Ove Ukahi Nokukongwa

HAMUE wakuateleale Pondyuo Yomaliongiyo Yonombangi mba Jeova potyilongo tyenyi, olipulu oityi valingilamo. Ove utyii okuti kese munthu uhanda, upondola okuya komaliongiyo valinga kese simano? Ovaenda vatambulwa nohole.

Anthi, hamue ove ulipula okuti: Omokonda yatyi Onombangi mba Jeova veliongiyila? Oityi tyilingwa momaliongiyo oo? Oityi ovaenda vehe-Nombangi mba Jeova vapopia momaliongiyo omo?

“Ongiya Ovanthu”

Tunde kohale, ovanthu vehole okuliongiya pala okufenda nokulilongesa konthele ya Huku. Palamba omanima 3.500 tunde etyi ova Isilayeli vapopililwe okuti: “Ongiya ovanthu, ovalume novakai, novana, novaenda vekahi meumbo liove, opo vatehelele avalongoka. Mokonda vena okukala nonthilo na Jeova Huku yenyi, opo vaendele monondaka ambuho mbovitumino evi.” (Deuteronômio 31:12) Ngotyo mo Isilayeli, ovana novakulu ankho valongeswa okufenda Jeova Huku no kumutavela.

Etyi palamba ovityita viomanima, puetyi kuaonganekwa ewaneno lio Vakristau, omaliongiyo atualako okukala otyipuka tyakolela mefendelo lio tyotyili. Apostolu Paulu wahoneka okuti: “Tulipamekei kese umue na mukuavo mohole no mokulinga ovilinga oviwa. Tuhakambei komaliongiyo etu. Vamue vena otyituwa tyokukamba. Anthi, tulipamekei kese umue na mukuavo. (Hebreus 10:24, 25, Tradução Interconfessional) Ngetyi oupanga wombunga upama, tyina ikala kumue omuvo omunyingi, nohole ya vana vahanda okuumbila Huku ipama, tyina Ovakristau veliongiya pala okufenda.

Ngetyi tyapopia Ovihonekwa ovio, Onombangi mba Jeova, veliongiya Monondyuo mbo Maliongiyo tuvali mo simano. Omaliongiyo akuatesako vana vakalapo okupanda, nokunoñgonoka ovitumino Viombimbiliya, nokuendelamo. Movilongo ovinyingi, pamue tyitavela okulandula oprograma yelifwa ouye auho. Kese eliongiyo lina etyi liapongiyilwa. Tyina omaliongiyo ehenehimbike na tyina amapu, aveho vakalapo ‘velipameka otyikati’ mokutomphola ovipuka vipameka. (Romanos 1:12) Oityi tyilingwa mukese liongiyo?

Elongomona lio Mbimbiliya

Eliongiyo liotete ovanthu ovanyingi vatetekela okuenda, o lielongomona lio Mbimbiliya lilingwa apeho pala ounyingi konthyulilo yo simano. Jesus Kristu apeho ankho ulinga omalongomona ounyingi. Limue pomalongomona oo, Elongomona liankhimana lio Komphunda. (Mateus 5:1; 7:28, 29) Apostolu Paulu wapopilile ovalume vo mo Atena. (Atos 17:22-34) Okulandula onongeleka ombo, Onombangi mba Jeova valinga omalongomona, alingwa haunene pala ounyingi, iya vamue hamue otyo otyikando tyotete veya keliongiyo.

Eliongiyo lihimbika notyiimbo tyikahi momukanda Cantemos Louvores a Jeová.a Aveho vahanda okukatuka avaimbi otyiimbo, vapondola okutyilinga. Konyima yelikuambelo lihasete, omulongomoni umue wokuafuapo, ulinga elongomona mono minutu 30. (Tala okakasa kati “Omalongomona Akolela pala Ounyingi.”) Elongomona liae liatunda mo Mbimbiliya. Omulongomoni ukonga ovikando ovinyingi ovateheleli okuikula ovihonekwa nokulandula tyina atanga onoversikulu. Ngotyo, ove upondola okutyinda Ombimbiliya yove, ine wiita Kombangi ya Jeova Ombimbiliya tyina eliongiyo lihenehimbike.

Elilongeso Liomutala Womulavi

Momawaneno omanyingi Onombangi mba Jeova, tyina elongomona liounyingi liamapu, kulandula Elilongeso Liomutala Womulavi, moola ike, lipopia konthele Yombimbiliya. Elilongeso olio, lilingwa nomapulo otyo ovateheleli vakumbulula. Eliongiyo olio, lilunda ovateheleli okulandula ongeleka yo va Bereia kononthiki mba Paulu, ankho “vatehelela ondaka nehando enene, avakaovolola nawa mo Vihonekwa.”—Atos 17:11.

Elilongeso Liomutala Womulavi lihimbika notyiimbo. Etyi matyililongeswa nomapulo omuendesi malingi, vivasiswa Momutala Womulavi. Ove upondola okutambula Omutala Womulavi Kombangi ya Jeova. Ononthele mbukahi nokulilongeswa hono mbumue mbati: “Vohe, Longei Ovana Venyi Noluembia,” “Muhakondolelei Nawike Ovivi”, no yokuati “Mokonda Yatyi Ononkhumbi Apa Katutu Mambupuko.” Namphila omuendesi ulinga omapulo otyo ovateheleli vakumbulula, mahi ovateheleli kavakuluminyua okukumbulula. Omakumbululo alingwa na vana vapongiya nawa onthele maililongeswa, nokuatanga onotestu mbovihonekwa mbuvasiwamo. Eliongiyo limanuhuka notyiimbo nelikuambelo.—Mateus 26:30; Efésios 5:19.

Elilongeso Liombimbiliya Mewaneno

Kese simano Onombangi mba Jeova veliongiya vali Mondyuo Yomaliongiyo pala ononthele ononthatu. Eliongiyo olio lilingwa mo oola 1 no nominutu 45. Vahimbika Nelilongeso Liombimbiliya Mewaneno, mo nominutu 25. Onthele oyo ikuatesako ovateheleli okunoñgonoka vali nawa Ombimbiliya, pala okuviukisa omalusoke avo novituwa, opo vakale ovalongwa vafuapo va Kristu. (2 Timóteo 3:16, 17) Onthele ei, ipopia konthele Yombimbiliya, ilingwa nomapulo ovateheleli avakumbulula ngetyi tyilingwa monthele Yomutala Womulavi. Vana vaava omakumbululo kavakuluminyua. Melilongeso olio Liombimbiliya, mulilongeswa omukanda ine ombrochula yalingwa no Nombangi mba Jeova.

Omokonda yatyi meliongiyo velilongesila omikanda vipolwa Mombimbiliya? Kohale ankho katyituuka okutanga vala Ondaka ya Huku. Ankho “vahangununa nawa nokutanga monkhalelo yayandyuluka. Vatualako okutanga etyi tyiivala nawa.” (Neemias 8:8) Momanima okuya na kuno, kuelilongeswa omukanda wa Isaia, wa Daniele, no wa Revelação, viavatela vana veya keliongiyo eli, okunoñgonoka ononthele ombo mbo Mbimbiliya.

Osikola Yovilinga via Huku

Kelilongeso Liombimbiliya Mewaneno, kulandula Osikola Yovilinga via Huku. Onthele oyo ilingwa mono minutu 30, pala okukuatesako Ovakristau okukala “nounongo wokulongesa.” (2 Timóteo 4:2) Okuti una omona ine epanga uhole okukulinga omapulo amue konthele ya Huku ine o Yombimbiliya, iya ohetyivili okuekumbulula nawa? Osikola Yovilinga via Huku maikulongesa okukumbulula no Mbimbiliya omapulo epuiya. Ngotyo, tupondola okupopia nga Isaia, wati: “Ohamba Tatekulu Jeova wampha elaka lia vana valongoka, opo ndyityivile okukumbulula nondaka una wepuila.”—Isaías 50:4.

Osikola Yovilinga via Huku, ihimbika nelongomona liapolwa monthele imue Yombimbiliya, ina ovateheleli vaavelelwe ondundo yokuitanga. Tyina amamane, omulongomoni ukonga ovateheleli opo vapopie tyihasete ononthele mbakolela vavasa pokutanga ovikapitulu viaitwa mo programa. Konyima yonthele oyo, ovalongwa vokuelihonekesa mosikola, avalingi ononthele mbavo.

Ovalongwa vamue, vapewa onthele yokutanga Ombimbiliya kotribuna, ine okulekesa oñgeni tupondola okulongesa omunthu Ovihonekwa. Tyina kese omulongwa amana, omuendesi wosikola upandula omulongwa apa alinga nawa, okuundapesa omukanda Beneficie-se da Escola do Ministério Teocrático. Konyima, upondola okuavela omulongwa aike, onondonga esukisa.

Onthele ei kaikuatesako vala ovalongwa velihonekesamo, mahi tupu ivatela ovateheleli aveho vahanda okuyawisa ounongo wavo wokutanga, nokupopia nokulongesa. Osikola Yovilinga via Huku imanuhuka notyiimbo tyapolwa mo Mbimbiliya, akulandula onondaka mbokuikula Eliongiyo Liovilinga.

Eliongiyo Liovilinga

Onthele yahulililako, Eliongiyo Liovilinga. Mulingwa omalongomona, nomalekeso, nomapulo, otyo ovateheleli vakumbulula. Ngotyo, ovateheleli vakala nounongo wokulongesa otyili tyo Mbimbiliya. Etyi Jesus ehenetume ovalongwa vae okukaivisa, weveongiyile eveavela onondonga. (Lucas 10:1-16) Mokonda valongesilwe nawa pala ovilinga viokuivisa, vakalele nonongeleka ononyingi onongwa. Konyima, ovalanduli va Jesus aveya okutyipopia kwe. (Lucas 10:17) Ovikando ovinyingi, ovalongwa ankho velihipululila onongeleka mbavo.—Atos 4:23; 15:4.

O programa Yeliongiyo Liovilinga ilingwa mono minutu 35, kese hanyi iiya mokamukanda Ovilinga Vietu Viouhamba. Ononthele mbukahi nokulilongeswa hono mbumue mbati: “Fenda Jeova Kumue Nombunga Yove,” “Omokonda Yatyi Tukondaukila Okukevetalelapo,” “Hetekela Kristu Movilinga Viove Viokuivisa.” Eliongiyo limanuhuka notyiimbo, iya umue mewaneno aholovonwa opo alinge elikuambelo liokuhulililako.

Otyetyi Tyapopia Ovaenda

Omawaneno alinga ononkhono mbokuyakula nawa kese umue uya. Mongeleka, Andre weivile omahipululo omavi konthele Yonombangi mba Jeova. Etyi aya otyikando tyotete meliongiyo, ahuvu unene monkhalelo vemuyakula. Andre ati: “Ei omphangu ihambukiswa”. Tupu, ati “ame nahuva unene etyi ovanthu ava vanthambula noupanga nokuesuka unene name.” Ashel omukainthu umue mo Kanada nae wetyitave, ati: “Eliongiyo olio, nelipanda unene! Ankho tyapepuka okulandula etyi valongesa.”

Jose, ukala ko Brazili, ankho wiiwe nawa mokonda yovituwa viae vioukalavi. No ngotyo, wakongwa opo aye keliongiyo Mondyuo Yomaliongiyo potyilongo tyavo. Oe wati: “Mondyuo Yomaliongiyo vanthambula nohole, namphila ankho vei ovituwa viange ovivi.” Atsushi, ukala ko Japau uhinangela okuti: “Tyotyili ndyitavela okuti, onthiki yotete naya keliongiyo lio Nombangi mba Jeova, nelitehelele omapita unene. No ngotyo, naimbuka okuti ava ovanthu ovawa. Vankhuatesako okukala nawa pokati kavo.”

Ove Moyakulua Nawa

Ngetyi tyapopiwa novanthu ovo, okuenda komaliongiyo Mondyuo Yomaliongiyo, otyiwa unene. Ove mokelilongesa konthele ya Huku, iya nonondonga mbo Mbimbiliya mokapewa, Jeova Huku mekulongesa oñgeni ‘mopoloko esilivilo.’—Isaías 48:17.

Omaliongiyo Onombangi mba Jeova munyingilwa vala, kamuyumbwa onombongo pongalo. Okuti upondola okuenda keliongiyo limue Mondyuo Yomaliongiyo potyilongo tyenyi? Ukahi nokukongwa opo ukelitaleleko.

[Onondaka Pokatoi]

[Okakasa pefo 30]

Omalongomona Akolela pala Ounyingi

Pomalongomona Ombimbiliya aholovonwa alamba po 170 no nosapi mbelikalaila, muakutikinya ombu mbati:

◼ Etyi Utavela Konthele Yonthuko Yovanthu​—Okuti Tyakolela?

◼ Oñgeni Huku Atala Otyinepo Notyihola

◼ Okunyona Oohi Matyinkhindula Onyengo ya Huku

◼ Oñgeni Matutetulula Omasukalalo Omuenyo

◼ Okuti Omuenyo Ou Tuna Oo Vala?

[Olutalatu pefo 30]

Elongomona lio Mbimbiliya

[Olutalatu pefo 30]

Elilongeso “Liomutala Womulavi”

[Omalutalatu pefo 31]

Elilongeso Liombimbiliya Mewaneno

[Olutalatu pefo 31]

Osikola Yovilinga via Huku

[Olutalatu pefo 32]

Eliongiyo Liovilinga