Kala Nomutima Wakola, Jeova Ukahi Noove!

1, 2. (a) Ovituwa patyi mavitukuatesako okulwa novitateka? (b) Ekolelo oityi? Popia ongeleka.

OVILINGA via Jeova vituetela ehambu. Mahi, nonthue tuna ovitateka ngovanthu aveho, iya pamwe tumona ononkhumbi mokonda yokulinga etyi tyaviuka. (1 Ped. 3:14; 5:8, 9; 1 Cor. 10:13) Opo tutyivile okulwa novitateka ovio, tuesukisa okukala nekolelo, nomutima wakola.

² Ekolelo oityi? Apostolu Paulu wahoneka okuti: “Ekolelo onthumbi yotyotyili yovipuka vikevelelwa, elekeso liotyotyili liovipuka namphila viahamoneka.” (Heb. 11:1) Ombimbiliya onkhuavo ipopia okuti: “Ekolelo onthumbi yokuti ovipuka tukevelela, tunavioale. Okukala nonthumbi movipuka tueheete.” (Bíblia sagrada) Inkha tuna omukanda upopia okuti tuapewa otyipuka tyimwe, tukala nonthumbi yokuti otyipuka otyo otyetu umwe. Tupu, ekolelo tuna liokuti Huku apeho ufuisapo etyi apopia, likahi ngomukanda tuapewa wahonekua ovipuka viakolela unene. Ekolelo lietu litukalesa nonthumbi yokuti, omilao via Huku vikahi Mombimbiliya mavikafuisuapo, namphila nkhele tuehenevimone.

3, 4. (a) Okukola omutima oityi? (b) Oityi matyitukuatesako okupameka ekolelo lietu, nokukala nomutima wakola?

³ Ondaka okukola omutima ipitiyua okuti “okukala novituwa viapama, nokupopia nondundo, nokulinga ovipuka tyihena owoma tyina tuvasiwa novitateka, noviponga.” The New Interpreter’s Dictionary of the Bible (Dicionário Bíblico do Intérprete). Inkha tuna omutima wakola, tukala nononkhono, nokuapama, iya pamwe alo umwe katukala nowoma.—Marcos 6:49, 50; 2 Timóteo 1:7.

⁴ Ekolelo, nokukola omutima, ovituwa oviwa. Mahi, soka ñgeno tuliivite okuti tuesukisa vali ekolelo, nokukala nomutima wakola. Ombimbiliya ipopia ovanthu ovanyingi vaavele ongeleka ongwa konthele yovituwa ovio. Ngotyo, onkhalelo imwe itukuatesako okupameka ekolelo lietu, nokukala nomutima wakola, okulilongesa onongeleka ombo mbumwe.

 5. Oityi Josue ankho esukisa opo etyivile okufuisapo otyilinga tyae?

⁵ Tukondokei komanima ovityita 35 konyima. Ankho palambale omanima 40 tunde etyi Jeova ayovola ova Isilayeli koupika mo Egitu. Vahongolelelwe nomuuli Moisesi. Ankho una omanima 120, etyi alonda kotyitongo-tongo Tyomphunda Nebo atalela kokule Otyilongo Valaelwe, iya ngako ankhila. Wapingua na Josue omulume ankho “una unene ounongo.” (Deuteronômio 34:1-9) Ova Isilayeli ankho vehungi kokunyingila mo Kanaa. Opo Josue etyivile okuvehongolela nawa, ankho wesukisa okupewa ounongo na Huku. Tupu, ankho wesukisa okukala nekolelo mu Jeova nokukala nomutima wakola nokuapama.—Deuteronômio 31:22, 23.

 6. (a) Omukanda wa Josué 23:6 utulondola okulinga tyi? (b) Oityi tulilongesila konondaka mbukahi mu Atos 4:18-20 nomu Atos 5:29?

⁶ Ounongo, nomutima wakola, nekolelo Josue akalele navio mokueenda kuomuvo wokufinda o Kanaa, wapamekele unene ova Isilayeli. Ankho kavesukisile vala okukala nomutima wakola movilwa, mahi tupu ankho vesukisa okukala nomutima wakola opo valinge etyi Josue evepopila. Konthyulilo yomuenyo wae, Josue wapopile okuti: “Muna okukala nomutima wakola opo muendele, nokulinga atyiho tyahonekua movitumino via Moisesi, amuahayapukamo, okuyemba kokulio ine okokumbili.” (Josué 23:6) Nonthue tuesukisa okukala nomutima wakola opo tutavele apeho ku Jeova. Tupu tuesukisa okulinga ngotyo tyina ovanthu vetutuma okulinga tyimwe tyehelikuate nehando lia Huku. (Tanga Atos 4:18-20; 5:29.) Inkha tulikuambela ku Jeova nonthumbi, metukuatesako okukala nomutima wakola.

 7. Oityi ankho Josue esukisa okulinga opo akale nomutima wakola, nomuenyo omuwa?

⁷ Opo tukale nomutima wakola mautukuatesako okulinga ehando lia Huku, tuesukisa okulilongesa Ondaka yae, nokulinga etyi tulilongesa. Etyi Josue apinga pu Moisesi, otyo atuminwe okulinga. Wapopililwe okuti: “Kala vali nomutima wakola nokuapama unene, opo ulinge ngetyi tyipopia ovitumino aviho vina Moisesi omuumbili wange ekutuma . . . Omukanda ou wovitumino, uhakale kokule nomulungu wove. Iya ove una okuutangela pombuelo otyitenya notyinthiki, opo utyivile okulinga ovipuka aviho viahonekuamo. Mokulinga ngotyo ondyila yove mayeende nawa, iya mokalinga aviho nounongo.” (Josué 1:7, 8) Josue walandulile elondolo olio, iya ‘atyiho alingile atyiende nawa.’ Nonthue, inkha tulinga ngotyo, matukala nomutima wakola, iya atulingi nawa ovilinga via Huku.

 8. Oipi otestu yetu yenima 2013, iya oñgeni onondaka ombo mambukukuatesako?

⁸ Josue wapamekelue unene etyi eiva vali onondaka ombu mba Jeova: “Kala tyapama, nokuakola omutima. Wahakale nowoma, mokonda Jeova, Huku yove, ukahi nove kese oku wenda nako.” (Josué 1:9) Tupu, Jeova ukahi nonthue. Moluotyo, ‘tuahakalei nowoma’ tyina tuna ovitateka. Haunene, tupamekwa nonondaka ombu: “Kala tyapama, nokuakola omutima. . . . Jeova Huku yove ukahi noove.” Onondaka ombo mba Josue 1:9, mbaholovonwa opo mbukale otestu yetu yenima 2013. Tyotyili, onondaka ombo kumwe no nongeleka ononkhuavo mbekolelo nokukola omutima, mambutupameka mokueenda kuonohanyi mbulandulako.

 9. Omonkhalelo patyi Raabe akalele nekolelo nomutima wakola?

⁹ Etyi Josue atumine ovalavi vevali ko Kanaa, Raabe ekunga, weveholeka, iya apopila onondyale mbavo okuti vaya nondyila onkhuavo. Mokonda walingile ovipuka nekolelo, nomutima wakola, Raabe kumwe nombunga yae kavaipaelwe etyi epundaumbo lio Jerikoo liahanyaunwa nova Isilayeli. (Hebreus 11:30, 31; Tiago 2:25) Tyotyili, Raabe wayekelepo ovituwa viae ovivi, opo ahambukiswe Jeova. Tupu, vamwe vakala Ovakristau hono, vakala nekolelo, nomutima wakola opo valinge omapiluluko ngoo pala okuhambukiswa Huku.

10. Rute ankho ukahi monkhalelo patyi etyi etavela efendelo liotyotyili, iya otyo atyimuetela ononkhano patyi onongwa?

¹⁰ Etyi Josue anyima, Rute woko Moabe, wakalele nomutima wakola, etavela efendelo liotyotyili. Mokonda ankho omulume wae wali omu Isilayeli, Rute ankho wii ovipuka vimwe konthele ya Jeova. Inaivi yae Noemi, ankho ukala mo Moabe, mahi atokola okukondoka ko Mbelei mo Jelusalei. Etyi ankho vekahi mondyila, Noemi apopila Rute opo akondoke kovanthu vae, mahi, Rute akumbulula okuti: “Wahankhuluminye okukusapo, okunkhondola opo nehekulandule vali . . . Ovanthu vove mavakakala ovanthu vange, iya Huku yove, makakala Huku yange.” (Rute 1:16) Rute alingi umwe ngotyo. Etyi palamba omuvo umwe, Boasi ankho ombunga ya Noemi, anepe Rute, avakala nomona weya okukala omukuaukulu wa David na Jesus. Tyotyili, Jeova uyamba vana valinga ovipuka nekolelo nomutima wakola.—Rute 2:12; 4:17-22; Mateus 1:1-6.

11. Oñgeni Jeoiada na Jeoseba valekesile okuti vena omutima wakola, iya otyo atyieta tyi?

¹¹ Ekolelo lietu nomutima wetu, vipama vali tyina tutala okuti Huku ukahi na vana vapaka omasuka, nouwa wavakuavo tete tyipona avo muene. Tutalei ongeleka Yomunene-nakwa, Jeoiada nomukai wae Jeoseba. Etyi ohamba Akazias yankhia, me yae Atalia, waipaa ovanthu aveho ankho vapondola okumupinga kouhamba, iya ahimbika okutumina, mahi kaipaele Joasi. Jeoiada na Jeoseba, vapakele omuenyo wavo motyiponga, avaholeka Joasi, omona wa Akazia mokueenda kuomanima epandu. Menima liapanduvali, Jeoiada avialeka Joasi kouhamba, iya Atalia aipawa. (2 Reis 11:1-16) Konyima, Jeoiada akuatesako Ohamba Joasi okupindulapo ondyuo ya Huku. Iya Jeoiada wankhia etyi atuukisa omanima 130, apakwa melangalo lio nohamba, “mokonda walingile ovipuka oviwa mo Isilayeli, na Huku yotyotyili, nondyuo Yae.” (2 Crônicas 24:15, 16) Haunene, mokonda Jeoiada nomukai wae vakalele nomutima wakola, vakuatesako opo ombunga yonohamba omu ankho mamutuku David na Mesiya, mbutualeko.

12. Oityi Ebedemeleke alingile, tyalekesile okuti ankho wakola omutima?

¹² Ebedemeleke ankho uundapa meumbo lio Hamba Zedekia, wapakele omuenyo wae motyiponga mokonda ya Jeremia. Ohamba yahongiliyilwe novatumini vo Judaa, vapopia okuti Jeremia omphuki, iya ohamba atumu vemupake metoto, ankho lina onthata opo ankhilemo. (Jeremias 38:4-6) Otyo ankho katyapepukile mokonda Jeremia ankho uyelwe unene, mahi nongotyo Ebedemeleke akapopia na Zedekia opo akuateseko omuuli Jeremia. Zedekia etavela iya atumu ovalume 30 vahindikile Ebedemeleke opo vakayovole Jeremia. Konyima Jeova atumu omuuli okupopila Ebedemeleke okuti omuenyo wae mauhupiswa tyina ova Mbambilonia vameya okuhanyako o Jelusalei. (Jeremias 39:15-18) Huku uyamba vana vakala nomutima wakola.

13. Oityi ova Hebreu vetatu valingile, iya oityi ongeleka yavo itulongesa?

¹³ Motyita tyapanduvali, P.K.E., ova Hebreu vetatu ovaumbili va Jeova vamuene nawa okuti Huku uyamba vana vena ekolelo, nomutima wakola. Ohamba Nambukondonosole yaongiyile ovatumini aveho vo Mbambilonia evetumu vafende otyilolo otyinene tyoolu. Una ankho wehetavela okufenda, uyumbwa mofolono yotupia. Ova Hebreu vetatu, nonthilo, avapopila Nambukondonosole okuti: “Huku yetu, una tuumbila upondola okutuyovola. Metuyovola mofolono yotupia no pomaoko ove, Ove hamba. Mahi, inkha ketyilingi, Ove hamba noñgonoka okuti kamatuumbila ono huku mbove, tupu kamatufende otyilolo tyove tyoolu.” (Daniel 3:16-18) Onkhalelo ihuvisa ova Hebreu vetatu vayovolwa, yapopiwa mu Daniel 3:19-30. Namphila onthue katuhongwa okupakwa mofolono yotupia, nonthue tupita movitateka vilola ekolelo lietu, iya tupondola okukala nonthumbi yokuti Huku metuyambe mokonda yekolelo lietu nomutima wakola.

14. Ngetyi tyipopia Daniel okapitulu 6, oñgeni Daniele akalele nomutima wakola, iya otyo atyieta tyi?

¹⁴ Daniele walekesile okuti una ekolelo nomutima wakola, etyi onondyale mbae mbahongiliyile Ohamba Daliu opo aave otyitumino tyokuti “una wehelikuambela kwe mahi elikuambela ku huku umwe ine okomunthu omukuavo mokueenda kuononthiki omakwi etatu, apakwe meleva liononkhulika.” Etyi Daniele eiva okuti ohamba yaava otyitumino otyo, “wanyingila mondyuo yae, iya aikula onondyanena ankho mbapilukila ko Jelusalei, aikila konongolo, alo umwe ovikando vitatu motyitenya, okulikuambela nokunkhimaneka Huku yae, ngetyi ankho alinga-lingale.” (Daniel 6:6-10) Mokonda yokuakola omutima, Daniele wapakelue meleva liononkhulika, mahi Jeova emuyovola.—Daniel 6:16-23.

15. (a) Akila na Prisila vaava ongeleka patyi konthele yokukala nekolelo, nomutima wakola? (b) Onondaka mba Jesus mu João 13:34 mbuhangununa tyi? Oñgeni Ovakristau ovanyingi valekesa ohole oyo?

¹⁵ Ombimbiliya kaipopi omonkhalelo patyi, mahi Akila na Prisila ‘vapakele omuenyo wavo motyiponga, mokonda ya Paulu.’ (Atos 18:2; Romanos 16:3, 4) Nomutima wakola, valingile ngetyi Jesus apopile okuti: “Ndyimupa otyitumino otyipe, tyokuti kalei nohole pokati kenyi, ngetyi ame ndyimuhole, nonwe kalei nohole kese umwe namukuavo.” (João 13:34) Ovitumino Viapelwe Moisesi ankho vituma okuti omunthu una okukala nohole navakuavo ngetyi oe muene elihole. (Levítico 19:18) Mahi, otyitumino tya Jesus ankho “otyipe” mokonda ankho ukahi nokupopia ohole itulunda alo umwe okuava omuenyo wetu mokonda yavakuetu, ngetyi oe alingile. Ovakristau ovanyingi valekesa ohole ‘pokupaka omuenyo wavo motyiponga’ opo vaholeke ovakuatate vavo no nomphange vahanda okuvetwa ine okuipawa no nondyale.—Tanga 1 João 3:16.

16, 17. Oñgeni ekolelo liovalanduli vamwe va Kristu votete lialolelwe? Oñgeni otyo tyilifwa nongeleka Yovakristau vamwe hono?

¹⁶ Nga Jesus, Ovakristau vopotete ankho vafenda vala Jeova. (Mateus 4:8-10) Ankho velityilika okulinga ovilikutila pala okunkhimaneka omutumini wo Roma. (Tala olutalatu.) Daniel P. Mannix wahoneka okuti: “Kavehi vayekelepo okukala Ovakristau, namphila apeho ankho patemeswa otupia pala okupakamo vana vatualako. Vana ankho veli mokaleya, vena okukuata o isesu aveinyanye potupia, iya avapewa Omukanda Wotyilikutila, opo vayovolwe. Tupu ankho vapopilwa nawa-nawa okuti, kavekahi nokufenda omutumini, mahi vekahi nokuimbuka okuti nae ankho ukahi ngatyina o huku, onkhalamutwe yo Roma. Nongotyo, Ovakristau ovanyingi ankho kavetyitale ngatyina omphitilo yokuyovoka.”—Those About to Die, (Vana Mavankhi).

¹⁷ Mononthiki mbetu, Ovakristau ovanyingi vapakelwe movikaleya vio Nazista opo vaipawe, iya apeho ankho vapewa omukanda vahonekemo okuti kavahande vali okukala Onombangi mba Jeova opo vayovolwe. Mahi, kavehi vahonekele omukanda oo. Momanima okualamba, etyi ova Tutsi nova Hutu ankho vekahi nokulipaa ko Ruanda, Onombangi ovanyingi ova Tutsi vapakele omuenyo wavo motyiponga pala okuamena Onombangi ova Hutu. Okulinga ngotyo ankho tyesukisa ekolelo nomutima wakola.

18, 19. Onongeleka patyi mbekolelo nokukola omutima, mambutukuatesako movilinga vietu viokuivisa?

¹⁸ Onthue hono tuna elao liokuundapa movilinga ovinene vali Huku aavela ovanthu vemuumbila, ovilinga viokuivisa onondaka Mbouhamba nokulinga ovalongwa. (Mateus 24:14; 28:19, 20) Tupandula unene mokonda Jesus wetuavela ongeleka imwe ongwa! Oe ankho wenda “momapundaumbo omanene nomatutu, okuivisa onondaka onongwa mbouhamba wa Huku.” (Lucas 8:1) Nga Jesus, tuesukisa okukala nekolelo nomutima wakola opo tuivise onondaka Mbouhamba. Nombatelo ya Huku, tupondola okukola omutima nga Noe, ‘waivisile ouviuki’ nombili “mouye wovanthu onondingavivi” ankho uhungi kokuhanyuako nombila onene.—2 Pedro 2:4, 5.

¹⁹ Elikuambelo litukuatesako movilinga vietu viokuivisa. Etyi ovalanduli vamwe va Kristu ankho vekahi nokumoneswa ononkhumbi, velikuambelele opo ‘vapopie ondaka ya Huku tyihena owoma,’ iya avakumbululwa. (Tanga Atos 4:29-31.) Inkha ukala nohonyi tyina wivisa umbo na umbo, likuambela okuita ekolelo liamapa nomutima wakola, iya Jeova mekukumbulula.—Tanga Salmo 66:19, 20.a

20. Ombatelo patyi onthue vaumbili va Jeova tuna?

²⁰ Katyapepukile okulinga ehando lia Huku mokonda yovitateka tuna mouye uno wononkhumbi. Mahi, katukahi atuike. Huku ukahi nonthue. Nomona wae, Omutwe weuaneno. Tupu, tuna ovakuatate valamba po 7.000.000 Onombangi mba Jeova mouye auho. Kumwe navo, tutualeiko okukala nekolelo, nokuivisa onondaka onongwa, nokuhinangela otestu yetu yenima 2013, yati: “Kala tyapama nokuakola omutima. . . . Jeova, Huku yove, ukahi nove.”—Josué 1:9.