2-5) Le gona re bala go Ekisodo 10:14, 15 mabapi le ditšie tšeo Jehofa a ilego a otla Egipita ka tšona ka gore: “[E bile] bontši bja tšiê byo bo sešoxo bya bônwa, byo bo sa tl’o xo bônwa xapê. Tšiê ya tlala lefase ka moka, ya apeša naxa, [ka lefsifsi].” Ee, lefsifsi! Lehono, lefsifsi la moya la lefase e bile leo le bonalago kudu ka baka la go letšwa ga phalafala ya bohlano le go tšhollwa ga morufsi wa bohlano wa bogale bja Modimo. Molaetša o lomago o bolelwago ke tšie e ntši ya mehleng yeno o tliša tlhokofatšo le bohloko go batho bao ba kgopo ba ba ‘ratilego lefsifsi gagolo ba nyatša seetša.’—Johane 3:19.

19. Ka go dumelelana le Kutollo 16:10, 11, go pepentšhwa ga Sathane phatlalatša e le modimo wa tshepedišo ye ya dilo go baka’ng?

¹⁹ Sathane ka ge e le mmuši wa lefase o bakile go se thabe mo gogolo le tlaišo. Tlala, dintwa, bošoro, bokebekwa, go dirišwa gampe ga dihlare-tagi, boitshwaro bjo bobe, malwetši ao a fetelago ka kopano ya botona le botshadi, go se botege, boikaketši bja bodumedi, ruri tše le tše dingwe tše dintši ke maswao ao a kgethollago tshepedišo ya Sathane ya dilo. (Bapiša le Bagalatia 5:19-21.) Lega go le bjalo, go pepentšhwa ga Sathane phatlalatša e le modimo wa tshepedišo ye ya dilo go bakile bohloko le kgakanego go bao ba phelago ka melao ya gagwe. Ba ile ba thoma go “itoma maleme ka baka la bohloko” kudu-kudu Bojakaneng. Ba bantši ga ba rate gore therešo e pepentšhe mokgwa wa bona wa bophelo. Ba bangwe ba hwetša gore e a ba hlasela, gomme ba tlaiša bao ba e tsebatšago. Ba gana Mmušo wa Modimo gomme ba goboša leina le lekgethwa la Jehofa. Boemo bja bona bja go babja bodumeding le bja go tšwa dišo bo beilwe nyanyeng, gomme ba roga Modimo wa legodimo. Aowa, ga ba ‘itshole medirong ya bona.’ Ka gona re ka se ke ra lebelela go sokologa ga batho ka bontši pele ga bofelo bja tshepedišo ye ya dilo.—Jesaya 32:6.

Noka ya Eforate e a Gopa

20. Bobedi go letšwa ga phalafala ya botshelela le go tšhollwa ga morufsi wa botshelela di akaretša bjang noka ya Eforate?

²⁰ Go letšwa ga phalafala ya botshelela go tsebišitše ka go hunollwa ga “barongwa ba bane bao ba tlemilwego nokeng e kgolo ya Eforate.” (Kutollo 9:14) Go ya ka histori, Babilona e be e le motse o mogolo wo o bego o dutše nokeng ya Eforate. Ka 1919 go hunollwa ga barongwa ba bane ba seswantšhetšo go ile gwa sepedišana le go wa mo gogolo ga Babilona o Mogolo. (Kutollo 14:8) Ka gona, go bohlokwa gore morufsi wa botshelela wa bogale bja Modimo o bile o akaretša noka ya Eforate: “Wa botshelela a tšhollela morufsi wa gagwe nokeng e kgolo ya Eforate, meetse a yona a gopa e le gore dikgoši tše di tšwago bohlabatšatši di lokišetšwe tsela.” (Kutollo 16:12) Tše le tšona ke ditaba tše mpe go Babilona o Mogolo!

21, 22. (a) Meetse a tšhireletšo a noka ya Eforate a ile a gopela bjang Babilona ka 539 B.C.E.? (b) “Meetse” ao Babilona o Mogolo a dutšego go ona ke’ng, gomme meetse a a seswantšhetšo a gopa bjang gaešita le mo nakong ye?

²¹ Letšatšing la lethabo la Babilona ya bogologolo, meetse a mantši a Eforate e be e le karolo e kgolo ya thulaganyo ya yona ya go itšhireletša. Ka 539 B.C.E. meetse ao a ile a gopa ge a be a fapošwa tseleng ya wona ke Korese moetapele wa Moperesia. Ka gona, go ile gwa bulega tsela ya gore Korese wa Moperesia le Dario wa Momeda, e lego dikgoši tša “bohlabatšatši” di tsene ka Babilona gomme di e thope. Nakong ya tlalelo, noka ya Eforate e ile ya palelwa ke go šireletša motse woo o mogolo. (Jesaya 44:27–45:7; Jeremia 51:36) Selo se se swanago se tla direga go Babilona ya mehleng yeno, e lego tshepedišo ya lefase ka bophara ya bodumedi bja maaka.

²² Babilona o Mogolo ‘o dutše godimo ga meetse a mantši.’ Go ya ka Kutollo 17:1, 15, ona a swantšhetša “merafo le mašaba le ditšhaba le maleme,” e lego makoko ao a mo kgomaretšego ao a bego a a lebelela e le tšhireletšo. Eupša “meetse” a a gopa! Ka Bodikela bja Yuropa, moo nakong e fetilego a bego a e-na le tutuetšo e kgolo, batho ba dimilione tše makgolo ba ile ba lahla bodumedi ka go lebanya. Dinageng tše dingwe, go be go e-na le molao o tsebišitšwego wa go leka go fediša tutuetšo ya bodumedi. Batho ba bantši mafaseng ao ga se ba ka ba bo lwela. Ka mo go swanago, ge nako e fihla ya gore Babilona o Mogolo a fedišwe, palo yeo e fokotšegago ya batho bao ba mo kgomaretšego e ka se be tšhireletšo le gatee. (Kutollo 17:16) Gaešita le ge e ipolela gore e na le ditho tše dimilione tše dikete, fela Babilona o Mogolo e tla ikhwetša e se ya šireletšwa go “dikgoši tše di tšwago bohlabatšatši.”

23. (a) Dikgoši tše di tšwago “bohlabatšatši” e be e le bomang ka 539 B.C.E.? (b) “Dikgoši tše di tšwago bohlabatšatši” nakong ya letšatši la Morena ke bomang, gomme di tla senya bjang Babilona o Mogolo?

²³ Dikgoši tše ke bomang? Ka 539 B.C.E., e be e le Dario wa Momeda le Korese wa Moperesia, bao ba ilego ba dirišwa ke Jehofa go fenya motse wa bogologolo wa Babilona. Letšatšing le la Morena, tshepedišo ya bodumedi bja maaka ya Babilona o Mogolo le yona e tla fedišwa ke babuši bao e lego batho. Eupša ye le yona e tla ba kahlolo ya Modimo gape. Jehofa Modimo le Jesu Kriste, e lego “dikgoši tše di tšwago bohlabatšatši” ba tla tsentšha ka dipelong tša babuši bao e lego batho “kgopolo” ya go fetogela Babilona o Mogolo le go mo fediša ka mo go feletšego. (Kutollo 17:16, 17) Go tšhollwa ga morufsi wa botshelela go tsebiša phatlalatša gore kahlolo ye e kgaufsi le go phethwa!

24. (a) Dikagare tša merufsi ya pele e tshelelago ya bogale bja Jehofa di ile tša tsebišwa bjang, gomme ka mafelelo afe? (b) Kutollo pele ga ge e ka re botša ka merufsi e šetšego ya bogale bja Modimo, e utolla’ng?

²⁴ Merufsi ye ya pele e tshelelago ya bogale bja Jehofa e swere molaetša o šoro. Bahlanka ba Modimo ba lefaseng ka go thekgwa ke barongwa ba dutše ba swaregile ka go tsebatša ka dikagare tša lefaseng ka bophara. Ka tsela ye, dikarolo ka moka tša tshepedišo ya lefase ya Sathane di neilwe temošo e swanetšego, gomme Jehofa o neile batho sebaka sa go retologela tokeng gore ba phele. (Hesekiele 33:14-16) Lega go le bjalo, go sa dutše go e-na le morufsi o mongwe wa bogale bja Modimo. Eupša pele ga ge Kutollo e ka re botša ka wona, e utolla kamoo Sathane le baemedi ba gagwe ba lefaseng ba lekago ka gona go thibela go phatlalatšwa ga dikahlolo tša Jehofa.

Go Kgobokanyetšwa go Haramagedone

25. (a) Johane o re botša’ng ka “dipolelo tše di buduletšwego” tšeo di sa hlwekago tše di swanago le digwagwa? (b) Ke bjang go bilego le kotlo e kago ya digwagwa e ferošago dibete ya ‘dipolelo tše di buduletšwego tše di sa hlwekago’ letšatšing la Morena, gomme ka mafelelo afe?

²⁵ Johane o re botša gore: “Ka bona dipolelo tše buduletšwego tše tharo tše di sa hlwekago tše di swanago le digwagwa di e-tšwa molomong wa drakone le molomong wa sebata le molomong wa moporofeta wa maaka. Ge e le gabotse, ke dipolelo tše di buduletšwego ke batemona gomme di dira dipontšho, di ya go dikgoši tša lefase ka moka le go agilwego go lona go di rapela ntweng ya letšatši le legolo la Modimo Ra-matla-ohle.” (Kutollo 16:13, 14) Mehleng ya Moše, Jehofa o ile a tliša kotlo ya digwagwa e ferošago dibete go Egipita ya Farao, gomme “naxa ya napa ya nkxa.” (Ekisodo 8:5-15) Nakong ya letšatši la Morena, le gona go bile le kotlo e kago ya digwagwa e ferošago dibete, gaešita le ge e be e e-tšwa mothopong o fapanego. E bopilwe ka ‘dipolelo tše di buduletšwego tše di sa hlwekago’ tša Sathane, e lego seo se swantšhetšago gabotse mokgoši wo o ilego wa hlabja wo o reretšwego go gapa babuši ka moka bao e lego batho, e lego “dikgoši” gore ba lwantšhane le Jehofa Modimo. Ka gona Sathane o kgonthiša gore ga ba akga-akgwe ke go tšhollwa ga merufsi ya bogale bja Modimo eupša gore ba eme ka go tia ka lehlakoreng la Sathane ge ‘ntwa ya letšatši le legolo la Modimo Ra-matla-ohle’ e thoma.

26. (a) Mekgoši e hlabjago ya Sathane e tšwa methopong efe e meraro? (b) “Moporofeta wa maaka” ke’ng, gomme re tseba bjang?

²⁶ Mokgoši o hlabjago o tšwa go “drakone” (Sathane) le “sebata” (tshepedišo ya lefaseng ya Sathane ya bopolitiki), e lego dibopiwa tšeo re šetšego re kopane le tšona go Kutollo. Lega go le bjalo, “moporofeta wa maaka” ke’ng? Yo ke yo mofsa ka leina feela. Nakong e fetilego re bontšhitšwe sebata se se nago le dinaka tše pedi tše e kego ke tša kwana seo se dirilego dipontšho tše kgolo ka pele ga sebata sa dihlogo tše šupago. Sebopiwa se sa bofora se ile sa dira ka go swana le moporofeta go sebata seo. Se tšweleditše pele borapedi bja sebata, gaešita le go dira gore se betlelwe seswantšho. (Kutollo 13:11-14) Sebata se seo se nago le dinaka tše pedi tše e kego ke tša kwana e swanetše go ba selo se tee le “moporofeta wa maaka” yo go bolelwago ka yena mo. Go kgonthišetša se, re bala ka morago gore moporofeta wa maaka ka go swana le sebata sa seswantšhetšo seo se nago le dinaka tše pedi o “dira dipontšho pele ga sona tšeo ka tšona a bego a timetša bao ba amogetšego leswao la sebata le bao ba bego ba rapela seswantšho sa sona.”—Kutollo 19:20.

27. (a) Ke temošo efe yeo e lego nakong yeo Jesu Kriste ka noši a e neago? (b) Ke temošo efe yeo Jesu a ilego a e nea ge a be a le mo lefaseng? (c) Moapostola Paulo o ile a boeletša bjang temošo ya Jesu?

²⁷ Ka ge go e-na le mekgoši e mentši gakaakaa ya Sathane, gona mantšu a latelago ao Johane a a ngwalago a nakong e le ka kgonthe: “Bonang! Ke tla bjalo ka lehodu. Go thaba yo a dulago a phafogile gomme a apere dikobo tša gagwe tša ka ntle, e le gore a se ke a sepela a hloboletše gomme batho ba lebelela dihlong tša gagwe.” (Kutollo 16:15) Ke mang yo a tlago “bjalo ka lehodu”? Ke Jesu ka noši yo a tlago ka nako yeo e sa kago ya tsebišwa e le Mophethi wa Kahlolo ya Jehofa. (Kutollo 3:3; 2 Petro 3:10) Jesu gape ge a be a sa le mo lefaseng o ile a swantšha go tla ga gagwe le go tla ga lehodu ka gore: “Ka baka leo, dulang le phakgame gobane ga le tsebe letšatši leo Morena wa lena a tlago ka lona. Ka baka leo le lena le itlhatsele le le ba itokišitšego, gobane Morwa wa motho o tla ka nako yeo le sa e naganego.” (Mateo 24:42, 44; Luka 12:37, 40) Moapostola Paulo ge a boeletša temošo ye o itše: “Letšatši la Jehofa le tla go swana tlwa le lehodu la bošego. Neng le neng ge ba re: ‘Khutšo le polokego!’ ke moka tshenyego ya tšhoganyetšo e tla ba wela gatee-tee.” Sathane ke mothomi wa polelo yeo ya maaka ya gore “Khutšo le polokego!”—1 Bathesalonika 5:2, 3.

28. Ke temošo efe yeo Jesu a ilego a e nea ye e lego mabapi le go ganetša dikgateletšo tša lefase, gomme “letšatši leo” le Bakriste ba sa nyakego gore le ba wele go “etša molaba” ke lefe?

²⁸ Jesu o bile o lemošitše ka mohuta wa dikgateletšo tšeo lefase le leo le aparetšwego ke mekgoši yeo e hlabjago ya maaka, le tlago go di tliša godimo ga Bakriste. O itše: “Eupša itlhokomeleng gore dipelo tša lena di se ke tša imelwa ke bojagobe le go nwa kudu le dipelaelo tša bophelo, gomme ka tšhoganyetšo letšatši leo la le wela ka bjako go etša molaba. . . . Ka gona, dulang le phakgame ka dinako tšohle le lopa gore le atlege ka go phonyokga dilo tše ka moka tše di reretšwego go direga, le go ema pele ga Morwa wa motho.” (Luka 21:34-36) “Letšatši leo” ke “letšatši le legolo la Modimo Ra-matla-ohle.” (Kutollo 16:14) Ge “letšatši leo” la go lwelwa ga bogoši bja Jehofa le dutše le batamela, go ba thata kudu go lebeletšana le dipelaelo tša bophelo. Bakriste ba swanetše go ba bao ba phakgamego, gomme ba dule ba phafogile go fihlela ge letšatši leo le fihla.

29, 30. (a) Ke’ng seo se bolelwago ke temošo ya Jesu ya gore bao ba hwetšwago ba robetše ba tla welwa ke dihlong ka go lahlegelwa ke ‘dikobo tša bona tša ka ntle’? (b) Diaparo di kgetholla moapari wa tšona e le eng? (c) Motho a ka lahlegelwa bjang ke diaparo tša gagwe tša seswantšhetšo, gomme ka mafelelo afe?

²⁹ Ka gona, temošo ya gore bao ba hwetšwago ba robetše ba tla welwa ke dihlong ka go lahlegelwa ke ‘dikobo tša bona tša ka ntle’ e bolela’ng? Isiraeleng ya bogologolo, moperisita le ge e le ofe goba Molefi yo a bego a e-na le modiro wa go ba moleti tempeleng o be a e-na le boikarabelo bjo bogolo. Bahlalosi ba Bajuda ba re botša gore ge e ba motho le ge e le ofe a be a ka hwetšwa a robetše modirong o bjalo, gona o be a ka apolwa diaparo tša gagwe gomme tša fišwa, gore a tle a lewe ke dihlong tša go bonwa ke batho bohle.

³⁰ Jesu mo o lemoša ka gore selo se se swanago se ka direga lehono. Baperisita le Balefi ba swantšheditše bana babo Jesu ba tloditšwego. (1 Petro 2:9) Eupša temošo ya Jesu e šoma le go lešaba le legolo ka gore e fetišetšwe go lona. Diaparo tše go bolelwago ka tšona mo di kgetholla moapari wa tšona e le Hlatse ya Mokriste ya Jehofa. (Bapiša le Kutollo 3:18; 7:14.) Ge e ba batho le ge e le bafe ba dumelela gore mathata a lefase la Sathane a ba kunkureletše borokong goba boemong bja go se dire selo, gona go ka direga gore ba lahlegelwe ke diaparo tše, ka mantšu a mangwe ba lahlegelwe ke go tsebja ga bona ka bohlweki e le Bakriste. Boemo bjo bo bjalo e ka ba bja dihlong. Bo ka bea motho kotsing ya go lahlegelwa ka mo go feletšego.

31. (a) Kutollo 16:16 e gatelela bjang go nyakega ga gore Bakriste ba dule ba phafogile? (b) Baetapele ba bangwe ba bodumedi ba ile ba akanya’ng ka Haramagedone?

³¹ Go nyakega ga gore Bakriste ba dule ba phafogile e ba mo go akgofilego kudu ka ge temana e latelago ya Kutollo e le kgaufsi le go phethagala: “Tša [meoya e buduletšwego ke batemona] ba [dikgoši tša lefase, goba babuši] kgobokeletša lefelong le le bitšwago Haramagedone ka Seheberu.” (Kutollo 16:16) Leina le, leo gantši le bolelwago e le Haramagedone, le tšwelela gatee feela ka Beibeleng. Eupša le ferehlile megopolo ya batho. Baetapele ba lefase ba lemošitše ka Haramagedone yeo e ka bago gona ya nuclear. Haramagedone le gona e ile ya tswalanywa le motse wa bogologolo wa Megiddo, e lego lefelo la dintwa tše dintši tša makgaolakgang mehleng ya Beibele, gomme baetapele ba bangwe ba bodumedi ba akantše gore ntwa ya mafelelo mo lefaseng e tla lwelwa lefelong leo feela. Go se, ba kgole kudu le therešo.

32, 33. (a) Leina Haramagedone goba Aramagedone le emela’ng go e na le go ba lefelo la kgonthe? (b) Ke dipolelwana dife tše dingwe tša Beibele tšeo di swanago le “Haramagedone” goba tšeo di tswalanago le yona? (c) Nako ya gore morongwa wa bošupa a tšholle morufsi wa mafelelo wa bogale bja Modimo e tla ba efe?

³² Leina Haramagedone le bolela “Thaba ya Megido.” Eupša go e na le gore e be lefelo la kgonthe, le emela boemo bja lefase bjo ditšhaba ka moka di kgobokanyetšwago go bjona gore di lwe le Jehofa Modimo yo a tlago go di fediša mafelelong. Se se akaretša lefase ka moka. (Jeremia 25:31-33; Daniele 2:44) E swana le ‘segatelo se segolo sa bogale bja Modimo’ le ‘moedi wa kahlolo’ goba ‘moedi wa Josefate,’ moo ditšhaba di kgobokanyetšwago gona gore di bolawe ke Jehofa. (Kutollo 14:19; Joele 3:12, 14, PK) Le gona e tswalana le “naxa ya Isiraele” moo madira a Sathane a Gogo wa Magogo a fedišwago gona le lefelo leo la “makxatheng a lewatlê le thaba e kxêthwa” moo go tšwago kgoši ya leboa mo e tlogo “tlêlwa ke tše di tl’o xo e fediša” diatleng tša Mikaele kgoši e kgolo.—Hesekiele 38:16-18, 22, 23; Daniele 11:45–12:1.

³³ Ge ditšhaba di gapetšwe boemong bjo ka mokgoši o šoro wo o tšwago go Sathane le go baemedi ba gagwe ba lefaseng, gona e tla ba e le nako ya gore morongwa wa bošupa a tšholle morufsi wa mafelelo wa bogale bja Modimo.

“Go diregile!”

34. Morongwa wa bošupa o tšhollela morufsi wa gagwe go eng, gomme ke mantšu afe a tšwago “sekgethweng sedulong sa bogoši”?

³⁴ “Wa bošupa a tšhollela morufsi wa gagwe moyeng. Ge a dira bjalo, lentšu le le hlabošago la tšwa sekgethweng sedulong sa bogoši, la re: ‘Go diregile!’”—Kutollo 16:17.

35. (a) ‘Moya’ wo o bolelwago go Kutollo 16:17 ke’ng? (b) Morongwa wa bošupa ka go tšhollela morufsi wa gagwe moyeng o bontšha’ng?

³⁵ ‘Moya’ ke mothopo wo o thekgago bophelo wa go tlo otlwa mafelelong. Eupša wo ga se moya wa kgonthe. Ga go na phošo ka moya wa kgonthe seo se dirago gore o swanelwe ke dikahlolo tše sehlogo tša Jehofa, go swana le ge lefase, lewatle, methopo ya meetse a sekilego goba letšatši tše e lego tša kgonthe di sa swanelwe ke go hwetša dikahlolo tše tšwago seatleng sa Jehofa. Go e na le moo, wo ke ‘moya’ wo Paulo a boletšego ka wona ge a be a bitša Sathane gore ke “mmuši wa matla a moya.” (Baefeso 2:2) Ke ‘moya’ wa Sathane wo lefase le o hemago lehono, moya goba tshekamelo ya kakaretšo ya kgopolo yeo e kgethollago tshepedišo ya gagwe ka moka ya dilo e kgopo, e lego kgopolo ya Sathane yeo e apareditšego sebopego se sengwe le se sengwe sa bophelo ka ntle ga mokgatlo wa Jehofa. Ka gona morongwa wa bošupa ka go tšhollela morufsi wa gagwe moyeng, o bontšha bogale bja Modimo go Sathane, mokgatlo wa gagwe le dilo tšohle tšeo di tutueletšago batho gore ba thekge Sathane tabeng ya go nyatša bogoši bja Jehofa.

36. (a) Dikotlo tše šupago di bopa eng? (b) Go bolela ga Jehofa gore: “Go diregile!” go bontšha’ng?

³⁶ Kotlo ye gotee le tše tshelelago tše fetilego di nea palo e tletšego ya dikahlolo tša Jehofa go Sathane le tshepedišo ya gagwe. Ke dipego tša kahlolo ya mafelelo ya Sathane le peu ya gagwe. Ge morufsi wa mafelelo o tšhollwa, Jehofa ka noši o re: “Go diregile!” Ga go se sengwe se se ka bolelwago. Ge dikagare tša merufsi ya bogale bja Modimo di tsebišitšwe ka mo go kgotsofatšago Jehofa, go ka se ke gwa ba le go diega tabeng ya go phetha dikahlolo tšeo di boletšwego ka melaetša ye.

37. Johane o hlalosa bjang seo se diregago ka morago ga go tšhollwa ga morufsi wa bošupa wa bogale bja Modimo?

³⁷ Johane o tšwela pele ka gore: “Gwa ba le magadima le mantšu le medumo, gomme gwa ba le tšhišinyego e kgolo ya lefase yeo e sešogo ya ba gona ga e sa le batho ba e-ba gona lefaseng, e be e le tšhišinyego ya lefase e apareditšego kudu le e kgolo kudu. Motse o mogolo wa kgaogana ka dikarolo tše tharo gomme metse ya ditšhaba ya wa; Babilona o Mogolo a gopolwa mahlong a Modimo gore a newe senwelo sa beine ya bogale bja kgalefo ya Modimo. Le gona, sehlakahlaka se sengwe le se sengwe sa tšhaba, gomme dithaba tša se ke tša hwetšwa. Sefako se segolo seo lefsika le lengwe le le lengwe la sona e lego la boima bjo e ka bago bja talente sa wela batho se e-tšwa legodimong, gomme batho ba roga Modimo ka baka la kotlo ya sefako, gobane kotlo ya sona e be e le e kgolo ka mo go sa tlwaelegago.”—Kutollo 16:18-21.

38. Ke’ng seo se swantšhetšwago ke (a) “tšhišinyego e kgolo”? (b) taba ya gore “motse o mogolo,” e lego Babilona o Mogolo o kgaogana ka “dikarolo tše tharo”? (c) taba ya gore “sehlakahlaka se sengwe le se sengwe sa tšhaba, gomme dithaba tša se ke tša hwetšwa”? (d) “kotlo ya sefako”?

³⁸ Jehofa o gata mogato gape ka mo go sa belaetšego ka batho, gomme se se bontšhwa ka “magadima, mantšu le medumo.” (Bapiša le Kutollo 4:5; 8:5.) Batho ba tla šišinywa ka tsela yeo ba sa kago ba šišinywa ka yona le gatee nakong e fetilego, bjalo ka ge eka ke ka tšhišinyego ya lefase yeo e senyago. (Bapiša le Jesaya 13:13; Joele 3:16.) Tšhišinyego ye e etšago pomo e šoro kudu e tla pšhatla “motse o mogolo,” e lego Babilona o Mogolo gore o kgaogane ka “dikarolo tše tharo,” e lego seo se swantšhetšago go senyega ga wona wa lešope la go se lokišege. Le gona, “metse ya ditšhaba” e tla phušoga. “Sehlakahlaka se sengwe le se sengwe” le “dithaba,” e lego makgotla le mekgatlo yeo e bonalago e le ya ka mo go sa felego tshepedišong ye di tla feta. “Sefako se segolo” se se fetago kgole seo se ilego sa otla Egipita nakong ya kotlo ya bošupa, le seo letlapana le lengwe le le lengwe la sona e lego la boima bjo bo nyakilego go lekana le bja talente se tla otla batho gabohloko.d (Ekisodo 9:22-26) Pula ye ya kotlo ya meetse ao a kgahlilego ka ntle le pelaelo e swantšhetša dipolelo tša molomo tše boima ka mo go sa tlwaelegago tša dikahlolo tša Jehofa, e lego tšeo di bontšhago gore bofelo bja tshepedišo ye ya dilo mafelelong bo fihlile! Jehofa a ka diriša sefako sa kgonthe modirong wa gagwe wa go fediša.—Jobo 38:22, 23.

39. Go sa šetšwe go tšhollwa ga dikotlo tše šupago, ke tiro efe yeo batho ba bantši ba tlago go e dira?

³⁹ Ka gona, lefase la Sathane le tla lebana le kahlolo ya Jehofa ya go loka. Batho ba bantši ba tla tšwela pele ba nyatša le go roga Modimo go ba go fihla mafelelong. Ka go swana le Farao wa bogologolo, dipelo tša bona di ka se ke tša letefatšwa ke dikotlo tšeo di dirwago leboelela goba ke seremo sa mafelelo seo se bolayago sa dikotlo tšeo. (Ekisodo 11:9, 10) Go ka se be le go fetola dipelo ka motsotso wa mafelelo le ka tekanyo e kgolo. Ka moya wa bona wo o hwelelago ba tla roga Modimo yo a bolelago gore: ‘Ba tlo tseba ge nna ke le Jehofa.’ (Hesekiele 38:23, PK) Lega go le bjalo, bogoši bja Jehofa Modimo Ramatlaohle bo tla ba bo godišitšwe.

[Mengwalo ya ka tlase]

[Lepokisi go letlakala 221]

“Lefaseng”

Sehlopha sa Johane se tsebišitše ka bogale bja Jehofa malebana le ‘lefase’ ka mantšu a swanago le a latelago:

“Ka morago ga nywaga-kgolo e mentši ya boiteko, mekgatlo ya dipolitiki e bontšhitše go se kgone ga yona go lokiša maemo a gona bjale le go rarolla mathata ao a gatelelago. Baithuti ba tša boiphedišo le bakgomana bao ba ilego ba nyakišiša taba ye ka mafolofolo, ba hwetša gore ga ba kgone go dira selo.”—Millions Now Living Will Never Die, 1920, letlakala 61.

“Ga go mmušo mo lefaseng lehono wo o kgotsofatšago karolo le ge e le efe e lekanego ya lefase. Ditšhaba tše dintši di bušwa ke babuši ba dinkgwete. Lefase ka moka le tloga le šaparegile.”—A Desirable Government, 1924, letlakala 5.

“Go fediša tshepedišo ye ya dilo . . . ke tsela fela ya go tloša bokgopo lefaseng le go bula sebaka sa gore khutšo le go loka di ate.”—“Ditaba tše tše di Lokilego tša Mmušo,” 1968, letlakala 25.

“Thulaganyo ya gona bjale ya lefase e ikgethollotše ka sebe se se golago, bokgopo le borabele go Modimo le go thato ya gagwe. . . . Ke yeo e ka se kego ya lokišwa. Ka gona, e swanetše go tloga!”—Morokami (wa Seisemane) wa November 15, 1981, letlakala 6.

[Lepokisi go letlakala 223]

“Lewatleng”

A latelago ke a sego kae feela a mantšu ao a gatišitšwego nywageng e mentši ke sehlopha sa Johane ge se be se tsebiša ka bogale bja Modimo malebana le ‘lewatle’ leo le bilokanago la borabele la batho bao ba sa boifego Modimo bao ba furaletšego Jehofa:

“Histori ya setšhaba se sengwe le se sengwe e bontšha gore go bile le ntwa magareng ga dihlopha. E bile ntwa ya ba sego kae ya go lwa le ba bantši. . . . Dintwa tše di feleleditše ka gore go be le diphetogelo tše dintši, tlaišego e kgolo le go tšhollwa ga madi mo gogolo.”—Government, 1928, letlakala 244.

Lefaseng le lefsa, “‘lewatle’ la seswantšhetšo la batho bao ba bilokanago, ba borabele le bao ba sa boifego Modimo, leo sebata sa seswantšhetšo se tšwilego go lona kgale kua gore se dirišwe ke Diabolo, le tla ba le fetile.”— Morokami (wa Seisemane) wa September 15, 1967, letlakala 567.

“Lekoko la batho la mehleng yeno le babja moyeng. Ga go le o tee wa rena yo a ka le phološago, ka gobane Lentšu la Modimo le bontšha gore bolwetši bja lona bo iša lehung la lona.”—Khutšo ya Kgonthe le Polokego—di tšwa Mothopong Ofe?, 1976, letlakala 131.

[Lepokisi go letlakala 224]

“Dinokeng le Methopong ya Meetse”

Kotlo ya boraro e pepentšhitše ‘dinoka le methopo ya meetse’ ka mantšu a swanago le a latelago:

“Baruti bao ba ipolelago gore ke barutiši ba dithuto [tša Kriste] ba dumeletše ntwa le go e dira selo se sekgethwa. Ba thabišitšwe ke gore diswantšho tša bona le dihlwa-di-eme tša bona di bontšhwe gotee le tša bahlabani bao ba tšholotšego madi.”—Morokami (wa Seisemane) wa September 15, 1924, letlakala 275.

“Bonoge [go dirišana le meoya] bo theilwe maakeng a magolo, e lego maaka a go phela ka morago ga lehu le go se hwe ga moya wa motho.”—What Do the Scriptures Say About “Survival After Death”?, 1955, letlakala 51.

“Difilosofi tša batho, baetapele ba dipolitiki tša go ikgopolela, barulaganyi ba tša leago, baeletši ba tša boiphedišo le baemedi ba mekgwa ya bodumedi ga se ba tliša tapološo ya kgonthe yeo e neago bophelo . . . Meetse a bjalo a bile a dirile gore banwi ba ona ba robe molao wa Mmopi wo o lego mabapi le go ba ga madi a makgethwa le go ba dira gore ba swarege ditlaišong tša bodumedi.”—Setlamo seo se amogetšwego Kopanong ya Ditšhaba-tšhaba ya “Ditaba tše di Dibotse tša Neng le Neng,” 1963.

“Ga se phološo ya tša mahlale, eupša ke tshenyego ya moloko wa batho yeo e lego selo se se swanetšego go letelwa go motho ka noši. . . . Re ka se ke ra lebelela go baithuti ka moka ba tša monagano le dingaka tša monagano tša lefase gore di fetole tsela ya batho ya go nagana . . . Re ka se ke ra ithekga ka sehlopha le ge e le lefe sa ditšhaba-tšhaba sa maphodisa gore se bopše . . . gomme se dire gore lefase le e be leo le šireletšegilego go ka phela go lona.”—Saving the Human Race—In the Kingdom Way, 1970, letlakala 5.

[Lepokisi go letlakala 225]

“Letšatšing”

Ka ge ‘letšatši’ la pušo ya batho le ‘fišitše’ batho nakong ya letšatši la Morena, sehlopha sa Johane se hlokomedišitše ka seo se diregago ka mantšu a swanago le a latelago:

“Lehono Hitler le Mussolini, babuši ba dinkgwete bao ba ikemetšego ba hlasela khutšo ya lefase ka moka, gomme ba thekgwa ka mo go tletšego ke Bapišopo ba Bagolo ba Roma Katholika go senyeng ga bona tokologo.”—Fascism or Freedom, 1939, letlakala 12.

“Historing ka moka molao o latelwago ke babuši ba dinkgwete e bile wa gore, Buša goba o senye! Eupša molao woo mo nakong ye o tlago go dirišwa lefaseng ka moka ke Kgoši e beilwego ke Modimo, Jesu Kriste ke o rego, Bušwa goba o senywe.”—When All Nations Unite Under God’s Kingdom, 1961, letlakala 23.

“Ga e sa le go tloga ka 1945 batho ba fetago dimilione tše 25 ba bolailwe dintweng tše ka bago 150 tšeo di lwelwego lefaseng ka moka.”—Morokami (wa Seisemane) wa January 15, 1980, letlakala 6.

“Ditšhaba lefaseng ka moka . . . ga di na taba le boikarabelo bja ditšhaba-tšhaba goba melao ya boitshwaro. Ditšhaba tše dingwe gore di tle di ikhole, di hwetša di swanetšwe ke go diriša tsela le ge e le efe yeo di bonago e swanetše, e lego go bolaya, go utswa, go lahlela dipomo le tše dingwe . . . Ditšhaba di tla kgotlelelana ka nako e kaaka’ng boitshwarong bjo bo bjalo bja go se šetše selo?”—Morokami, February 15, 1985, letlakala 4.

[Lepokisi go letlakala 227]

“Sedulong sa Bogoši sa Sebata”

Dihlatse tša Jehofa di pepentšhitše sedulo sa bogoši sa sebata gomme tša tsebiša ka kahlolo ya Jehofa ya sona ka mantšu a swanago le a:

“Babuši le baetapele ba mebušo ya ditšhaba ba šušumetšwa ke makgotla a mabe ao a phagametšego batho ao a ba gapeletšago go tsena mogwantong wa go ipolaya ntweng ya makgaola-kgang ya Haramagedone.”—After Armageddon—God’s New World, ya 1953, letlakala 8.

“‘Sebata’ se sa mmušo wa batho e sego wa Modimo, se hweditše matla a sona, pušo le sedulo go Drakone. Se swanetše go šoma tseleng ya Drakone.”—After Armageddon—God’s New World, 1953, letlakala 15.

“Ditšhaba tša Bantle di ka ikhwetša feela di le . . . ka lehlakoreng la Lenaba le Legolo la Modimo, Sathane Diabolo.”—Setlamo se se amogetšwego Kopanong ya Ditšhaba-tšhaba ya “Phenyo ya Modimo” ka 1973.

[Lepokisi go letlakala 229]

“Meetse a Yona a Gopa”

Gaešita le mo nakong ye, go thekgwa ga bodumedi bja Babilona go a gopa mafelong a mantši, gomme se se bontšha seo se tlago go direga ge “dikgoši tša Bohlabatšatši” di hlasela.

“Nyakišišong e dirilwego setšhabeng ka moka go hweditšwe gore 75 lekgolong ya bao ba dulago mafelong a mmasepala [wa Thailand] ga ba ye ditempeleng tša Buddha go ya go theetša dithero le gatee, mola palo ya bao ba lego magaeng bao ba etelago ditempele e fokotšega ganyenyane-ganyenyane go ya go mo e ka bago masome-hlano lekgolong.”—Bangkok Post, September 7, 1987, letlakala 4.

“Bonoge bo tšwile go Botao nageng ya [China] moo bo ilego bja thoma gona nywageng e fetilego e ka bago dikete tše pedi. . . . Ditho tša baperisita ka ge di sa hlwe di e-na le didirišwa tša bonoge tšeo tšona gotee le bao ba bilego ka pele ga tšona ba bego ba di diriša go hwetša bahlatlami ba bantši, di ikhwetša di se na balatedi, gomme di lebeletšane le go hwelela mo go bonalago ga Botao e le tumelo e rulagantšwego karolong e kgolo ya lefase.”—The Atlanta Journal and Constitution, September 12, 1982, letlakala 36-A.

“Japane . . . ke e nngwe ya dinaga tša lefase yeo e nago le palo e kgolo kudu ya baromiwa ba dinageng di šele, bao ba ka bago 5 200, eupša . . . ke batho ba ka tlase ga 1% bao e lego Bakriste. . . . Moruti wa Franciscan yo a šomilego mo ga e sa le go tloga ka bo-1950 . . . o dumela gore ‘letšatši la baromiwa ba dinageng di šele mo Japane le fedile.’”—The Wall Street Journal, July 9, 1986, letlakala 1.

Kua Engelane nakong ya nywaga e masome-tshela e fetilego, “mo e ka bago 2 000 ya dikereke tša Anglican tše 16 000 di tswaletšwe ka baka la go se dirišwe. Palo ya bao ba bago gona e fokotšegile le gare ga dinaga tšeo di lego boemong bja tlase kudu tše di ipolelago gore ke tša Bokriste. . . . ‘Bjale Engelane ga e sa le naga ya Bokriste,’ go boletše [Mopišopo wa Durham].”—The New York Times, May 11, 1987, letlakala A4.

“Ka morago ga diiri tše dintši tša go phenkgišana mo go šoro, Palamente [ya Gerika] e ile ya dumela go hlongwa ga molao lehono, se sa dira gore Mmušo wa tša Leago o tšee dinaga tše dikgolo tše e bego e le tša Kereke ya Orthodox ya Gerika . . . Le gona, molao o dumelela gore batho bao e sego baruti ba laole makgotla a kereke le dikomiti tšeo di ikarabelelago bakeng sa go laolwa ga dilo tše bohlokwa tša kereke tšeo di akaretšago dihotele, meepo ya mmabole le meago ya diofisi.”—The New York Times, April 4, 1987, letlakala 3.

[Diswantšho go letlakala 222]

Merufsi ya pele e mene ya bogale bja Modimo e tliša dikotlo tše swanago le tšeo di tlišwago ke go letšwa ga diphalafala tša pele tše nne

[Seswantšho go letlakala 226]

Morufsi wa bohlano o pepentšha sedulo sa bogoši sa sebata e le pušo yeo Sathane a e neilego sebata

[Diswantšho go letlakala 231]

Go hlabja ga mekgoši ya botemona go kgobokanyetša babuši ba lefase boemong bjo tlhokomelo e lebišitšwego go bjona, e lego Haramagedone moo dikahlolo tša Jehofa di tlago go tšhollelwa godimo ga bona

[Seswantšho go letlakala 233]

Bao ba tutuetšwago ke ‘moya’ wo o šilafetšego wa Sathane ba swanetše go tlaišwa ke go phethwa ga dikahlolo tša Jehofa tša go loka