Omalikuambelo

7 Okuti Huku Meetehelela Nokuekumbulula?

EPULO olio, lilunda unene omutima nokuetesa olumbwe. Ombimbiliya ilekesa okuti Jeova hono tyotyili utehelela omalikuambelo. Inkha matehelela omalikuambelo etu ine kameetehelela tyitei unene kuonthue.

Jesus wapopile ononkhalamutwe mbonongeleya kononthiki mbae ankho velikuambela nomatutu. Ankho vahanda vala okulilekesa ngatyina ovaviuki. Jesus wati ovalume ovo “venale ondyambi yavo.” Otyo tyilekesa okuti mavatambula vala etyi vahanda unene, okupandwa novanthu, mahi kamavapewa etyi vesukisa, okutehelelwa na Huku. (Mateus 6:5) Tupu, hono ovanyingi velikuambela ngetyi vahanda, ha ngetyi Huku ahanda. Huku kevetehelela mokonda kavetavela ovitumino Viombimbiliya tukahi nokupopia.

Iya omalikuambelo ove? Okuti Huku meetehelela nokuekumbulula? Ekumbululo kalitei kotyivala tyove, nomuhoko, no kouhona wove ine ouhepi. Ombimbiliya itupopila okuti: “Huku utupu okapungulula. Mahi, oe utavela kese munthu una onthilo nae nokulinga etyi tyaviuka, momalongo aeho.” (Atos 10:34, 35) Okuti monondaka ombo noove wakutikinyuamo? Inkha una onthilo na Huku, momupande unene, nokulityilika okumunumanesa. Okulinga etyi tyaviuka, tyihangununa okuovola okulinga etyi Huku ati tyaviuka, hakulandula omahando ove muene ine o avakuenyi. Okuti uhanda umwe Huku atehelele omalikuambelo ove? Ombimbiliya ilekesa oñgeni una okulikuambela.a

Tyotyili, ovanyingi vahanda Huku akumbulule omalikuambelo avo kehuviso. Alo umwe kohale, haapeho Huku ankho akumbulula omalikuambelo kehuviso. Pamwe ankho palamba omanima omanyingi pokati kehuviso limwe nekuavo. Ombimbiliya ilekesa okuti omuvo womahuviso wapua konyima yononthiki mbono apostolu. (1 Coríntios 13:8-10) Okuti otyo tyilekesa okuti hono Huku kakumbulula vali omalikuambelo? Au! Tala omalikuambelo amwe oe akumbulula.

Huku wava ounongo. Jeova oe vala Ondyivindyivi younongo auho wotyotyili. Oe wavela ounongo otyali vana vahanda ehongolelo liae nokutyinda omuenyo welikuata nounongo oo.—Tiago 1:5.

Huku wava ospilitu sandu nouwa auho yeta. Ospilitu sandu ononkhono mba Huku. Kutupu ononkhono mbavilapo ombo. Mbupondola okutuvatela okukoleleya movitateka, nokutuavela ombembwa tyina tuasukalala. Tupu mbutuvatela okukala novituwa ovikwavo oviwa. (Gálatas 5:22, 23) Jesus wapopilile ovalanduli vae okuti Huku wava ospilitu oyo otyali.—Lucas 11:13.

Huku wavela enoñgonoko vana vemuovola tyotyili. (Atos 17:26, 27) Mouye auho, muna ovanthu vekahi nokuovola otyili nononkhono. Vahanda okunoñgonoka Huku, nenyina liae, nehando liae konthele yoohi no yovanthu, no ñgeni vapondola okulinga oupanga nae. (Tiago 4:8) Onombangi mba Jeova apeho vavasa ovanthu ngovo, nokuna ehambu liokuvelekesa etyi Ombimbiliya ipopia konthele oyo.

Okuti omukanda ou weupeua no Nombangi? Ove ukahi nokuovola Huku? Hamwe ongetyi Huku ekahi nokukumbulula omalikuambelo ove.

[Onondaka Poutoi]