Sesusi Utalameka Omphepo Melunga

Sesusi ankho waponwa unene. Etyi kuanthikovela, apopila ovalongwa vae, ati: “Tuyaukei elunga tuende nthele ina,” okutunda ko Kafalanau, okuenda konthele onkhuavo. — Maluku 4:35.

Koutundilo Welunga lyo Ngalileya ankho otyilongo tyova Gelasenu. Ankho kuna omapunda-umbo aihanwa okuti o Dekapoli. Momapunda-umbo o Dekapoli ankho muvasiwa unene oviso viova Geleku, namphila ankho mukala ova Sundeu ovanyingi.

Sesusi katundile ko Kafalanau tyihamuenwe novanthu. Mokonda ankho tupu kuna onowato ononkhuavo mbukahi nokuyauka elunga. (Maluku 4:36) Elunga lyo Ngalileya ankho likahi ngetala, lina onokilometulu 21 moulale, mounthanda ankho lina 12. Moluotyo, ankho hakokule-ko.

Namphila Sesusi ehena onkhali, mahi mokonda ankho walinga ovipuka ovinyingi, waponwa. Ngotyo, etyi ankho vekahi nokuenda, Sesusi akalangala-po mowato konyima, anthiamina kokavai kamwe, alala.

Ovanyingi pono apositolu ankho vetyivila okutaha nawa owato, mahi monthiki oyo avehetyivili. Ankho kuna onomphunda ononyingi iya ovikando ovinyingi, omaande Elunga lyo Ngalileya ankho atokota. Pamwe, tyina omphepo ankho itunda konomphunda ilivasa nomaande oo atokota, liwa-liwa ikatula omphepo imwe onene melunga ipondola okuteya owato. Nonthiki oyo, akukatuka omphepo imwe onene. Liwa-liwa, omanyonda ine omakufi-kufi ahimbika okuveta mowato. Moluotyo, “omaande aahimbika okunyingila mowato, iya avakala motyiponga.” (Luka 8:23) Mahi, Sesusi nkhele ankho ulele!

Ovatahi avalingi ononkhono opo vatahe owato, mokonda ankho vehole-ale okutyilinga tyina vatumbukilwa nomphepo imwe onene. Mahi onthiki oyo avehetyivili. Mokonda ankho vatila owoma, avapahula-po Sesusi, avati: “Tatekulu, tuyovole matunkhi!” (Mateusi 8:25) Ovalongwa ankho pahe vatila owoma wokuti mavankhila momaande!

Etyi Sesusi apinduka-po, apulu ono apositolu mbae okuti: “Omokonda yatyi muatilila owoma, vekolelo lihehi?” (Mateusi 8:26) Konyima, Sesusi apopila omphepo nelunga okuti: “Uti filuu! Tula!” (Maluku 4:39) Omphepo aitalama iya elunga alitulu. (Maluku na Luka vapopile ehipululo olio lihuvisa, tete opo valekese okuti Sesusi watalameka omphepo kehuviso, konyima avapopi okuti ovalongwa ankho vetupu ekolelo.)

Soka oñgeni otyo tyakalesile ovalongwa! Vamona okuti omphepo imwe onene yatalama, elunga alitulu. Avakala vali nowoma mokonda yotyipuka vehenemone. Avahimbika okulipula okuti: “Ou omunthu patyi-ale? Alo umwe omphepo nelunga vimutavela.” Avaende umwe nawa konthele onkhuavo yelunga. (Maluku 4:41 – 5:1) Tyafuile, vonowato ononkhuavo ankho mbuli melunga, vetyivilile okukondoka no koutakelo welunga.

Tyipameka unene okunoñgonoka okuti Omona wa Huku una epondolo liokutumina omaande nomphepo! Tyina amahimbika okutumina Mouhamba wae, ovanthu aveho mavekelitehelela okuti vapama mokonda kamavakakala vali nowoma wovitateka vietwa nomphepo ine nomaande!