Omukanda wo Tete Onohamba

18 Etyi pakala, tyina tyiti menima lya tatu,+ Iliya atambula ondaka yatunda ku Siovaa yati: “Enda, kelilekese ku Akambe, ame mandyilokesa ombila ohi aiho.”+ 2 Ngootyo Iliya aende ku Akambe; ondyala ankho yatokota+ mo Samaliya.

3 Pononthiki opo, Akambe aihana Ombandiya ankho onkhalamutwe yo vomeumbo liae. (Ombandiya ankho utila unene owoma Siovaa. 4 Etyi Sesambele+ ekahi nokwipaa* ovauli va Siovaa, Ombandiya akaholeka ovauli 100 ekevepaka momaleva, eveyapaula pokati, atyiti ava vena 50, ava vena 50, otyo eveavelela-mo onombolo nomaande.) 5 Akambe apopila Ombandiya okuti: “Enda-enda motyilongo atyiho, no kononyombo ambuho mbomeva no momilola aviho.* Hamwe tuvasa eholi tuhupise ononkhambe, nonomula, opo ovinyama vietu vihankhie aviho.” 6 Avelitepaulila onofika mavaende. Akambe aende aike nondyila yae, Ombandiya nae aende aike nondyila yae.

7 Etyi Ombandiya ankho ekahi nokwenda nondyila yae, Iliya eya no kwe. Ombandiya emwimbuka, elipetamena-po, apulu okuti: “Ove, ove tatekulu yange Iliya?”+ 8 Ngwe akumbulula okuti: “Yoo ame yatyo. Enda kapopile tatekulu yove ohamba okuti: ‘Ndyili kuno.’” 9 Ombandiya emupulu okuti: “Onkhali patyi nalinga, etyi tatekulu wahanda okupakula omuundapi wove kohamba Akambe na andyipae? 10 Na Siovaa umwe Huku yove una omwenyo, ohamba Akambe wekwovola movanthu vovilongo aviho, no momauhamba aeho. Ankho ovanthu vati vala: ‘Kuno keko,’ ohamba ankho iita ovanthu vaane tyina vati kavekuvasile.+ 11 Pahe tatekulu, ame uti: ‘Enda kapopile ohamba okuti: “Iliya, uli oku.”’ 12 Tyina ame namaende, ononkhono mba Siovaa, tatekulu mambukutwala+ komphangu oku ame nehei. Nga napopila Akambe, tyina eya ehekuvasi, mandyipaa. Mahi omuundapi wove nkhele vala tya poukwendye utila Siovaa. 13 Kavekupopilile tatekulu etyi nalingile pweetyi Sesambele aipaa ovauli va Siovaa? Ame naholekele momaleva ovauli va Siovaa 100, andyiveyapaula pokati, atyiti ava vena 50, ava vena 50, andyivepela-mo onombolo nomaande.+ 14 Pahe ove tatekulu umphopila okuti: ‘Enda kapopile tatekulu yove ohamba, okuti: “Ndyili kuno.”’ Tyotyili mandyipaa.” 15 Mahi, Iliya emupopila okuti: “Na Siovaa umwe una omwenyo, Huku womambamba ovita, una ndyiundapela,* hono mandyikelilekesa ku Akambe.”

16 Ombandiya aende ku Akambe, emupopila-tyo. Akambe aende ku Iliya.

17 Etyi Akambe amona Iliya emupulu okuti: “Ove yatyo? Ove ukahi nokweta elamba mo Isilayeli?”

18 Akumbulula okuti: “Ame hame-ko naeta elamba mo Isilayeli; waeta elamba ove tatekulu, no veumbo lya ho, mokonda mwayekapo ovitumino vya Siovaa amufende ovika-huku ovi Mbaale.+ 19 Pahe ihana ova Isilayeli aveho veye komphunda Kalumelu,+ novauli va Mbaale 450, novauli 400 vokufenda otyipandyi tyikola,*+ vokulia komesa ya Sesambele.” 20 Akambe atumu ovatumwa-ndaka kovanthu aveho vo Isilayeli, aongiya ovauli Komphunda Kalumelu.

21 Iliya afwene kovanthu aveho evepopila okuti: “Atee nalupi mamutwalako okukala nomitima vivali?*+ Ine Siovaa o Huku yotyotyili, oe mufenda!+ Mahi ine o Mbaale oe mufende!” Mahi ovanthu avahapopi natyike. 22 Iliya apopila ovanthu okuti: “Ame vala omuuli wa Siovaa nahupa-po,+ mahi ovauli va Mbaale vena 450. 23 Vaete ononthane onombali, avakoyo-po ike aveiteta-teta ovinthimbu, aveipake kombanda yononkhwii. Mahi kavapondola okupakako otupia. Naame otyo mandyilingi onthane onkhwavo andyiipake kombanda yononkhwii anahapake-ko otupia. 24 Vaite menyina lya huku yavo,+ ame andyiiti menyina lya Siovaa. Huku wamakumbulula okutuma otupia, oe Huku yotyotyili.”+ Ovanthu aveho avakumbulula okuti: “Etyi wapopia tyikahi nawa tatekulu.”

25 Iliya apopila ovauli va Mbaale okuti: “Koyei-po onthane ike amutetekela okwiteta-teta, mokonda onwe muvanyingi. Pahe amwiiti menyina lya huku yenyi, mahi muhapakei-ko otupia.” 26 Ngootyo avakwate onthane vaeta aveiteta-teta avaiti menyina lya Mbaale, okuhimbikila komuhuka atee komutenya, otyo vati: “Mbaale tukumbulule!” Mahi ankho kakwivala ondaka naike; nawike ankho ukumbulula.+ Ngwe ankho vekahi nokulomboka otyo veliseta-seta nomutala wovilikutila ankho valinga. 27 Tyina tyiti komutenya, Iliya ahimbika okuvelinga omukwele ati: “Liyavelelei unene peulu! Ngwe ha-huku iya?+ Hamwe una etyi ekahi nokusoka ine hamwe walupuka.* Ine hamwe ulele, wesukisa ou memupahula-po!” 28 Avahimbika okulaveleya unene peulu, otyo veliteta nononkhiki nomaonga ngeetyi ankho tyilingwa moviso viavo, atee vepwila mohonde. 29 Atee umwe etyi tyati komutenya, otyo vapopia vala oviyayu* atee oola yehika-po yokulinga otyiawa tyovilia kokangulohi, mahi ankho kakwivala ondaka naike, nawike wakumbululile; nii nawike wevetehelele.+

30 Konyima, Iliya apopila ovanthu aveho okuti: “Fwenei kuno.” Ovanthu aveho avafwene kwe, apindula-po omutala wa Siovaa wovilikutila, ankho wahanywa-po.+ 31 Iliya apolo omamanya 12, otyifwe tyombalulo yovana va Sakoo, una wapopililwe na Siovaa, okuti: “Enyina liove malikala o Isilayeli.”+ 32 Nomamanya oo, Iliya atungu omutala wovilikutila+ menyina lya Siovaa. Konyima aheye omukungu omunene weliseta nomutala wovilikutila. Okahika katyo omukungu weliseta nako, ankho katuuka okukunwa onoseaa* onombali mbombuto. 33 Pahe apake-ko ononkhwii ateta-teta ononthane ovinthimbu evipake kombanda yononkhwii,+ ati: “Yulisei omilindi ominene vikwana viomaande amweetili kotyilikutila oku no kononkhwii.” 34 Evepopila ati: “Wanei vali.” Avawane vali. Pahe evepopila vali ati: “Wanei-po vali lya tatu.” Avawane-po vali lya tatu. 35 Omaande aeliseta-seta nomutala wovilikutila, omukungu nao auyula omaande.

36 Etyi ononthiki mbehika-po mbokwava otyiawa tyovilia kokangulohi,+ omuuli Iliya, afwene pomutala wovilikutila apopi okuti: “Siovaa, Huku ya Ambalayau+ na Isake+ na Isilayeli, hono ovanthu ava vanoñgonoke okuti ove Huku yo Isilayeli, ame, ame omuundapi wove, nalinga ovipuka ovio aviho+ mokonda ove wanthuma. 37 Nkhumbulule-vo Siovaa! Nkhumbulule opo ovanthu ava vanoñgonoke okuti ove Siovaa, ove Huku yotyotyili ukahi nokukondola omitima viavo kwoove.”+

38 Keulu akutundu otupia twatunda ku Siovaa atuyoko otyilikutila tyokuyokwa,+ nononkhwii, nomamanya, nombuma, omaande ankho ekahi momukungu aakukuta-mo.+ 39 Etyi ovanthu vamona otyipuka otyo, aveho avelipetamena-po avati: “Siovaa oe o Huku yotyotyili! Siovaa oe o Huku yotyotyili!” 40 Iliya evepopila ati: “Kwatei ovauli va Mbaale aveho! Muhahupisei-po nawike!” Liwa-liwa avevekwate, Iliya evelaukisa no kondongi* Kisoo,+ ngako eveipaela.+

41 Iliya apopila Akambe okuti: “Enda, kalie, okanwa, mokonda ndyiivite ombila imwe onene.”+ 42 Akambe aende akalia, akanwa, mahi Iliya alondo peulu liomphunda yo Kalumelu, aikila konongolo apake omutwe wae pokati konongolo.+ 43 Apopila omukwatesiko wae okuti: “Enda opilukila kelunga.” Aende atale-ko ati: “Kutupu natyike.” Iliya emupopila vali tyihika pepandu-vali okuti: “Kondoka-ko vali.” 44 Tya pandu-vali omukwatesiko wae ati: “Tala! Kuna ekaka etutu lilifwe peke liomulume likahi nokutunda melunga.” Iliya emupopila okuti: “Enda kapopile Akambe okuti: ‘Akwate okatemba kae kovilwa! Alauke, aye opo ahalokwe nombila!’” 45 Pononthiki opo meulu amuyula omakaka anthikovela, okamphepo akahimbika okufila, akuloko ombila imwe onene.+ Akambe aende no ko Sesiliyeli+ netemba liae kovilwa. 46 Okuvoko kwa Siovaa ankho kuna Iliya; elikutu otyikutu tyae monomanekelo, apiti komutwe wa Akambe ahateka atee ko Sesiliyeli.