Pameka Oupanga Wove na Huku Namphila Ukahi Mewaneno Lipopia Elaka Ekuavo

1-3. (a) Oityi ovaumbili aveho va Huku vapaka tete momuenyo? (b) Ovitateka patyi vina ovanthu velilongesa elaka epe, iya omapulo patyi tyikatula? (Tala olutalatu pefo pahimbikila onthele.)

HONO, ovanyingi po nombangi mba Jeova vekahi nokuundapa unene, opo eulo liokuivisa “omalongo aeho nomihoko, nomalaka, novanthu” lifuisuapo. (Revelação 14:6) Okuti nove ukahi nokulilongesa elaka ekuavo? Vamwe onomisionaliu ine vaivisa kovilongo ovikuavo kuesukisa vali ovaivisi. Vakuavo vakuatesako ewaneno lipopia elaka ekuavo motyilongo tyavo.

² Ovaumbili aveho vekolelo va Huku vesukisa okupaka tete momuenyo wavo oupanga wavo na Huku nombunga. (Mateus 5:3) Pamwe tukala novilinga ovinyingi atyipuiya okulinga elilongeso lioulike. Mahi vana vekahi mo mawaneno apopia elaka ekuavo kovilinga viavo kuayawisua.

³ Vana vakuatesako ewaneno lipopia elaka ekuavo vesukisa okulilongesa elaka epe, mahi tupu vesukisa okulinga atyiho opo velilongese ovipuka viaya kohi via Huku. (1 Coríntios 2:10) Oityi mavalingi inkha kavekahi nokunoñgonoka atyiho tyipopiwa mewaneno? Iya omokonda yatyi ovalinepi vakuatesako ewaneno lipopia elaka ekuavo, vena okukala nonthumbi yokuti otyili tyikahi nokuhika komitima vio vana vavo?

 4. Oityi tyipondola okupaka oupanga wetu na Jeova motyitateka? Popia ongeleka.

⁴ Tyina tuhanoñgonoka omalongeso Ombimbiliya melaka ekuavo, otyo tyipondola okupaka motyitateka otyinene oupanga wetu na Jeova. Etyi Neemia akondoka ko Jelusalei, wamona okuti ovana vamwe kavetyivili okupopia elaka lio Hebreu. (Tanga Neemias 13:23, 24.) Mokonda ovana ovo ankho kavapondola okunoñgonoka Ondaka ya Huku, oupanga wavo na Jeova ankho ka wapamene.—Neemias 8:2, 8.

5, 6. Ovalinepi vamwe vakuatesako ewaneno lipopia elaka ekuavo, vaimbuka tyi? Otyitateka patyi vakala natyo?

⁵ Ovohe vamwe Ovakristau vakuatesako ewaneno lipopia elaka ekuavo, vaimbuka okuti ovana vavo vetupu oupanga wapama na Jeova. Mokonda ovana vavo kavanoñgonoka atyiho tyipopiwa momaliongiyo, otyo katyivelundu okulinga omapiluluko. Pedro watunda nombunga yae ko Austrália avakakala ko América do Sul. Wati: “Tyina tupopia ovipuka viopaspilitu, tupopia nomutima auho nomalusoko etu aeho.”^[1] (Tala okatoi konthyulilo yonthele.)​—Lucas 24:​32.

⁶ Tyina tutanga melaka ekuavo, katyitulundu ngatyina tukahi nokutanga melaka lietu muene. Tupu, mokonda katyapepukile okupopia elaka ekuavo, tupondola okuhimbika okusoka okuti efendelo tulingila Jeova hatyipuka tyesukisa unene. Ngotyo, namphila tuna ehando enene liokukuatesako ewaneno lipopia elaka ekuavo, mahi tuesukisa okuamena oupanga wetu na Jeova.​—Mateus 4:4.

 7. Oñgeni ova Mbambilonia vahetekela okukuluminya Daniele okutavela oviso viavo nongeleya yavo?

⁷ Etyi Daniele nomapanga ae vatualwa koukonde ko Mbambilonia, ova Mbambilonia valingile atyiho opo vevekuluminye okutavela oviso viavo nongeleya yavo. Oityi valinga? Vevelongesa “elaka lipopiwa navana valongesiwa unene monosikola” nokuveluka omanyina ova Mbambilonia. (Daniel 1:3-7) Enyina epe lia Daniele ankho litiwa Bel, lihangununa okuti huku yo Mbambilonia. Tyafuile Ohamba Nambukondonosole ankho uhanda Daniele etavele okuti ovikahuku vio Mbambilonia vina vali epondolo tyipona Jeova, Huku ya Daniele.—Daniel 4:8.

 8. Oñgeni Daniel atuaileko noupanga wapama na Jeova?

⁸ Mombambilonia Daniele wapewa ovikulia oviwa vio hamba. Mahi ‘watokola momutima wae’ okutavela ovitumino via Huku. (Daniel 1:8) Mokonda ankho utualako okulilongesa “omikanda via Huku” melaka lio Hebreu, watuaileko okupameka oupanga wae na Jeova namphila ankho ekahi kotyilongo otyikuavo. (Daniel 9:2) Alo umwe etyi palamba omanima 70 tunde apa eya Mombambilonia, nkhele ankho wiihanwa enyina liae lio Hebreu, Daniel.​—Daniel 5:13.

 9. Otyituwa patyi konthele Yondaka ya Huku omuhoneki wo Salmo 119 ankho ena?

⁹ Omuhoneki wo Salmo 119 wakoleleyile movitateka etyi ovanthu vomombunga yohamba vemutyitukilapo. Mahi wapamekelwe Nondaka ya Huku, otyo atyimukuatesako okulikalela kuvakuavo. (Salmo 119:23, 61) Wayeka ondaka ya Huku ihike komalusoke ae.​—Tanga Salmo 119:11, 46.

10, 11. (a) Oityi tuhanda okulinga tyina tulilongesa Ondaka ya Huku? (b) Oñgeni tupondola okuvasa etyi tuhanda okulinga? Popia ongeleka.

¹⁰ Namphila tuundapa ku kaputu nokuna ovilinga ovinyingi mewaneno, atuho tuesukisa okuovola omuvo vokulinga elilongeso lioulike nefendelo liombunga. (Efésios 5:15, 16) Onthue katuhande vala okutanga opo tumane omukanda ine okuovola vala omakumbululo tyina tupongiya omaliongiyo. Mahi tuhanda Ondaka ya Huku ihike komitima vietu nokupameka ekolelo lietu.

¹¹ Opo tutyivile okutyilinga, tuesukisa okupola pokati. Tyina tulilongesa, katuesukisile okusoka vala kuvakuetu mahi tuesukisa okusoka kuonthue muene. (Filipenses 1:9, 10) Ovikando ovinyingi tyina tupongiya etyi matukalongesa movilinga viokuivisa, ine eliongiyo, ine elongomona, katusoko oñgeni tupondola okuendela-mo mahi tusoka vali ku vakuetu. Mongeleka, tyina omunthu ateleka okulia, opo anoñgonoke inkha kuapepa okumakela. Mahi inkha uhanda okukala nekongoko wesukisa okulia tyipona vala okumakela. Tyelifwa notyo, inkha tuhanda okupameka oupanga wetu na Jeova, tuesukisa okutanga apeho Ombimbiliya. Otyo matyitukuatesako okukala noupanga wapama na Huku.

12, 13. Omokonda yatyi vamwe vaimbuka okuti vesukisa okulilongesa Ombimbiliya melaka liavo muene?

¹² Ovanyingi vakuatesako ewaneno lipopia elaka ekuavo, vaimbuka okuti tyina vatanga Ombimbiliya “melaka liavo” tyivekuatesako unene. (Atos 2:8) Alo umwe onomisionaliu vaimbuka okuti etyi velilongesa mewaneno lielaka ekuavo katyituuka opo vapameke oupanga wavo na Jeova.

¹³ Alain, welilongesa elaka lio Persia mokueenda kuomanima etyinana, wapopia okuti: “Tyina ndyipongiya omaliongiyo melaka lio Persia, ndyisuka vali no nondaka. Tyina ndyilinga ngotyo etyi ndyitanga katyihiki komutima wange. Otyo ndyiovolela omuvo wokutanga nokulilongesa omikanda vietu melaka liange muene.”

14. Onthumbi patyi ovohe vena okukala nayo, iya omokonda yatyi?

¹⁴ Ovohe Ovakristau vesukisa okuimbuka okuti otyili tyikahi nokuhika komutima wovana vavo. Tutalei ongeleka ya Serge nomukai wae Muriel, vakuatesako ewaneno lipopia elaka ekuavo momanima etatu. Vehimbika okuimbuka okuti omona wavo una omanima 17, utupu ehambu movilinga viokuivisa. Muriel wati: “Ovilinga viokuivisa melaka ekuavo ankho vimunumanesa, mokonda ankho uhole elaka lietu o Francês omu ankho tuivisa.” Serge wati: “Etyi tuaimbuka okuti omona vetu kekahi nokukula mopamphepo, atutokola okukondoka kewaneno lietu ekulu.”

15. (a) Oityi tyipondola okukuatesako ovohe okutokola ewaneno patyi mavailukila? (b) Onondonga patyi Deuteronômio 6:5-7 yaavela kovohe?

¹⁵ Oityi tyipondola okukuatesako ovohe okutala inkha tyitavela okukondoka kewaneno lipopia elaka ovana vavo vanoñgonoka nawa? Tete, vena okutala inkha mavakala nomuvo wokulongesa ovana vavo okukala nohole na Jeova, tupu otyo vevelongesa elaka epe. Vali, vena okutala inkha ovana vavo vena ehambu liokuenda movilinga viokuivisa, ine komaliongiyo ewaneno lipopia elaka ekuavo. Mo nonkhalelo ombo, ovohe vapondola okutala okuti hahe vali okukondoka kewaneno lipopia elaka ovana vanoñgonoka nawa. Mokueenda kuomuvo, tyina ovana vamakala noupanga wapama na Jeova, ovohe vapondola okutokola okuilukila kewaneno lielaka ekuavo.​—Tanga Deuteronômio 6:5-7.

16, 17. Oityi tyikahi nokukuatesako ovohe vamwe okulongesa ovana vavo konthele ya Jeova?

¹⁶ Ovohe vamwe valongesa ovana vavo konthele ya Jeova melaka liavo muene namphila vakuatesako ewaneno lipopia elaka ekuavo. Charles una ovana vetatu vena eti liomanima 9 alo 13. Ukuatesako otyikundyi tyelaka lio Lingala. Wati: “Onthue tuatokola okulongesa ovana vetu Ombimbiliya nokulinga efendelo liombunga melaka lietu. Mahi tulinga ovinyano vimwe melaka lio Lingala opo velilongese elaka olio namphila tukahi nokunyana.”

¹⁷ Kevin, una ovana vevali vena omanima 5 ne 8. Ulinga ononkhono mbokuvelongesa otyili mokonda kavanoñgonoka atyiho tyipopiwa mewaneno omu vekahi, lipopia elaka ekuavo. Wati: “Ame nomukai wange tulilongesa novana vetu Ombimbiliya melaka lietu, o Francês. Tupu tualinga epongiyo liokuenda like mohanyi liewaneno lio Francês, tupu po nofelia tueenda kovionge vilingilwa melaka lietu.”

18. (a) Oñgeni Romanos 15:1, 2 ipondola okukukuatesako okulinga etokolo lietela ouwa ovana vove? (b) Oityi ovohe vamwe vapopia? (Tala okatoi konthyulilo yonthele.)

¹⁸ Kese ombunga oyo ina okutokola etyi tyaviuka pala ovana vavo, netyi matyivekuatesako okukala noupanga wapama na Jeova. ^[2](Tala okatoi konthyulilo yonthele.) (Gálatas 6:5) Muriel wapopia okuti namphila oe nomulume wae vahanda unene okutualako okukuatesako ewaneno lipopia elaka ekuavo, mahi vatokola okuenda kekuavo lielaka liavo opo vakuateseko ovana vavo okukala nohole na Jeova. (Tanga Romanos 15:1, 2.) Hono, Serge wiimbuka okuti valingile etokolo liaviuka. Wati: “Pakala vala katutu etyi tuakondoka kewaneno lipopia o Francês, omona wetu ekulu mopamphepo ambatisalwa. Pahe omukokoli-ndyila. Tupu ukahi nokusoka okukondoka kewaneno lipopia elaka ekuavo!”

19, 20. Oñgeni matulekesa okuti tuhole Ondaka ya Huku?

¹⁹ Jeova uhole ovanthu aveho. Watuma okuhoneka Ombimbiliya momalaka omanyingi opo “ovanthu vomihoko viatyo aviho” vakale nenoñgonoko liafuapo liotyili. (1 Timóteo 2:4) Jeova utyii okuti oupanga wetu nae maupame vali tyina tutanga Ombimbiliya melaka tunoñgonoka nawa.

²⁰ Onthue tuesukisa okulinga ononkhono opo tutualeko okupameka oupanga wetu na Jeova. Tulinga ngotyo tyina tutanga apeho Ombimbiliya melaka tunoñgonoka vali nawa. Tupu onthue matutyivili okukuatesako ombunga yetu okukala noupanga wapama na Huku atulekesa okuti tyili-tyili tuhole Ondaka ya Huku.​—Salmo 119:11.