Hambukilwa Otyinepo Tyondyona!

1, 2. (a) Otyinepo tyalie matyieta ehambu enene keulu? (b) Matulilongesa omapulo patyi?

TYIMANA omuvo omunyingi okupongiya otyipito pala otyinepo. Mahi pahe matupopi otyinepo mondyuo yohamba tyikahiale nokupongiyua mokueenda kuomanima ehungi po 2.000. Apa katutu omphunga maikeliwaneka nondombwa yae. Mombala Yohamba mamukeivala otyiimbo otyiwa, iya keulu makukeivala onondaka mbuimba okuti: “Hivilikei Jah, mokonda Jeova Huku yetu, Wepondolo Aliho, wahimbika okutumina. Tuhambukwei atukala tyeyula ehambu, nokumunkhimaneka, mokonda otyinepo Tyondyona tyehikapo, iya omukai wae welipongiyale.”​—Rev. 19:6, 7.

² “Ondyona” yapopiwa motestu oyo o Jesus Kristu. (João 1:29) Otyinepo tyae matyieta ehambu enene keulu. Oñgeni mavale pala otyinepo? Ondombwa yae olie? Oñgeni ekahi nokulipongiya pala otyinepo? Onalupi otyinepo matyihimbika? Otyinepo otyo matyieta ehambu keulu, mahi okuti vana vena ekevelelo liokukakala apeho pano pohi navo mavahambukwa? Tuhanda unene okunoñgonoka omakumbululo omapulo oo, moluotyo matutualako okulilongesa o Salmo 45.

3, 4. (a) Oityi tyapopiwa konthele yovikutu Viomphunga pala otyinepo? Oityi tyahambukisilwe vali Ohamba? (b) Ovalie “ovana vonohamba,” ‘navakuavo vekahi mombala’ vahambukwa Nomphunga?

³ Tanga Salmo 45:8, 9. Omphunga, Jesus Kristu wavala ovikutu viae viankhimana pala otyinepo. Ovikutu viae vina omuniko omuwa welifua “noperfume yalia okalu,” ngetyi o mirra no cássia, omulela wokulembula ankho uundapeswa mo Isilayeli.​—Êxo. 30:23-25.

⁴ Otyiimbo otyiwa tyiivala mombala yomphunga, tyihambukiswa vali unene putyina otyinepo tyae tyamehiki popepi. Uhambukwa ‘navakuavo vekahi mombala,’ vana valinga onthele meongano lia Huku keulu. Ovo, ovo vakutikinya “ovana vonohamba,” tyihangununa onoandyu. Tyihambukiswa unene okutehelela onondaka keulu mbupopia okuti: “Tuhambukwei nokukala tyeyula ehambu . . . mokonda otyinepo Tyondyona tyehikapo”!

 5. “Omukai Wondyona” olie?

⁵ Tanga Salmo 45:10, 11. Tuanoñgonokale olie omphunga, mahi ondombwa olie? Otyikundyi atyiho tyo 144.000 Tyovakristau ovalembulwa. Jesus omutwe weuaneno olio liovalembulwa. (Tanga Efésios 5:23, 24.) Ovalembulwa ovo mavakatumina na Kristu Mouhamba wae keulu. (Luc. 12:32) Tupu “vekahi nokulandula Ondyona kese oku yenda.” (Rev. 14:1-4) Mokonda “omukai Wondyona,” umulandula kondyuo yae keulu.​—Rev. 21:9; João 14:2, 3.

 6. Omokonda yatyi ovalembulwa vaihanenwa okuti “ovana vohamba,” iya omokonda yatyi vatolelelwa opo valimbwe ovanthu vavo?

⁶ Ondombwa iihanwa okuti “omona omuhikuena,” tupu iihanwa okuti “omona wohamba.” (Sal. 45:13) “Ohamba” oyo olie? Jeova wetavela Ovakristau ovalembulwa opo vakale “ovana” vae. (Rom. 8:15-17) Ovalembulwa vapopilwa okuti: “Limbwa elongo liove novo meumbo liove.” Mokonda ovalembulwa mavakakala ondombwa keulu, vesukisa okutualako okupaka omitima viavo ‘kovipuka vio keulu, hakovipuka via pano pohi.’​—Col. 3:1-4.

 7. (a) Oñgeni Kristu ekahi nokupongiya ondombwa yae? (b) Oñgeni ondombwa ilitehelela konthele yauna makakala omulume wae?

⁷ Mokueenda kuomanima omanyingi, Kristu ukahi nokupongiya ou makala ondombwa yae pala otyinepo keulu. Apostolu Paulu wahonekele okuti Kristu “uhole ewaneno, iya elipakula mokonda yalio, opo elisukukise, nokulikoha nomeva ondaka. Opo apakule ewaneno kwe muene nomunkhima walio auho, lihena osilo naike ine enyonda, ine kese tyimwe povipuka ovio. Anthi, opo likale osandu nokuhena osilo.” (Efé. 5:25-27) Paulu wapopilile ovalembulwa Ovakristau mo Korintu okuti: “Nalinga onkhuelume nonwe, ounkhuelume omuwa, mokonda nemulaa okunepwa nomulume wike vala, opo ndyimutuale ku Kristu ngomumphembela omusukuki.” (2 Cor. 11:2) Mokonda efendelo liae liasukuka nokuapandwa na Huku, Ohamba Jesus Kristu utala ondombwa yae okuti yefiwa nawa. Ondombwa umuimbuka okuti o “tatekulu” yae iya ulipetamena ku una makakala omulume wae.

 8. Omokonda yatyi ondombwa ipopilwa okuti “yefiwa nawa”?

⁸ Tanga Salmo 45:13, 14a. Ondombwa “yefiwa nawa,” itualwa pala otyinepo tyohamba. Mu Revelação 21:2, ondombwa yaelekwa nepundaumbo, o Jelusalei Omphe. Epundaumbo olio keulu liliaima “nenkhimano lia Huku” iya “lielifwa nemanya liakolela, lielifwa nemanya litiwa jaspe liliaima ngovitulu.” (Rev. 21:10, 11) Ouwa wo Jelusalei Omphe wahonekua nawa momukanda wa Revelação. (Rev. 21:18-21) Ondombwa oyo, ‘omuwa unene’ ngatyi! Okuti otyo, hatyo tukevelela kotyinepo tyohamba keulu?

 9. Ondombwa utualwa kulie? Oñgeni yavala?

⁹ Ondombwa itualwa Komphunga yayo, Ohamba Mesiya. Ohamba ipongiya ondombwa ‘nokuikoha nomeva ondaka.’ “Yakala osandu nokuhena osilo.” (Efé. 5:26, 27) Ondombwa yae ina okuvala nawa pala otyipito. Iya yavala umwe nawa! “Ovikutu viae viefiwisua noolu,” iya “matualwa kohamba novikutu viatungwa nawa.” Pala otyinepo Tyondyona, “wapeua opo avale omuvalo omungonga, wayela, utunda nawa too, mokonda otyo tyilekesa ovilinga viaviuka vio no sandu.”​—Rev. 19:8.

10. Onalupi Ondyona mainepe?

¹⁰ Tanga Revelação 19:7. Onalupi Ondyona mainepe? Namphila Revelação 19:7 ipopia okuti “omukai wae welipongiyale” pala okunepwa, mahi onoversikulu mbukuamako kambupopi natyike tyilekesa okuti velinepale. Mahi mbulekesa nawa onthele yahulililako yononkhumbi ononene. (Rev. 19:11-21) Okuti otyo tyilekesa okuti otyinepo matyilingwa tyina nkhele Ohamba yehenefinde? Au. Ovipuka viahonekwa mu Revelação kamavimoneka ngomu viahonekelwa. Mo Salmo 45, Ohamba Jesus Kristu imaneka omutunga wayo iya aitetekela okufinda onondyale mbayo iya konyima ainepe.​—Sal. 45:3, 4. 

11. Oityi Kristu makalinga tyina nkhele ehenenepe?

¹¹ Ngotyo, tuelilongesa Mombimbiliya okuti ovipuka ovio mavikamoneka ñgaa: Tete, “ekunga enene” Ombambilonia Onene, onongeleya ambuho mbomatutu, maikahanyuako. (Rev. 17:1, 5, 16, 17; 19:1, 2) Okulandulako, Kristu makahanyaunako ouye wovivi wa Satanasi wahupapo mo Armagedom, “ovita vionthiki onene ya Huku Wepondolo Aliho.” (Rev. 16:14-16; 19:19-21) Okuhulako, Ohamba maikamanuhula okufinda tyina yamapake Satanasi novilulu viae mokaleya, iya kamaveketyivila vali okuhongiliya nawike. Mavakakala ngatyina vankhia.​—Rev. 20:1-3.

12, 13. (a) Otyinepo Tyondyona matyilingwa nalupi? (b) Keulu, ovalie mavahambukwa mokonda yotyinepo Tyondyona?

¹² Mononthiki mbonthyulilo, Ovakristau ovalembulwa vatualako nekolelo alo kononkhia, vatutiliswa opo vakakale keulu. Tyina Ombambilonia Onene yamahanyaunuako, mapalambe vala katutu, iya tyina nkhele o Armagedom yeheneye, Kristu makamanuhula okuongiya Ovakristau aveho ovalembulwa opo vakale nae keulu. (1 Tes. 4:16, 17) Konyima yo Armagedom, otyinepo Tyondyona tyipondola okulingwa. Onthiki oyo yotyinepo matyihambukiswa unene! Revelação 19:9 ipopia okuti: “Vena ehambu ovovana vakongwa kotyipito tyotyinepo Tyondyona.” Tyotyili, ondombwa yahambukwa unene. Iya Ohamba maihambukwa tyina yamatale okuti ovalembulwa aveho vekahi nae keulu. (Luc. 22:18, 28-30) Mahi, omphunga nondombwa, havoko vala mavahambukwa.

¹³ Ngetyi tuelilongesale pombanda, makukeivala onondaka keulu mbuimba okuti: “Tuhambukwei atukala tyeyula ehambu, nokumunkhimaneka [Jeova], mokonda otyinepo Tyondyona tyehikapo, iya omukai wae welipongiyale.” (Rev. 19:6, 7) Oityi matyikapita novaumbili va Jeova pano pohi? Okuti navo mavakahambukwa?

14. Ngetyi tyapopiwa mo Salmo 45, ovalie “ovomundyila ovamphembela” vondombwa?

¹⁴ Tanga Salmo 45:12, 14b, 15. Omuuli Zakaria waulile okuti kononthiki mbonthyulilo, ovanthu vomalongo mavaumbila Jeova nehambu kumwe novalembulwa nkhele vekahi pano pohi. Wahonekele okuti: “Kononthiki ombo, ovalume ekwi vatunda momalaka aeho ovilongo, mavakakuata motyikutu tyomulume umwe omu Judeu, avati: ‘Tuhanda okuenda nonwe, mokonda tueiva okuti Huku ukahi nonwe.’” (Zac. 8:23) Mo Salmo 45:12, ‘ovalume ovo ekwi,’ “omona wa Tiru” “nomulume omuhona.” Ovo vaavela oviawa ovalembulwa nkhele vekahi pano pohi, nokulinga ononkhono opo vapandwe navo, nokukuatesuako pala okuumbila Jeova. Tunde mo 1935, ovalembulwa vekahi nokutuala ovanthu ovanyingi ‘kouviuki,’ tyilekesa okuti ovanthu ovanyingi vekahi nokulongeswa otyili konthele ya Jeova. (Dan. 12:3) ‘Ovalume ovo ekwi,’ ovomundyila vovalembulwa vatunda mefendelo liomatutu iya pahe vena omuenyo wasukuka. Otyo vaihanenwa okuti “ovomundyila ovamphembela.” Vapakula omuenyo wavo ku Jeova nokulekesa okuti ovaumbili vekolelo Vohamba Jesus Kristu.

15. Oñgeni “ovomundyila ovamphembela” vaundapa kumwe novalembulwa nkhele vekahi pano pohi?

¹⁵ Ovalembulwa nkhele vekahi pano pohi, vapandula unene ‘ovomundyila ovo ovamphembela’ mokonda vevekuatesako nombili okuivisa “onondaka ombu onongwa mbouhamba wa Huku” kombanda yohi aiho. (Mat. 24:14) ‘Ospilitu nondombwa havoko vala vatualako okuti: “Endyu!’” mahi vana vatehelela navo vapopia okuti: “Endyu!” (Rev. 22:17) Otyo tyilekesa okuti “onongi ononkhuavo” veiva ovalembulwa vapopia okuti “Endyu!” iya aveliwaneka navo okupopila ovanthu aveho mouye okuti “Endyu!”​—João 10:16.

16. Elao patyi Jeova aavela onongi ononkhuavo?

¹⁶ Ovalembulwa nkhele vekahi pano pohi vehole onongi ononkhuavo. Ovalembulwa vahambukwa mokonda Jeova tupu waavela onongi ononkhuavo elao liokuhambukilwa otyinepo otyo. Tyaulilwe okuti ‘ovomundyila ovo ovamphembela,’ “mavatualwa nehambu enene.” Tyotyili, onongi ononkhuavo vena ekevelelo liokukala nomuenyo wahapu pano pohi, mavakahambukwa kumwe navana vekahi keulu tyina otyinepo Tyondyona tyamaligwa keulu. Omukanda wa Revelação upopia “otyinyingi tyovanthu” vafenda Jeova pano pohi, ngatyina vekahi “tyitai kolupala luotyipundi tyouviali no kolupala lwo Ndyona.” Vekahi nokuumbila Jeova pepata liondyuo yae onene yopaspilitu pano pohi.​—Rev. 7:9, 15.

17, 18. Oñgeni otyinepo Tyondyona matyietela ouwa vana mavakakala mouye omupe? Iya Kristu makakala he yavalie mokueenda Kuoutumini wae Womanima Ovityita Ekwi?

¹⁷ Tanga Salmo 45:16. “Ovomundyila ovamphembela” vondombwa ya Kristu mavahambukwa vali unene tyina vamatale ouwa otyinepo otyo matyieta mouye omupe. Ohamba Jesus Kristu makatutilisa “ovakuaukulu” vavo pano pohi, iya avakakala “ovana” vae. (João 5:25-29; Heb. 11:35) Jesus maholovona vamwe “povana” ovo opo vakale “ovatumini mohi aiho.” Tupu makaholovona vamwe povakulu vewaneno vekolelo hono opo vahongolele ovanthu mouye omupe.​—Isa. 32:1.

¹⁸ Mokueenda Kuoutumini wae Womanima Ovityita Ekwi, Kristu tupu makakala he yavakuavo. Monkhalelo patyi? Vana vena ekolelo motyilikutila tyeyovo tya Jesus mavakakala nomuenyo wahapu pano pohi. (João 3:16) Iya Kristu akakala ‘Tate yavo Yaapeho.’​—Isa. 9:6, 7.

19, 20. Oñgeni ovipuka vihambukiswa viapopiwa mo Salmo 45 vikalesa Ovakristau aveho votyotyili hono?

¹⁹ Tanga Salmo 45:1, 17. Ovakristau aveho vena okusuka novipuka viapopiwa mo Salmo 45. Ovalembulwa nkhele vekahi pano pohi vahambukwa okunoñgonoka okuti apa katutu mavawanekua keulu kumwe novakuatate vavo, Nomphunga Jesus Kristu. Onongi ononkhuavo vapewa ondundo opo vatualeko okutavela Kohamba yavo yankhimana. Tupu vapandula unene okukala ovomundyila yovalembulwa nkhele vekahi pano pohi. Konyima yotyinepo, ononkhano onongwa Kristu nondombwa yae mavakaavela ovanthu aveho mambukakala onongwa unene.​—Rev. 7:17; 21:1-4.