ELONGESO 58
Wahayekepo Siovaa
Onthwe tututumba umwe tuahayeke natyike tyituyapule ku Siovaa. Hamwe no ove ongotyo usoka. Wati umwe ‘ngaliti pano himayekepo Siovaa Huku.’ Siovaa uhambukwa tyina ove wehemuyekepo. (Tanga 1 Crônicas 28:9.) Mahi ovipuka patyi vipondola okukulingisisa oyekepo okulingila Siovaa? Oityi ove una okulinga wahayekepo otyili?
1. Oñgeni vakuetu vapondola okutusoyesa atuyekepo okulingila Huku?
Ovanthu vamwe vahanda tuyekepo okulingila Siovaa. Vamwe pu ovo, valinga umwe etyi ovanthu vapopia vati: ‘Okambwa watekula, oko kekunumata.’ Vali umwe Onombangi, mahi pahe vapopia omapita eongano lya Siovaa. Omatutu oo, veepopia vanyone oupanga wetu na Siovaa na tuyekepo okuyumba onthumbi meongano liae. Ovanthu ngo ovo, ovo vatiwa ovanthu vokuatyitukilapo otyili. Tupu omalombe amwe onongeleya, vapopia omatutu ayemba Konombangi mba Siovaa. Vahanda ñgeno vangwangwanesa ava vahapamene nawa opo vayekepo otyili. Onthwe katupondola okulikumbulula novanthu ovo, nokutanga omikanda viavo, nokutala ono vidiu mbavo. Tupu tuna okulunguka tuahatange etyi vahoneka mo internet. Sesusi wetyipopile-ale okuti makuya ovanthu ngo ovo valingisisa vakuavo vayekepo Huku. Watile: ‘Veyekei. Ovahongoli veheete-po. Ine omumphoki uhongolela omumphoki mukuavo aveho mavatokela metoto.’ — Mateusi 15:14.
2. Omunthu wokuhole Huku, una okulityilika-tyi?
Onthwe mokonda tuhole Siovaa, katuhande okulipaka motyipuka natyike tyayemba konongeleya mbomatutu. Naina, tuna okutala nawa ovilinga vietu, novipuka ovikwavo tulinga, opo tuehelipake momalongeso omatutu. Siovaa wati: “Tundei-mo [mo Mbambilonia Onene], vanthu vange.” — Eholololo 18:2, 4.
KUHANDE OKUNOÑGONOKA VALI?
Monoñgonoka etyi upondola okulinga wahayeke omunthu nawike ekuyapule ku Siovaa. Tupu momono etyi una okulinga wehelipake movipuka viayemba komalongeso omatutu.
3. Lunguka komatutu
Oityi molingi, ine wiiva ovanthu veli nokupopia omapita Onombangi mba Siovaa? Tangei Provérbios 14:15, amutomphola epulo eli:
Oityi tuesukisila okutala nawa, atuehetavela vala atyiho tyipopiwa tyayemba Konombangi?
Tangei 2 Suau 9-11, amutomphola omapulo aa:
Oityi tuna okulinga omunthu wokuatyitukilapo otyili?
Onthwe kamatukatuka-le atuende tukatomphole nomunthu vokuatyitukilapo otyili. Mahi opi vapondola okutukuatela nomatutu avo?
Ovanthu vokuatyitukilapo otyili, vapopia umwe vala omapita Siovaa, Nonombangi mbae. Pahe ine tuhimama nokutehela omatutu oo, Siovaa makala ñgeni?
4. Hula ku Siovaa tyina omunthu umwe mewaneno amalingi onkhali
Ine tukati-ko ñgaa mukuetu mewaneno walinga onkhali, matulingi ñgeni? Siovaa wetyipopia motyipuka tyimwe atumine ova Isilayeli valinge. Tangei Levítico 5:1.
Otesitu oyo yapopia umwe nawa okuti ine tuamona omunthu mewaneno walinga onkhali, tuna okutyipopila ovakulu vewaneno. Mahi tete nkhele tuna okutomphola nae, atumupopila eketyipopile ovakulu vewaneno. Ine ngwe ketyipopi, pahe ngo onthwe muene tuenda kovakulu tukevepopile-tyo. Onthwe tulinga vala ngotyo mokonda povipuka ngo ovio, tuna okuhula ku Siovaa. Oñgeni okukapopila ovakulu vewaneno onkhali mukuetu alinga, tyilekesa okuti tuhole . . .
Siovaa Huku?
omunthu watyo wokualinga onkhali?
vakuetu mewaneno?
Ine wamona mukwenyi mewaneno, etyi ena nokulinga ketyeete nawa, tyina umutala ñgaa ngoti melietela vala, mukuatesako!
5. Wehelipake mo Mbambilonia Onene
Tangei Luka 4:8 nomukanda Eholololo 18:4, 5, olilingi omapulo aa:
Okuti nkhele ndyivalulilwa mongeleya imwe?
Okuti nkhele ndyivalulilwa kotyipuka tyimwe tyayemba konongeleya mbomatutu?
Okuti ovilinga ndyiundapa vikuatesako omalongeso omatutu?
Okuti nkhele ndyina ovipuka vimwe ndyina okulipola viayemba komalongeso omatutu?
Ine ndyina vimwe ndyina okutala nawa, oityi mandyilingi ndyihondovoke Kombambilonia Onene?
Ine una tyimwe molingi, linga umwe otyipuka weete okuti matyikukalesa nawa, omutima wove maukala pomphangu, na Siovaa etyimono umwe okuti umuhole.
Pahe ine vekuita waave tyimwe ukuateseko ongeleya imwe, molingi ñgeni?
OVANTHU VAMWE VATI: “Ovanthu ava vokuatyitukilapo otyili, ndyina umwe okutehelela omatutu vapopia, na ndyityivile okuliamena.”
Okuti onondunge okusoka ngotyo? Oityi wapopila ngotyo?
ETYI WELILONGESA
Wamona okuti opo onthwe tuahayeke-po Siovaa, katupondola okulihonyeka novanthu vokuhanda okutulingisisa tumuyeke-po.
Okupitulula
Oityi tyahandela umwe okulunguka tuahatehelele omatutu ovanthu vatyitukilapo otyili vapopia?
Oityi tuna okulinga tyina twameivi okuti mukwetu mewaneno walinga onkhali?
Oityi tuna okulinga opo tutunde mo Mbambilonia Onene?
KUHANDE OKUOVOLA VALI?
Onthele ei ipopia etyi tupondola okulinga netyi tuahapondola okulinga tyina ovanthu vamapopi omapita Onombangi.
“Okuti Wii Aviho Viaendapo?” (Omutala Womulavi wa Agosto yo 2018)
Tala etyi una okulinga upunge ine otyipuka tyimwe tyayemba ko Mbambilonia Onene.
Oityi ovanthu veyele Onombangi vehole okulinga vevesoyese?
Omukulu ou wali elombe. Onthele ei yati “Nkhele Vala Tyo Pouna Ankho Ndyiovola Huku,” ipopia etyi alingile etyivile okulipola ovipuka aviho viayemba kongeleya yae yo kohale.
“Ombimbiliya Ipilulula Omuenyo Wovanthu” (onthele Yomutala Womulavi)