Etyi Tyahonekwa na Luka

11 Nthiki imwe ankho una apa eli ulikwambela, etyi amana, umwe povalongwa vae emuti: “Tatekulu, Swau ulongesa ovalongwa vae okulikwambela, noove tulongese-vo.”

2 Ngwe evepopila ati: “Tyina mulikwambela, itei okuti: ‘Tate yetu keulu enyina liove lisukukiswe.*+ Ouhamba wove uye.+ 3 Twaavele-vo okulia* tulia, okulia tusuka nako nthiki na nthiki.+ 4 Wehetutanthe-vo ononkhali mbetu,+ mbukale, noonthwe otyo tulinga ava vetulevala,+ wehetuyeke tuyondywe.’”+

5 Pahe eveti: “Sokei ñgeno pahe una epanga liove, oende-ko mokati kovinthiki okelipopia, otyo uti: ‘Mukwe mbaa, ndevalese-vo onombolo ononthatu, 6 ndyina omweenda waenda ondyila onde, wehika pehepano, ame ndyitupu-vo apa nakwatelela.’ 7 Ngwe epanga liove eivalela vala mokati, ati: ‘Mukwe pahe tyapwa! Onthwe epito tweliika-le, atuho novana tulangi-ale. Ame hipinduka-po vali, ndyitupwa-le etyi ndyikupa ovola oyo.’ 8 Ame ndyimutolela umwe, ine upinduka-po ekupe, matyimupindula-po, ha tyoupanga vali, opo pahe otyetyi waita ehimbwe+ umwe vala upewe etyi wahanda. 9 Ame ndyimuti, itei+ mwahayekei-ko mamupewa; ovolei, lipilikei-ko umwe mamutyivasi; totolei pepito, mwahayekei-ko mamwiikulwa.+ 10 Ou wiita, upewa,+ ou woovola, utyivasa, ou utotola pepito wiikulwa. 11 Olie pwoonwe uti tyina omona wae amemwiiti ombisi umupa onyoka, kemupe ombisi?+ 12 Hamwe etyi emwiita eyiyi, emutambeka onge? 13 Naina, ine onwe ovana venyi muvepa oviwa, ngwe muvapengesi, ya pahe Tate keulu, oe wahamape omphepo ikola ava vemwiita!”+

14 Pahe apolo otyilulu momunthu, otyilulu ankho tyemupa okwahapopi.*+ Etyi otyilulu tyemutunda, oo pahe apopi, ava ovaunyingi atyivehuvisa.+ 15 Vamwe avati: “Utaata tupu ovilulu, ononkhono upola ku Mbelesembu,* mwene wovilulu.”+ 16 Ava ovakwavo, avemulolo, avemwiiti otyilekesa+ tyimwe tyitunda keulu. 17 Etyi amona etyi veli nokusoka,+ eveti: “Ouhamba welitepauka uhanyauka, epunda-umbo lielitepauka kalitungu, neumbo lielitepauka kalitungu. 18 Otyo otyipuka tyike na Satanasi, okuti ine ouhamba wa Satanasi ulitipauka maupame? Onwe muti ndyitaata tupu ovilulu o Mbelesembu. 19 Opo ine ame ndyitaata tupu ovilulu o Mbelesembu, ya ovana venyi vetyipola-pi tyokuvitaata? Ovio mulinga, ovio ovana venyi mavekemukwatela. 20 Mahi, ine ame ndyitaata tupu ovilulu, enkhanya lya Huku,*+ naina Ouhamba wa Huku mweupolwa.+ 21 Omulume wokwapama, omulume wokwamaneka, okuyunga ombala yae, tyae tyihupa. 22 Mahi ine kuya omulume wapama vali kwe, emulwisa atiliko, umupola ovihongati viae aviho ankho ayumba onthumbi, ovipuka umupunda-vio aveliyapaulila-vio. 23 Ou wahahulile kwaame, ondyale yange, ou twahaongiya nae, uhandaula.+

24 “Otyilulu okutunda momunthu, tyenda no moluhandya tyikataindye apa matyikapululukwa, mahi etyi tyahavasile, atyiti: ‘Mandyikondoka mondywo yange, omu natunda.’+ 25 Tyina tyihika omo, tyivasa mwakombwa nawa, mwehiwa. 26 Atyiende atyikapola vali ovilulu vityavio, vina epandu-vali ovikalavi vali, aviya avinyingila mondywo omo, ngamo vikala; omunthu oo pahe evili-po umwe, akala vali unene omapita tyipona etyi ali tete.”

27 Etyi eli nokupopia ovipuka ovio, omukai umwe uli povaunyingi opo, akaluluka ati: “Lihambukwe eimo liekutyindile, ahambukwe omavele wanyamine!”+ 28 Mahi ngwe emuti: “Au, vahambukwa ovava vatehelela ondaka ya Huku avalingi etyi veiva!”+

29 Etyi ovanthu velikongolola aveya, evepopila ati: “Ovanthu vo hono onondingavivi; vahanda valingilwe otyilekesa; mahi kamavetyilingilwa, o tya Sona vala.+ 30 Sona wali otyilekesa tyova Ninive,+ Omona womulume oe otyilekesa tyovanthu vo hono. 31 Tembwa otyilongo tyo kombwelo+ maikapindulwa-po pomphela yovanthu vomuvo uno ngayo ikevevela onombei, mokonda yatundile kokule-kule aiya ku Salomau yiive ounongo wae. Tala! Uli pano wapona pu Salomau.+ 32 Tyina tyamati pomphela yovanthu vomuvo uno, ova Ninive mavakapindulwa-po ngavo vevevela onombei, mokonda etyi Sona atwaile-ko ondaka velivelele.+ Tala! Uli pano wapona pu Sona. 33 Omunthu utemesa okandiyelo, kekepake mombwelo youla, mahi uketentheka kondyikwa+ yokandiyelo opo ava vanyingila vamona otyitei. 34 Otyimimi tyolutu eiho. Eiho liove okutala nawa, nolutu lwove aluho lukala motyimimi;* mahi tyina eiho liove lilinga lionkhi, olutu lwove aluho lupwila menthiki.+ 35 Lungukei, otyimimi tyili mu onwe tyahalinge tyenthiki. 36 Mahi ine olutu lwenyi aluho lukala motyimimi, alwahalingi enthiki napeke, opo maluteme umwe ngokandiyelo kekupa otyitei.”

37 Etyi pahe amana okupopia, omukulu umwe omu Faliseu, ati haa endyu tukalie atuho. Aende-ko, pahe avahimbika okulia. 38 Mahi, omu Faliseu ukati ñgaa, omweenda pokulia kelikohele peke,* atyimuhuvisa.+ 39 Tatekulu emuti: “Onwe va Faliseu, olufo mulusukula kondye, otyilindo mutyisukula kondye, mokati kenyi mweyula elungavi, muweyula movivi.+ 40 Onwe vityova onwe! Watunga kondye, hae vala watunga mokati? 41 Lingei okankhenda ovahepi,* vepei ovipuka munavio momitima, tala! Okulinga otyo mamusukuka. 42 Elowei onwe va Faliseu, muyeka tya 10 mupola kolwatalau, no ko alunda, no konombi ononkhwavo,*+ mahi mwati umwe, okuviukisa kwa Huku kamwesukile nako, olwembia lwae kamwesukile nalo! Ovio ovio umwe muna okusuka navio, mahi amwahatombo ovikwavo.+ 43 Onwe va Faliseu ngongo yenyi, mwahanda povipundi vyo komutwe* monondywo mbokufendela, mwahanda okukukunyinwa apa palandesilwa!+ 44 Elowei onwe, onwe mwafwa omaendo anyima-po ahamoneka vali,*+ omunthu uliatelako umwe otyo eheete!”

45 Umwe povanongo Kovitumino apopi, ati: “Mulongesi, ovipuka ovio upopia uli nokutupenya.” 46 Ngwe emuti: “Noonwe elowei, onwe vanongo Kovitumino, mupa ovanthu omitengi vialema, ngwe onwe kamukwate-ko nii okuyama-ko vala nomunwe!+

47 “Elowei onwe, onwe mutungila ovauli omaendo, ngwe veveipaele ovo ho!+ 48 Onwe mwalinga onombangi mbo voho movipuka valingaile, evi valinga-linga mwevipandula, soka vaipaa ovauli,+ onwe pahe muvetungila omaendo. 49 Otyo Huku mounongo wae atila: ‘Ame mandyivetumu ovauli novatumwa, maveveipaa, mavevehukaisa, 50 otyo ohonde yovauli maipulilwa kovanthu vomuhovo uno, nohonde ya ava umwe vaipwaelwa-le ponthyimbi youye, mavekeipulwa.*+ 51 Okupolelela umwe kohonde ya Ambele+ atee kohonde ya Sakaliya, Sakaliya waipaelelwe pokati okuti nomutala wovilikutila nondywo ya Huku.’+ Ndyimutolela umwe, maveipulwa* ovanthu vomuvo uno.

52 “Elowei onwe vanongo Kovitumino, onwe osapi yenoñgonoko vakwenyi mwevepola-yo. Soka onwe kamwanyingilile, ava vahanda okunyingila muvekelela!”+

53 Etyi atunda opo, ovahoneki vovitumino nova Faliseu avemwoongelela otyo vemukunkhuminya vala, avemulingi vali omapulo omanyingi, 54 omapulo okumweenda kohi, na vatale ine una etyi mapopi tyimukwatesa.+