Vokuankhia Vena Ekevelelo Liokukatutiliswa

Okuti utavela omulao Wombimbiliya wokuti vokuankhia mavakatutiliswa?a Ekevelelo liokukelivasa vali na vana tuhole vankhiale lituhambukiswa unene. Mahi okuti ekevelelo olio oliotyotyili umwe? Opo tukumbulule epulo olio, tutale ongeleka yono apostolu mba Jesus Kristu.

Ono apostolu ankho vetavela okuti vokuankhia mavakatutiliswa. Omokonda yatyi? Omokonda yomahunga evali. Tete, omokonda ankho vetyii okuti Jesus watutilisua. Ono apostolu, “novakuatate ankho valamba po 500,” vamuene Jesus etyi atutiliswa. (1 Coríntios 15:6) Tupu, ngetyi tyilekesa ono Evandyeliu ononkhuana, etutilo lia Jesus lianoñgonokelwe, nokutavelwa novanthu ovanyingi.​—Mateus 27:62–28:20; Marcos 16:1-8; Lucas 24:1-53; João 20:1–21:25.

Vali, ono apostolu ankho opo vekahi etyi Jesus atutilisile ovanthu ovikando vitatu, ko Naim, noko Kafarnau, noko Betania. (Lucas 7:11-17; 8:49-56; João 11:1-44) Etutilo liahulililako liapopiwa monthele yotete yomukanda ou, o liepanga enene lia Jesus. Tutalei vali nawa etyi tyamonekelepo.

“Omphange yove mapindukapo.” Onondaka ombo Jesus wembupopilile Marta, omphange ya Lasalu. Iya ankho palambale ononthiki ononkhuana tunde etyi Lasalu ankhia. Potete Marta ankho kanoñgonokele nawa onondaka mba Jesus. Akumbulula okuti: “Ndyityii okuti makapindukapo,” mahi ankho usoka okuti o komutwe wandyila vala. Pahe soka oñgeni akalele etyi Jesus apopia okuti: “Ame tutilo nomuenyo,” iya atutilisa omphange yae!​—João 11:23-25.

Etyi Lasalu ankhia opi aile? Lasalu kapopile natyike tyilekesa okuti ankho una oku ekahi ononthiki ombo ononkhuana. Lasalu ankho utupu ohande yahankhi yaile keulu. Etyi Jesus atutilisa Lasalu, ankho kekahi nokumukondola pano pohi, okumupola komphangu ongwa keulu ponthele ya Huku. Naina opi ankho Lasalu ekahi ononthiki ombo ononkhuana? Tyotyili, ankho ulele meendo.​—Eclesiastes 9:5, 10.

Hinangela, Jesus waelekele omunthu wankhia nomunthu ulele, iya upondola okupahuluapo vala tyina amatutiliswa. Ehipululo liati: “‘Epanga lietu Lasalu wakapululukuapo, mahi ame mandyendeko opo ndyikemupahulepo.’ Mahi, ovalongwa avemukumbulula okuti: ‘Tatekulu, inkha wakapululukuapo, mapahukapo.’ Anthi, Jesus ankho ukahi nokupopia okuti wankhia. Mahi, ovo ankho vasoka okuti ukahi nokupopia okuti ulele. Iya pahe Jesus evepopila nawa okuti: ‘Lasalu wankhia.’” (João 11:11-14) Etyi Jesus atutilisa Lasalu, wemukondolela omuenyo wae, emukondola pombunga yae. Otyo tyotyili tyahambukisilwe unene ombunga oyo!

Puetyi Jesus ankho ekahi pano pohi, watutilisile ovanthu. Otyo, tyilekesa etyi makalinga komutwe tyina amakala Ohamba Youhamba wa Huku.b Tyina Jesus amatumina ovanthu pano pohi, makatutilisa vana velele momaendo. Otyo apopilile okuti: “Ame tutilo nomuenyo.” Nkhele soka kehambu mokakala nalio tyina wamekelivasa na vana uhole! Tupu soka kehambu vana mavatutiliswa mavakakala nalio!​—Lucas 8:56.

Jesus wapopilile Marta okuti: “Una ukala nekolelo muame, namphila ankhia, makala vali nomuenyo. Iya kese umwe una omuenyo, nekolelo muame, kamakankhia vali.” (João 11:25, 26) Vana Jesus makatutilisa mokueenda kuoutumini wae womanima ovityita ekwi, mavakakalako apeho, inkha vakala nekolelo mwe.

Etyi amana okupopia onondaka ombo mbakolela konthele yetutilo, Jesus apulu Marta okuti: “‘Otyo ove utyitavela?’ Emukumbulula okuti: ‘Eenga Tatekulu, ndyitavela okuti ove Kristu, Omona wa Huku.’” (João 11:26, 27) Iya ove, okuti uhanda okukala nekolelo ngo lia Marta liokuti makukakala etutilo? Opo ukale nekolelo olio, tete una okunoñgonoka etyi Huku ahanda kovanthu. (João 17:3; 1 Timóteo 2:4) Enoñgonoko olio malikukuatesako okukala nekolelo. Omokonda yatyi wahaitila ko Nombangi mba Jeova opo mbukulekese etyi Ombimbiliya ilongesa konthele yetutilo? Mavakala nehambu liokukulongesa konthele yekevelelo ewa lietutilo.