“Olie Tyilityili Omupika Wekolelo Nokualunguka?”

1, 2. Olie Jesus ekahi nokuundapesa hono pala okutuavela okulia, iya omokonda yatyi tyakolela unene okunoñgonoka olie omupika oo?

OMPHANGE umwe wahonekelele ovakuatate vaundapa mombala Yonombangi mba Jeova ouye auho okuti: “Vakuatate, hityivili okuvalula tuñgapi mualinga omikanda vina ononthele ankho nesukisa, momuvo ankho nesuka umwe nambo.” Okuti noove ulitehelela ngotyo? Ovanyingi puonthue ongotyo tulitehelela. Okuti otyo tyituhuvisa? Au.

² Okulia kuopaspilitu tupewa momuvo wanakua, otyilekeso tyokuti Jesus, Omutwe weuaneno, utualako nomulao wae wokutuavela okulia. Ovalie ekahi nokuundapesa pala okutyilinga? Etyi apopila ovalongwa vae enyingilikilo liokuya kwae, Jesus wapopile okuti maundapesa “omupika wekolelo nokualunguka” opo aavele vomeumbo liae “okulia momuvo wanakua.”a (Tanga Mateus 24:45-47.) Momuvo uno wonthyulilo, Jesus ukahi nokuundapesa omupika wekolelo opo aavele okulia ovalanduli vae votyotyili. Tyakolela unene okunoñgonoka olie omupika wekolelo. Oupanga wetu na Huku utei kokulia tupewa nomupika oo wekolelo.—Mateus 4:4; João 17:3.

 3. Oityi omikanda viomupika ankho vipopia konthele yonthengele-popia yomupika wekolelo?

³ Onthengele-popia ya Jesus konthele yomupika wekolelo ihangununa tyi? Kohale omikanda viomupika ankho vipopia okuti, mo Pendekoste yo 33 P.K., Jesus waavelele omupika wekolelo otyilinga tyokuyunga nawa vomeumbo liae. Omupika, Ovakristau aveho ovalembulwa vekahi pano pohi okupolelela ponthyimbi alo hono. Ondaka vomeumbo liae, ilekesa kese umwe povalembulwa ovo. Mo 1919, Jesus waavela omupika wekolelo otyilinga tyokuyunga nawa “omalumono ae aeho” ovipuka aviho viundapeswa pano pohi pala okuvatela ovilinga viokuivisa Ouhamba. Mahi, etyi tuelilongesa vali nawa, nokusokolola, nokulikuambela, tuamona okuti enoñgonoko lietu konthele yonondaka mba Jesus konthele yomupika wekolelo nokualunguka, liesukisa okuyandyululwa vali nawa. (Provérbios 4:18) Tutalei onthengele-popia oyo, noñgeni tuakutikinyuamo, tyilinge tuna ekevelelo liokuenda keulu ine oliokukala pano pohi.

4-6. Omokonda yatyi tyayandyuluka nawa okuti onthengele-popia ya Jesus yomupika wekolelo yahimbika vala okufuisuapo konyima yo 1914?

⁴ Onoversikulu ononkhuavo mu Mateus okapitulu 24 mbulekesa okuti onthengele-popia yomupika wekolelo nokualunguka kayahimbikile okufuisuapo mo Pendekoste yo 33 P.K., mahi yahimbika okufuisuapo momuvo uno wonthyulilo. Tutalei oñgeni Ovihonekwa vitukuatesako okutyinoñgonoka.

⁵ Onthengele-popia yomupika wekolelo onthele yeulo lia Jesus konthele “yenyingilikilo malilekesa okuti weyale, no yonthyulilo youye.” (Mateus 24:3) Onthele yotete yeulo ikahi mu Mateus 24:4-22, ifuiswapo tuvali, tete, yafuiswapo momanima 33 P.K. alo mo 70 P.K., vali, maifuiswapo mononthiki mbetu monkhalelo imwe yavilapo. Okuti otyo tyilekesa okuti onondaka mba Jesus konthele yomupika wekolelo tupu mambufuiswapo tuvali? Au.

⁶ Okuhimbikila monondaka mbukahi mu Mateus 24:29, Jesus wapopia vali unene ovipuka mavimoneka mononthiki mbetu. (Tanga Mateus 24:30, 42, 44.) Etyi Jesus apopia konthele yovipuka mavikamoneka mokueenda kuononkhumbi ononene, wati, ovanthu “mavakamona Omona womulume ukahi nokuya komakaka okeulu.” Iya pala ovanthu mavakalako mokueenda kuononthiki mbahulililako, oe wevelondola vakale tyalunguka, wati: “Kamutyii onthiki patyi Tatekulu yenyi meya,” iya “Omona womulume meya moola muahasoko.”b Etyi Jesus amana okupopia konthele yovipuka mavimoneka mononthiki mbonthyulilo, ahipulula onthengele-popia yomupika wekolelo. Moluotyo, tyayandyuluka nawa okuti onondaka mba Jesus konthele yomupika wekolelo mbahimbika vala okufuisuapo konyima yetyi ononthiki mbonthyulilo mbahimbika mo 1914. Enoñgonoko olio liaviuka. Mokonda yatyi?

 7. Epulo patyi liakolela lialingwa etyi omuvo wokuteya wahimbika, iya omokonda yatyi?

⁷ Nkhele soka katutu konthele yepulo eli: “Olie tyilityili omupika wekolelo nokualunguka?” Pomuvo Wovakristau votete, ankho petupu ehunga liokulinga epulo ngolio. Ngetyi tuelilongesa monthele yokualamba, ono apostolu ankho vapondola okulinga omahuviso alo umwe okuavela vakuavo otyali otyo, tyilekesa okuti ankho vakuateswako na Huku. (Atos 5:12) Moluotyo, ankho kavesukisile okulipula olie tyilityili Kristu aavela otyilinga tyokuhongolela. Mahi, mo 1914, ovipuka ankho vielikalela unene. Omuvo wokuteya wahimbika menima olio. Omuvo wokuyapula evu kotiliku pahe ankho wehikapo. (Mateus 13:36-43) Etyi omuvo wokuteya wahimbika, ankho kuna Ovakristau ovanyingi vomatutu vapopia okuti ovalanduli va Jesus. Moluotyo, apakatulwa epulo eli liakolela: Oñgeni otiliku, ine Ovakristau ovalembulwa, mavaimbukua? Onthengele-popia ya Jesus yomupika wekolelo yaava ekumbululo. Ovalanduli va Kristu ovalembulwa ankho ovo vana mavapewa okulia kuopaspilitu kukahi nawa.

 8. Omokonda yatyi tyaviukila omupika wekolelo okulinga onthele Yovakristau ovalembulwa?

⁸ Omupika wekolelo nae ulinga onthele Yovakristau ovalembulwa vekahi pano pohi. Vaihanwa okuti “ovanakwa vouhamba,” iya vapewa otyilinga “‘tyokuivisa enkhimano lia una weveihana menthiki opo veye motyitei tyae otyiwa unene.” (1 Pedro 2:9) Tyaviuka ovanthu ovo vokulinga onthele “yovanakwa vouhamba,” valongese otyili ovakuatate vavo.—Malaquias 2:7; Revelação 12:17.

 9. Okuti Ovakristau aveho ovalembulwa valinga onthele yomupika wekolelo? Hangununa.

⁹ Okuti ovalembulwa aveho vekahi pano pohi valinga onthele yomupika wekolelo? Au. Tyilityili haveho ovalembulwa vena otyilinga tyokuava okulia kuopaspilitu pala ovakuatate vavo mouye auho. Vamwe povakuatate ovalembulwa ovakulu vewaneno ine ovakuatesiko vovakulu vewaneno potyilongo tyavo. Valongesa umbo na umbo, no momawaneno avo, iya vetavela noukuatyili ehongolelo litunda kombala Yonombangi mba Jeova ouye auho. Mahi, vetupu otyilinga tyokuavela okulia kuopaspilitu ovakuatate vavo ouye auho. Tupu, povalembulwa ovo, vamwe onomphange vokueliola omutima, vahapondola okukala notyilinga tyokulongesa mewaneno.—1 Coríntios 11:3; 14:34.

10. Olie omupika wekolelo nokualunguka?

¹⁰ Naina, olie omupika wekolelo nokualunguka? Mokutualako nongeleka ya Jesus yokuundapesa ovanthu vehehi pala okuavela okulia ovanthu ovanyingi, omupika, otyikundyi otyitutu tyovakuatate ovalembulwa valinga, nokuava okulia kuopaspilitu mokueenda kuomuvo wokuya kwa Kristu. Mokueenda kuononthiki mbonthyulilo, ovakuatate ovalembulwa valinga onthele yomupika wekolelo vekahi nokuundapa mombala Yonombangi mba Jeova ouye auho. Momanima ano, omupika oo Ononkhalamutwe mbo Nombangi mba Jeova. Mahi, tala okuti monthengele-popia yae, Jesus wapopile okuti makukala “omupika” wike vala. Omatokolo Ononkhalamutwe mbo Nombangi mba Jeova veelingila kumwe.

11, 12. (a) Ovilinga patyi vivali omupika wekolelo nokualunguka apewa? (b) Onalupi Jesus aavela omupika wekolelo otyilinga tyokuyunga nawa vomeumbo liae, iya ovalie aholovonene?

¹¹ Tala okuti monthengele-popia ya Jesus, omupika wekolelo nokualunguka, wapeua ovilinga vivali vielikalela. Tyotete, okuyunga nawa vomeumbo liae, tyavali okuyunga nawa omalumono aeho omuhona. Mokonda onthengele-popia ifuiswapo vala momuvo uno wonthyulilo, ovilinga ovio aviho viahimbika konyima yetyi Jesus akala Ohamba mo 1914.

¹² Onalupi Jesus aavela omupika wekolelo otyilinga tyokuyunga nawa vomeumbo liae? Opo tukumbulule, tuesukisa okukondoka mo 1914 etyi omuvo wokuteya wahimbika. Ngetyi tuelilongesa konthyimbi, pomuvo opo, ovanthu ovanyingi ankho veliti Ovakristau. Ovalie povanthu ovo Jesus ankho maholovona eveavela otyilinga tyokukala omupika wekolelo? Epulo olio liakumbululwa etyi Jesus na Tate yae veile okutala nawa ondyuo ya Huku, okuhimbikila mo 1914 alo konthyimbi yo 1919.c (Malaquias 3:1) Vahambukilwe unene novanthu vamwe vehehi, Ovalilongesi Vombimbiliya vekolelo, ankho valekesa okuti tyilityili vehole Jeova, Nondaka yae. Tyotyili, ankho vesukisa okusukulwa, moluotyo avetavela nomutima weliola okutalwa nawa na Jeova, avaviukiswa. (Malaquias 3:2-4) Ovalilongesi ovo Vombimbiliya vekolelo ankho Ovakristau votyotyili velifwa notiliku. Mo 1919, Jesus waholovonene ovakuatate ovalembulwa vafuapo opo vakale omupika wekolelo nokualunguka iya eveavela otyilinga tyokuyunga nawa vomeumbo liae.

13. Ovalie vakutikinyua movomeumbo, iya omokonda yatyi?

¹³ Ngotyo, vomeumbo ovalie? Ovo vana vapewa okulia. Konthyimbi yononthiki mbahulililako, vomeumbo ankho ovalembulwa aveho. Konyima, mo vomeumbo pahe mueya okukutikinya otyinyingi tyovanthu vonongi ononkhuavo. “Motyunda tyike vala” tya Kristu hono, ovanyingimo vali onongi ononkhuavo. (João 10:16) Aveho, vapola ouwa kokulia kuopaspilitu kuawa nomupika wekolelo momuvo wanakua. Okuti Ononkhalamutwe mbo Nombangi mba Jeova hono valinga onthele yomupika wekolelo nokualunguka navo ovomeumbo? Ovakuatate ovo navo vesukisa okulia kuopaspilitu. Moluotyo, nokueliola omutima vaimbuka okuti kese umwe puvo owomeumbo, vekahi vala ngo Vakristau ovakuavo votyotyili.

14. (a) Omupika wekolelo wapeua otyilinga patyi, iya otyo tyakutikinya tyi? (b) Elondolo patyi Jesus aavelele omupika wekolelo nokualunguka? (Tala okakasa “Inkha Omupika Una Ondingavivi . . . ”)

¹⁴ Jesus waavela omupika wekolelo nokualunguka otyilinga tyimwe otyinene. Kohale, omupika wokuayumbua onthumbi, ine omuumbili, ankho uyunga nawa ovipuka aviho viomuhona wae. (Lucas 12:42) Ngotyo omupika wekolelo nokualunguka, una otyilinga tyokuyunga nawa ovipuka aviho via Kristu vikahi pano pohi. Otyo tyakutikinya okuyunga nawa omalumono, nokuonganeka ovilinga viokuivisa, novionge, nokulinga omikanda pala okuviundapesa movilinga viokuivisa, no momaliongiyo, no melilongeso lietu. Vomeumbo vetei kokulia kuopaspilitu kuawa nomupika.

15, 16. Onalupi Jesus maavela omupika otyilinga tyokuyunga nawa omalumono ae aeho?

¹⁵ Onalupi Jesus aavela omupika otyilinga tyavali tyokuyunga nawa “omalumono ae aeho”? Jesus wati: “Omupika makala nehambu, inkha omuhona wae tyina ameya, umuvasa ukahi nokulinga ngotyo. Tyotyili ame ndyimupopila okuti: Oe memupe otyilinga tyokuyunga omalumono ae aeho.” (Mateus 24:46, 47) Tala okuti Jesus waavela omupika otyilinga tyavali tyina ameya iya emuvasi ukahi “nokulinga ngotyo,” okuaava okulia kuopaspilitu nekolelo. Ngotyo, ankho pena okulamba omuvo umwe opo aave otyilinga tyavali. Opo tunoñgonoke oñgeni iya onalupi Jesus aavela omupika omalumono ae aeho, tuesukisa okunoñgonoka ovipuka vivali: onalupi eya, iya omalumono ae akutikinya tyi.

¹⁶ Onalupi Jesus eya? Ekumbululo livasiwa mo noversikulu mbotete mba Mateus okapitulu 24. Hinangela okuti mo noversikulu ombo “okuya” kwa Jesus, tyilekesa omuvo meya okuhanyako onondingavivi konthyulilo youye.d (Mateus 24:30, 42, 44) Moluotyo, “okuya” kwa Jesus kuapopiwa monthengele-popia yomupika wekolelo, kuhimbika mokueenda kuononkhumbi ononene.

17. Omalumono a Jesus akutikinya tyi?

¹⁷ “Omalumono aeho [a Jesus]” akutikinya tyi? Omalumono a Jesus kaekahi vala pano pohi. Tupu muakutikinya ovipuka vio keulu. Jesus wati: “Outumini auho keulu no pohi neupewa.” (Mateus 28:18; Efésios 1:20-23) Omalumono ae pahe akutikinya Ouhamba wa Mesiya, apewa okuhimbikila mo 1914 omu makatumina kumwe novalanduli vae ovalembulwa.—Revelação 11:15.

18. Omokonda yatyi Jesus makahambukilwa okuavela omupika wekolelo otyilinga tyokuyunga nawa omalumono ae aeho?

¹⁸ Ngotyo, oityi tuanoñgonoka? Tyina Jesus ameya okuhanyako onondingavivi mokueenda kuononkhumbi ononene, mavasi omupika wekolelo ukahi nokuavela okulia kuopaspilitu vomeumbo momuvo wanakua. Iya Jesus makakala nehambu liokumuavela otyilinga tyavali, tyokuyunga nawa omalumono ae aeho. Vokulinga onthele yomupika wekolelo, mavakalinga vala otyilinga otyo tyina vamapewa ondyambi yavo yokuenda keulu, avakatumina kumwe na Kristu.

19. Okuti omupika wekolelo makapewa ondyambi onene vali keulu tyipona ovalembulwa ovakuavo? Hangununa.

¹⁹ Okuti omupika wekolelo makapewa ondyambi onene vali keulu tyipona ovalembulwa ovakuavo? Au. Ondyambi yalawa ovanthu ovo vehehi, tupu maikapewa vakuavo. Mongeleka, tala etyi Jesus apopilile ono apostolu mbae 11 vekolelo, motyinthiki tyahulililako opo aipawe. (Tanga Lucas 22:28-30.) Jesus walaele ovalume ovo vehehi okuti mavakapewa ondyambi ongwa mokonda yekolelo liavo. Mavakatumina kumwe nae keulu. Mahi, etyi palamba omanima amwe, Jesus walekesile okuti aveho vo 144.000 mavakakala onohamba kumwe nae keulu. (Revelação 1:1; 3:21) Tupu, ngetyi tyipopia Mateus 24:47, Jesus walaa okuti ovanthu ovo vehehi, ovakuatate ovalembulwa valinga onthele yomupika wekolelo, mavakapewa otyilinga tyokuyunga nawa omalumono ae aeho. Tyotyili, aveho vo 144.000, mavakatumina keulu.—Revelação 20:4, 6.

20. Omokonda yatyi Jesus aholovonena omupika wekolelo, iya oityi tuhanda okulinga apeho?

²⁰ Ngetyi kohale Jesus aundapesile ovanthu vehehi pala okuavela okulia ovanthu ovanyingi, hono ukahi nokuundapesa omupika wekolelo nokualunguka, pala okuavela okulia ovanthu ovanyingi. Jesus waholovona omupika oo wekolelo opo akale nonthumbi yokuti ovalanduli vae votyotyili, tyilinge ovalembulwa ine onongi ononkhuavo, mavapewa okulia kuopaspilitu kutuuka mokueenda kuononthiki mbahulililako. Moluotyo, tulekesei apeho okuti tuapandula, mokukuatesako noukuatyili ovakuatate ovalembulwa valinga onthele yomupika wekolelo nokualunguka.—Hebreus 13:7, 17.