Otyilinga Tyospilitu Sandu Mokufuisapo Ehando Lia Jeova

“Ondaka itunda momulungu wange . . . tyotyili mailingi etyi nahanda, nokufuisapo nawa etyi neitumina.”—ISAÍAS 55:11.

 1. Hangununa oñgeni omunthu ulandula omapa elikalela na una wii nawa oku enda nako.

SOKA kovanthu vevali vekahi nokulipongiya pala okulinga oungendi nomatuku-tuku. Umwe ulinga omapa youngendi wae alo apa ahanda okuhika. Omukuavo wii nawa oñgeni maende, mahi, tupu wii onondyila ononyingi mbukehika apa ahanda okuenda. Tupu, wafuapo pala okupilulula oungendi wae inkha pamoneka otyitateka tyimwe. Ononkhalelo mbelikalela mbaundapeswa novanthu ovo vevali mongeleka, mbulekesa okuelikalela kukahi pokati ka una ulandula omapa nou wii nawa oku aya nako. Una weenda nomapa, ulandula umwe ondyila alo ekehika. Anthi, una wii nawa oku aya nako, utei vala apa amakuate, mahi ukehika oku ahanda okuenda.

2, 3. (a) Oityi tyakutikinya ehando lia Jeova, iya oñgeni oe atetulula otyitateka etyi Andau na Eva valinga onkhali? (b) Omokonda yatyi tuesukisa okukala tyityi oñgeni Jeova afuisapo ehando liae?

² Tyina Jeova afuisapo ehando liae, oe kasoko vala konkhalelo ike yokutyilinga, anthi, una ononkhalelo ononyingi. (Efésios 3:11) Ehando olio liakutikinya etyi ahandele ponthyimbi pala ovanthu noohi—oohi aiho okukala omphangu yombembwa novanthu vehena nkhali vena ombembwa nehambu apeho. (Gênesis 1:28) Etyi Andau na Eva valinga onkhali, Jeova watetulula otyitateka otyo, iya alingi epongiyo opo ehando liae lifuisuepo. (Tanga Gênesis 3:15.) Jeova wapopile okuti omukai wae makaetako “ombuto” ine Omona, makahanyako omukueli Satanasi, nokumanako ovivi aviho aetako.—Hebreus 2:14; 1 João 3:8.

³ Kutupu ononkhono keulu ine pano pohi mbupondola okutyilika Jeova okufuisapo ehando liae. (Isaías 46:9-11) Omokonda yatyi tupopila ngotyo? Mokonda muakutikinya ospilitu sandu ya Jeova. Ononkhono ombo ononene mbuavela onthumbi yokuti ehando lia Huku “tyotyili malilingwa.” (Isaías 55:10, 11) Tuesukisa okukala tyityi nokuundapa na Jeova mokufuisapo ehando liae. Omuenyo wetu komutwe wandyila utei kokufuisuapo kuehando olio. Tupu, okutala oñgeni Jeova aundapesa ospilitu sandu yae, tyipameka ekolelo. Pahe, tutalei otyilinga tyospilitu sandu—kohale, hono, no komutwe wandyila, pokufuisapo ehando lia Jeova.

Otyilinga Tyospilitu Sandu Kohale

 4. Oñgeni Jeova katutu-katutu ahololola ehando liae?

⁴ Tunde kohale, Jeova katutu-katutu wahololola ehando liae. Tete, walekesa olie Ombuto yalaelwe ankho “otyaholekwa tya Huku.” (1 Coríntios 2:7) Etyi palamba omanima 2.000 Jeova apopi vali konthele yombuto. (Tanga Gênesis 12:7; 22:15-18.) Jeova walinga na Abraiau omulao maufuiswapo mokueenda kuomanima omanyingi. Onondaka “menyina liombuto” ankho mbulekesa nawa okuti Ombuto, omunthu meya okutunda mombunga ya Abraiau. Tutyii okuti Satanasi waovolele nesuko enene oñgeni ombuto oyo maiholololwa. Ondyale ankho ihanda okuhanya ine okunyona ombuto yombunga ya Abraiau nokuhanyauna ehando lia Jeova. Mahi, Satanasi ketyivilile, mokonda ospilitu ya Huku yahamoneka oyo ikahi nokuundapa. Omononkhalelo patyi?

5, 6. Oñgeni Jeova aundapesile ospilitu yae pala okuamena ovanthu ankho valinga onthele yombunga mamutundu Ombuto?

⁵ Jeova waundapesa ospilitu yae pala okuamena ovanthu ankho valinga onthele yombunga mamutundu Ombuto. Jeova wapopilile Abraiau okuti: “Ame ndyakulilo yove.” (Gênesis 15:1) Ombo ha nondaka vala mbuhena esilivilo. Mongeleka, tala etyi tyamoneka mo 1919 P.K.E etyi Abraiau na Sara vatula po Gerar. Tyehetyi okuti Sara omukai wa Abraiau, Abimeleke ohamba yoko Gerar apolo Sara opo akakale omukai wae. Okuti o Satanasi wahindila Abimeleke atyinde Sara opo anyone ombuto ya Abraiau? Ombimbiliya kaityipopi. Anthi, itupopila vala okuti o Jeova wemutyilikile. Jeova wapopilile Abimeleke kondyoi opo ahayame Sara.—Gênesis 20:1-18.

⁶ Ha tyikando otyo vala Jeova eveamenene. Wayovolele Abraiau nombunga yae ovikando ovinyingi. (Gênesis 12:14-20; 14:13-20; 26:26-29) Omuhoneki wono Salmu wapopia konthele ya Abraiau okuti: “Oe kayekele omunthu nawike evelinge otyivi, mahi, waviyula ono hamba mokonda yavo, okuti: ‘Muhayamei ovalembulwa vange, muhalingei otyivi natyike kovauli vange.’”—Salmo 105:14, 15.

 7. Omononkhalelo patyi Jeova aamenene elongo lio Isilayeli?

⁷ Jeova waundapesile ospilitu sandu pala okuamena elongo lio Isilayeli kohale, omu ankho mamutyitwa Ombuto yalaelwe. Nospilitu oyo, Jeova wavela Ovitumino ova Isilayeli, iya ovio viapakele nawa efendelo liotyotyili, nokuamena oupanga wova Judeu na Jeova, nokuveamena opo vahanyonwe movituwa no mopahitu. (Êxodo 31:18; 2 Coríntios 3:3) Mononthiki mbo Vakoyesi, ospilitu ya Jeova yaavelele ononkhono ovalume vamwe opo vayovole o Isilayeli konondyale mbavo. (Juízes 3:9, 10) Mokueenda kuomanima etyi Jesus onthele yotete yombuto ya Abraiau nkhele ehenetyitwe, ospilitu sandu yaamenene o Jelusalei, no Mbelei, nondyuo ya Huku—aviho ankho mavikalinga onthele mokufuisapo omaulo konthele ya Jesus.

 8. Oityi tyilekesa okuti ospilitu sandu yakuatesileko Omona wa Huku momuenyo wae nomovilinga?

⁸ Ospilitu sandu yakuatesileko Jesus momuenyo wae no movilinga. Okuundapa Meimo liomumphembela Maliya, ospilitu sandu yalingile otyipuka tyimwe tyihenemonwe. Oyo yalingile opo omukai omukuankhali akale omulemi nokutyita Omona uhena nkhali, uhankhila onkhali ya Andau. (Lucas 1:26-31, 34, 35) Konyima ospilitu aiyamena Jesus etyi omututu opo ahaipawe. (Mateus 2:7, 8, 12, 13) Etyi ankho Jesus ena omanima 30, Huku wemulembula nospilitu sandu, opo akale omphinga yotyipundi tya David nokumuavela otyilinga tyokuivisa. (Lucas 1:32, 33; 4:16-21) Ospilitu sandu yaavelele Jesus epondolo liokulinga omahuviso, okuvelula ovavei, nokuavela okulia ovanyingi, nokupindulapo vana vankhia. Otyo tyilekesa ononkhano onongwa ononyingi mambukamoneka moutumini wa Jesus.

9, 10. (a) Oñgeni ospilitu sandu yakuatesileko ovalongwa va Jesus kohale? (b) Mokufuisapo ehando lia Jeova oityi tyaholololelwe okupolelela momuwo wo Vakristau votete?

⁹ Okupolelela mopendekoste yo 33 P.K., Jeova waundapesile ospilitu sandu pala okulembula onthele yavali yombuto ya Abraiau, mahi, ovanyingi puvo hambunga ya Abraiau. (Romanos 8:15-17; Gálatas 3:29) Pomuvo wo Vakristau votete, ospilitu sandu yakuatesileko ovalongwa va Jesus, okukala nounongo wokuivisa nombili nokuveavela ononkhono opo valinge ovilinga ovinene. (Atos 1:8; 2:1-4; 1 Coríntios 12:7-11) Mokonda yokuapewa oviawa vihuvisa viospilitu, otyo tyalekesa otyipuka tyimwe otyipe konthele yoñgeni Jeova mafuisapo ehando liae. Jeova ankho kahande vali ovanthu vemufende ngetyi apopile kohale, okufendela mondyuo ya Huku mo Jelusalei. Oe pahe ankho upanda Ewaneno epe Liovakristau. Okupolelela opo Jeova ukahi nokuundapesa ewaneno lialembulwa pala okulinga ehando liae.

¹⁰ Okuamena, nokuavela epondolo, nokulembula—ombo ononkhalelo mbumwe vala Jeova aundapesa ospilitu sandu kohale opo akale nonthumbi yokuti ehando liae malifuiswapo. Iya mononthiki mbetu? Oñgeni Jeova hono aundapesa ospilitu sandu yae pala okufuisapo ehando liae? Tuesukisa okutyinoñgonoka, mokonda tuhanda okuundapela kumwe nospilitu. Pahe tutalei ononkhalelo ononkhuana Jeova aundapesa ospilitu sandu yae hono.

Otyilinga Tyospilitu Sandu Hono

11. Oityi tyilekesa okuti ospilitu ikuatesako ovanthu va Huku okukala tyasukuka? Oñgeni upondola okulekesa okuti ukahi nokuundapa kumwe nospilitu?

¹¹ Tete, ospilitu sandu ivatela ovanthu va Huku okukala tyasukuka. Vana vaundapa kumue nehando lia Jeova vena okukala novituwa viasukuka. (Tanga 1 Coríntios 6:9-11.) Vamwe vekahi nokukala Ovakristau votyotyili, kohale ankho valinga omaundalelapo, nomaumbalehi, nokulala nomulume mukuavo. Omahando okulinga etyi tyituala konkhali apondola okukala omanene unene. (Tiago 1:14, 15) Anthi, ovanthu ovo “vasukulwa,” tyilekesa okuti valinga omapiluluko momuenyo wavo opo vapandwe na Huku. Oityi tyikuatesako vana vehole Huku okulityilika omahando omavi? 1 Coríntios 6:11 yati “ospilitu ya Huku yetu.” Mokutualako novituwa viasukuka, ulekesa okuti ukahi nokuyeka ospilitu ihongolele omuenyo wove.

12. (a) Ngetyi tyilekesa emonekelo lia Ezekiele, oñgeni Jeova ahongolela eongano liae? (b) Oñgeni upondola okulekesa okuti ukahi nokuundapela kumwe nospilitu?

¹² Vali, Jeova uundapesa ospilitu yae opo ihongolele eongano liae liende monkhalelo oe ahanda. Memonekelo lia Ezekiele, onthele yeongano lia Jeova liapopiwa nge tuku-tuku liokeulu litualako nokuenda pala okufuisapo ehando lia Jeova. Oityi tyikuatesako etuku-tuku okuenda? Ospilitu sandu. (Ezequiel 1:20, 21) Tuhinangelei okuti eongano lia Jeova lina ononthele onombali, imwe ikahi keulu onkhuavo ikahi pohi. Inkha onthele yokeulu ihongolelwa nospilitu sandu, onthele yo pohi nayo ihongolelwa nospilitu oyo. Mokutavela ku Huku nokulandula nawa ehongolelo lieongano liae pano pohi, ove ulekesa okuti una ombembwa netukutuku lia Jeova keulu nokuundapela kumwe nospilitu sandu yae.—Hebreus 13:17.

13, 14. (a) Ovalie valinga onthele “yombuto yovanthu ava” vapopiwa na Jesus? (b) Popia ongeleka ilekesa okuti ospilitu sandu ikahi nokukuatesako okunoñgonoka otyili tyo Mbimbiliya. (Tala okakasa “Okuti Ukahi Nokutualako Nokutavela Enoñgonoko Liotyili?”)

¹³ Tatu, Jeova uundapesa ospilitu sandu pala okutukuatesako okunoñgonoka otyili tyo Mbimbiliya. (Provérbios 4:18) Omutala Womulavi, omukanda wavilapo “omupika wekolelo nokualunguka” aundapesa pala okuhangununa otyili tyo Mbimbiliya. (Mateus 24:45) Mongeleka, tala enoñgonoko tuna konthele yavana valinga onthele “yombuto ei” yapopilwe na Jesus. (Tanga Mateus 24:32-34.) Ombuto patyi Jesus apopia? Onthele yati “Okuiwa Okuti Kristu Weyale Tyihangununa Tyi?” yapopile okuti Jesus ankho kapopi ono ndingavivi, anthi ankho upopia ovalongwa vae, vana mavalembulwa nospilitu sandu.a Ovalanduli va Jesus ovalembulwa, tyilinge kohale ine mononthiki mbetu, kavatale vala enyingilikilo, mahi tupu, vanoñgonoka ehangununo lienyingilikilo olio, okuti Jesus “ukahi popepi ponombundi.”

¹⁴ Otyo tyihangununa tyi pala onthue? Namphila katupondola okuvalula omanima “ombuto yovanthu ava,” tuesukisa okupaka momutima ovipuka ovinyingi konthele yondaka “ombuto”: Ovikando ovinyingi ipopia konthele yovanthu ovanyingi vokuna omuenyo momuvo wike vala, iya omuvo oo kawende ehimbwe-ehimbwe, una onthyulilo. (Êxodo 1:6) Iya oñgeni tupondola okunoñgonoka onondaka mba Jesus konthele “yombuto yovanthu ava”? Mbulekesa ovalembulwa vokuna omuenyo etyi enyingilikilo liamoneka mo okupolelela mo 1914 okukutikinyamo ovalembulwa ovakuavo vokuna omuenyo vana mavakatala okuhimbika kuononkhumbi ononene. Ombuto oyo yali nonthyimbi, iya maikakala nonthyulilo. Okufuiswapo kuononthele ononkhuavo mbenyingilikilo mbulekesa okuti ononkhumbi ononene mbukahi popepi. Mokukala notyituwa tyondyanga nokutualako tyalunguka, ove molekesa okuti ukahi nokutavela enoñgonoko Liombimbiliya nokulandula ehongolelo liospilitu sandu.—Marcos 13:37.

15. Oityi tyilekesa okuti ospilitu sandu itukuatesako okuivisa onondaka onongwa?

¹⁵ Kuana, ospilitu sandu itukuatesako okuivisa onondaka onongwa. (Atos 1:8) Oityi vali tyipondola okuhangununa oñgeni onondaka onongwa mbukahi nokuiviswa ouye auho? Soka konthele oyo. Ove hamwe ukahi pokati kavana vena unene owoma, ine ohonyi, osoko okuti, ‘ame nalumue mandyiende okukaivisa ombu-na-umbo!’ Mahi ove pahe una ombili yokulipaka movilinga ovio.b Onombangi mba Jeova ovanyingi, vatualako okuivisa namphila veyelwe ine okuluiswa. Ononkhono mba Huku ombo vala mbupondola okuavela ononkhono pala okufinda ovitateka ovinene nokulinga ovipuka vihevilwa kononkhono mbetu muene. (Miquéias 3:8; Mateus 17:20) Mokuundapa nombili movilinga viokuivisa, ove ulekesa okuti ukahi nokuundapela kumwe nospilitu sandu.

Otyilinga Tyospilitu Sandu Komutwe Wandyila

16. Omokonda yatyi tupondola okukala nonthumbi yokuti Jeova makaamena ovanthu vae mokueenda kuononkhumbi ononene?

¹⁶ Komutwe wandyila, Jeova maundapesa ospilitu sandu yae mononkhalelo mbuhuvisa pala okufuisapo ehando liae. Tutalei tete oñgeni Jeova aamena. Ngetyi tuetyimona, Jeova waundapesile ospilitu yae kohale pala okuamena kese munthu nokuamena elongo aliho lio Isilayeli. Moluotyo, onthue tuna omahunga okutavela okuti Jeova maundapesa ospilitu oyo pala okuamena ovanthu vae mokueenda kuononkhumbi ononene mbukahi popepi. Katuesukisile okusukalala unene oñgeni Jeova metuamena. Anthi, tupondola okutala komutwe wandyila nonthumbi, okuimbuka okuti vana vehole Jeova apeho mavaamenwa nospilitu sandu yae.—2 Crônicas 16:9; Salmo 139:7-12.

17. Oñgeni Jeova maundapesa ospilitu sandu yae mouye omupe?

¹⁷ Oñgeni Jeova maundapesa ospilitu sandu yae mouye omupe ukahi popepi? Ospilitu oyo maikakuatesako okunoñgonoka omikanda ovipe viawigua mavikaikulwa momuvo omo. (Revelação 20:12) Oityi matyikakalamo? Ovitumino via Jeova pala onthue mokueenda kuomanima ovityita ekwi. Okuti ove uhanda okutala oityi matyikakala momikanda ovio viawingwa? Tukevelela nesuko enene ouye oo omupe. Matyiketuhuvisa unene okukamona ononkhaneno onongwa tyina Jeova makaundapesa ospilitu sandu yae pala okufuisapo ehando liae pala oohi novanthu.

18. Oityi ove watokola?

¹⁸ Tuhalimbweiko okuti ehando lia Jeova malikafuiswapo, mokonda oe uundapesa ospilitu sandu yae—ononkhono mbavilapo kononkhono ambuho mbouye, pala okufuisapo ehando liae. Mehando olio nove wakutikinyuamo. Moluotyo, tokola okuita ku Jeova opo ekuavele ospilitu yae nokuundapela kumwe nehongolelo yayo. (Lucas 11:13) Inkha ulinga ngotyo ove upondola okukakala nomuenyo ngetyi Jeova ahandele pala ovanthu vakale apeho Momphangu Yombembwa pano pohi.

[Onondaka Poutoi]

Okuti Ove Utyihinangela?

• Omononkhalelo patyi Jeova aundapesile ospilitu sandu yae kohale opo ehando liae litualeko okuenda no komutwe?

• Oñgeni Jeova aundapesa ospilitu yae hono?

• Oñgeni Jeova maundapesa ospilitu yae komutwe pala okufuisapo ehando liae?

[Olutalatu pefo 22]

Okuti Ove Utualako Okuendela Motyitei Tyikahi Nokuliyawisa?

Jeova utualako okuhangununina vali nawa otyili Tyombimbiliya ovanthu vae. Ovipuka patyi viahangununwa vali nawa Momutala Womulavi?

▪ Mongeleka yonkhiso, ovipuka patyi viakolela Jesus alongesa konthele yokukula mopaspilitu? (Mateus 13:33)​—1 ya Kakwenye yo 2008, pomafo 28-29.

▪ Onalupi ekongwa liovakristau pala okuenda keulu liapwa?—1 ya Maio yo 2007, pomafo 30-31.

▪ Oityi tyihangununa okufenda Jeova “nospilitu”? (João 4:24)—15 ya Julho yo 2002, pefo15.

▪ Omepata patyi otyinyingi otyinene tyovanthu vaumbila? (Revelação 7:15)—1 ya Maio yo 2002, pomafo 30-31.

▪ Onalupi okuyapula onongi kovinkhombo tyahimbika? (Mateus 25:31-33)—15 ya Outubro yo 1995, pomafo 18-28.