Wo Tete Wahonekelwa Ova Kolindu

16 Pahe pokukongololela onombongo ovasukuki,+ mupondola okulinga ngeetyi napopila ewaneno liova Ngalasiya. 2 Onthiki yo tete kosimanu, munthu na munthu apole ko tyae apake nawa, opo mwahatie tyina ame nameya, onwe pahe mukongolola. 3 Mahi tyitie tyina nameya oko, andyitumu ovalume mwetavela ava onwe mwapopia momikanda mwahoneka,+ vatwale otyali tyenyi ko Selusalei. 4 Ine tyisukisa naame ndyende, opo haa twenda navo.

5 Ame mandyikwata ko Masendonia andyiya no oko, nkhele mandyeende no ko Masendonia;+ 6 hamwe ndyiya tukala katutu noonwe oko, ine tyetavela, omuvo woutalala auho andyikala oko, haa amunthyindikila-po katutu tyina ndyitunda oko. 7 Hahandele okuya oko andyimutale vala otyo ndyilamba, nahanda ine Siovaa* wetyihanda, ndyikale umwe ononthiki noonwe.+ 8 Mahi nkhele mandyikala muno mo Efesu+ andyikevela umwe Otyipito tyo Pendekosite, 9 mokonda mwene naikulilwa ombundi imwe onene,+ mahi onondyale mbalinga ononyingi.

10 Ine Timotiu+ uya oko, talei nawa evi mulinga ahatile owoma tyina muna-e oko, ovilinga eli nokulinga ovia Siovaa,*+ nae o ngaame vala. 11 Pahamone nawike umulinga omutomba. Mwene aye nondyila yae nombembwa eye ambase, onthwe tuli kuno na vakwetu tumukevelela.

12 Ou pahe Apolu+ mutaveli mukwetu, nemuti umwe enda meya no kwoonwe oko, meya na vataveli vakwetu. Mahi ngwe omu ndyimutalela ha pehepano meya, matale nkhele apa tyametavelela ngapo eila.

13 Pahukei,+ pamenei monthumbi yenyi,+ pamekei umwe tyokwakola,*+ lingei umwe ononkhono.+ 14 Aviho mulinga, vilingei nolwembia.+

15 Mahi pahe vanthu vetu, ame ndyimutolela okuti: Onwe mutyii okuti veumbo lya Sitefana, ovo ovinyango vyo tete mo Akaya, velipakula umwe vaundapele ovasukuki. 16 Noonwe tavelei kovanthu ovo ngavo, no ku ava vayaka motyilinga aveho, veli nokuundapa unene.+ 17 Mahi tyanthyambukiswa tya Sitefana,+ na Fulutunatu, na Akaiku okweya, vapinga umwe pwoonwe kuno mweheko. 18 Mokonda vati umwe ame vampha ononkhono, onwe noonwe vemupa ononkhono. Naina, ovalume ngo ovo vetalei-vo nawa.

19 Omawaneno oko Asiya emukukunya-po. Ovo Akila na Pilisika newaneno liliongiyila meumbo liavo+ vemukukunya-po otyinene, vemukukunya-po mu Tatekulu. 20 Ovataveli vakwetu aveho vemukukunya-po. Likukunyei nombesu yasukuka.

21 Etyi pahe ame Paulu ndyimukukunya-po, o tyokuvoko kwange mwene.

22 Ou wehehole Tatekulu, oo ateyelwe onkhano. Tatekulu, endyu! 23 Okankhenda okanene ka Tatekulu Sesusi kakale noonwe. 24 Ame ndyimuhole unene amuho mu Kilisitu Sesusi.