Ovituwa Vitulunda Okuenda Komaliongiyo

1-2. (a) Oityi Siovaa amona tyina atala ovanthu ovanyingi-nyingi veliongiya opo Vahinangele ononkhia mba Sesusi? (Tala olutalatu luo kondye.) (b) Oityi matulilongesa monthele ei?

KUOVE, oityi Siovaa amona tyina atala ovanthu ovanyingi-nyingi veliongiya opo Vahinangele ononkhia mba Sesusi? Katale vala ovanthu ovanyingi, mahi usuka na kese omunthu weya Kehinangelo. Mongeleka, utala ovaumbili vae ovakuatyili vahakambe Kehinangelo omanima aeho. Vamwe puvo namphila veyelwe, no ngotyo veya. Ovakuavo pamwe kaveya komaliongiyo apeho, mahi kavakambe Kehinangelo mokonda liakolela unene kuvo. Siovaa tupu utala vana veya Kehinangelo otyikando tyo tete, hamwe omokonda yolumbwe.

² Siovaa uhambukwa unene tyina amona ovanthu ovanyingi veya Kehinangelo. (Luka 22:19) Mahi no ngotyo kesukile unene nombalulo yovanthu veya. Tyakolela vali kwe, ehunga livelunda okuya Kehinangelo. Monthele ei matulilongesa epulo liakolela unene liati: Omokonda yatyi tuesukisila okueenda komaliongiyo aeho iya atuheya vala Kehinangelo?

3-4. (a) Omokonda yatyi tuiila komaliongiyo? (b) Otyituwa patyi tulekesa tyina tuenda komaliongiyo? (c) Ngetyi tyipopia 1 Kolindu 11:23-26, omokonda yatyi tuhapondola okukamba Kehinangelo?

³ Ehunga liakolela litulunda okuenda komaliongiyo, omokonda tyilinga onthele yefendelo lietu. Tupu, tuenda komaliongiyo mokonda tuhanda okulongeswa na Siovaa. Ovanthu vomalityindailo vasoka okuti kavesukisile okulongeswa natyike. (3 Suau 9) Mahi onthue tuhanda okulongeswa na Siovaa, neongano liae. — Isa. 30:20; Suau 6:45.

⁴ Tyina tuenda komaliongiyo tulekesa okuti tueliola omutima iya tuhanda okulongeswa. Onthue katuende vala Kehinangelo mokonda tulitehelela okuti tuna okutyilinga, mahi omokonda tueliola omutima iya tuhanda okutavela otyitumino tya Sesusi tyati: “Tualeiko okutyilinga opo munthyinangele.” (Tanga 1 Kolindu 11:23-26.) Eliongiyo olio lipameka ekevelelo lietu iya lituhinangelesa okuti Siovaa utuhole unene. Mahi Siovaa kahande vala tupamekwe otyikando tyike menima. Ngotyo, upongiya omaliongiyo onosimanu ambuho iya utupopila opo tuende-ko. Okuliola omutima tyitulunda okutavela ku Siovaa. Tupu, onosimanu ambuho tukala omuvo omunyingi nokupongiya iya atwii komaliongiyo.

 5. Oñgeni ovanthu vokueliola omutima vakala tyina Siovaa evekonga?

⁵ Omanima aeho, Siovaa ukonga ovanthu opo evelongese iya ovanyingi vokueliola omutima vetavela. (Isa. 50:4) Vahambukwa unene tyina veya Kehinangelo iya okutuka opo avahimbika okuenda komaliongiyo. (Zac. 8:20-23) Tyilinge vana veli motyili omanima omanyingi ine ovape, atuho tuhambukwa tyina tulongeswa nokuhongolelwa na Siovaa, ‘omukuatesiko wetu nomuyovoli wetu.’ (Sal. 40:17) Okuti pena otyipuka tyakolela vali, tyipona okutavela okulongeswa na Siovaa Nomona wae ehole unene Sesusi? — Mat. 17:5; 18:20; 28:20.

 6. Oñgeni okuliola omutima tyakuatesileko omulume umwe okuya Kehinangelo?

⁶ Omanima aeho, tulinga ononkhono mbokukonga ovanthu ovanyingi opo veye Kehinangelo liononkhia mba Sesusi. Ovanyingi veliola omutima vehole okupolako ouwa tyina vetavela. Tala ongeleka imwe. Momanima omanyingi konyima, omukuatate umwe wakonga omulume umwe iya omulume oo emupopila okuti kameya. Mahi monthiki Yehinangelo, omukuatate ahuvu etyi emumona Mondyuo Yomaliongiyo. Mokonda ovakuatate vemukukunyine nawa, omulume oo ahimbika okuya komaliongiyo aeho. Alo umwe mokueenda kuenima aliho, akambe vala komaliongiyo ovikando vitatu. Oityi tyemukuatesileko okutokola okuya komaliongiyo aeho? Omokonda una omutima omuwa iya ankho wafuapo opo alinge omapiluluko. Konyima, omukuatate apopi okuti: “Omulume una weliola omutima.” Siovaa oe wemukokela kwe opo emuumbile iya pahe wambatisalua. — 2 Sam. 22:28; Suau 6:44.

 7. Oñgeni ovipuka tulilongesa komaliongiyo nevi tutanga mo Mbimbiliya vitukuatesako okuliola omutima?

⁷ Ovipuka tulilongesa komaliongiyo nevi tutanga mo Mbimbiliya vitukuatesako okuliola omutima. Tyina onthiki Yehinangelo ihikapo, omaliongiyo apopia haunene konthele yongeleka ya Sesusi no ñgeni alekesile okuti weliola omutima etyi aava omuenyo wae opo etuyovole. Iya mononthiki ombo, otyiwa tutange ovipuka viaenda-po mononthiki Sesusi aipawa no puetyi atutiliswa. Ovipuka tulilongesa momaliongiyo nevi tutanga mo Mbimbiliya vitukuatesako okupandula vali etyi Sesusi etulingila. Otyo tyitulunda okuliola omutima ngae nokulinga ehando lya Siovaa, alo umwe tyina tyihapepukile. — Luka 22:41, 42.

 8. Oñgeni Sesusi alekesile okuti wakola omutima?

⁸ Tupu, tulinga ononkhono opo tukole omutima nga Sesusi. Soka oñgeni alekesile otyituwa otyo etyi kuakambela ononthiki mbumwe opo aipawe. Ankho utyii nawa okuti onondyale mbae mavemulingi omukuele, avemuvete iya avemuipaa. (Mat. 20:17-19) No ngotyo ankho wafuapo opo ankhie. Etyi omuvo wehikapo opo aipawe, apopila ono apositolu mbae etyi ankho vekahi mo Getsemani okuti: “Katukei, tuendei. Talei! Una mamphakula ukahi nokuhika popepi.” (Mat. 26:36, 46) Etyi omafualali eya tyamaneka opo vemukuate, Sesusi eheliholeka iya evepopila opo vayeke ono apositolu vende. (Suau 18:3-8) Tyayandyuluka nawa okuti Sesusi ankho wakola omutima. Hono, Ovalembulwa nonongi ononkhuavo valinga ononkhono mbokuhetekela Sesusi. Oñgeni vetyilinga?

 9. (a) Omokonda yatyi tuesukisila okukola omutima opo tuende apeho komaliongiyo? (b) Oñgeni ongeleka yetu ipondola okukuatesako ovakuatate vekahi movikaleya?

⁹ Tyina tulambela movitateka, tuesukisa okukola omutima opo tuende apeho komaliongiyo. Vamwe povakuatate no nomphange venda komaliongiyo namphila vasoya ine vavela. Ovakuavo venda komaliongiyo namphila vailikwa nombunga, novatumini. Pahe soka oñgeni ongeleka yetu ikuatesako ovakuatate veli movikaleya mokonda yokuumbila Siovaa. (Heb. 13:3) Tyina veiva okuti tutualako okuumbila Siovaa namphila tulambela movitateka, otyo tyivelunda okutualako nekolelo liavo, nokukola omutima, nokukoleleya. Tupu otyo tyaendele na apositolu Paulu. Etyi ankho eli mokaleya mo Loma, ankho uhambukwa tyina eiva okuti ovakuatate vatualako okuumbila Siovaa noukuatyili. (Fili. 1:3-5, 12-14) Wahonekela omukanda ovakuatate mewaneno lyo Hebeleu opo evelunde ‘okutualako noluembia novakuatate’ iya avahayeke-po okuliongiya. — Heb. 10:24, 25; 13:1.

10-11. (a) Ovalie tuna okukonga opo veye Kehinangelo? (b) Ngetyi tyipopia Efesu 1:7, omokonda yatyi tuna okutyilingila?

¹⁰ Tulekesa okuti tuakola omutima tyina tukonga ombunga yetu, na vana tuundapa navo, no vomunthele yetu opo veye Kehinangelo. Mokonda yatyi tuvekongela? Omokonda tupandula etyi Siovaa na Sesusi vetulingila, iya otyo tyitulunda okukonga vakuetu opo navo veye Kehinangelo. Tuhanda vanoñgonoke oñgeni navo vapondola okupola ouwa “kokankhenda okanene” Huku alekesa etyi etuavela otyilikutila tyeyovo. — Tanga Efesu 1:7; Ehol. 22:17

¹¹ Tyina tuliongiya, tupu tulekesa okuti tuna otyituwa otyikuavo tyakolela. Siovaa na Sesusi valekesa okuti vena otyituwa otyo mononkhalelo mbavilapo.

12. (a) Oñgeni omaliongiyo apameka ohole tuna na Siovaa na Sesusi? (b) Oityi 2 Kolindu 5:14, 15 itulunda okulinga?

¹² Ohole tuna na Siovaa na Sesusi itulunda okuenda komaliongiyo. Iya ovipuka tulilongesa momaliongiyo vipameka ohole tuna navo. Momaliongiyo apeho tuhinangeleswa etyi Siovaa na Sesusi vetulingila. (Loma 5:8) Haunene, Ehinangelo litukuatesako okuimbuka okuti Siovaa na Sesusi vetuhole unene. Vehole alo umwe vana vahapandula ofeto yeyovo. Olupandu lutulunda okulinga ononkhono mbokuhetekela Sesusi monkhalelo tutyinda omuenyo wetu ononthiki ambuho. (Tanga 2 Kolindu 5:14, 15.) Tupu tuhilivika Siovaa mokonda wetuavela ofeto yeyovo. Onkhalelo imwe yokumuhilivika, okuava omakumbululo apameka.

13. Ohole tuna na Siovaa na Sesusi iimbukilwa-pi? Hangununa.

¹³ Ohole tuna na Siovaa na Sesusi italelwa kononkhono tulinga opo tuvehambukiswe. Ovikando ovinyingi, tuna okulinga ononkhono ononene opo tuende komaliongiyo. Omawaneno omanyingi, alinga omaliongiyo kongulohi tyina ovanthu vaponwa mokonda yokuaundapa onthiki aiho. Omakuavo alinga omaliongiyo konthyulilo yosimanu tyina ovanthu vekahi nokupululukwapo. Okuti Siovaa utumona tyina tuenda komaliongiyo tyaponwa? Enga, utumona! Tuhinangelei okuti Siovaa weete iya upanda ononkhono tulinga opo tuende komaliongiyo. — Malu. 12:41-44.

14. Ongeleka patyi Sesusi etusila konthele yokupaka omasuka-suka a vakuetu komutwe?

¹⁴ Sesusi wetusila ongeleka ongwa yokulingila-ko vakuetu ovipuka oviwa. Ankho kafuilepo vala opo ankhile ovalongwa vae, mahi tupu watyindile omuenyo wae monkhalelo ilekesa okuti ankho upaka omasuka-suka avo komutwe. Mongeleka, ankho ukala novalongwa vae alo umwe tyina ankho aponwa. (Luka 22:39-46) Tupu ankho usoka kovipuka apondola okulingilako vakuavo, ehesuku vala netyi vena okumulingila. (Mat. 20:28) Inkha ohole yetu na Siovaa novakuatate ikala ngo ya Sesusi, matulingi atyiho tuvila opo tuende Kehinangelo tupu kamatukambe komaliongiyo.

15. Ovalie haunene tuhanda okukuatesako?

¹⁵ Onthue tulinga onthele yombunga yovakuatate ouye auho iya tuna ehambu liokukonga ovanthu ovanyingi opo veliwaneke nonthue. Haunene, tuhanda okukuatesako “vana tufenda navo” mahi vayekapo okuenda komaliongiyo nokuivisa. (Gal. 6:10) Tulekesa okuti tuvehole tyina tuvelunda opo veye komaliongiyo, haunene Kehinangelo. Nga Siovaa na Sesusi, onthue tuhambukwa unene tyina omukuatate wayekelepo okuya komaliongiyo nokuivisa akondoka ku Tate yetu wo keulu. — Mat. 18:14.

16. (a) Oñgeni tupondola okulipameka novakuatate vetu iya oñgeni omaliongiyo etukuatesako? (b) Omokonda yatyi uno omuvo ukahi nawa opo tuhinangele onondaka mba Sesusi mbukahi mu Suau 3:16?

¹⁶ Monosimanu mambulandulako, ovola okukonga ovanthu ovanyingi opo veye Kehinangelo, Mutano 19 ya Abril yo 2019. (Tala okakasa kati: “Okuti Movekongo?”) Enima lino, tulingei ononkhono mbokuenda apeho komaliongiyo opo tulipameke novakuatate. Putyina onthyulilo itualako okufuena popepi, tuesukisa omaliongiyo mokonda etukuatesako okuliola omutima, nokukola omutima, nokukala nohole. (1 Tes. 5:8-11) Nomutima auho, tulekesei oñgeni tulitehelela konthele ya Siovaa na Sesusi mokonda yohole vena nonthue! — Tanga Suau 3:16.