Omukanda wo Tete wa Samuwele

5 Etyi ova Filisitiya vatyinda-po Otyikasa+ tya Huku yotyotyili, avetyipolo ko Embenesele avetyitwala ko Asindonde. 2 Ova Filisitiya avapolo Otyikasa tya Huku yotyotyili, avetyitwala kondywo yotyika-huku Ndangoo, avetyipake mphangu ike notyika-huku Ndangoo.+ 3 Monthiki yalandula-ko etyi ova Asindonde vapindukapo, otyika-huku Ndangoo tyatoka-po, tyaika otyipala pohi komutwe Wotyikasa tya Siovaa.+ Ngootyo, avapolo-po otyika-huku Ndangoo, avetyipake pomphangu yatyo.+ 4 Tyina tyiti monthiki yalandula-ko, etyi vapinduka-po komuhuka-huka, avavasi otyika-huku Ndangoo tyatoka, tyaika otyipala pohi komutwe Wotyikasa tya Siovaa. Tyatipuka omutwe nomavoko tyikahi pohi pombundi. Ankho tyesala vala omundindi watyo ngombisi.* 5 Otyo ovanakwa va Ndangoo novanthu aveho vanyingila mondywo ya Ndangoo ko Asindonde, vahaliatela pohi pombundi atee hono.

6 Okuvoko kwa Siovaa ankho kwalemena ova Asindonde, ngwe evenyimi-ko pweetyi atahela ovanthu vo ko Asindonde no vovilongo viatyo, ouvela wondyange.*+ 7 Etyi ovanthu vo Asindonde vamona etyi tyikahi nokweenda-po, avati: “Otyikasa tya Huku yova Isilayeli katyipondola okukala noonthwe, mokonda okuvoko kwae kukahi nokutumonesa ononkhumbi onthwe, na Ndangoo huku yetu.” 8 Ngootyo, avaihana ovatumini aveho vova Filisitiya, avevepulu okuti: “Oityi tuna okulinga Otyikasa tya Huku yo Isilayeli?” Avakumbulula okuti: “Otyikasa tya Huku yo Isilayeli tyina okutwalwa ko Ngate.”+ Avatwala Otyikasa tya Huku yo Isilayeli ko Ngate.

9 Etyi vetyitwala-ko, okuvoko kwa Siovaa akupilukila-po epunda-umbo, ovanthu avayangalala unene. Atahela ovanthu vomepunda-umbo omo ouvela wondyange, okuhimbikila komututu atee komukulu.+ 10 Pahe, avatwala Otyikasa tya Huku yotyotyili ko Ekoloo,+ etyi Otyikasa tya Huku yotyotyili tyehika ko Ekoloo, ova Ekoloo avahimbika okulila otyo vati: “Vaeta kuno Otyikasa tya Huku yo Isilayeli opo tyitwipae, onthwe no votyilongo tyetu!”+ 11 Avatumu ovatumwa-ndaka avaongiya ovatumini aveho vova Filisitiya, avati: “Otyikasa tya Huku yo Isilayeli tyende; tyikondoke pomphangu yatyo opo onthwe no votyilongo tyetu tuhankhie.” Owoma wononkhia ankho weliyandyana mepunda-umbo aliho; okuvoko kwa Huku yotyotyili ankho kwevelemena unene,+ 12 ovanthu vokwahupile-po avavasiwa nouvela wondyange. Etyi veliyava okwiita vakwatesweko, atyiivala keulu.