Ouwa Utundilila Kovilinga Viokuivisa—“Omapia . . . Ayela pala Okuteya”

1, 2. (a) Omokonda yatyi ovalongwa ankho vanguanguanena? (b) Okuteya patyi Jesus ankho apopia?

OVALONGWA ankho vanguanguana. Jesus wevetolela okuti: “Yelulei omaiho enyi amutale omapia, ayela pala okuteya.” Ovalongwa avatale oku ankho evelekesa, mahi etyi ankho veete, omapia ena ovilia viamena pahetyino kavipepi okuyela. Avahimbika okulipula okuti: ‘Oityi matyiteyua?’ ‘Nkhele kuakambela onohanyi ononyingi opo ovilia viteyue.’—João 4:35.

² Mahi, Jesus ankho kekahi nokupopia okuteya ovilia. Anthi, waundapesa omuvo oo, opo alongese ovalongwa vae ovipuka vivali viakolela, konthele yovilinga via Huku viokuteya, okukuatesako ovanthu okuya meongano liae. Ovipuka ovio ovipi? Opo tukumbulule tutalei vali nawa ovipuka viaendapo.

 3. (a) Etyi Jesus ati: “Omapia . . . ayela pala okuteya,” tyafuile ankho upopia valie? (Tala pokatoi.) (b) Oñgeni Jesus ayandyulula nawa onondaka mbae?

³ Jesus watomphola novalongwa vae konthele yonthyulilo yenima 30 P.K., popepi yepundaumbo lio Samaria ko Sikale. Puetyi ovalongwa vae vanyingila mepundaumbo, Jesus ankho wesala ponthele yonyombo iya alongesa omukai umwe otyili tyo Ndaka ya Huku. Omukai oo liwa-liwa aimbuka esilivilo lietyi Jesus alongesa. Etyi ovalongwa vakondoka, omukai akuluminya okuenda ko Sikale opo akapopile ovo munthele yae ovipuka vihuvisa alongeswa. Ovanthu avesuku unene novipuka apopia, iya ovanyingi avahateka opo vakavase Jesus ponyombo. Tyafuile pomuvo opo, Jesus watala kokule amono ova Samaliya ovanyingi vekahi nokuya, iya apopi okuti: “Talei omapia, ayela pala okuteya.” a Konyima, opo Jesus alekese okuti kapopi okuteya ovilia, mahi upopia ovilinga via Huku, ayawisako okuti: “Omuteyi ukahi . . . nokuongiya ovinyango pala omuenyo wahapu.”—João 4:5-30, 36.

 4. (a) Ovipuka patyi vivali Jesus alongesa konthele yovilinga viokuteya? (b) Omapulo patyi matulilongesa?

⁴ Ovipuka patyi vivali viakolela konthele yovilinga via Huku viokuteya Jesus alongesa? Tete, ovilinga vina okulingwa nondyanga. Onondaka mbae mbokuti “omapia . . . ayela pala okuteyua,” ankho mbulunda ovalongwa vae pala ovilinga. Opo akuateseko ovalongwa vae okutala okuti ovilinga viesukisa ondyanga, Jesus wayawisako okuti: “Omuteyi ukahiale nokutambula ofeto.” Tyotyili, ovilinga viokuteya viahimbikale, hamuvo wokuseta! Vali, ovaundapi vahambukwa. Jesus wati ovakuni novateyi “vahambukilwa kumwe.” (João 4:35b, 36) Ngetyi Jesus ahambukilwe etyi amona “ova Samaliya ovanyingi vemuyumba onthumbi,” novalongwa vae navo mavakala nehambu enene putyina vaundapa movilinga viokuteya nomutima auho. (João 4:39-42) Otyo tyakolela unene pala onthue hono, mokonda tyilekesa nawa etyi tyikahi nokumoneka hono mokueenda kuovilinga viavilapo viokuteya. Onalupi ovilinga viokuteya mononthiki mbetu viahimbika? Ovalie vekahi nokuvilinga? Oityi vikahi nokueta?

 5. Olie uhongolela ovilinga viokuteya mouye auho? Oñgeni emonekelo lia João lialekesa okuti ovilinga ovio vina okulingwa nondyanga?

⁵ Memonekelo liapelwe Oapostolu João, Jeova walekesa okuti waholovona Jesus opo ahongolele ovilinga viavilapo viokuongiya ovanthu mewaneno liae. (Tanga Apocalipse 14:14-16.) Memonekelo olio, Jesus walekesa okuti una ekolowa liouhamba nofoso. “Ekolowa lioolu komutwe wa [Jesus]” lilekesa okuti oe Ohamba ikahi nokutumina. “Ofoso yokuatwa pomaoko ae,” ilekesa okuti una otyilinga Tyokuteya. Etyi Jeova atuma oandyu ipopie okuti “ovikuna kombanda yohi viayela,” ukahi nokulekesa okuti ovilinga ovio viesukisa okulingwa nondyanga. Tyotyili, “omuvo wokuteya wehikapo,” hamuvoko wokuseta! Mokutavela etyi Huku emutuma, “okupaka ofoso yae” Jesus apolopo ofoso yae, iya ahimbika okuteya. Emonekelo olio lihambukiswa, tupu lituhinangelesa okuti “omapia . . . ayela pala okuteya.” Okuti emonekelo olio litukuatesako okutala onalupi ovilinga viokuteya mouye auho viahimbika? Enga!

 6. (a) Onalupi “omuvo wokuteya” wahimbika? (b) Onalupi “ovilinga viokuteya” viononthiki mbuno viahimbika? Hangununa.

⁶ Mokonda emonekelo lia João mu Apocalipse okapitulu 14 lilekesa okuti Jesus Omuteyi, wavala ekolowa (oversikulu 14), otyo tyilekesa okuti ankho wavialekuale Kouhamba mo 1914. (Dan. 7:13, 14) Etyi omuvo oo uhenehikepo, Jesus watumwa ahimbike ovilinga viokuteya, (oversikulu 15). Ovipuka ovio tupu viapopiwa monthengele popia ya Jesus konthele yokuteya otiliku, omu apopia okuti: “Ovilinga viokuteya, onthyulilo youye uno.” Ngotyo, omuvo wokuteya nonthyulilo youye viahimbika momuvo wike, mo 1914. (Mat. 13:30, 39) Tyina tutala konyima, tuimbuka okuti ovilinga viokuteya vio hono, viahimbika etyi palamba omanima amwe, tunde etyi Jesus akala Ohamba. Tete, okuhimbikila mo 1914 alo konthyimbi yo 1919, Jesus walinga ovilinga viokusukukisa ovalanduli vae ovalembulwa. (Mal. 3:1-3; 1 Ped. 4:17) Konyima, mo 1919 “ovilinga viokuteya pano pohi” avihimbika. Liwa-liwa, Jesus aundapesa omupika wekolelo nokualunguka ankho aholovona pahe, opo akuateseko ovakuatate vetu okutala okuti ovilinga viokuivisa viesukisa ondyanga. Tala etyi tyaendapo.

 7. (a) Oityi tyikuatesako ovakuatate vetu, okuimbuka okuti ovilinga viokuivisa vihanda okulumbana? (b) Ovakuatate vetu vapewa ondundo yokulinga tyi?

⁷ Mu Kakwenye yo 1920, Omutala Womulavi wati: “Okutala nawa Ovihonekwa vilekesa okuti, ongeleya yapewa otyilinga otyiwa, tyokuivisa Ouhamba wa Huku.” Mongeleka, onondaka mbeulo lia Isaia mbakuatesako ovakuatate okutala okuti, onondaka onongwa Mbouhamba wa Huku mbuna okuiviswa mouye auho. (Isa. 49:6; 52:7; 61:1-3) Oñgeni ovilinga ovio mavilingwa, ankho kavetyii, mahi ankho vena onthumbi yokuti Jeova meveikulila ondyila. (Tanga Isaías 59:1.) Mokonda vanoñgonoka nawa okuti ovilinga viokuivisa, viesukisa okulingwa nondyanga, ovakuatate vetu vapewa ondundo yokuyawisa ovilinga viavo viokuivisa. Iya ovakuatate avalingi ñgeni?

 8. Mo 1921, ovipuka patyi vivali ovakuatate vetu vanoñgonoka konthele yovilinga viokuivisa?

⁸ Mu Kayovo yo 1921, Omutala Womulavi wapopia okuti: “Eli enima liavilapo komakuavo. Ovanthu ovanyingi vekahi nokutavela vali otyili mo 1921 tyipona omanima okualamba.” Auyawisako okuti: “Nkhele kuna ovilinga ovinyingi vina okulingwa. . . . Tulingei ovilinga evi nehambu.” Tala oñgeni ovakuatate vanoñgonoka ovipuka vivali viakolela konthele yovilinga viokuivisa Jesus atuma ono apostolu mbae: Ovilinga vina okulingwa nondyanga, iya ovaundapi vahambukwa.

 9. (a) Mo 1954, oityi Omutala Womulavi wapopia konthele yovilinga viokuteya, iya omokonda yatyi? (b) Eliyawiso patyi liovaivisi liamoneka mokueenda kuomanima 50 okualamba? (Tala omapa yati “Eliyawiso Ouye Auho.”)

⁹ Mokueenda kuomanima 1930, etyi ovakuatate vanoñgonoka okuti otyinyingi otyinene tyonongi ononkhuavo, mavetavela onondaka Mbouhamba wa Huku, avaundapa vali nombili movilinga viokuivisa. (Isa. 55:5; João 10:16; Rev. 7:9) Otyo atyieta tyi? Ovaivisi vonondaka Mbouhamba wa Huku ankho vena 41.000 mo 1934, aveliyawisa avakala 500.000 mo 1953! Omutala Womulavi 1 ya Kayovo yo 1954, wapopia okuti: “Ospilitu ya Jeova nononkhono mbo Ndaka yae, ovio vikahi nokufuisapo otyilinga etyi otyinene tyokuteya mouye auho.”b—Zac. 4:6.

10, 11. Ovipuka patyi viapopiwa unene monthengele-popia yoñgima yomostarda, konthele yokukula kuombuto?

¹⁰ Mononthengele-popia mbae Mbouhamba, Jesus waula etyi ovilinga viokuteya vikahi nokulingwa hono mavieta. Tutalei onthengele-popia yoñgima yomostarda no yonkhiso.

¹¹ Onthengele-popia yoñgima yomostarda. Omulume umwe wakuna oñgima yomostarda. Oñgima oyo aikulu aikala omuti omu oviila vikala. (Tanga Mateus 13:31, 32.) Ovipuka patyi viapopiwa konthele yokukula kuombuto monthengele-popia ei? (1) Ikula monkhalelo ihuvisa. “Okañgima okatutu, ko nombuto ambuho,” mahi kakala omuti una “onompha ononene.” (Mar. 4:31, 32) (2) Onthumbi yokuti maikulu. “Tyina [ombuto] yamakunwa, ikula.” Jesus katile “ipondola okukula.” Mahi wati: “Ikula.” Kaipondola okutyilikwa okukula. (3) Oviila viahatekela momuti oo wekula, avivasi omphangu. “Oviila vio peulu viya” iya “avivasi omphangu nokahi mombuelo yao.” Oñgeni ononthele ombo ononthatu mbelikuata kumwe nokuteya kulingwa mononthiki mbuno?

12. Oñgeni onthengele-popia yoñgima yomostarda yelikuata novilinga viokuteya hono? (Tupu tala omapa yati “Ombalulo Yovalongwa Vombimbiliya Iliyawisa.”)

¹² (1) Okukula alo pi: Oñgima yomostarda ilekesa okukula kuonondaka Mbouhamba newaneno lio Vakristau. Tunde mo 1919, ovaundapi vombili vekahi nokuongiyua mewaneno Liovakristau liapindulwapo. Pomuvo opo, ovaundapi ankho kavehi, mahi veliyawisa liwa. Tyotyili, okukula kuayo kuhuvisa unene. Yahimbika noñgima onthutu konthyimbi yomanima 1900, hono, omuti una “onompha ononene.” (Isa. 60:22) (2) Onthumbi: Ewaneno Liovakristau litualako okukula tyihatalama. Namphila ombuto yavasa onondyale ononyingi, mahi itualako okukula. (Isa. 54:17) (3) Otyiholamo: “Oviila vio peulu” vivasa otyiholamo momuti, vilekesa ovanthu ovanyingi vomitima viaviuka vatunda movilongo 240, vekahi nokutavela onondaka Mbouhamba avalingi onthele yewaneno lio Vakristau. (Eze. 17:23) Omo, vavasa eameno, nokupewa okulia kupameka oupanga wavo na Jeova.—Isa. 32:1, 2; 54:13.

13. Onthengele-popia yonkhiso ipopia ovipuka patyi konthele yokukula?

¹³ Onthengele popia yonkhiso. Etyi omukai umwe ayawisa onkhiso momasa okulinga onombolo, omasa aeho aitutumuka. (Tanga Mateus 13:33.) Ovipuka patyi konthele yokukula kuombuto, viapopiwa unene monthengele-popia ei? Tutaleipo vivali. (1) Okukula kueta omapiluluko. Onkhiso yeliyandyana “alo omasa aeho atutumuka.” (2) Ikula okuliyandyana. Onkhiso itutumukisa omasa atyo aeho, ‘ohinde ankho yaelekwa’. Oñgeni ononthele ombo onombali mbelikuata novilinga vio hono viokuteya?

14. Oñgeni onthengele-popia yonkhiso yelikuata novilinga viokuteya hono?

¹⁴ (1) Omapiluluko: Onkhiso, onondaka Mbouhamba wa Huku, iya omasa, ovanthu. Ngetyi onkhiso ilinga omapiluluko tyina yamahonyekwa nohinde, tupu onondaka Mbouhamba wa Huku, mbulinga omapiluluko momitima viomunthu tyina vametavela onondaka ombo. (Rom. 12:2) (2) Okuliyandyana: Okuliyandyana kuonkhiso, kulekesa okuliyandyana kuonondaka Mbouhamba wa Huku. Onkhiso iliyandyana momasa aeho alo atutumuka. Tupu, onondaka Mbouhamba wa Huku mbukahi nokuliyandyana “alo kononthele mbokokule-kule mbohi.” (Atos 1:8) Onthele oyo yonthengele-popia tupu ilekesa okuti onondaka Mbouhamba wa Huku mbuliyandyana, alo umwe kovilongo kuna ovilinga vietu viailikwa, namphila kavimoneka unene kovanthu movilongo ovio.

15. Oñgeni onondaka mbuvasiwa mu Isaías 60:5, 22 mbukahi nokufuisuapo? (Tala okakasa kati “O Jeova Wetyilinga” pefo 93 no kokuati “Oñgeni ‘Okatutu’ Kakala ‘Elongo Liapama.’”pomafo 96-97)

¹⁵ Etyi kuakambela omanima 800 opo Jesus apopie onthengele-popia oyo, Jeova watumine Isaia okuula monkhalelo yavilapo eliyandyano liovilinga viokuteya vikahi nokulingwa hono, nehambu vieta.c Jeova wapopia ovanthu “vatunda kokule,” veya meongano liae. Etyi apopia “nomukai,” hono otyihupe tyovalembulwa pano pohi, wati: “Motyimono okala nehambu olaima, iya omutima wove maulombauka nehambu enene, mokonda moetelwa omalumono omelunga, iya omalumono omalongo maeya kuove.” (Isa. 60:1, 4, 5, 9) Onondaka ombo ombotyotyili! Hono, vana vekahiale nokuumbila Jeova omuvo omunyingi nkhele vatualako nehambu, putyina vatala ovaivisi Vouhamba wa Huku movilongo viavo veliyawisa, etyi vahimbika kavehi mahi pahe vakala ovanyingi.

16, 17. Omokonda yatyi ‘omukuni nomuteyi mavahambukilwa kumwe’? (Tupu tala okakasa kati “Oñgeni Onotratadu Onombali Mbehika Komitima Viovanthu Vevali mo Amazonia.”)

¹⁶ Hinangele okuti Jesus wapopila ovalongwa vae, okuti: “Omuteyi ukahi . . . nokuongiya ovinyango pala omuenyo wahapu, opo omukuni nomuteyi vahambukilwe kumwe.” (João 4:36) Oñgeni “tuhambukilwa kumwe” movilinga viokuteya mouye auho? Omononkhalelo ononyingi. Tutalei ononthatu.

¹⁷ Tete, tuhambukwa tyina tutala etyi Jeova ekahi nokulinga movilinga ovio. Tyina tuivisa onondaka Mbouhamba, tukuna ombuto. (Mat. 13:18, 19) Tyina tukuatesako omunthu umwe akala omulongwa wa Kristu, ngotyo tuteya ovinyango. Iya onthue atuho tuhambukwa unene tyina tutala oñgeni Jeova ekahi “nokumenesa, nokukulisa” ombuto Youhamba wae. (Mar. 4:27, 28) Ombuto imwe tukuna iseta okumena iya aikateyua navakuetu. Ove hamwe una ongeleka ngo ya Joan Omphange Omukristau ko Grã-Bretanha wambatisalua momanima 60 konyima. Wati: “Ndyihole okuvasa ovanthu vamphopila okuti, ame nakuna ombuto momutima wavo puetyi ankho ndyiivisa omanima amwe konyima. Iya Onombangi vakuetu avelilongesa navo Ombimbiliya avevekuatesako okukala ovaumbili va Jeova, otyo ame nehetyii. Tyinthyambukiswa tyina ndyitala okuti ombuto nakuna yekula aiteyua.”—Tanga 1 Coríntios 3:6, 7.

18. Ehunga patyi liokuhambukwa liapopiwa mu 1 Coríntios 3:8?

¹⁸ Vali, matutualako okuundapa nehambu tyina tusoka etyi Paulu apopia: “Kese umwe makatambula ondyambi yae, yatokala movilinga viae.” (1 Cor. 3:8) Ovanthu mavayambwa mokonda yovilinga valinga, ha mokonda vakuatesako ovanthu ovanyingi okutavela otyili. Otyo, tyipameka unene vana vaundapa movilongo muna ovanthu ovanyingi vehetavela otyili! Komaiho a Huku, kese Mbangi uundapa nomutima auho movilinga viokukuna, “wava ovinyango ovinyingi.” Moluotyo, una ehunga liokuhambukwa.—João 15:8; Mat. 13:23.

19. (a) Oñgeni eulo lia Jesus livasiwa mu Mateus 24:14, lielikuata nehambu lietu? (b) Oityi tuesukisa okuhinangela, inkha pamwe katukahi nokulinga omulongwa nawike?

¹⁹ Tatu, tuhambukwa, mokonda ovilinga vietu vikahi nokufuisapo eulo. Tala ekumbululo Jesus aava etyi ono apostolu mbae vapula okuti: “Olipi enyingilikilo malilekesa okuti ove weyale, iya tukahi konthyulilo youye?” Jesus evepopila okuti onthele imwe yenyingilikilo olio, ovilinga viokuivisa ouye auho. Okuti ankho upopia ovilinga viokulinga ovalongwa? Au. Wati: “Onondaka ombu onongwa Mbouhamba wa Huku, mambukaiviswa kombanda yohi aiho, pala oumbangi.” (Mat. 24:3, 14) Ngotyo, okuivisa Ouhamba wa Huku, okukuna ombuto, onthele imwe yenyingilikilo. Moluotyo, tyina tuivisa onondaka onongwa Mbouhamba, tutyii okuti namphila pamwe tuhalingi ovalongwa, mahi tukahi nokuava “oumbangi.”d Tyilenge ovanthu vetavela ine kavetavela, mahi tukahi nokukuatesako okufuisapo eulo lia Jesus, iya tuna ehambu “liokuundapa kumwe na Huku.” (1 Cor. 3:9) Tuna ehunga enene liokuhambukwa ngatyi!

20, 21. (a) Oñgeni onondaka mba Malaquias 1:11, mbukahi nokufuisuapo? (b) Konthele yovilinga viokuteya oityi ove watokola okulinga? Omokonda yatyi?

²⁰ Pomuvo wono apostolu, Jesus wevekuatesileko okuimbuka okuti ovilinga viokuteya viesukisa ondyanga. Okutuka mo 1919 okuenda no komutwe, Jesus ukahi nokukuatesako ovalongwa vae, okukala nolusoke olo. Moluotyo, ovanthu va Huku vekahi nokuyawisa ovilinga viavo. Tyotyili, ovilinga viokuteya vilekesa okuti nawike upondola okuvitalameka. Ngetyi omuuli Malakia aula, ovilinga viokuivisa vikahi nokulingwa “okutunda koutundilo wekumbi alo koutakelo walio.” (Mal. 1:11) Tyotyili, okutuka koutundilo alo koutakelo, kese apa vekahi, ovakuni novateyi vaundapela kumwe iya vena ehambu. Tunde komuhuka alo kongulohi ine onthiki aiho, tuundapa nondyanga.

²¹ Tyina pahe hono tutala konyima omanima 100, oñgeni otyikundyi otyitutu tyovaumbili va Huku tyekula, atyikala “elongo liapama,” omutima wetu “uhambukwa unene.” (Isa. 60:5, 22) Ehambu olio, nohole yetu na Jeova “Muene wovilinga viokuteya,” lilunda kese umwe puonthue okutualako okuundapa, pala okumanuhula ovilinga ovio viavilapo viokuteya!—Luc. 10:2.