Sakaliya

12 Onondaka mbapopiwa:

2 “O Selusalei mandyiikalesa olufo lwovinyu,* aikoleswa ovanthu aveho veli ponthele yayo. Makukakala ongandyo iliseta no Sundaa no Selusalei.+ 3 Monthiki oyo, o Selusalei mandyikeikalesa emanya lialema* kovanthu vovilongo aviho. Aveho veihumphula-po, mavelivete unene.+ Ovanthu vovilongo aviho, mavekeliwaneka kumwe opo veilwise.”+ 4 Siovaa wati: “Monthiki oyo, ononkhambe mandyikembukalesa unene nowoma, vokwavelama-ko andyikevekalesa ovityova. Mandyikatala okapanena keumbo lyo Sundaa, mahi ononkhambe mbovanthu vovilongo aviho, mandyikembukalesa onomphoki. 5 Onohongoi mbo Sundaa, mavekelipopila momutima wavo okuti: ‘Ovanthu vokukala mo Selusalei ovo ononkhono mbetu, mokonda ya Huku yavo Siovaa, womambamba ovita.’+ 6 Monthiki oyo, onohongoi mbo Sundaa, mandyikembukalesa ngo potupia pena ononkhwii ononyingi, tupu mambukakala ngotyihihi tyatema tyapakwa povipandi viovingenge.+ Ngwe mavakahanya-po ovilongo aviho viokwevekalela popepi, kokulio no kokumbili.+ Mo Selusalei mamukakala vali ovanthu otyo ili pomphangu yayo,* mo Selusalei.+

7 “Siovaa matetekela okuyovola omakaka o Sundaa, opo omunkhima* wondywo ya Ndaviti, nomunkhima* wovanthu vakala mo Selusalei uhalambe-po wo Sundaa. 8 Monthiki oyo, Siovaa melisete novanthu vakala mo Selusalei,+ akala ondyakulilo yavo. Monthiki oyo, una ulipunduka* makakala nga Ndaviti, ondywo ya Ndaviti maikakala nga Huku. Maikakala ngoandyu ya Siovaa ivekalela komutwe.+ 9 Monthiki oyo, tyotyili mandyikahanya-ko ovanthu vovilongo aviho vilwisa o Selusalei.+

10 “Mandyikauyulila ononkhono mbange kondywo ya Ndaviti no ku vana vakala mo Selusalei. Mandyikevepanda, ngwe avekelivondela kwaame. Mavakatala mu ou vatomene,+ avekemulila ngatyina valila omona wike vala vali nae. Mavekemulila unene ngatyina valila omona wotyiveli. 11 Monthiki oyo, ovanthu mo Selusalei mavakalila unene, ngeetyi tyalililwe mo Handandilimoo mepembe lyo Mesitu.+ 12 Otyilongo matyikalila, ombunga maikalila aike, Ombunga yeumbo lya Ndaviti maikalila aike, ovalume vakalila aveke, ovakai avakalila aveke. Ombunga yeumbo lya Nataa+ maikalila aike, ovalume vakalila aveke, ovakai avakalila aveke. 13 Ombunga yeumbo lya Levii+ maikalila aike, ovalume vakalila aveke, ovakai avakalila aveke. Ombunga yeumbo lya Simei+ maikalila aike, ovalume vakalila aveke, ovakai avakalila aveke. 14 Onombunga ambuho mbahupa-ko, ombunga nombunga maikalila aike, ovalume mavakalila aveke, ovakai avakalila aveke.