“Hivilikei Jah!”​—Omokonda Yatyi?

1-3. (a) Onalupi o Salmo 147 tyafuile yahonekwa? (b) Oityi tupondola okulilongesa mo Salmo 147?

APEHO onthue tuhivilika omunthu tyina amapopi ine alinga otyipuka tuapanda. Jeova Huku watokala okuhivilikwa vali unene? Onthue tumuhilivika mokonda yepondolo liae enene, tupu tumuhivilika tyina tutala ovipuka atunga vihuvisa, tumuhivilika mokonda yohole ena nonthue, etyi alinga Omona wae otyilikutila tyeyovo.

² Tyina tutanga o Salmo 147, tyimoneka nawa okuti omuhoneki wo salmu ankho una ehambu lio kunkhimaneka Jeova. Tupu waavelele ondundo vakuavo opo vankhimaneke kumwe Huku.​—Tanga Salmo 147:1, 7, 12.

³ Katutyii nawa olie wahoneka o Salmo 147. Mahi tyafuile omuhoneki oo waliko pomuvo ova Isilayeli vakondoka ko Jelusalei, etyi Jeova eveyovola koukonde Mombambilonia. (Salmo 147:2) Omuhoneki wo salmu ankho uhivilika Jeova mokonda ovanthu vae ankho vapondola okumufendela vali motyilongo tyavo. Omuhoneki oo ankho una omahunga omanyingi opo ankhimaneke Jeova. Amwe oepi ? Iya omahunga patyi opo upopie okuti “Aleluya!,” ine “Hivilikei Jah!,” ove una?​—Salmo 147:1, okatoi.

 4. Etyi Ohamba Siru yayovola ova Isilayeli, oñgeni ankho velitehelela, iya omokonda yatyi?

⁴ Soka oñgeni ova Isilayeli velitehelelele etyi ankho veli koukonde mo Mbambilonia. Voko Mbambilonia ankho vevelinga omukuele iya avati: “Tuimbilei-po otyiimbo tyike poviimbo vio ko Siau.” Mahi ova Judeu ankho kavahandele okuimba. O Jelusalei, ankho ivekalesa nehambu, yahanyua-po. (Salmo 137:1-3, 6) Omitima viavo ankho vieihama iya ankho vesukisa okupamekwa. Mahi ondaka ya Huku ipopia okuti Jeova wakuatesileko ovanthu vae. Ñgeni? Ohamba yo Pérsia Siru aihanye-po Ombambilonia iya ati: “Jeova wanthuma opo ndyimutungile ondyuo mo Jelusalei.” Siru tupu ati: “Olie puonue wahula kovanthu vae, Jeova Huku yae akale noonwe. Ngotyo, endei indukei.” (2 Crônicas 36:23) Otyo tyapamekele unene ova Isilayeli mo Mbambilonia!

 5. Oityi omuhoneki wo salmu apopia konthele yepondolo Jeova ena lio kutuhakula?

⁵ Jeova kapamekele vala elongo liatyo aliho, mahi tupu wapamekele kese wike. Na hono Jeova utupameka. Omuhoneki wo salmu wahoneka okuti, Huku “ukahi nokuvelula vo kuna omutima wateka-teka nokukuta ovipute via vana vaihamenwa.” (Salmo 147:3) Tuna onthumbi yokuti Jeova usuka nonthue tyina tuavela natyina tuasoya. Jeova wafuapo pala okutupameka, nokuvelula vana vena emone. (Salmo 34:18; Isaías 57:15) Utuavela ounongo, nokutupameka opo tutyivile okufinda kese tyitateka tyitumonekela.​—Tiago 1:5.

 6. Oñgeni tupondola okupola ouwa konondaka mbo Salmo 147:4? (Tala olutalatu pefo pahimbikila onthele.)

⁶ Omuhoneki wo salmu apopi vali otyikuavo, watalele peulu iya ati Jeova “uvalula ononthungululu, iya ambuho umbuihana komanyina.” (Salmo 147:4) Ngwe ankho upondola okumona ononthungululu, mahi ketyivili okumbuvalula. Hono, ovanongo vetyii okuti kuna ononthungululu ononyingi. Tupu mbayapaulwa omikeka-keka ominyingi! Ovanthu kavetyivili okuvalula ononthungululu ambuho, mahi Omutingi utyivila. Moluotyo wii nawa kese nthungululu iya waavela enyina kese imwe. (1 Coríntios 15:41) Huku wii opi kese nthungululu ikahi, nove ukwii. Huku apeho weete apa ukahi, oñgeni ulitehelela netyi wesukisa!

7, 8. (a) Oityi Jeova ei konthele yetu? (b) Popia ongeleka imwe ilekesa okuti Jeova una okankhenda.

⁷ Jeova weete ovitateka ukahi nokulambela iya una epondolo pala okukukuatesako movitateka viove. (Tanga Salmo 147:5.) Upondola hamwe ukahi nokulambela motyitateka osoka okuti otyinene unene iya kumetyivili okutyifinda. Huku wii nawa etyi tuhevili, “uhinangela okuti tuatunda keheke.” (Salmo 103:14) Onthue tuvakuankhali, tulinga oviponyo apeho iya otyo tyipondola okutusoyesa. Tupondola okulitehelela omapita konthele yovipuka tuapopia, nomahando omavi tuna ine hamwe onkhi tuna! Jeova kalingi otyivi natyike, mahi wii nawa oñgeni tyitukalesa.​—Isaías 40:28.

⁸ Okuti waimbuka-le oñgeni okuvoko kwa Jeova kuekukuatesako okufinda ovitateka vimwe? (Isaías 41:10, 13) Otyo tyamonekele nomukokoli-ndyila umwe utiwa o Kyoko. Etyi ailuka mokonda yotyilinga otyikuavo, akala unene tyasoya. Mahi oñgeni Kyoko ankho etyii okuti Jeova wii ovitateka viae? Mewaneno ailukila ankho muna ovakuatate ovanyingi vanoñgonoka oñgeni elitehelela. Kyoko, elitehelela ngatyina Jeova ekahi nokumupopila okuti: “Ame ndyikuhole, ha mokonda vala umukokoli-ndyila, mahi omokonda umona wange iya welipakula kwame. Ame nahanda ukale Ombangi yange una ehambu!” Oñgeni Jeova ekulekesa okuti “enoñgonoko liae litupu apa lielekwa”?

9, 10. Tyina Jeova etukuatesako, oityi tete alinga? Ava ongeleka.

⁹ Onthue atuho tuesukisa ovipuka, ngetyi okulia nomuvalo nondyuo. Tyafuile ove usukalala mokonda yokuhena okulia kutuuka. Mahi Jeova watunga eheke opo liave okulia okunyingi, alo umwe pala “omailona ekwaila.” (Tanga Salmo 147:8, 9.) Inkha Jeova waavela omakwaila okulia, tupu tupondola okukala nonthumbi yokuti metuavela etyi tuesukisa.​—Salmo 37:25.

¹⁰ Tyakolela vali, Jeova utuavela atyiho tuesukisa opo ekolelo lietu litualeko tyapama iya utuavela “ombembwa yae, ipona onondunge nomalusoke aeho.” (Filipenses 4:6, 7) Omukuatate utiwa Mutsuo no mukai wae vaimbuka oñgeni Jeova evekuatesako. Etyi otyinimawe tyaenda mo Japau mo 2011 kuakambele katutu ñgeno vankhia, vahupa vala mokonda valonda kombanda yondyuo yavo. Mahi ovipuka viavo aviho avipeseka. Etyi tyalamba, avatuluka avanyingila mondyuo ikahi kombanda mahi avalala menthiki. Etyi kuatya avaovola tyimwe tyipondola okupameka ekolelo liavo. Otyipuka tyotete ankho vavasa o Anuario yo 2006 yo Nombangi mba Jeova. Etyi Mutsuo eiikula avasi osapi yati: (Ovinimawe Ovinene Viaendako-ale) “Os maiores tsunamis já registrados.” Onthele oyo ankho ipopia otyinimawe tyimwe otyinene tyaendele ko Sumatra mo 2004. Mutsuo nomukai wae avalili unene etyi vatanga etyi tyamonekele novakuatate vavo no nomphange. Avaimbuka okuti Jeova ankho weveavela ekuateso vesukisa. Jeova tupu evekuatesako vali mo nonkhalelo ononkhuavo. Ovakuatate ko Japau, aveveavela okulia novikutu. Mahi tyevepamekele vali unene, ovakuatate ankho vatumwa neongano lia Huku. Mutsuo wati: “Nelitehelela ngatyina Jeova ekahi nokuhongolela kese wike puonthue nokututekula. Tala ekuateso!” Tete Jeova waovola etyi tuesukisa opo tutualeko nekolelo liapama iya konyima etuavela ovipuka ovikuavo tuesukisa.

11. Oityi tuesukisa okulinga opo Huku etukuateseko?

¹¹ Jeova “ukuatesako ovaviuki.” Oe utuhole iya apeho wafuapo pala okutukuatesako. (Salmo 147:6a) Oñgeni tupondola okupola ouwa kekuateso Huku etuavela? Tuesukisa okupameka oupanga wetu nae. Tupu tuesukisa okukala onondalawa. (Sofonias 2:3) Ovaviuki vayumba onthumbi mu Jeova mu kese tyitateka nokukevela etyitetulule. Jeova upanda unene ovanthu ovo.

12, 13. (a) Opo etukuateseko Huku etuavela, oityi tuesukisa okulityilika? (b) Ovalie Jeova ahambukilwa?

¹² Tupu Huku “mahanyeko onondingavivi.” (Salmo 147:6b) Onthue katuhande otyo tyitumonekele! Onthue tuhanda Huku etulekese ohole yae yotyotyili. Tupu nonthue tuna okuyala etyi eyele. (Salmo 97:10) Mongeleka, tuna okuyala oundalelapo. Otyo tyilekesa okuti tuna okulityilika kese tyipuka tyipondola okutuhongiliya okulinga oundalelapo ngetyi okutala ovanthu vemuhoyo. (Salmo 119:37; Mateus 5:28) Otyo katyapepukile, mahi tyesukisa ononkhono opo tukapewe ononkhano onongwa na Jeova.

¹³ Opo tufinde ovitateka ovio katupondola okuyumba onthumbi muonthue muene. Mahi tuna okuyumba onthumbi mu Jeova. Okuti Huku mahambukwa inkha tuyumba onthumbi movipuka ovanthu valinga opo vetukuateseko? Au, Jeova “kahambukilwa epondolo lio nkhambe.” Okuti tupondola okuyumba onthumbi mononkhono mbetu ine mbomunthu omukuavo? Jeova “kahuvu novikalo viapama viomulume.” (Salmo 147:10) Moluotyo, tuesukisa okutualako okulikuambela ku Jeova opo etukuateseko, nokuita opo tuluise eyembelo lietu liokulinga ovivi. Jeova nalumwe maponwa okutehelela omalikuambelo etu, alo umwe ankho tuita ehimbwe. “Jeova uhambukilwa vana vena onthilo nae, na vana vakevelela ohole yae yotyotyili.” (Salmo 147:11) Mokonda Huku omukuatyili iya utuhole tuna onthumbi yokuti matualako okutukuatesako opo tutyivile okuluisa omahando etu omavi.

14. Omuhoneki wo no salmu ankho uyumba onthumbi mutyii?

¹⁴ Jeova utupopila okuti metukuatesako tyina tuna ovitateka. Etyi ova Isilayeli vakondoka ko Jelusalei, omuhoneki wo salmu ankho usoka oñgeni Jeova mevekuatesako. Iya aimbi okuti: “Oe upameka omakumba opo nombundi mbavo iya uyamba ovana vavo vakala-mo. Weetela ombembwa motyilongo tyae.” (Salmo 147:13, 14) Tyotyili, putyina Jeova ankho apameka onombundi mbepunda-umbo, omuhoneki wo no salmu ankho ulitehelela tyapama. Otyo ankho tyimuhambukiswa mokonda ankho utyii okuti Jeova waamena ovanthu vae.

15-17. (a) Oñgeni pamwe tulitehelela konthele yovitateka vietu? (b) Oñgeni Jeova aundapesa Ondaka yae opo itukuateseko? (c) Popia ongeleka ilekesa oñgeni ondaka ya Huku “ihateka” opo itukuateseko.

¹⁵ Ove upondola okusukalala mokonda yovitateka viove, mahi Jeova upondola okukuavela ounongo wokufinda ovitateka ovio. Omuhoneki wo no salmu wapopia okuti Huku “utuma ondaka yae pohi; ondaka yae ikanyauka.” Konyima omuhoneki wo no salmu wapopia konthele yo ngandyi nongandavila iya apulu okuti: “Olie upondola okuliyakulila koutalala oo?” Tupu wapopia okuti Jeova “utuma ondaka yae aivisengulula.” (Salmo 147:15-18) Huku yetu wii ovipuka aviho iya upondola okulinga kese tyipuka, uyunga ongandyi nongandavila, upondola okukala nonthumbi yokuti mekukuatesako okuluisa kese tyitateka.

¹⁶ Hono, Jeova utuhongolela Nondaka yae, Ombimbiliya. Omuhoneki wono salmu wapopia okuti ondaka ya Jeova “ihateka unene” opo itukuateseko. Otyo tyilekesa okuti Huku utuhongolela mondyila yaviuka nomuwo tuesukisa. Soka oñgeni Ombimbiliya itukuatesako, nomikanda “viomupika wekolelo nokualunguka,” no JW Broadcasting, no site jw.org, novakulu vewaneno novakuatate no nomphange. (Mateus 24:45) Ove utyiete okuti Jeova ukahi nokukanyauka opo ekuhongolele?

¹⁷ Tala ongeleka yomphange utiwa Simone wapopia oñgeni Ondaka ya Huku yemukuatesako. Ankho ulitehelela okuti utupu esilivilo iya asoko okuti Jeova kesukile nae. Namphila ankho asoya, mahi watuaileko okulikuambela ku Jeova opo emukuateseko. Tupu watuaileko okulilongesa Ombimbiliya. Wati: “Apeho tyina ndyina otyitateka Jeova umphameka nokunthyongolela.” Ombimbiliya yakuatesako omphange Simene okukala nomalusoke aviuka.

18. Omokonda yatyi ovanthu va Jeova vena elao iya omahunga patyi “Okuhivilika Jah!” ove una?

¹⁸ Omuhoneki wo salmu ankho utyii okuti, Jeova waholovonene elongo lio Isilayeli opo likale ovanthu vae pomalongo aeho kombanda yohi. Ankho olio vala liapewa “ondaka” ya Huku “novitumino viae.” (Tanga Salmo 147:19, 20.) Hono, tuna elao enene liokuihanwa enyina lia Huku. Tupandula unene Huku mokonda tumwii, tuna Ondaka yae opo ituhongolele iya tupondola okukala noupanga nae. Ngo muhoneki wo Salmo 147, ove una omahunga omanyingi “Okuhilivika Jah!” iya avela ondundo vakuenyi opo navo vetyilinge