Tyilikuambelwa Ñgeni — Okuti Tuna Vala Okupitaulula Elikuambelo lya Tatekulu?

Elikuambelo lya Tatekulu litukuatesako okunoñgonoka oñgeni tuna okulikuambela, neetyi tuna okupopia melikuambelo. Sesusi walongesile ovalongwa vae elikuambelo olio etyi vemuti: “Tatekulu, tulongese okulikuambela.” (Luka 11:1) Mahi, Elikuambelo lya Tatekulu, eli vamwe vati elikuambelo lya Tate Yetu, halio vala olio Huku etavela.a Sesusi walongesile ovalongwa vae elikuambelo olio vataleleko etyi vena okuiita momalikuambelo opo Huku evetehelele.

Etyi matyipopiwa monthele ei

• Elikuambelo lya Tatekulu Lipopia-tyi?

• Elikuambelo lya Tatekulu lipunguhuna-tyi?

• Okuti Elikuambelo lya Tatekulu Olio Vala Tuna Okupitaulula?

• Oñgeni Mwene Tuna Okulikuambela?

• Omalikuambelo Omakuavo Apopiwa Mombimbiliya

Onombimbiliya ononyingi pokuapopia Elikuambelo lya Tatekulu lili mu Mateusi 6:9-13, kambapopile otyipuka tyike. Matutale Onombimbiliya onombali.

Ombimbiliya Ikola Yaava Ekevelelo Liouye Omupe yati: “Tate yetu keulu, enyina liove lisukukiswe. Ouhamba wove uye. Ehando liove lilingwe pano pohi, ngetyi likahi nokulingwa keulu. Tuavele-vo okulia kuonthiki ino; tupu tuevele-vo ononkhali mbetu, ngetyi no onthue tuevela vakuetu. Tukuateseko opo tuhalinge onkhali tyina tulolwa, nokutuyovola kondingavivi.”

Ombimbiliya Rei Jaimes yati: “Tate yetu uli keulu, enyina liove lisukukiswe. Ouhamba wove uye. Etyi uhanda tyilingwe pano pohi, ngetyi tyikahi nokulingwa keulu. Tuavele-vo ombolo yonthiki ino. Tuevele-vo onongele mbetu, ngetyi no onthue tuevela ava vetulevala. Wehetutuale no momahetaiko, mahi tuyovole kondingavivi.”b

Etyi Sesusi alongesile tyilii Novihonekwa ovikwavo, naina, onotesitu ononkhuavo Mbombimbiliya mambutukuatesako okunoñgonoka etyi Elikuambelo lya Tatekulu lipunguhuna.

“Tate yetu keulu”

Tyatamo okutumbula Huku okuti “Tate yetu” mokonda oe wetutunga, oe wetuavela omuenyo. — Isaías 64:8.

“Enyina liove lisukukiswe”

Enyina lya Huku, Siovaa, lina okulingwa onthilo tyeetyi esukuki ine likola. Ovanthu vasukukisa vala enyina lya Huku tyina vapopia etyi ekahi, neetyi makalinga. — Salmo 83:18; Isaías 6:3.

“Ouhamba wove uye”

Ouhamba wa Huku outumini uli keulu, Ohamba yatyo o Sesusi. Sesusi wetulongesa pokulikuambela tuite outumini oo utumine ohi aiho. — Daniel 2:44; Eholololo 11:15.

“Ehando liove lilingwe pano pohi, ngetyi likahi nokulingwa keulu”

Huku wahanda ovanthu pano pohi vakale-ko apeho nombembwa netuliyo, ngetyi keulu kuhena ovivi nii ononkhia. — Salmo 37:11, 29.

“Tuavele-vo [ombolo] yonthiki ino”

Pononthiki Sesusi ali pano pohi, ombolo oyo yali okulia ovanthu valia vali unene. Onthwe tuna okuhinangela okuti tutei vala Komutungi wetu, oe vala utuavela ovipuka aviho tuesukisa tukale nomuenyo. — Ovilinga 17:24, 25.

“Tuevele-vo onongele mbetu, ngetyi no onthue tuevela ava vetulevala”

Apa ondaka “ongele,” ipopia ononkhali. (Luka 11:4) Ovanthu atuho tuna onkhali, tusukisa okuevelwa. Mahi ine tuahanda okuevelwa na Huku, tuna okuevela vakwetu ononkhali vetulinga. — Mateusi 6:14, 15.

“Tukuateseko opo tuhalinge onkhali tyina tulolwa, nokutuyovola kondingavivi”

Siovaa Huku ketulolo tulinge etyi tyahaviukile. (Tiaku 1:13) Mahi onthwe tulolwa “nondingavivi,” Satanasi Eliapu — tupu liatiwa “Omuyondyi.” (1 Swau 5:19; Mateusi 4:1-4) Onthwe tuita Siovaa etukuateseko opo tuehetavele tyina tuhongilinyua tulinge etyi ahahande.

Elikuambelo Tatekulu Sesusi alingile opala vala okutalela-ko, hakuti opala umwe okupitaulula onondaka mbatyo. Puetyi Sesusi ehenepopie Elikuambelo lya Tatekulu, walondolele ovalongwa vae ati: “Tyina ulikuambela, uhawane-wane otyipuka tyike.” (Mateusi 6:7) Etyi nthiki imwe elikuambelo olio eliwana vali, wapopile onondaka onkhuavo. — Luka 11:2-4.

Elikuambelo likahi nawa olieli litunda umwe komutima. — Salmo 62:8.

Elikuambelo lya Tatekulu lilekesa umwe nawa oñgeni tuna okulikuambela Huku etutehelele. Nkhele tala vala otyipuka lielikuata nonovelesikulu ononkhuavo Mbombimbiliya mbupopia omalikuambelo.

• Likuambela vala ku Huku

  Otesitu: “Mu kese tyipuka likuambelei, amulivondela ku Huku kumwe nokupandula, amunoñgonokesa Huku etyi muiita.” — Ova Filipu 4:6.

  Etyi ipunguhuna: Atuho tuna umwe vala okulikuambela ku Huku — ha ku Sesusi-ko, ha ku Maliya-ko, nii ha kovasukuki-ko. Onondaka mbokuahimbika Elikuambelo lya Tatekulu mbokuati “Tate yetu,” mbutulongesa okuti tuna umwe vala okulikuambela ku Siovaa Huku kuapwa.

• Ita ovipuka vielikuata neetyi Huku ahanda

  Otesitu: “Atyiho tuita tyelikuata nehando lya Huku, Huku ututehelela.” — 1 Suau 5:14.

  Etyi ipunguhuna: Pokulikuambela tupondola okupopia atyiho tyayemba ku etyi Huku ahanda. Sesusi wetulongesa okuti etyi Huku ahanda tyesukisa unene, mokuetyipopia Melikuambelo lya Tatekulu pokuati, “etyi uhanda tyilingwe.” Onthwe matunoñgonoka vala etyi Huku ahandela ohi novanthu tyina tulilongesa Ombimbiliya.

• Ita evi wesuka navio

  Otesitu: “Pakula omulemo wove ku Siovaa, ngwe mekukuatesako.” — Salmo 55:22.

  Etyi ipunguhuna: Huku usuka neevi onthwe tusuka navio. Ngetyi Sesusi alinga tyokupopia ovipuka omunthu na munthu esuka navio Melikuambelo lya Tatekulu, no onthwe tupondola okuiita evi tusuka navio nthiki na nthiki, nokuita Huku etululike tyina tuna etyi tuahanda okulinga, na tyina tuna ovitateka, nokuita etuevele ononkhali tulinga.c