4 Konthele Yatyi?

OVANTHU vapopia okuti eli elikuambelo lipitaululwa vali unene pomalikuambelo aeho Ovakristau. Tyilinge otyo otyili ine hatyiliko, elikuambelo Jesus alongesa, pamwe liihanwa okuti Elikuambelo lia Tatekulu ine o Tate Yetu, ovanyingi kavelii nawa. Ovanthu ovanyingi vapitaulula onondaka ombo ovikando ovinyingi kese nthiki. Mahi, Jesus nalumwe ahandele elikuambelo olio lilingwe ngotyo. Oñgeni tuetyinoñgonoka?

Etyi Jesus ehenelinge elikuambelo olio, oe wati: “Tyina ulikuambela, uhawane-wane okupopia ovipuka vike vala apeho.” (Mateus 6:7) Okuti Jesus ankho ukahi nokupililika onondaka mbae muene, okuava onondaka mbuna okupakwa momutwe nokupitaululwa? Au! Oe ankho ukahi nokutulongesa konthele yetyi tuna okuita melikuambelo, novipuka tuna okusuka navio tete tyina tulikuambela. Tutalei vali nawa etyi apopia. Elikuambelo likahi mu Mateus 6:9-13.

Okandyaulula tualinga kononthele mbakolela mbelikuambelo lia Jesus, kakalekesa atyiho tuesukisa okuita melikuambelo. Hinangela okuti 1 João 5:14 itupopila konthele ya Huku okuti: “Kese etyi tuita inkha tyelikuata nehando liae, oe metutehelela.” Ngotyo, uhakale notyiho tyokuti ovitateka viove ovitutu unene katyisukisa okulikuambela ku Huku.—1 Pedro 5:7.

Ngotyo, Jesus ankho uhinangelesa ovalongwa vae okuti omalikuambelo aeho ena okuviukiswa ku Tate yae, Jeova. Mahi okuti ove utyii omokonda yatyi enyina lia Jeova liakolela unene, netyi liesukisila okusukukiswa?

Tunde konthyimbi yovanthu, enyina likola lia Huku, likahi nokusiliswa nomaunkhembi. Ondyale ya Jeova, Satanasi, uhole okupopia okuti Jeova onkhembi, Omutumini welungavi, nokuhatokalele okutumina ovipuka aetako. (Gênesis 3:1-6) Ovanyingi velipaka konthele ya Satanasi, okulongesa okuti Huku omukalavi, nokuhetavela okuti Oe Omupakeko wovipuka aviho. Ovakuavo veyele enyina liae, Jeova, alo umwe velinyima mono Mbimbiliya mbavo, nokutyilika ovanthu okulitumbula.

Ombimbiliya ilekesa okuti Huku makamanako ovivi ovio aviho. (Ezequiel 39:7) Mokulinga ngotyo, oe mekekuavela atyiho wesukisa nokutetulula ovitateka viove aviho. Ñgeni ngotyo? Onondaka mbulandulako mbelikuambelo lia Jesus mbuava ekumbululo.

Hono, pokati kovalongesi vomo nongeleya pena enguanguano enene konthele Youhamba wa Huku. Mahi ngetyi ovateheleli va Jesus vetyinoñgonoka, ovauli va Huku kohale vapopile okuti Mesiya, Omuyovoli waholovonwa na Huku, makatumina Ouhamba maukapilulula ouye. (Isaías 9:6, 7; Daniel 2:44) Ouhamba oo, maukasukukisa enyina lia Huku mokuhololola omatutu a Satanasi, nokuhanyako Satanasi novilinga viae aviho. Ouhamba wa Huku maukamanako ovita, nomauvela, nondyala, alo umwe ononkhia. (Salmo 46:9; 72:12-16; Isaías 25:8; 33:24) Tyina ulikuambela okuita opo Ouhamba wa Huku uye, ukahi nokulikuambela opo omilao ovio aviho vifuisuepo.

Onondaka mba Jesus mbulekesa okuti ehando lia Huku malikalingwa pano pohi, ngetyi lilingwa keulu kuna Huku akala. Ehando lia Huku litualako okulingwa keulu. Keulu, Omona wa Huku waluisa Satanasi novilulu viae, evetahela pano pohi. (Revelação [Apocalipse] 12:9-12) Ngovipuka vivali viotete, tyatatu tyaitwa melikuambelo lia Tatekulu, tyitukuatesako okulinga etyi tyakolela vali—ehando lia Huku, halietuko. Ehando liae apeho lietela ouwa omunene ovipuka aviho aetako. Ngotyo, alo umwe Jesus omunthu ankho uhena nkhali, wapopile na Tate yae okuti: “Tyilingwe ngetyi ove wahanda, hangetyiko ame nahanda.”—Lucas 22:42.

Okulandulisako, Jesus walekesa okuti tupondola okuita etyi tuesukisa. Katyapengele okulikuambela ku Huku konthele yetyi tuesukisa kese nthiki. Okulinga ngotyo, tyotyili tyituhinangelesa okuti Jeova oe “wavela ovanthu aveho omuenyo, nomufuimo, novipuka aviho.” (Atos 17:25) Ombimbiliya ilekesa okuti oe tate wokuna oluembia nehambu liokuavela ovana vae etyi vesukisa. Nga he ondalawa, oe kakumbulula tyina vaita etyi tyiheveetela ouwa.

Okuti ove una umwe ongele na Huku? Wesukisa umwe okuevelwa nae? Ovanyingi hono kavei oityi onkhali, nokuhasukile nayo. Mahi, Ombimbiliya ilongesa okuti onkhali oyo yaetela ovanthu ononkhumbi ononene, nononkhia. Mokonda tutyitilwa monkhali, apeho atuho tulinga ononkhali, iya ekevelelo lietu liomuenyo uhapu litei kokuevelwa na Huku. (Romanos 3:23; 5:12; 6:23) Tyiungumanesa okunoñgonoka okuti Ombimbiliya yati: “Ove Jeova, ove muwa nokuafwapo pala okuevela.”—Salmo 86:5.

Ove utyii okuti wesukisa unene liwa-liwa eameno lia Huku? Ovanyingi kavetavela okuti “ondingavivi” Satanasi oko ekahi umwe. Mahi Jesus walongesa okuti Satanasi oko ekahi, alo umwe wemuihana okuti “omutumini wouye uno.” (João 12:31; 16:11) Satanasi ukahi nokunyona ouye uno atumina, nokuhanda unene okukunyona opo uhakale noupanga omuwa na Tate yove Jeova. (1 Pedro 5:8) Mahi, Jeova una vali epondolo enene tyipona Satanasi, nokuna ehambu liokuamena vana Vemuhole.

Iya konthele yomuvo nomphangu? Okuti navio viakolela?