Ovaviuki Mavakahivilika Huku Apeho

“Omuviuki makahinangelwa . . . Ouviuki wae mautualako apeho.” —SALMO 112:6, 9.

 1. (a) Ehambu patyi vakevelela ovaviuki aveho komaiho a Huku? (b) Epulo patyi lialingwa?

OVAVIUKI komaiho a Huku vena ekevelo ewa unene! Ovo mavakakala nehambu liokukelilongesa konthele yovituwa oviwa via Jeova. Mavakatualako okuhivilika Huku nomitima vieyula olupandu tyina vamelilongesa vali konthele yovipuka atunga. Otyiawa tyimue tyakolela pala okukala nekevelelo olio liankhimana, “ouviuki” wapopiua unene mo Salmo 112. Mahi oñgeni Jeova Huku osandu nomuviuki atala ovanthu ovakuankhali ngatyina ovaviuki? Tyotyili namphila tulinga ononkhono mbukulinga etyi tyaviuka, pamue tulinga oviponyo ovinene.—Romanos 3:23; Tiago 3:2.

 2. Omahuviso patyi evali Jeova alinga noluembia?

² Noluembia Jeova wava ekumbululo ewa. Ñgeni? Tete, mokuapola komahuviso omuenyo womona wae keulu eupake meimo liomumphembela atyitua omunthu wehena nkhali. (Lucas 1:30-35) Etyi onondyale mba Jesus mbemuipaa, Jeova emututilisa komahuviso. Huku wapindulapo Jesus nomuenyo wopamphepo.—1 Pedro 3:18.

 3. Omokonda yatyi Huku akalele nehambu liokuavela Omona wae muenyo wo keulu?

³ Jeova wayamba Omona wae Jesus, notyipuka tyimue ankho ehena etyi ankho eheneye pano pohi. Otyipuka otyo, omuenyo wo keulu wahahanyaunwa vali. (Hebreus 7:15-17, 28) Jeova wemuavela nehambu otyipuka otyo, mokonda Jesus wakoleleya nawa etyi ankho alolwa. Moluotyo, Jesus waava otyipuka tyimue otyiwa ku Tate yae. Wakumbulula omatutu a Satanasi, etyi ati ovanthu vafenda vala Huku mokonda yelungavi hamokonda ko yohole.—Provérbios 27:11.

 4. (a) Etyi Jesus akondoka keulu, oityi alinga pala onthue, iya Jeova akumbulula ñgeni? (b) Oñgeni ulitehelela konthele yetyi Jeova na Jesus valinga pala ove?

⁴ Keulu Jesus walinga etyi tyavilapo vali. Oe wamoneka komaiho a Huku mokonda yetu, opo aave esilivilo “liohonde yae muene.” Tate yetu woluembia keulu, nokankhenda wetavela Jesus aave “otyilikutila tyafuapo tyononkhali mbetu.” Moluotyo, nomitima viasukuka tupondola okulingila “Huku yomuenyo ovilinga viasukuka”. Otyo, tyituavela ehunga enene liokutavela onondaka mbotete mbo Salmo 112, mbokuati, “Hivilikei Jah”!—Hebreus 9:12-14, 24; 1 João 2:2.

 5. (a) Oityi tuna okulinga opo tutualeko okukala ovaviuki komaiho a Huku? (b) Oñgeni o Salmu 111 no 112 mba onganekwa?

⁵ Opo tutualeko okukala ovaviuki komaiho a Huku, tuna okutualako okukala nekolelo mohonde Jesus amomesa. Tuesukisa okupandula Jeova ononthiki ambuho, mokonda yoluembia olunene ena nonthue. (João 3:16) Tupu, tuesukisa okutualako okulilongesa Ondaka ya Huku, nokulinga ononkhono mbokuendela muetyi tulilongesamo. O Salmo 112, ina onondonga onongwa pala aveho vahanda okutualako okukala nomutima wasukuka komaiho a Huku. O salmu oyo yelikuata nawa no Salmo 111. Ambuho mbuhimbika no nondaka mbati “Hivilikei Jah!” ine “Haleluya!” Akulandula omitete 22, iya kese mutete uhimbika noletela ike po noletela 22 mbo ambesendaliu yo Hebreu.a

Otyituwa Tyimue Tyeeta Ombembwa

 6. Oñgeni oviwa “omunthu” wonthilo na Huku ena viapopiwa mo Salmo 112?

⁶ “Omunthu wonthilo na Jeova omuna-mbembwa. Una uhole unene ovitumino viae. Ovana vae mavapame kombanda yoohi. Iya ombuto yovaviuki, maikamona ononkhano onongwa.” (Salmo 112:1, 2) Tala okuti omuhoneki wo salmu tete wapopia “omunthu” wike, mahi mo versikulu 2 apopi ovanthu ovanyingi etyi ati “ovaviuki.” Otyo tyilekesa okuti o Salmu 112 ei ipondola okupopia ovanthu ovanyingi. Kononkhono mba Huku o apostolu Paulu waundapesa onondaka mbo Salmo 112:9 mo Vakristau votete. (Tanga 2 Coríntios 9:8, 9.) O salmu ei ilekesa nawa oñgeni ovalanduli va Kristu hono pano pohi vapondola okukala nombembwa!

 7. Omokonda yatyi ovaumbili va Huku vesukisa okukala nonthilo nae? Iya oñgeni ove una okulitehelela konthele yovitumino via Huku?

⁷ Ngetyi tyalekeswa mo Salmo 112:1 Ovakristau votyotyili vena ehambu enene tyina vatualako “nonthilo na Jeova.” Onthilo oyo yokulityilika okulinga etyi tyinumanesa Huku, ivekuatesako okuanya ontheto youye wa Satanasi. ‘Vehole unene’ okulilongesa Ondaka ya Huku nokutavela ovitumino viae. Muovio, muakutikinya otyitumino tyokuivisa onondaka onongwa Mbouhamba wa Huku mouye auho. Velikuatesila okulinga ovalongua momalongo aeho ovanthu tyina valondola onondingavivi okuya kuonthiki ya Huku yekoyeso.—Ezequiel 3:17, 18; Mateus 28:19, 20.

 8. (a) Oñgeni hono ovanthu velipakula ku Huku vekahi nokuyambwa? (b) Vokuna ekevelelo liokukala pano pohi ouwa patyi vakevelela?

⁸ Mokonda yokutavela ovitumino ovio ovaumbili va Huku hono vena 7 yonomiliau. Olie upondola okuanya okuti ovanthu ovo vena “epondolo kombanda yoohi”? (João 10:16; Revelação 7:9, 14) Mavakakala “nononkhano onongua” tyina Huku amafuisapo ehando liae! Aveho, vokuna ekevelo liokukala pano pohi mavakahupiswa “pononkhumbi ononene” avakala “oohi omphe” “muna mamukakala ouviuki.” Vana mavahupu po Armagedon ‘mavakapewa vali ononkhano onongwa’ ononkhuavo. Mavakayakula ovanthu ovanyingi mavakatutiliswa. Olio ekevelo limue lihambukiswa unene! Konthyulilo, vana vehole unene ovitumino via Huku mavakapewa omuenyo wehena onkhali “avakala neyovo lienkhimano liovana va Huku.”—2 Pedro 3:13; Romanos 8:21.

Undapesa Nonondunge Omalumono

9, 10. Oñgeni Ovakristau votyotyili vaundapesa omalumono avo opaspilitu? Oñgeni ouviuki wavo maukatualako tyitai?

⁹ “Mondyuo yae muna ovipuka viakolela nomalumono. Iya ouviuki wae utualako lutai apeho. Oe waliaimina menthiki ngotyimimi pala ovaviuki. Oe omuna-tyieve, nomuna-kankhenda, nomuviuki.” (Salmo 112:3, 4) Kohale ovaumbili vamue va Huku ankho veiwe nawa mokonda yomalumono avo. Tupu vana Huku apanda vakala ovahona namphila vehena omalumono opalutu. Ovanyingi vekahi nokuholovona okukala nomutima weliola komaiho a Huku pamue ovanthu vokuahepa nokuatombwa ngetyi tyali kononthiki mba Jesus. (Lucas 4:18; 7:22; João 7:49) Mahi tyilinge omunthu wamona unene ine okatutu, upondola okukala omuhona mopaspilitu.—Mateus 6:20; 1 Timóteo 6:18, 19; Tanga Tiago 2:5.

¹⁰ Ovakristau ovalembulwa, kumue nomapanga avo kavaholeka omalumono avo opaspilitu palavo muene. Anthi, “valiaimina” menthiki liouye wa Satanasi “ngotyimimi pala ovaviuki.” Valinga ngotyo opo vakuateseko vakuavo okukala nolumono luo paspilitu nokunoñgonoka Huku. Onondyale vehole okuovola okutalamesa ovilinga Viouhamba wa Huku mahi kavetyilile. Anthi, ovinyango viovilinga viouviuki ‘mavitualako apeho tyitai’. Mokutualako okuendela mouviuki ovaumbili va Huku vapondola okukala nonthumbi yokuti mavatualako “apeho tyitai.”

11, 12. Omononkhalelo patyi ovanthu va Huku vaundapesa omalumono avo?

¹¹ Ovanthu va Huku, ohambo yovalembulwa, “notyinyingi otyinene tyovanthu” valekesa okuti vena otyali mokuava ovipuka vena mopalutu. O Salmo 112:9 yati: “Ukahi nokuavununa unene, ukahi nokuavela ovahepi.” Ovakristau votyotyili ovikando ovinyingi vehole okuavela Ovakristau ovakuavo, etyi vena mopalutu, no omunthele yavo tyina vesukisa okuvatelwa. Tupu vaundapesa omalumono avo opo vavatele vakuavo pomivo vioviponga. Ngetyi Jesus alekesa okulinga ngotyo tyieta ehambu.—Tanga Atos 20:35; 2 Coríntios 9:7.

¹² Tupu, soka konombongo ononyingi mbuundapeswa pala okulinga omukanda uno momalaka 172, omanyingi apopiwa novanthu vahepa. Omukanda ou tupu ukahi nokulingwa momalaka ovanthu vahapopi no mo Braile elaka liovamphoki.

Kala Omuna-nkhenda Nomuviuki

13. Olie wava ongeleka ongwa yokuava nonkhenda? Iya oñgeni tupondola okumuhetekela?

¹³ “Omunthu omuwa oyouna una onkhenda nomuundiki.” (Salmo 112:5) Tyipondola ove wamonale okuti ovanthu vehole okukuatesako vakuavo hapeho vena onkhenda. Vamue vaava opo velilekese okuti vamona vali tyipona vakuavo ine pamue velivela. Katyihambukiswa okukuateswako nomunthu ukupenya ine ukunumanesa ine ukutala ngatyina umana ovipuka viae. Mahi, tyitukengelela okukuateswako nomunthu wonkhenda. Jeova ulekesa ongeleka ongwa youna-nkhenda, Wava nehambu. (1 Timóteo 1:11; Tiago 1:5, 17) Jesus Kristu wahetekela nawa Tate yae omuna-nkhenda. (Marcos 1:40-42) Moluotyo, opo Huku etutale ngovaviuki tuna okuava nehambu nouna-nkhenda haunene tyina tukuatesako ovanthu movilinga viokuivisa.

14. Omononkhalelo patyi ‘tuesukisa okulekesa ouviuki muatyiho tulinga’?

¹⁴ “Wendesa ovipuka viae nouviuki.” (Salmo 112:5) Ngetyi tyapopiwa, omupika wekolelo nokualunguka uyunga omalumono Omuhona wae, monkhalelo yelikuata nouviuki wa Jeova. (Tanga Lucas 12:42-44.) Otyo tyitalelwa kehongolelo lio Vihonekwa vaava ko vakulu vomawaneno, pamue vatetulula ovitateka viepuiya mewaneno. Onkhalelo yaviuka omupika atetulula ovipuka, tupu italelwa kehongolelo lio Mbimbiliya aava komawaneno aeho, no monondyuo mbo nomisionaliu, no mono Mbetele. Vesukisa ouviuki ha vakulu vala vomawaneno. Mahi, Ovakristau ovakuavo vesukisa okulekesa ouviuki tyina vakala navakuavo no vakwauye, no pokulinga ovitanda viavo. — Tanga Miquéias 6:8, 11.

Ovaviuki Mavakamona Onokhano Onongwa

15, 16. (a) Oñgeni onondaka onombi mbouye mbukalesa ovaviuki? (b) Ovaumbili va Huku vatokola okutualako okulinga tyi?

¹⁵ “Mokonda nalumue makatengaiswa. Omuviuki makahinangelwa apeho. Kamakala nowoma, ni vala wonondaka onombi. Omutima wae wapama, wayumba onthumbi mu Jeova. Omutima wae wakola, oe kamakala nowoma. Alo atala konondyale mbae.” (Salmo 112:6-8) Tunde kohale kakunekale onondaka onombi ngo hono, ovita, omakongombanda, omauvela omape, nomauvela omakulu atualako, ovanthu velipaa, oluhepo, nomphepo yasila vikahi nokunyona ovanthu noohi. Ovaviuki komaiho a Huku navo pamue mavavasiwa novitateka vio, mahi kavasoyeswa nowoma wovipuka ovio. Mahi, omutima wavo “wapama” no “kwakola” vatala komutue wa ndyila nonthumbi mokonda vetyii okuti ouviuki wa Huku mouye omupe ukahi popepi. Inkha vamonekelwa notyiponga vetyivila okukoleleya mokonda vena onthumbi yokuti Jeova mevekuatesako. Jeova kayeke ovaumbili vae ovaviuki “vatengaiswe” ehevekuatesako—uveavela ononkhono opo vakoleleye.—Filipenses 4:13.

¹⁶ Ovaumbili va Huku ovaviuki tupu vekahi nokukoleleya oundyale nomatutu ekahi nokuyandyanekwa no nondyale mbavo. Mahi, kavekahi nokutyivila okutalameka Ovakristau votyotyili, nalumue mavetyivili. Anthi, ovaumbili va Huku vatualako tyakola no kwapama movilinga Jeova eveavela—okuivisa onondaka onongwa Mbouhamba nokulinga ovalongwa vana vetavela. Oundyale ovaviuki valingilwa mauliyawisa tyina onthyulilo ikahi nokuhikapo. Apa katutu ouye auho mavakatukilwa na Satanasi Eliapu, mokuundapesa outumini walio nga Ngonge ya Mangonge. Konthyulilo matukatala onondyale mbetu tyina mavakahanyaunuako. Matyikakala ongeleka ongwa okutala etyi enyina lia Jeova lisukukiswa!—Ezequiel 38:18, 22, 23.

‘Mavalondekwa Nomunkhima’

17. Oñgeni ovaviuki ‘mavalondekwa nomunkhima’?

¹⁷ Matyikakala otyiwa unene okuhivilika Jeova kumue navakuetu tyihena oundyale wa Satanasi nouye wae! Aveho vatualako nouviuki komaiho a Huku mavekemuhilivika nehambu apeho. Kamavafindwa mokonda Jeova ulaa okuti “ombinga” yovaumbili vae ovaviuki “mailondekwa nomunkhima.” (Salmo 112:9) Ovaumbili ovaviuki va Jeova mavakahambukua okutala tyina onondyale ambuho mbouhamba wa Jeova mbamafindwa.

18. Oñgeni ombituko yonondaka mbo Salmo 112 maifuiswapo?

¹⁸ “Ondingavivi maiketyimona, iya aikanumana. Maikatyeka komayo, asenguluka. Ehando liondingavivi malikanyimako.” (Salmo 112:10) Aveho vatualako okuyala ovanthu va Huku apa katutu ‘mavakanyimuako’ nonkhi yavo noundyale wavo. Ehando liavo liokuhanda okutala onthyulilo yovilinga vietu malinyimi navo mokueenda ‘kuononkhumbi onene’ mbukahi nokuya.—Mateus 24:21.

19. Tupondola okukala nonthumbi yatyi?

¹⁹ Okuti ove mokakala pokati ka vana mavakahupa? Iya inkha unkhia mokonda youvela ine okukulupa tyina onthyulilo youye wa Satanasi iheneye, okuti mokakala pokati ‘kovaviuki’ mavakatutiliswa? (Atos 24:15) Upondola okukumbula okuti enga inkha utualako okukala nekolelo motyilikutila tyeyovo Jesus ava. Nokuhetekela Jeova ngetyi tyilinga vana vekahi polukalo “luomulume” omuviuki wapopiua mo Salmo 112. (Tanga Efésios 5:1, 2.) Jeova ‘kamalimbwa’ ovanthu ovo novilinga viavo viouviuki. Jeova mekevehinangela nokukala noluembia navo apeho omuvo wahapu.—Salmo 112:3, 6, 9.

[Onondaka Poutoi]

Omapulo Okusokolola

• Oepi omahunga amue tuna okuhilivikila okuti “Aleluya”?

• Mononthiki mbo Hono ovilinga patyi vihambukiswa vikahi nokulingwa no Vakristau votyotyili?

• Jeova omuavi woluembia mokonda yatyi?

[Olutalatu pefo 25]

Opo tutualeko okukala ovaviuki ku Huku, tuna okukala nekolelo mohonde ya Jesus amomesa

[Omalutalatu pefo 26]

Oviawa vilingwa nomutima auho vikuatesako ovilinga viokulinga omikanda vio Mbimbiliya novilinga ovikuavo vio Vakristau